Month: October 2018

Монгол Канад улсын хамтын ажиллагааны хүрээнд Улсын нэгдүгээр төв эмнэлгийн “Нүд судлалын тасагт” мэс заслын багаж төхөөрөмжийг хандивлалаа. Энэхүү төхөөрөмж нь Канадын Лаурэл Ретина сангаас 1,228,840,000 төгрөгийн дэмжлэгтэй бүрджээ.

Уг арга хэмжээнд Эрүүл мэндийн сайд Д. Сарангэрэл, УНТЭ-ийн Эмнэлзүй эрхэлсэн захирал Д.Цэцгээ, Канад улсын Элчин сайд David Sproule, профессор Hugh M.Parsons болон нүд судлалын тасгийн эрхлэгч П.Бүрэнжаргал нарын төлөөлөгчид оролцлоо.Тэд нүдний торлог шилэнцрийн мэс засал, цээжний хөндийн мэс засал, чих хамар хоолой гэх мэт салбарыг хурдацтай хөгжүүлэх зорилготой. Энэ чиглэлээр дагнасан эмч сурган, хөдөө орон нутгийн иргэдэд үнэ төлбөргүй үзлэг оношлогоо мэс заслыг хийж, тоног төхөөрөмжөөр хангах зэрэг үйл ажиллагааг хэрэгжүүлнэ гэв.

Эрүүл мэндийн сайд Д.Сарангэрэл “Өнөөдөр бидний хувьд түүхэн үйл явдал болж улсдаа эмчлэгддэггүй нэг өвчнийг буурууллаа. Канад улсад төвтэй Лаурэл Ретина сан үүнийг бидэнд бүрдүүлж өгч байна. Мөн энэхүү төхөөрөмж дээр ажиллах эмч нарыг хоёр жилийн хугацаатай бэлтгэсэн” гэдгээ хэлэв

Мөн төслийн хүрээнд 2019 онд нүдний компьютер томографи, нүдний торлогийн судасны ангиографи болон торлогийн лазерын машиныг гаалийн татварыг чөлөөлүүлэн тус эмнэлэгт суурилуулахаар бэлтгэл ажил хийгдэж байна. Эдгээр багаж төхөөрөмж суурилагдсанаар Улсын нэгдүгээр төв эмнэлэгт торлог шилэнцрийн өвчний оношлогоо эмчилгээг цогцоор шийдэж чадах юм байна.

Э.АНУЖИН

Нийслэлийн Баянзүрх дүүргийн 19 дүгээр хороо, Цайз захаас зүүн Алтан-Өлгий рүү өгсдөг авто замын засвар, шинэчлэлтийн ажил дуусч, өнөөдөр бүрэн ашиглалтад хүлээлгэн өглөө

Энэ хэсэгт анх 2003 онд зам тавьсан бөгөөд засвар шинэчлэл хийгдээгүй 15 жилийн нүүр үзээд байжээ.

Нээлтийн ажиллагаанд УИХ, ЗГ-ын гишүүн, ХХААХҮ-ийн сайд Б.Батзориг, НИТХ-ын төлөөлөгч Б.Сүхбаатар, нийслэлийн Авто замын хөгжлийн газрын дарга Ж.Тогтохбаяр болон холбогдох хүмүүс оролцов.

“Энэ хэсгийн иргэдийн хамгийн ихээр хүсэн хүлээж байсан замыг засч, шинэчлээд өнөөдөр ашиглалтад хүлээлгэн өгч байна. ХХААХҮ-ийн сайд Б.Батзориг санхүүжилтийг нь хөөцөлдөж нааштайгаар шийдүүлж чадсан. Зарим хэсгүүдэд хөрсний ус маш ихээр гарч ирдэг, намагтай байсан. Үүнийг шийдэх хөрөнгийг НИТХ-ын төлөөлөгч Б.Сүхбаатар, Н.Баярмөнх нар гаргаж, дэмжин ажилласан” хэмээн нийслэлийн Авто замын хөгжлийн газрын дарга Ж.Тогтохбаяр ярилаа.

Эх сурвалж: Нийслэлийн ЗДТГ-ын Хэвлэл мэдээлэл, олон нийттэй харилцах хэлтэс

Эцэг эх, асран хамгаалагч, багш сурган хүмүүжүүлэгчдийн оролцоотойгоор хүүхдийг зам тээврийн осол, гэмтлээс сэргийлэх, энэ төрлийн зам тээврийн ослыг тэглэх зорилгоор 11 дүгээр сараас “Kinder police” буюу цэцэрлэгийн эргүүл ажиллаж эхлэх гэж байна.

Уг аяныг Тээврийн цагдаагийн алба, Хүүхэд зорчиж байна ТББ-аас санаачлан Нийслэлийн боловсролын газар, Үндэсний үйлдвэрлэгч Монос Косметик ХХК, Авто замын хөдөлгөөний аюулгүй байдлын ассоциаци хамтран зохион байгуулах бөгөөд Нийслэлийн төрийн өмчит 227 цэцэрлэгийн 10,000 гаруй эцэг эх, асран хамгаалагч буюу “Kinder police”-ууд оролцох юм.

Түүнчлэн эргүүлээр ажиллах эцэг, эхчүүдийг урьдчилан видео сургалтанд хамруулж, цацруулагчтай хантааз, дохиур мод, шүгэл, сургалтын гарын авлага зэргээр хангана.

Аян хэрэгжиж эхлэхтэй холбоотойгоор өнөөдөр тус албанаас Авто замын хөдөлгөөний аюулгүй байдлын ассоциацитай хамтран видео сургалтыг бэлтгэлээ.

Сургалт нь хүүхдийн авто машины суудлыг зөв байршуулах, Хүүхдийн авто машины суудалд хүүхдийг хэрхэн суулгаж сургах зөвлөгөө, Хүүхдийн авто машины суудал нь зам тээврийн осол гарах үед хүүхдийг хэрхэн хамгаалдаг талаар мэдлэг олгох, Blind spot буюу үл үзэгдэх цэг гэж юу вэ зэрэг агуулгуудыг багтаасан байх юм.

Зохион байгуулагч байгууллагуудаас эцэг эх, асран хамгаалагч нарыг энэхүү аянд идэвхи, санаачлагатай оролцож, хамтдаа “ХҮҮХЭД ӨРТӨЖ БУЙ ЗАМ ТЭЭВРИЙН ОСЛЫГ ТЭГЛЭХ”-ийг уриалж байна.

Нийслэлийн Газрын албанаас Баянгол дүүрэгт 1 явган хүний зам, 3 авто замын бүтээн байгуулалтын ажлын газар чөлөөлөлтийг хийлээ. Дээрх 4 авто замын нөлөөлөлд нийт 34 нэгж талбарын 1927 м2 газар өртөн 1.9 км явган хүний болон авто замын ажил хийгдэж, бүрэн ашиглалтад орлоо.

Шинээр авто зам тавих ажилд идэвх санаачлагатай оролцож, олон нийтийн эрх ашгийн төлөө газраа чөлөөлсөн 34 иргэндээ нийслэлийн иргэдийн өмнөөс талархал илэрхийлье.

Тухайлбал,

ØБаянгол дүүргийн 10, 22 дугаар хороо, Хасбаатарын гудамжны уулзвараас 22-р хорооны байр хүртэлх 1 км явган хүний зам

ØБаянгол дүүрэг 23 дугаар хороо, Хорооны цогцолбор байрны баруун талын замын холбогдоогүй хэсгийн 0.3 км авто зам

ØБаянгол дүүрэг 2 дугаар хороо, Цагдаагийн 1-р хэлтсээс 26-р байрны зүүн тал, Төмөр замын урд талбай, Энхтайвны өргөн чөлөөний 0.17 км авто зам

ØБаянгол дүүрэг 17 дугаар хороо, Эрүүл мэндийн 7 дугаар төв 70/2 дугаар байрны шинээр тавигдсан 0.466 км авто зам

Цоохор ирвэс бүхий дэлхийн 12 улс, донор байгууллагуудын төлөөлөгчид оролцон Цоохор ирвэс хамгаалах Бишкекийн тунхаглалыг 2013 оны 10 дугаар сарын 22, 23-ны өдрүүдэд хэлэлцэн баталж жил бүрийн 10 дугаар сарын 23-ны өдрийг “Дэлхийн цоохор ирвэс хамгаалах өдөр” болгон тэмдэглэж байхаар шийдвэрлэсэн байдаг.

Дэлхийд нэн ховор цоохор ирвэсийн экологийн ач холбогдлыг олон нийтэд таниулах, хайрлан хамгаалах үйл хэргийг уриалах зорилгоор нийслэлийн ерөнхий боловсролын сургуулийн эко клубүүдийн дунд “Бид хуулиар хамгаалагдсан” уриан дор “Дэлхийн цоохор ирвэс хамгаалах өдөр”-ийг тэмдэглэн өнгөрүүлэх гэж байна.

Өдөрлөг арга хэмжээ нь 2018 оны 10 дугаар сарын 20-ны бямба гаригт 10:00 цагаас Үндэсний цэцэрлэгт хүрээлэнд эхлэх юм. Өдөрлөгийн үеэр хөдөлгөөнт дасгал, урлагийн үзүүлбэр, богино зайн алхалт, өртөөгөөр аялах, “АХА” тэмцээнд оролцож мэдлэгээ шалгах зэрэг сонирхолтой олон арга хэмжээг зохион байгуулах юм. Идэвх санаачилгатай оролцож, цоохор ирвэс, түүний экологийн ач холбогдлыг таниулах, хайрлан хамгаалахыг уриалахад өндөр хувь нэмэр оруулсан эхний гурван эко клубийг шалгаруулж, урамшуулах юм.

Уг арга хэмжээг Нийслэлийн Байгаль орчны газраас санаачилж, Дэлхийн байгаль хамгаалах сан (WWF)-гийн Монгол дахь хөтөлбөрийн газар, Байгаль орчин, аялал жуулчлалын яамны харьяа “Цэнгэг усны нөөц, байгаль хамгаалах төв” УТҮГ, Үндэсний цэцэрлэгт хүрээлэн ОНӨҮГ зэрэг албан байгууллагуудтай хамтран зохион байгуулж байна гэж нийслэлийн Байгаль орчны газраас мэдээллээ.

Тус арга хэмжээний удирдамж, хөтөлбөрийг ЭНД дарж үзнэ үү.

Цоохор ирвэсийн тухай товчхон мэдээлэл:

1. Монгол улс 800-1000 цоохор ирвэстэй, үүний 500-700 нь Алтай-Соёны бүс нутагт амьдардаг.
2. Дэлхийн нийт цоохор ирвэсийн 20 хувь нь Монголд байдаг.
3. Цоохор ирвэс “Улаан ном”-д орсон дархан цаазтай амьтан, агнах хориотой.
4. Цоохор ирвэс хад асгатай өндөр ууланд амьдардаг.
5. Нутгийн иргэд цоохор ирвэсийг “Өндөр уулын эзэн” гэж авгайлдаг.
6. Биеийн урт 103-130 см, жин 23-41 кг.
7. Цоохор ирвэс нь 14 метр хүртэл хол үсрэх чадвартай.
8. Цоохор ирвэс 10-13 насалдаг.
9. Эрийг нь гэнд, эмийг гинс, нялх төлийг нь гүем гэж нэрлэдэг.
10.Гүем 2 нас хүртлээ эхийн хамт амьдардаг.
11.Аргаль, янгир, тарвага, туулай, мэрэгч амьтдаар хооллодог.
12.Ихэвчлэн 2-3 гүем төрүүлдэг.
13.Цоохор ирвэс хүн рүү дайрдаггүй.
14.Цоохор ирвэс өндөр уулын экосистемийн эрүүл байдлыг хадгалагч гол амьтан юм.

Жил бүр уламжлал болгон зохиогддог “Монгол экспорт экспо-2018” нэгдсэн арга хэмжээ өнөөдөр эхэллээ. Ноос, ноолуур, арьс шир болон бусад экспортын бүтээгдэхүүний чанар, стандартыг сайжруулах, экспортыг нэмэгдүүлэх, үйлдвэрлэгчдийн борлуулалтыг дэмжих, хэрэглэгчдийг нэг дороос худалдан авалт хийх боломж олгодог энэхүү арга хэмжээг ХХААХҮЯ-наас Монголын ноос ноолуурын холбоо, Монголын арьс ширний үйлдвэрлэлийн холбоо, Мишээл Экспо төв хамтран зохион байгуулж байна.

“Монгол экспорт экспо-2018” нэгдсэн арга хэмжээ 2018 оны 10 сарын 17-21 өдрүүдэд үргэлжлэх юм.

Энэ үеэр ХХААХҮЯ–ны хөнгөн үйлдвэрийн бодлогын хэрэгжилтийг зохицуулах газрын дарга Б.Батхүүгээс зарим зүйлийг тодрууллаа.

–Монголчууд гадагшаа ямар бүтээгдэхүүн экспортлож байна вэ?

Монголын экспортын 10 орчим хувь уул уурхайгаас бусад салбараас экспортлогдож байна. Энэ дотроо дийлэнх нь ноос ноолуур, арьс шир. Энэ жилийн үзэсгэлэнд 120 гаруй байгууллага оролцож байна. “Ноолуур” хөтөлбөрийг өнгөрсөн хоёр сард батлуулсан. Энэ бол манай үндсэн стратегийн бүтээгдэхүүн. Бид ноолуураар дэлхийд хоёрт ордог нийлүүлэгч улс. Гол тоглогч нь гэсэн үг. Ноолуур хөтөлбөрийг батлуулснаар эдийн засгийн эргэлдэх хөрөнгө нэмэгдэнэ. Манай ноолуурын салбарт жилд 780 гаруй тэр бум төгрөг эргэлддэг. Энэ жилийн хувьд дотоодын хэрэгцээндээ хэрэглэх ноолуураа бид хангалттай авчихсан.

–Махны экспорт энэ жил ямархуу байна вэ?

Мах махан бүтээгдэхүүний борлуулалт өмнөх жилүүдээс нэмэгдэж байгаа. Энэ жил арьс шир, ноос ноолууран бүтээгдэхүүнээс гадна мах махан бүтээгдэхүүн орж ирж байна. “Монгол экспорт экспо 2018”-аар бид зөвхөн үзэсгэлэн худалдаа хийгээд зогсохгүй экспортлоход тулгамдаж байгаа асуудал, хооронд нь хэрхэн уялдуулах, экспортыг нэмэгдүүлэх талаар хэлэлцүүлэг семинар зохион байгуулахаар төлөвлөсөн.

–Нийт хичнээн бүтээгдэхүүнийг манайхан гадагшаа экспортлодог вэ?

Ер нь манайх импортлогч орон. Гэсэн хэдий ч бид уул уурхайгаас гадна хэд хэдэн бүтээгдэхүүнээ экспортлоод явж байна. Аль болох үндэсний үйлдвэрлэлийн бүтээгдэхүүнээ гадагш нь гаргах санал санаачлага энэ үеэр хэлэлцэгдэнэ.

–Нэмүү өртөг шингэсэн ямар бүтээгдэхүүнүүд гадагшаа гарч байна?

Арьс шир ноос ноолуур голлон оролцоод хүнсний бүтээгдэхүүний экспортлогч дотор бяслаг, зөгийн бал, чацаргана орж байна. Манай үндсэн гол нэрийн бүтээгдэхүүн гарын таван хуруунд багтахаар байна. Арьс шир, ноос ноолуур, чацаргана, зөгийн бал, мах гэх мэт. Мөн сүүлийн жилүүдэд гоо сайхны салбарынхан нэрийн бүтээгдэхүүнээ амжилттай экспортлож байна.

–Манайхан ихэвчлэн аль улсруу бүтээгдэхүүнээ экспортлодог вэ?

Манай улсын гол экспортлогч орон Хятад улс. Гэхдээ Англи, Турк, Япон, Итали зэрэг улсууд манайхаас бүтээгдэхүүн авах сонирхолтой. Япон улсын хувьд хагас боловсруулсан бүтээгдэхүүнийг илүү сонирхдог. Гадны байгууллагууд буюу импортлогч орнууд Монголын үндсэн бүтээгдэхүүн болох арьс шир, ноос ноолуур, зөгийн бал гэх мэт зүйлсийг худалдаж авахыг маш ихээр сонирхож ирдэг.