Month: October 2018

“Боловсролын салбарын мэдээллийн систем” төсөл нь энэ хичээлийн жилээс сургууль, цэцэрлэг, багш сурагч, эцэг эх рүү чиглэсэн систем болон өргөжих юм байна.

Уг системийг ашиглаж эхэлснээр багшийн хөдөлмөрийг хөнгөвчилж, цаастай зууралддаг хуучин арга барилыг халахаас эхлээд багш бүр БСШУС яамны сайдад санал хүсэлтээ шууд хүргэх бололцоотой болохыг салбар яамнаас өнөөдөр мэдээллээ.

Эцэг эхчүүдийн хувьд интернет ашиглан хүүхдийнхээ сурлага, ирцийн мэдээлэл гэх мэт хүүхэдтэйгээ холбоотой бүх мэдээллийг цаг тухайд нь хүлээн авдаг болсноор хүүхдийн хүмүүжил, сургууль, цэцэрлэгийн үйл ажиллагаанд эцэг эхчүүдийн оролцоо илүү бодитой болж нэмэгдэж байгаа юм. Өөрөөр хэлбэл, “Play Store”-оос “ESIS” аппликейшнийг татаж суулгаснаар эцэг эхчүүд энэхүү үйлчилгээг хүлээн авах боломжтой аж.

Боловсролын салбарын байгууллагуудын хувьд мэдээллийн сан дээр тулгуурлан дүн шинжилгээ хийх, бодлого боловсруулах, зөв төлөвлөлт хийх боломжоор хангагдаж байна. Монгол Улсын боловсролын салбарын удирдлага, төлөвлөлт, менежментийн үйл ажиллагаанд дэмжлэг үзүүлэх, боловсролын салбар дахь мэдээллийн урсгалыг хянах, зохицуулах үүрэгтэй нэгдсэн мэдээллийн санг бүрдүүлэх, түүнийг удирдах системийг боловсруулахад төслийн үндсэн зорилго оршжээ.

Төслийн хүрээнд боловсролын салбарын мэдээллийн системийн нэгдсэн платформыг байгуулах, системийг боловсролын бүх шатны байгууллагад нэвтрүүлэх, тэдгээрийг үнэн бодит мэдээллээр хангаж, судалгаа шинжилгээ хийх бололцоо олгох, системд байнгын шинэчлэлт, сайжруулалт хийж тогтвортой ажиллагааг хангах зэрэг ажлууд багтаж байгаа аж.

2018 оны 10-р сарын 03-ны байдлаар хонины ястай махны үнэ өмнөх сараас 2.4, үхрийн ястай махны үнэ 0.9 хувь, үхрийн цул махны үнэ 1.1 хувь, адууны ястай махны үнэ 3.0 хувь, ямааны ястай махны үнэ 3.2 хувиар буурсан байна.

Ажиглалтаар хонины ястай махны үнэ 0.5 хувь, адууны ястай махны үнэ 0.8 хувь, ямааны ястай махны үнэ 3.2 хувиар буурсан бол үхрийн цул мах өөрчлөлтгүй харин үхрийн ястай махны үнэ 0.1 хувиар өссөн байна.

2018 оны 10-р сарын 03-ны байдлаар 1 кг хонины /ястай/ мах дунджаар 6260 төгрөг, үхрийн /ястай/ мах 7710 төгрөг, үхрийн цул мах 9380 төгрөг, адууны /ястай/ мах 5900 төгрөг, ямааны /ястай/ мах 4550 төгрөгийн үнэтэй байв.

Хөвсгөл аймгийн аялал жуулчлалын гол бүс нутаг болох Хатгал тосгонд 49 жилийн дараа Гал унтраах аврах 69 дүгээр анги байгуулагдаж шинэ байрны нээлтээ хийлээ.

Сүүлийн үед гадаад, дотоодын жуулчид Хатгал тосгоны Хөвсгөл нуурыг зорих нь эрс нэмэгдсэн учраас болзошгүй эрсдлээс урьдчилан сэргийлэх, гал гарсан үед хугацаа алдахгүй авран хамгаалах тусламж үзүүлэх зорилтын хүрээнд ОБЕГ, Хөвсгөл аймгийн ЗДТГ, Хөвсгөл аймгийн ОБГ хамтран шинэ ангийг нээж байгаа аж.

Тус анги 30 орчим хүний бүрэлдэхүүнтэй бөгөөд ихэнх нь орон нутгийн иргэд юм. Гал унтраах аврах 69 дүгээр ангийн шинэ байрны нээлтэд аймаг орон нутгийн удирдлагууд болон тэртээ 1969 онд Гал хамгаалах анги байгуулагдаж байхад ажиллаж байсан ахмадууд оролцлоо.

Хатгал тосгон нь аймгийн төвөөс 100 гаруй километрийн зайтай учраас орон нутагт гал гарах, усны осол болох гэнэтийн асуудал гарсан тохиолдолд тусламж үзүүлэхэд хүндрэлтэй байдаг бөгөөд шинээр аврах, гал унтраах анги байгуулагдсанаар аливаа эрсдлийг даван туулах, цаг алдалгүй авран хамгаалах боломж бүрдэж байгаа аж.

“Жэжү эйр” авиакомпани Сөүл-Улаанбаатар-Сөүл чиглэлд тогтмол нислэг үйлдэх хүсэлтээ Иргэний нисэхийн ерөнхий газарт илэрхийлжээ. Энэ талаар өнөөдөр Иргэний нисэхийн ерөнхий газрын Дэд дарга бөгөөд Нисэхийн аюулгүй ажиллагааны хяналт зохицуулалтын алба/НААХЗА/-ны дарга С.Манлай, Нислэгийн стандарт, үйл ажиллагааны хяналтын хэлтсийн дарга М.Эрдэнэбатмөнх болон албаны бусад хүмүүс БНСУ-ын “Жэжү эйр” авиа компанийн тээврийн асуудал хариуцсан захирал ноён Парк Ён Чол, “Ай эйч Си” ХХК-ийн Ерөнхий захирал Квон Ик Сон нарыг хүлээн авч уулзжээ.

ИНЕГ-ын зүгээс дээрх авиакомпанид“ИНД-129”-ийн дагуу 5 шатлалтай хяналт, шалгалт хийж гэрчилгээ олгоно гэдгийг уулзалтын үеэр хэлсэн байна.