Month: October 2018

Манай улсад сүүлийн жилүүдэд барилгын салбар эрчимтэй хөгжиж буйтай холбогдуулан Нийслэлийн Иргэдийн Төлөөлөгчдийн Хурлын Тэргүүлэгчдийн 2014 оны есдүгээр сарын 08-ны өдрийн 148 дугаар тогтоолоор Налайхын барилгын материалын үйлдвэрлэл, технологийн паркийг байгуулсан юм. Тус парк нь Байгаль орчинд ээлтэй, хүний эрүүл мэндэд хор нөлөөгүй, хэрэглэгчийн хэрэгцээ шаардлагад нийцсэн бүтээгдэхүүнийг зах зээлд хямд өртгөөр нийлүүлэх, шинжлэх ухаан технологийн дэвшлийг нэвтрүүлсэн орчин үеийн үлгэр жишээ үйлдвэрүүдийг дэмжин хөгжүүлж, Монгол улсын барилгын материал үйлдвэрлэлийн салбарын хөгжилд хувь нэмэр оруулах зорилготойгоор ажиллаж байна. Энэ жил Нийслэлийн авто замын сангийн хөрөнгөөр УБ-Чойрын замаас НБМҮТПарк хүртэл нийт 4,67 км авто зам баригдахаар болж гүйцэтгэгч компаниуд ажлаа эхлээд байна. Уг замыг 40 метр өргөн, 4 эгнээтэй, явган хүний зам, ногоон байгууламж, гэрэлтүүлэг гээд цогцоор нь барьж 2019 онд ашиглалтанд оруулах юм. Мөн паркийн үерийн барилга байгууламжийн ажил хийж гүйцэтгэх, хүлээлгэн өгөх тендерийг БХБЯамнаас зарлаж гүйцэтгэгч байгууллагаар “Заабар” ХХК шалгаран үйл ажиллагаагаа эхлүүлээд байна. Үерийн барилга байгууламжийг энэ оны 4 дүгээр улиралд хүлээлгэн өгнө. Одоогийн байдлаар Улс, Нийслэлийн төсвөөс 4.9 тэрбум төгрөгийн хөрөнгө оруулалтыг дэд бүтцийн ажилд хийгээд байгаа бөгөөд цаашид ч дэд бүтцийн ажлууд шуурхай явагдаж, тэр хэрээр Нийслэл хотын барилгын салбарын хөгжил хурдсах, Налайх дүүрэгт бүтээн байгуулалт хийгдэж шинээр ажлын байр үүсэх гол хөшүүрэг болох юм.

Татварын байгууллагын үйл ажиллагааг бүрэн цахимжуулах, үйлчилгээг илүү чанартай, хүртээмжтэй болгох үүднээс татварын удирдлагын нэгдсэн системийг 2019 оны нэгдүгээр сарын 01-ээс нэвтрүүлэхээр ажиллаж байгаа билээ. Үүнтэй холбогдуулан татвар төлөгч ААН, байгууллагуудыг Үл хөдлөх эд хөрөнгө болон авто тээвэр, өөрөө явагч хэрэгслийн бүртгэлийг баталгаажуулахыг анхааруулж байна. Татвар төлөгч ААН, байгууллагын нягтлан бодогчид e-tax.mta.mn-д хандаж, 3-р улирлын ААНОАТ, ХХОАТ-ын тайлангаа илгээхдээ өөрийн Үл хөдлөх эд хөрөнгө болон авто тээвэр, өөрөө явагч хэрэгслийн бүртгэлийг хөрөнгө нэг бүрээр баталгаажуулна уу. Баталгаажуулаагүй тохиолдолд тайлан илгээгдэхгүй болохыг анхааралдаа авна уу. Үл хөдлөх эд хөрөнгө болон авто тээвэр, өөрөө явагч хэрэгслийн бүртгэлийг дараах зааврын дагуу баталгаажуулна уу.

Завхан аймгийн Мэргэжлийн хяналтын газрын байцаагч алтны агууламж бүхий чулууг устгалгүй өөртөө авч байсан хэргийг АТГ шалгаж байна.

Уг албан тушаалтан аймгийн нутаг дэвсгэр дэх “Зүүн шувуут” хэмээх газарт гар аргаар алт олборлогчдоос алтны агууламж бүхий чулууг хураан авч шийдвэрлүүлэхээр цагдаа нар хүлээлгэн өгснийг журмын дагуу устгаагүй байсан аж.

МЕГ-ын байцаагчийг хахууль авсан гэх хэргийг шүүхэд шилжүүлэх саналтайгаар АТГ-аас прокурорт хүргүүлээд байна.

Татварын ерөнхий газар НӨАТ-ын урамшууллын сугалааны тохирлыг сар бүр зохион байгуулдаг. Есдүгээр сарын сугалааны тохирол энэ сарын 21-ны ням гарагт “Боловсрол” телевизээр орон даяар шууд явагдахаар болжээ. Есдүгээр сарын 1-30 хүртэлх хугацаанд худалдан авалт хийсэн баримтаа энэ сарын 20-ны 23 цаг 59 минутаас өмнө цахим төлбөрийн баримтын системд бүртгүүлсэн иргэд сугалаанд оролцох эрхтэй болох юм. Өнгөрсөн сарын тохирлоор 50 мянган төгрөгийн азтан 19447, 200 мянган төгрөгийн азтан 1970, нэг сая төгрөгийн азтан 196, таван сая төгрөгийн азтан 20, арван сая төгрөгийн нэг азтан нийт 21634 иргэн азтан болсон юм. Харин супер шагналын эзэн тодроогүй.

Энэ удаагийн сугалаагаар супер шагнал 150 сая төгрөг болон нэмэгдсэн.

“Дэлхийн Зөн Монгол” олон улсын байгууллагын “Эрдэнэт” орон нутгийн хөгжлийн хөтөлбөр 17 жилийн хугацаанд нийт гурван цэцэрлэг байгуулжээ.

Мөн 750 гаруй хүүхдийг их, дээд сургуульд сурах сургалтын тэтгэлэгт, 4050 хүүхдэд гадаад, дотоодын эмчилгээнд нь санхүүгийн дэмжлэг олгож,360 орчим өрхийг орон гэрээр хангасан аж.

Эрдэнэт дэх салбар 2001 оны гуравдугаар сард Орхон аймгийн Баян-Өндөр сумын Говил багт анх байгуулагдсан бөгөөд төслийн нэгжийнхэн 17 жилийн түүхэн үйл явдлаа дурсаж хаалтын арга хэмжээгээ зохион байгуулсан юм.

Эрдэнэтчүүдийн хөгжил дэвшил, хүүхэд багачуудын сурах үйлсэд оюуны хөрөнгө оруулалт хийсэн төслийн нэгжийн хамт олонд орон нутгийнхан талархал илэрхийлж, амжилт хүсэв.

“Эрдэнэт” орон нутгийн хөгжлийн хөтөлбөрийн хүрээнд боловсрол, эрүүл мэнд, эдийн засаг, орон нутгийн тогтвортой байдал гэсэн таван чиглэлд төсөл, хөтөлбөр хэрэгжүүлж нийт 21.2 тэрбум төгрөгийн хөрөнгө оруулалт хийжээ.

НИТХ-ын Тэргүүлэгчдийн өнөөдрийн хуралдаанаар “Нийслэлийн эдийн засаг, нийгмийг хөгжүүлэх үндсэн чиглэл”-ийн 2017 оны биелэлт, 2018 оны хэрэгжилтийн явц, ирэх оны төслийг батлах тухай хэлэлцэж НИТХ-ын ээлжит хуралдаанд оруулж хэлэлцүүлэхээр тогтлоо.

Үндсэн чиглэлтэй холбоотойгоор НИТХ-ын дарга С.Амарсайхан, “Үндсэн чиглэлд тусгасан зарим ажлыг хэн хариуцаж хийж, ямар үр дүн гарч байгаа, цааш яаж хийж бүтээн байгуулалт хэрхэн өрнөх талын мэдээллийг солилцдоггүй, гүйцэтгэл дээр ажлын уялдаа холбоо байхгүй байна. Үндсэн чиглэлд тусгасан ажлууд дээр, ялангуяа бүтээн байгуулалтын ажлууд дээр тооцоо, судалгаа, мэргэжлийн багийн оролцоо дутагдаж байна” хэмээн шүүмжлэлттэй хандаж байв. Өнөөдрийн хуралдаанаар мөн “Барилга байгууламж, нийтийн эзэмшлийн эд хөрөнгө акталж, нийслэлийн өмчийн бүртгэлээс хасах”, “Хонхор”, “Тэрэлж, “Гачуурт” тосгоны хэсэгчилсэн төлөвлөгөөг батлах, НИТХ-ын Нийгмийн бодлогын хорооноос оруулж ирсэн хүүхэд багачуулын “Уншлагыг дэмжих-2021” төслийг дэмжих, НИТХ-ын ээлжит 19-р хуралдааныг зарлах, шашны байгууллагын зөвшөөрлийн хугацааг сунгах зэрэг асуудлыг хэлэлцлээ. “Хонхор”, “Тэрэлж, “Гачуурт” тосгонуудын хувьд хотын ерөнхий төлөвлөгөөний дагуу өргөтгөн хөгжүүлэх талаар Нийслэлийн Хот төлөвлөлт, ерөнхий төлөвлөгөөний газраас танилцуулж, Нийслэлийн Орон сууцны корпорациас оруулж ирсэн энэ талын хэсэгчилсэн ерөнхий төлөвлөгөөг НИТХ-ын Тэргүүлэгчид баталсан тогтоол гаргалаа.

Харилцаа холбооны зохицуулах хорооноос цахим орчны хүүхэд хамгаалал, зохистой хэрэглээг дэмжих зорилгоор эцэг, эх, багш нарт зориулсан хүүхдийн ухаалаг гар утасны хэрэглээнд хяналт хийх боломж бүхий “Интернетийн шүүлтүүрийн аппликейшн” хөгжүүлэх уралдаан, Үндэсний OTT үйлчилгээг бий болгох зорилгоор Интернетэд суурилсан харилцааны аппликейшн буюу “OTT communications” төрлийн аппликейшн хөгжүүлэх уралдаануудыг 2018 оны 10-р сарын 01-нээс 2018 оны 12-р сарын 07-ийг хооронд хүлээн авахааар зарлаад байна. Уралдааны шагнал, урамшуулал: Нийт 3–н байр уралдаан тус бүрээр шалгаруулна.

“OTT Communications” аппликейшн:

Тэргүүн байр: Өргөмжлөл 9,000,000 төгрөг

Дэд байр: Өргөмжлөл 3,000,000 төгрөг

Гуравдугаар байр: Өргөмжлөл 2,000,000 төгрөг

Интернэт шүүлтүүрийн аппликейшн:

Тэргүүн байр: Өргөмжлөл 9,000,000 төгрөг

Дэд байр: Өргөмжлөл 3,000,000 төгрөг

Гуравдугаар байр: Өргөмжлөл 2,000,000 төгрөг

Уралдаанд тэргүүн байранд шалгарсан оролцогчтой тус хороо хамтран үндэсний хэмжээнд төслийг хэрэгжүүлэх бөгөөд аппликейшны зохиогчын эрхийг тус хороо эзэмшинэ.

Тавигдах шаардлага

Аппликейшний эхний хувилбар болон цаашид хөгжүүлэх төслийг бэлтгэсэн байна.

Дэлгэрэнгүй мэдээллийг: http://www.crc.gov.mn/k/2Uw