Month: October 2018

Монгол Улсын эрүүл мэндийн үндсэн үзүүлэлтээс сүүлийн таван жилийн судалгааны хүн амын өвчлөл, нас баралтын тэргүүлэх таван шалтгааныг үндэслэн Эрүүл мэндийн яамнаас улс орон даяар иргэдээ анх удаа Урьдчилан сэргийлэх эрт илрүүлэг, үзлэг, оношлогоонд хамруулахаар болсон. Тус үзлэг, оношлогоог аравдугаар сарын 01-нээс эхлэн эрүүл мэндийн даатгалын сангаас санхүүжүүлэн хэрэгжүүлж эхэлжээ.

Энэ хүрээнд Эрүүл мэндийн яамнаас 18-с дээш насны даатгуулагч бүрийг Эрүүл мэндийн урьдчилан сэргийлэх үзлэгт үнэ төлбөргүй хамруулахаар болсон. Даатгуулагч Эрүүл мэндийн даатгалаа тасралтгүй төлсөн байх ёстой бөгөөд өөрийн насны ангилалд багтах үзлэгийн багцын дагуу үзлэгт хамрагдах юм.

Дэлхийн эрүүл мэндийн байгууллагаас зөвлөмж болгосон насны ангиллын дагуу эрт илрүүлэг, урьдчилан сэргийлэх үзлэгт “Хүн амыг нас, хүйс, эрүүл мэндийн эрсдэлд суурилан урьдчилан сэргийлэх, эрт илрүүлэг үзлэг”-ийг ЭМД-д даатгуулагч иргэн бүрт ЭМД-аас санхүүжүүлэн зохион байгуулж байна. Товлолыг ЭМД-ын үндэсний зөвлөлийн хуралдаанаар хоёр удаа, ЭМС-ын зөвлөлийн хуралдаанаар гурван удаа хэлэлцүүлж шийдвэрлэсэн юм.

Ингэхдээ дөрвөн насны /18-34, 35-45, 46-64, 65-аас дээш/ ангиллаар үзлэгүүдийг багцлан хамруулах юм байна. Аль ч насны ангилалд эмчийн ерөнхий үзлэг, эрүүл мэндийн эрсдэлийн үнэлгээ, халдварт бус өвчний бүрдмэл үнэлгээ хийх аж. Мөн үзлэг дээр суурилан эрүүл мэндийн эрсдэлийг илрүүлэн дараагийн үзлэгт хамруулах юм байна.

Даатгуулагчид 18-34 насны урьдчилан сэргийлэх багцад: БЗДХ, Сүрьеэгийн илрүүлэг үзлэг орно. Мөн 40-өөс дээш насны даатгуулагчид нийт найман төрлийн хорт хавдрын илрүүлэг, үзлэгийг хийнэ. Ингэснээр “Зонхилон тохиолдох халдварт бус өвчин”-үүд болон хорт хавдарыг эрт илрүүлж, эмчилэх боломжтой. Хүн бүр эрүүл мэндийнхээ төлөө хариуцлагатай байж, нас насанд тохирсон эрүүл мэндийн эрт илрүүлгийн багц үзлэгт хамрагдан, 2030 гэхэд хорт хавдрын нас баралтыг 35 хувиар бууруулах төлөвлөгөөтэй байна.

Шинжилгээ, оношлогоонд хамрагдах иргэд харьяа эрүүл мэндийн төвд хандах юм.

10 дугаар сарын 18-ны 12:00 цагийн үед “Хуурамч дэвсгэрт илэрлээ” гэсэн дуудлага мэдээллийг цагдаагийн байгууллагад ирснийг шалгаж байна. ХААН банкны Баянзүрх тооцооны төвд “Жавхлант дестребюшин” ХХК-ийн нярав орлогоо тушааж байх явцад нь хуурамч 20.000 төгрөгийн мөнгөн дэвсгэрт илэрчээ. Гүйлгээнд орсон 20 мянгатын хуурамч дэвсгэртийг шалгаж байна.

1958 оны аравдугаар сарын 19-ний өдөр БНМАУ-ын Сайд нарын зөвлөлийн наймдугаар сарын 22-ны өдрийн тоот тогтоолоор Хүүхэд багачуудын авьяас чадварыг дэмжин хөгжүүлж, мэргэжлийн чиг баримжаа олгох зорилготойгоор “Монголын Пионер Сурагчдын Төв” ордон буюу “Монголын Хүүхдийн Ордон”-ыг байгуулсан билээ. Харин өнөөдөр “Монголын хүүхдийн ордон”-ы түүхт 60 жилийн ой тохиож байна. Энэхүү байгууллага нь хүүхэд багачуудын авьяас чадварыг дэмжин, хөгжүүлэхээс гадна тэдэнд ардын урлаг үндэсний өв соёлыг өвлүүлэн үлдээж, сурталчлан таниулах, сурган хүмүүжүүлэх ажлыг үйл ажиллагааны тэргүүлэх чиглэл болгодог юм. 2018-2019 оны хичээлийн жилд 4500 орчим хүүхэд багачуудыг ордондоо элсүүлэн суралцуулж, 130.000 гаруй төгсөгчидтэй болсон билээ. Энэхүү 60 жилийн хугацаанд Монголын хүүхдийн ордны төгсөгчдөөс Хөдөлмөрийн баатар, Төрийн соёрхолт, Ардын жүжигчин, Ардын зураач, Урлагийн болон Соёлын гавьяат зүтгэлтнүүд олноор төрөн гарсан бөгөөд урлаг соёлын байгууллагууд, их дээд сургуулиудад урлагийн боловсон хүчнүүд болж, нэр хүндтэй албыг хариуцлагатай хашиж байгаа.

Төгсөгчдөөс гарсан эдгээр амжилтууд нь “Монголын хүүхдийн ордон”-ы сургалтын чанар чансаа, үр дүнг харуулахын зэрэгцээ Монгол Улс хүүхэд багачууд, өсвөр үеийнхний авьяас чадварыг 60 жилийн турш дэмжиж ирсэн нийгмийн амжилтыг харуулж байгаа юм. Арга хэмжээний үеэр Монголын хүүхдийн ордны захирал Б.Цэнгэлмаа “Бидний мэдэх багачуудын ордон өнгөрсөн 60 жилийн хугацаанд Монголын пионер сурагчдын төв ордон, Монголын хүүхдийн ордон хэмээн нэрлэгдэж, сүрлэг сайхан 2 ордонд суурьшин тогтнож 13 захирлын удирдлага дор үйл ажиллагаагаа явуулж иржээ. Хугацаа мөчлөг бүр өөр өөрийн түүхийг өгүүлж, хөгжил дэвшлийн төлөө үргэлжид тэмүүлж хэтийн болон ойрын төлөвлөгөөтэйгээр урагшлан хөгжсөөр өнөөдрийг хүргэсэн нь дамжиггүй. Анх 30 гаруй дугуйланд 3000 орчим хүүхэд элсүүлж, урлаг утга зохиол, биеийн тамир, барилга, техник гэсэн чиглэлүүдээр 40 гаруй багш ажилчидтайгаа үйл ажиллагаагаа эхлүүлж байсан бидний хамт олон Үндэсний хөгжлийн цогц бодлогын хүрээнд хүүхдийн авьяас, оюун билгийг хөгжүүлэх, үндэсний урлаг, соёлын өвөө дээдлэн өвлүүлэх, хэл шинжлэл, шинжлэх ухаан, урлаг, спорт, уран бүтээлийн сургалтаар дамжуулан гоо зүйн боловсрол, мэргэжлийн чиг баримжаа олгох зорилго бүхий дөрвөн алба нэг нэгжийн хүрээнд 109 багш ажиллагсадтайгаар 32 төрлийн дугуйланд хүүхдүүдийг элсэн суралцуулсаар үйл ажиллагаагаа үргэлжлүүлж байна” гэв.

Мөн хүүхэд багачууд төдийгүй ард түмэнд танигдсан “Монголын хүүхдийн ордон”-ы нэрийн бренд болсон улсын уралдаанууд, “Харшийн сүлд модны наадам” зэрэг нэр хүндтэй үйл ажиллагаа, томоохон арга хэмжээг тасралтгүй зохиосоор ирсэн бөгөөд жилээс жилд өргөжин тэлсээр байна.

Хүүхэд багачуудын авьяас бэлгийг хөгжүүлсэн түүхт 60 жилийн ойгоо угтан 60 бүтээлч ажил санаачлан хийж байгаа. Тухайлбал, Нийслэлээс алслагдсан дүүрэг, хороодын хүүхдийг дугуйланд хамруулах зорилгоор Нийслэлийн Иргэдийн Төлөөлөгчдийн Хурлын шийдвэрээр Сонгинохайрхан, Сүхбаатар, Чингэлтэй, Баянзүрх, Хан-Уул дүүрэгт уран зураг, дуулаач, драм, бүжиг, амьдрах ухаан зэрэг 30 гаруй дугуйланд 6000 орчим хүүхдийг хамруулан сургасан юм. Мөн энэ оны долоодугаар сарын 26, 27-ны өдрүүдэд “Мөнгөн хараацай” Олон улсын хүүхдийн урлагийн Анхдугаар наадмыг ОУХ ”Найрамдал” цогцолбортой хамтран зохион билээ. Уг наадамд ОХУ, БНХАУ, ТАЙЛАНД улс, БНСУ болон манай улсын нийт 330 гаруй хүүхэд багачууд оролцож, авьяас чадвараа сорин, харилцан туршлага солилцож, улс үндэстнийхээ өв соёлыг сурталчлан таниулсан юм. Үүнээс гадна 2018 онд Монголын Хүүхдийн ордноо олон улсын жишигт нийцэхүйц Олон улсын Чанарын менежментийн тогтолцоо-шаардлага MNS ISO 9001:2016 стандартыг хэрэгжүүлэгч байгууллага болгон ажиллаж байна

Дашрамд дурдахад, 1958 онд болж байсан “Монголын хүүхдийн ордон” буюу Монголын Пионерийн ордныг нээлтэд БНМАУ-ын Их хурлын тэргүүлэгчдийн дарга нөхөр Ж.Самбуу “Энэ ордон бол пионер багачууд та нарыг эрүүл чийрэг, эрдэм номтой, төрөл бүрийн мэргэжилтэй, ажилч хичээнгүй хүмүүс болгохын төлөө байгуулагдсан Та нарыг эрдэм номтой, хөдөлмөрт дуртай, эрүүл чийрэг,соёлч боловсон хүмүүс болгон хүмүүжүүлэхийн тулд бүхий л анхаарлаа тавьж байна. Сайн, онц сайн сурлагын үндэс нь сайн сахилга бат мөн. Сахилга бат сайтай явна гэдэг бол өөрийн сонирхол, өөрийн үйл ажиллагааг, нийтийн амьдрал ажиллагаанд захируулна гэсэн хэрэг юм.Сурагч та бүхэнд хөдөлмөрийн хүмүүжил олоход өнөөдөр нээгдэж байгаа Пионерийн ордон сайхан бололцоо олгож байна” хэмээж байсан юм. Харин Комсомолын төлөөлөгчдийн тэргүүн Ю.А.Маринкина хэлэхдээ “Сурагчдын хүмүүжлийн өргөн цар хүрээтэй ажил өрнүүлэн,тэдний чадвар авьяас сонирхлыг бүх талаар хөгжүүлэх бололцоотой болгож байна. Пионерийн ордны багш нар, Монголын залуучуудын эвлэлийн ажилтан нар тус ордныг “Монголын багачуудын хичээлээс гадуур хийх бүх ажлын төв, пионерийн хөдөлгөөний ажилтны мэргэшлийг дээшлүүлэх төв болгож чадна гэдэгт бид итгэж байна” гэж хэлсэн байдаг. Энэхүү үгэнд шингэсэн үзэл санаа өнөөг хэрнэ үнэ цэнээ алдаагүй байгаа юм.

З.МӨНХСУВД

Нийслэлийн Газрын албанаас Баянзүрх дүүрэгт 3 цэцэрлэг, 3 сургууль баригдах байршилд газар чөлөөлөлтийн ажил хийлээ. Эдгээр сургууль, цэцэрлэгийн газрын нөлөөлөлд нийт 41 нэгж талбарын 25500 м2 буюу 2.5 га газарт газар чөлөөлөлт хийв.

Шинээр сургууль, цэцэрлэг барих ажилд идэвх санаачлагатай оролцож, олон нийтийн эрх ашгийн төлөө газраа чөлөөлсөн 41 иргэн, аж ахуйн нэгж байгууллагадаа нийслэлийн иргэдийн өмнөөс талархал илэрхийлье гэж нийслэлийн Газрын албанаас мэдээлэв.

Тухайлбал,

·БЗД-ийн 14 хороо, Консулын 1, 4 дүгээр гудамжинд 150 ортой хүүхдийн цэцэрлэг барих газар,

·БЗД-ийн 14 хороо, Консулын 11 дүгээр гудамжинд цэцэрлэг барих газар,

·БЗД-22 дугаар хороо, Цайз захын хойно 100 ортой хүүхдийн цэцэрлэг барих газар,

·БЗД-24 дугаар хороо, Цахлай 5, 6 дугаар гудамжинд сургууль барих газар,

·БЗД-26 дугаар хороо, Кристал таун хотхоны баруун талд 920 хүүхдийн сургууль барих газар,

·БЗД-ийн 9 дүгээр хороо, Шархадны 32 дугаар гудамжинд сургууль барих газар

Нийслэлийн Засаг даргын хэрэгжүүлэгч агентлаг Залуучуудын хөгжлийн газар, Зэвсэгт Хүчний Жанжин Штабтай хамтран “Эерэг–Эх орон” сэдэвт аян зохион байгуулж байгаа. Өнөөдрийн байдлаар Улаанбаатар цэргийн хүрээний нийт 20 ангийн 2257 алба хаагчдыг эерэг хандлагыг төлөвшүүлэх, гэр бүлийн боловсрол олгох сургалтад хамруулав.

Аяны хүрээнд өнөөдөр Зэвсэгт хүчний 310 дугаар ангийн 120 цэргийн алба хаагчдад “Гэр бүлийн харилцаа”, “Цалин, орлогоо зөв удирдаж, сэтгэл хангалуун амьдралыг бүтээх нь” зэрэг сэдвүүдээр сургалт зохион байгууллаа. Сургалтын үер залуучуудад гэр бүлийн тогтвортой харилцааг хэрхэн бий болгох, гэр бүлд эхнэр, нөхрийн хүлээх үүрэг хариуцлага, хүүхдийн хөгжил, төлөвшилд гэр бүлийн харилцаа хэрхэн нөлөөлөх нь, бэрхшээлийг даван туулах чадвар, асуудлыг эерэгээр шийдэх гарц олох, эерэг хандлагыг төлөвшүүлэх талаар мэдээлэл өгсөн юм.

Монгол Улсын хөгжлийн тулгуур болсон залуучуудад эерэг хандлага төлөвшүүлж, нийгмийн сэтгэл зүйд давамгайлсан сөрөг уур амьсгалыг өөрчлөх, ёс суртахуун, хариуцлага, харилцааны эерэг соёлыг нэмэгдүүлэх, гэр бүлийн боловсрол олгох зорилгоор энэхүү аяныг өнгөрсөн зургаадугаар сараас эхлэн аравдугаар сарыг дуустал Зэвсэгт хүчний жанжин штабтай хамтран нийслэлийн ойр орчмын цэргийн ангиудад зохион байгуулахаар төлөвлөн ажиллаж байна гэж нийслэлийн Залуучуудын хөгжлийн газраас мэдээллээ.

Баянхонгор аймгийн Стандартчилал хэмжилзүйн хэлтсийн дэргэд “Үнэт металлын сорьц тогтоох лаборатори худалдан авах нэг цэгийн үйлчилгээ”-ний нээлт 10 дугаар сарын 18-нд боллоо.

Нээлтийн тууз хайчлах ёслолд Стандарт хэмжилзүйн газрын дэд дарга Б.Билгүүн, Монголбанкны Тамгын газрын дарга Ж.Батхуяг, Швейцарийн хөгжлийн агентлагийн “Тогтвортой бичил уурхай төсөл”-ийн зохицуулагч Б.Алтанбагана, аймгийн Засаг дарга Г.Батжаргал нарын зэрэг албаныхан, бичил уурхай эрхлэгчдийн төлөөлөл оролцов.

Мөн анхны алтан гулдмай хайлах үйл явцтай зочид, төлөөлөгчид танилцсан юм. Анхны гулдмай 255 гр жинтэй байлаа. Тус лаборатори нэг удаад хамгийн багадаа 50 гр, том нь 9 кг-ийн алтан гулдмай үйлдвэрлэх хүчин чадалтай. Өндөр хүчин чадал бүхий тоног төхөөрөмжтэй тул гулдмай хийхэд төдийлөн цаг орохгүй, харин сорьц тогтооход 3-4 цаг шаардагддаг байна.

Аливаа металлын хайлшийг 1000 нэгж гэж үзвэл түүний хэдэн нэгжийг нь үнэт металл эзэлж байгаа сорьц гэдэг аж. Тухайлбал, 3.0 грамм жинтэй алтан бөгжийг 1000 нэгж гэвэл түүний 585 нэгж нь алт байх ба тэр бөгжийг 585 сорьцтой алтан бөгж гэж ойлгохыг лабораторийн ажилтан тайлбарласан.

Баруун бүсийн лабораторийг Баянхонгор аймагт ийнхүү байгуулахад 395 сая төгрөгийн тоног төхөөрөмж худалдан авах ажлыг Монголбанк, Швейцарийн хөгжлийн агентлагийн “Тогтвортой бичил уурхай” төсөл хамтран шийдвэрлэсэн бол Баянхонгор аймгийн ЗДТГ-аас лабораторийн барилгын засварт 34 сая төгрөгийг гаргажээ.

Бүс нутгийг хамарсан үнэт металлын сорьцын лаборатори байгуулагдсанаар иргэн, аж ахуйн нэгж олборлосон алтаа сорьцлуулах боломжтой болж байгаа төдийгүй Монголбанкны салбар, арилжааны банкуудаар дамжуулан алтаа худалдах нөхцөл бүрдэж байгаа юм. Ингэснээр алт нийлүүлэлтийн эргэлт нэмэгдэж, шат дамжлага багасч, бодит сорьцын дүнгээр арилжаа хийгдэх боломжийг олгож байна.

“Алт олборлогч аж ахуйн нэгж болон бичил уурхайчид олборлосон алтаа Монголбанк болон арилжааны банкинд тушаахын өмнө албан ёсны байгууллагаар сорьц тогтоолгох шаардлагатай байдаг. Алтны олборлолт төвлөрсөн бүс нутагт энэхүү нэг цэгийн үйлчилгээний төвийг нээснээр алт олборлогчдод алтаа дэлхийн зах зээлийн үнээр худалдах, тээврийн зардал болон цаг хугацааны хувьд хэмнэлт гарах төдийгүй, аюулгүй байдлын баталгаа бий болно” хэмээн Монголбанкны төлөөлөл хэлж байсан.

Мөн алтны нийлүүлэлтийн сүлжээ албан бус шат дамжлага багасч, алтны худалдааны бүртгэлийг сайжруулах, олборлолтын хэмжээг хянах тогтолцоог бүрдүүлснээр алтны нийлүүлэлтийн сүлжээг бүхэлд нь ил тод болгох, албажуулах нөхцөл бүрдэж байгаа онцолж байлаа.