Month: September 2018

Монгол Улсын Шадар сайдын Булган аймгийн Засаг даргатай байгуулсан үр дүнгийн гэрээний дагуу тус аймагт Гамшгаас хамгаалах команд штабын сургуулийг 2018 оны 09 дүгээр сарын 13-14-ний өдрүүдэд зохион байгуулна. Сургуулийн бэлтгэл ажлыг хангуулах ажлын хэсэг өнөөдрөөс Булган аймагт ажиллаж байна.

Гамшгаас хамгаалах команд штабын сургуулийн удирдагчаар ОБЕГ-ын дэд дарга, хурандаа Б.Ууганбаяр ажиллаж байгаа бөгөөд ОБЕГ-аас томилогдсон ажлын хэсгийн гишүүд аймгийн Онцгой комисс, нутгийн захиргааны байгууллага болон орон нутгийн гамшгаас хамгаалах албад, мэргэжлийн ангийн удирдах бүрэлдэхүүнд сургуулийн бодлого, төлөвлөгөөг танилцуулан сургуулийн бэлтгэл ажлыг хангуулан ажиллаж байна гэж Онцгой байдлын ерөнхий газраас мэдээллээ.

Энэ сарын 2-ноос 8-ны өдрүүдэд Киргизстан улсын Чолпан-Ата хотноо “Дэлхийн нүүдэлчдийн гуравдугаар их наадам” зохион байгуулагдаж, дүнгээ гаргажээ. Нийт 80 улсын 2000 тамирчин, спортын 37 төрлөөр өрсөлдсөн бөгөөд манай улсаас 80 тамирчин оролцсон байна.

Энэ удаагийн наадмын хөтөлбөрт анх удаа монгол үндэсний бөхийн барилдааныг багтаасан бөгөөд эхний тэмцээнд Монгол Улсын начин Доржийн Анар түрүүлж, Өвөрмонголын бөх Алтансүх үзүүрлэжээ.

Энэ удаагийн наадамд зохион байгуулагч Киргизстан улсын баг тамирчид илт давамгай амжилтаар тэргүүлж, Казакстан улс дэд байр, ОХУ гутгаар байрт тус тус шалгарсан байна. Манай улсын баг тамирчид есдүгээрт жагсав. Монголчууд хоёр алт, дөрвөн мөнгө, 11 хүрэл медаль хүртжээ.

Энэ жилийн “Автомашингүй өдөр”-ийг “Автомашинаас татгалзаж, унадаг дугуй, алхалтыг дэмжье” уриан дор есдүгээр сарын 22-ны бямба гарагт зохион байгуулахаар төлөвлөжээ.

“Автомашингүй өдөр “-өөр Улаанбаатар хотын төвийн зарим гудамж замын хөдөлгөөнийг хязгаарлаж өглөөний 07:00 цагаас оройн 19:00 цагийн хооронд хаана.

Дэлхийн улс орнууд жил бүр автомашингүй өдрийг уламжлал болгон тэмдэглэдэг бөгөөд энэ жишгийн хүрээнд нэг ч гэсэн өдөр утаагүй, эрүүл агаараар амьсгалж, явган алхаж эрүүл мэнддээ анхаарахыг уриалан манай улс энэхүү арга хэмжээг знайм дахь жилдээ зохион байгуулж байна.

Энэ өдөр нийслэлийн иргэд авто машинаас татгалзаж, явган алхах, унадаг дугуйгаар зорчих зэрэг ажлыг зохион байгуулах юм. Тусгай дуут болон гэрлэн дохиогоор тоноглогдсон албан үүргээ гүйцэтгэж яваа шуурхай албаныхаас бусад тээврийн хэрэгсэлд уг хязгаарлалт хамаарах аж.

Баянзүрхийн товчоо орчмын авто замын өргөтгөл шинэчлэлтийн ажил эхэллээ. Зам барилгын ажил эхэлж байгаатай холбогдуулан 2018 оны есдүгээр сарын 3-ны өдөр Баянзүрхийн товчоог буулгасан бөгөөд 15 хоногийн дотор авто замын ажил хийгдэж, байнгын ашиглалтад оруулахаар төлөвлөжээ.

Энэ дагуу энэ сарын 11-21-ний 23:00 цаг хүртэл хугацаанд Улиастайн уулзвараас Баянзүрхийн товчоо, Богд уулын арын замын уулзварын хэсгийн тээврийн хэрэгслийн хөдөлгөөнийг түр хязгаарлахаар боллоо. Эхний ээлжид Баянзүрхийн товчооноос Богд уулын арын уулзвар хүртэлх 800 м авто замд өргөтгөл, шинэчлэлтийн ажил хийгдэж энэ сарын 15-нд нээнэ.

Иймд иргэд Төмөр замын аюулгүйн зурвас ашиглаж Скай ресортын авто замтай холбогдох хэсгийн авто замаар зорчих боломжтой.

“Улаанбаатар дулааны сүлжээ” компани өвөлжилтийн бэлтгэл ажлын засвар үйлчилгээнүүдээ хийж дуусгажээ. Орон сууцны халаалтыг энэ сарын 15-наас өмнө, аж, ахуйн нэгж албан байгууллагуудынхыг 10 дугаар сарын 1-нээс өмнө өгөхөөр ажиллаж байгааг мэдээллээ. Үүний өмнө есдүгээр сарын 15-наас өмнө дулаан өгдөггүй байсан. Тэгвэл энэ жилээс залгахад бэлэн болсон шугамууд дээрээ дулаан авах хүсэлтээ гаргасан хэрэглэгчид тоолуураар дулааныг нь өгч эхэлжээ.

Тухайлбал, Нийслэлийн хэмжээнд хүсэлтээ гаргасан цэцэрлэг, сургууль, орон сууц, аж ахуйн нэгжүүд нийтдээ 117 газрыг дулаанд холбосон байна. Хэрэглэгчид дулаанаа авах гэж есдүгээр сарын 15-ныг хүртэл хүлээх шаардлагагүйгээр хүссэн үедээ дулаанаа тоолуураар авч бас дулаанаа хэрэглээгээрээ багасгаж ч болох аж. 2018-2019 онд Улаанбаатар хотын хэмжээнд гэрээгээр 2,397 хэрэглэгч, иргэн аж ахуйн нэгжийг дулаанаар хангахаар төлөвлөсөн байна.

‘’Иргэдийн оролцоотой амьдрах орчныг сайжруулах жил’’-ийн хүрээнд дүүргийн Засаг даргын Тамгын газар болон “Утааны эсрэг ээж аавууд” ТББ-аас агаарын бохирдлыг бууруулах зорилгоор “Байшингаа дулаалцгаая” сургалт судалгааны төслийг санаачлан зохион байгуулах гэж байна.

Тус сургалт 2018 оны есдүгээр сарын 12-ны өдөр дүүргийн ЗДТГ-ын Чуулганы танхимд нээлтээ хийх бөгөөд есдүгээр сарын 14-ний өдрийг хүртэл үргэлжлэх аж.

Та бүхэн уг сургалтад хамрагдсанаар дулааны алдагдлаа хэмжүүлж, мэргэжлийн зөвлөгөө авах боломжтой юм. Иймд иргэн, аж ахуй нэгж та бүхэн тус арга хэмжээнд идэвхтэй оролцоно уу.

Холбоо барих утас: 88002839, 96221111

ОХУ-ын Сахагийн «Триумф» ордонд есдүгээр сарын 6-8-нд хуучин ЗХУ-ын гавьяат дасгалжуулагч, нэрт дасгалжуулагч Дмитрий Коркины нэрэмжит чөлөөт бөхийн эрэгтэйчүүдийн олон улсын тэмцээн болж манай 8 бөх медаль хүртжээ.