Month: October 2018

Монгол Улсын Ерөнхийлөгч Х.Баттулга Ази-Европын дээд хэмжээний 12 дугаар уулзалтын нэгдүгээр нэгдсэн хуралдаанд оролцож, үг хэллээ.

МОНГОЛ УЛСЫН ЕРӨНХИЙЛӨГЧ Х.БАТТУЛГА:

Эрхэм хүндэт төр, засгийн тэргүүн нар аа,

Хүндэт төлөөлөгчид өө,

Ноёд хатагтай нар аа,

Даяаршил, өндөр технологийн хөгжил, нөөцийн хомстол, уур амьсгалын өөрчлөлт зэрэг орчны хувьсал өөрчлөлтөөс үүдэж энэ зуунд дэлхий нийтийн өмнө олон сорилт бэрхшээл тулгараад байгаа билээ. Тиймээс олон улсын хамтын нийгэмлэгээс тогтвортой хөгжлийн 2030 хөтөлбөр, Уур амьсгалын өөрчлөлтийн асуудлаарх Парисын хэлэлцээр зэрэг түүхэн баримт бичгүүдийг батлан хэрэгжүүлж эхлээд даруй гурван жил өнгөрч байна.

Өнөөдөр энд чуулж байгаа Ази, Европын уулзалт бол бидний үндэсний болон бүс нутаг, олон улсын түвшний хөгжлийн алсын хараа, бодлого, хөтөлбөрөө хэрэгжүүлэх нэгэн чухал арга механизм гэдэгтэй бүгд санал нийлэх биз ээ.

Түүний дотор 2016 онд болсон Дээд түвшний 11 дүгээр уулзалтын Улаанбаатарын тунхаглалд заасны дагуу АСЕМ-ын орнууд Тогтвортой хөгжлийн төлөөх түншлэлээ бэхжүүлэх, уялдаа холбоог бүхий л хүрээнд хөгжүүлэх чиглэлээр өнгөрсөн хоёр жилд идэвхтэй хамтран ажиллалаа.

Хүндэт төлөөлөгчид өө,

Монгол Улсын хувьд нэг талаас АСЕМ-ын үйл ажиллагаа, хөгжилд хувь нэмрээ оруулах, нөгөө талаас манай улсын хөгжлийн тэргүүлэх зорилтуудын хэрэгжилтэд чухал хувь нэмэр оруулж байгаа АСЕМ-ын хүрээнд хамтын ажиллагаагаа эрчимжүүлэхийг эрмэлздэг.

Үнэхээр ч Монгол Улсын улс төр, эдийн засаг, соёлын хамгийн том түншүүд бол АСЕМ-ын орнууд байдаг. Тиймээс эх газрын хатуу уур амьсгал, далайд гарцгүй байрлал, сүүлийн жилүүдийн эдийн засгийн хүндрэл зэрэг өөрийн орны өмнө тулгарч буй олон сорилт, бэрхшээлийг даван туулахад АСЕМ-ын түншүүд, хөрш улсуудаа түшиж тулан, олон талын болон хоёр талын худалдаа, эдийн засгийн хамтын ажиллагааг идэвхтэй хөгжүүлэх бодлого баримталж байна.

Бид сүүлийн арав гаруй жил, түүний дотор 2016 оноос хойш Монгол-Орос-Хятад гурван улсын дэд бүтцийн холбоосууд, эдийн засгийн коридорыг байгуулах чиглэлээр идэвхтэй ажиллаж тодорхой хэлэлцээрүүдийг байгуулснаар хөрш орнуудын нутгаар дамжин өнгөрч, далайн боомтуудаар дамжуулан Зүүн Хойд Азийн болон бусад улстай худалдаа хийх боломж өсөн нэмэгдлээ. “Монгол-Орос-Хятадын эдийн засгийн коридор” байгуулах хөтөлбөрийн хүрээнд төслүүд хэрэгжүүлж эхлэх, ОХУ-аас БНХАУ руу барихаар төлөвлөж байгаа байгалийн хийн хоолойг Монгол Улсаар дамжуулан өнгөрүүлэх болон Евразийн эдийн засгийн холбоотой Чөлөөт худалдааны хэлэлцээр байгуулах асуудлын үндэслэлийг хамтран судлах зэрэг олон ажлыг ойрын хугацаанд хэрэгжүүлэхээр төлөвлөж байна.

Түүнчлэн Монгол Улс АСЕМ-ын эрдэм шинжилгээний хүрээлэнгүүдийн сүлжээ байгуулахыг дэмждэг ба манай улсын санаачилгаар байгуулагдсан Улаанбаатарт төвтэй “Далайд гарцгүй хөгжиж буй орнуудын олон улсын судалгааны төв”-өөр дамжуулан тус сүлжээний үйл ажиллагаанд хувь нэмэр оруулахыг зорьж байна.

Хүндэт төлөөлөгчид өө,

Зүүн Хойд Азийн бүс нутаг төдийгүй дэлхийн энх тайван, аюулгүй байдлыг бататган бэхжүүлэхэд Солонгосын хойгийн тогтвортой байдлыг хангах явдал нэн чухал юм. Тиймээс бид бүс нутгийн аюулгүй байдал, тогтвортой байдлын асуудлаарх яриа хэлэлцээний механизмыг хөгжүүлэхийг зорьж Улаанбаатарын яриа хэлэлцээ зэрэг хурал, арга хэмжээг санаачлан тууштай хөгжүүлж ирсэн.

Монгол Улс сүүлийн үед Солонгосын хойгт гарч буй нааштай өөрчлөлтүүдийг талархан сайшааж байгаа бөгөөд талуудын яриа хэлэлцээ, хүчин чармайлт нь бүс нутаг, дэлхий дахины аюулгүй байдалд эерэгээр нөлөөлнө хэмээн итгэж байна.

Бид Зүүн Хойд Азийн хамтын ажиллагааг улс төр, аюулгүй байдлын төдийгүй эдийн засаг, соёлын зэрэг бусад хүрээнд өргөжүүлэх санал санаачилга дэвшүүлэх, бүс нутгийн орнуудын энэ чиглэлийн санаачилгыг дэмжих, нэгдэх чиглэлээр ажиллаж байна.

Миний бие өнгөрсөн сард Владивосток хотноо болсон Дорны эдийн засгийн форумын үеэр цахилгаан эрчим хүчээр хангах, оргил цагийн ачаалал хуваалцсан, нөөц ашиглалтын оновчтой шийдэл болох “Зүүн Хойд Азийн эрчим хүчний супер сүлжээ” төслийн ажлыг хамтран, цаг алдалгүй, шуурхай эхлүүлэхийг уриалсан.

Хүндэт төлөөлөгчид өө,

АСЕМ бол цаашид бидний хамтран тодорхойлсон хамтын ажиллагааны тэргүүлэх чиглэлүүдэд суурилсан ажил хэрэгч механизм байх ёстой, АСЕМ-ын үйл ажиллагааг өргөжүүлэн хөгжүүлэхийн тулд олон улсын тавцан дахь өнөөгийн тулгамдаж буй асуудлуудад АСЕМ-ын орнууд нэгдсэн байр суурьтай хандах нь чухал гэсэн түнш орнуудын саналыг бид бүрэн хуваалцаж, дэмжиж байна.

Анхаарал хандуулсанд баярлалаа” гэж хэллээ.

Улсын Их Хурлын Аюулгүй байдал, гадаад бодлогын байнгын хорооны дарга О.Содбилэг, УИХ-ын гишүүн, Улсын Их Хурал дахь Монгол-Германы парламентын бүлгийн дарга Д.Тэрбишдагва нар өнөөдөр (2018.10.20) ХБНГУ-ын Бундестагийн гишүүн, Холбооны Батлан хамгаалахын сайд, доктор Урсула Фон Дер Лайеныг Төрийн ордонд хүлээн авч уулзав.

Уулзалтын эхэнд УИХ-ын гишүүн, АБГББХ-ны дарга О.Содбилэг Европ дахь гол түнш, гуравдагч хөрш орон болох ХБНГУ-ын Батлан хамгаалахын сайд Монгол Улсад айлчилж, аюулгүй байдал, батлан хамгаалах чиглэлээр яриа хэлэлцээр хийж байгаад талархалтай байгаагаа илэрхийлэв.

Тэрбээр, манай хоёр улс 2009 оноос Иж бүрэн түншлэлийн харилцааг хөгжүүлж буйг дурдаад, нийгмийн бүхий л салбарт хоёр талын хамтын ажиллагаа бүс нутагт үлгэр дууриал болон хөгжиж буйд сэтгэл ханамжтай байгаагаа илэрхийлэв. Хоёр орны хооронд дээд, өндөр түвшний харилцан айлчлал сүүлийн жилүүдэд тогтмолжиж, хууль тогтоох дээд байгууллагууд хоорондын харилцаа, хамтын ажиллагаа өндөр түвшинд амжилттай хэрэгжиж буйд сэтгэл ханамжтай байдгаа хэлээд 2017 онд Улсын Их Хурлын Аюулгүй байдал, гадаад бодлогын байнгын хорооны гишүүд Бундестагт зочилсон нь хоёр орны Парламент хоорондын хамтын ажиллагааг гүнзгийрүүлэх, харилцан туршлага солилцоход чухал үүрэг гүйцэтгэж буйг онцлон тэмдэглэв.

ХБНГУ-ын Бундестагийн гишүүн, Холбооны Батлан хамгаалахын сайд, доктор Урсула Фон Дер Лайен, “Ази тивд орших чухал харилцаатай орон болох Монгол Улсад айлчилж байгаадаа баяртай байна. Монгол Улсын Их Хурлын Аюулгүй байдал, гадаад бодлогын байнгын хороо болон УИХ дахь Монгол-Германы парламентын бүлгийн гишүүдэд талархал илэрхийлье” хэмээгээд хоёр орны Парламентын бүлгийн харилцаа нь хоёр орны харилцааны билэгдэл болж байгааг тэмдэглэв. Үргэлжлүүлэн талууд Исламын Бүгд Найрамдах Афганистан Улсад хоёр орны Зэвсэгт хүчний цэргийн бүрэлдэхүүн хамтран үүрэг гүйцэтгэж байгаа нь хоёр талын хамтын ажиллагааны чухал тулгуур болохыг онцолсон. Мөн хоёр орны Парламентын бүлгийн гишүүд хамтран тус улсад үүрэг гүйцэтгэж буй цэргийн бүрэлдэхүүнийхээ үүрэг гүйцэтгэлтийг газар оронд нь очиж үзэх нь талуудын цаашдын харилцаанд их чухал айлчлал, арга хэмжээ болох тал дээр санал нэгтэй байгаагаа илэрхийлж байсан юм.

Уулзалтад УИХ дахь Монгол-Германы парламентын бүлгийн дэд дарга, АБГББХ-ын гишүүн Л.Болд, УИХ-ын гишүүн Б.Бат-Эрдэнэ, Б.Ундармаа, Холбооны батлан хамгаалах яамны Улс төрийн газрын Аюулгүй байдлын бодлого, хоёр талын харилцааны газрын ахлах мэргэжилтэн Арслан Дайхсел, Холбооны Батлан хамгаалах яамны Цэргийн бодлого, ажиллагааны газрын ахлах мэргэжилтэн, Тэнгисийн цэргийн дэд хурандаа Даниел Волфен болон албаны бусад хүмүүс байлцлаа гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.

Монгол Улсад албан ёсны айлчлал хийж буй ХБНГУ-ын Батлан хамгаалахын сайд хатагтай доктор Урсула фон дер Лайн өнөөдөр Монгол Улсын Батлан хамгаалахын сайд Н.Энхболдын албан ёсны хэлэлцээ хийлээ.

Монгол Улс ХБНГУ-ын хоорондын дипломат харилцаа 1974 оноос эхэлсэн түүхтэй гэдгийг Батлан хамгаалахын сайд Н.Энхболд онцлоод, “Өнгөрсөн он жилүүдэд манай манай хоёр орны харилцаа Иж бүрэн түншлэлийн хэмжээнд хүрч, бүхий л салбарт өргөжин хөгжиж байна. Монгол Улс ардчилсан нийгэмд шилжиж байсан хүндхэн үед ХБНГУ-аас багагүй дэмжлэг үзүүлж байсан” хэмээв. Монгол Улс гуравдагч хөршийн бодлогын хүрээнд Европын холбооны улсуудтай нээлттэй найрсаг харилцаа, хамтын ажиллагааг хөгжүүлж ирсэн бөгөөд үүнээс ХБНГУ-тай хамгийн ойрын хамтын ажиллагаатай гэдгийг сайд онцлов. Монгол, ХНГУ-ын батлан хамгаалах салбарын харилцаа 1993 оноос хойш эрчимтэй хөгжиж өндөр дээд хэмжээний төлөөлөгчдийн харилцан айчлал, яамд хоорондын зөвлөлдөх уулзалт, цэргийн боловсон хүчнийг сургах чиглэлд нягт хамтран ажиллаж буй юм. Монгол Улсын Зэвсэгт хүчний бие бүрэлдэхүүн ХБНГУ-ын Зэвсэгт хүчинтэй хамтран Исламын Бүгд найрамдах Афгинастан Улсад “Шийдвэртэй дэмжлэг” ажиллагаанд 2009 оноос хойш үүрэг гүйцэтгэж буй нь үүний тод илрэл юм. Уг ажиллагаан хамтран оролцох хугацаа энэ жил дуусгавар болох бөгөөд Монгол Улсын Үндэсний аюулгүй байдлын зөвлөл энэхүү хугацааг сунгах шийдвэр гаргана гэдэгт эргэлзэхгүй байгаагаа ХБНГУ-ын Батлан хамгаалахын сайд, хатагтай Урсула фон дер Лайн тэмдэглэн хэллээ.

Монгол Улсын Шадар сайд Ө.Энхтүвшин өнөөдөр ХБНГУ-ын Батлан хамгаалахын сайд, хатагтай Урзула фон дер Лайныг хүлээн авч уулзав.

ХБНГУ нь ардчилсан, хүмүүнлэг нийгмийг бэхжүүлэх болон улс төр, нийгэм, эдийн засгийн бүх салбарт Монгол Улстай хамтран ажиллаж, дэмжлэг туслалцаа үзүүлж ирсэн. Хоёр орны Иж бүрэн түншлэлийн харилцаанд батлан хамгаалах салбарын хамтын ажиллагаа жинтэй байр суурь эзэлдэг гэдгийг Шадар сайд тэмдэглэлээ. ХБНГУ-ын Засгийн газар, Батлан хамгаалах яам монгол цэргийн боловсон хүчнийг үнэ төлбөргүй бэлтгэн, техник, материал хэрэгслийн буцалтгүй тусламж үзүүлж байгаад талархал илэрхийлэв. Цаашид ч энхийг дэмжих ажиллагаанд оролцох цэрэг дайчдыг чадавхжуулах, инженерийн батальоныг шаардлагатай техник, тоног төхөөрөмжөөр хангахад дэмжлэг үзүүлнэ гэдэгт эргэлзэхгүй байна гэв. Харилцаа, хамтын ажиллагаа бүх салбарт өргөжин хөгжиж байгаад сэтгэл хангалуун байгаагаа ХБНГУ-ын Батлан хамгаалахын сайд, хатагтай Урзула фон ер Лайн илэрхийлэв.