Month: September 2018

Ардын уран зохиолч, төрийн гурван удаагийн шагналт, зууны манлай соён гэгээрүүлэгч, академич Цэндийн Дамдинсүрэнгийн мэндэлсний 110 жилийн ой тохиож байна. Дорнод аймгийн Матад суманд төрсөн түүний алдар гавьяаг мөнхжүүлэх, намтар, уран бүтээлийг сурталчлан таниулах, ирээдүй хойч үедээ өвлүүлэн үлдээх зорилгоор тус аймгийн удирдлагууд өнөөдөр их эрдэмтний хөшөөнд цэцэг өргөж, хүндэтгэл үзүүлжээ. Мөн Соёлын гавъяат зүтгэлтэн Л.Хэрээ, соёлын тэргүүний ажилтан Ж.Цагаан нарын санаачлагаар их эрдэмтний 110 жилийн ойд зориулан урласан цагаан толгойн гэрэлт самбарын нээлтийг хийжээ.

НЦГ-ын МШГ-ын хулгайлах гэмт хэрэгтэй тэмцэх хэлтсийн алба хаагчид 2018.09.05-06-г шилжих шөнө Өвөрхангай аймгийн Хархорин сум, Ганган орхон багын нутаг дэвсгэрт байрлах “Манлай-тод” захаас монет мөнгөн эдлэл, 70 орчим гар утас хулгайлсан этгээдийг илрүүлэн дайчлан баривчилжээ.

Уг хэргийг нийслэл хотод орших суух хаягтай 30 орчим настай Б үйлдсэн болохыг тогтоон шалгалтын ажиллагаа үргэлжилж байна. Хэрэгт холбогдон шалгагдаж байгаа этгээд нь дээрэм болон хулгайлах төрлийн гэмт хэрэгт өмнө нь хэд хэдэн удаагийн ял шийтгэл эдэлж байсан аж.

Улиастайн гүүрний уулзвараас Баянзүрхийн товчоо хүртэл авто зам засварын ажил хийгдэхтэй холбоотойгоор тухайн гудамж замаар дайран өнгөрдөг нийтийн тээврийн үйлчилгээний таван чиглэлийн замналд өөрчлөлт орж байна. Үүнд:

Тус авто замын засвар, шинэчлэлтийн ажлыг 2018 оны есдүгээр сарын 11-ний 23:00 цагаас 09 дүгээр сарын 21-ний 23:00 цаг хүртэл хугацаанд тээврийн хэрэгслийн хөдөлгөөнийг түр хязгаарлаж хийх тул зорчигч та бүхэн дээрх зураглалын дагуу зорчилтоо төлөвлөнө үү.

Нийтийн тээврийн үйлчилгээтэй холбоотой санал, хүсэлтийг тус газрын 70044040 болон 11-323176 дугаарын утсаар 24 цагийн турш хүлээн авч, шуурхай шийдвэрлэнэ гэж нийслэлийн Тээврийн газраас мэдээллээ.

Германы эрдэмтэд нэгэн гайхалтай нээлтийг хийсэн нь хүний бие эрхтэнтэй яг ижил хэлбэртэй бол түүндээ эергээр нөлөөлдөг хүнсний ногоо, жимсний ач тус юм. Хүн төрөлхтөн өөрөө байгалийн бүтээл учир эд эрхтнийх нь үйл ажиллагааг дэмжих хүнсийг байгаль дэлхий өөрөө ижилхэн байдлаар бүтээсэн байдаг ажээ. Германы эрдэмтэд хүний эд эрхтэнтэй ижил хэлбэртэй жимс, ногоо үнэхээр үр дүнтэй байдаг эсэхийг туршжээ. Гурван сарын туршилтанд оролцсон хүмүүс өвдөж, зовиурладаг эд эрхтэнтэйгээ ижил хэлбэртэй ногоо жимсийг хэрэглэсэн байна. Үр дүн нь гайхалтай эерэг, басхүү үр дүн өндөртэй гарсан гэдэг.

Хөндлөн зүссэн лууван хүний нүдний солонгон бүрхүүлийн бүтэцтэй ижил харагддаг. Лууван нүдний цусны эргэлтэнд сайнаар нөлөөлж, нүдний цагаа үүсэх, нүдний эвэрлэг бүрхэвчийн эмгэгт өртөх эрсдлийг бууруулдаг.

Улаан лоольд агуулагддаг lycopene нь зүрхний элдэв эмгэгээр өвчлөх эрсдлийг бууруулдаг болох нь анагаах ухаанд хэдийнээ нотлогдсон билээ.

Уушгины жижиг гуурсанцаруудын төгсгөлд байх альвеолууд гэж нэрлэгддэг олон тооны өчүүхэн жижиг агаарт цулцангууд нь усан үзмийн хонгорцогтой адил байдаг.Усан үзмийн үрийн ханд нь үрэвслийн эсрэг мөн уушгины үйл ажиллагааг дэмжиж эзлэхүүн тэлэхэд тусалдаг. Сайн чанарын усан үзэм тогтмол хэрэглэснээр астма, бронхит зэрэг амьсгалын замын өвчин тусахаас сэргийлж чадна.

Тархины үйл ажиллагаа дэмжих, ой тогтоолтоо сайжруулахын тулд хушга идэхийг зөвлөх байна. Хушга нь омега3-аар баялаг учир алцгеймер өвчнөөс урьдчилан сэргийлэхийн сацуу тархины хөгшрөлтийг удаашруулдаг ид шидтэй.

Хоолны шингэцийг сайжруулахаас эхлээд цагааны гааны ходоодонд үзүүлэх эерэг нөлөөг дурдаад байвал мундахгүй олон. Азиуд цагаан гааны ид шидийг 2000 жилийн тэртээгээс мэдэж хүнсэндээ хэрэглэж ирсэн байдаг. Зөвхөн ходоод ч гэлтгүй шулуун гэдэсний хорт хавдраас сэргийлэхэд цагаан гааг хэрэглэдэг гэдэг.

Цитрусын төрлийн жимс нь нарны цацраг мэт харагдах дотоод бүтцээрээ хөхний сүүн булчирхайтай ижил. Энэ төрлийн жимс хөхний тунгалгийн булчирхайн үйл ажиллагааг дэмждэг.

Инжир жимсийг үргүйдлийг эмчилдэг гэдэг. Хэдийгээр судалгаагаар батлагдаагүй ч шээс хөөх, бөөрний чулуунаас хамгаалдаг чанар нь инжир жимсийг нөхөн үржихүй, бодисын солилцоонд эерэгээр нөлөөлдөг гэж үзэн инжир жимсийг зохистой хэмжээгээр хэрэглэхийг зөвлөдөг эмч нар цөөнгүй бий.

Чихэрлэг төмсөнд агуулагдах байгалийн цэвэр чихэр нь нойр булчирхайн үйл ажиллагаанд сайнаар нөлөөлж, бие дэх сахарын хэмжээг зохицуулдаг байна.

Бөөрний үйл ажиллагааг сайжруулахад хар, бор өнгөтэй хүнсний бүтээгдэхүүн сайн байдаг.Тэдний дундаас хүрэн шош нь найрлагадаа төмөр агуулдаг учраас цус төлжүүлдэг учир бөөрөнд онцгой сайн аж.

Цоохор майлзыг хүнсэндээ тогтмол хэрэглэснээр ясны сийрэгжилтээс айлтгүй болно. Зөвхөн цоохор майлз гэлтгүй чинцай, гишүүнэ зэрэг ижил хэлбэртэй ногоонууд нь бүгд ясны бөх бат чанарт онцгой нөлөөлж бэхжүүлдэг.

Мөөгөнд агуулагддаг Д аминдэм ясны эрүүл мэндэд сайнаар нөлөөлдөг. Нэн ялангуяа чихний хамгийн эмзэг, жижиг яс буюу хүний тархинд дуу чимээ дамжуулахад онцгой үүрэг гүйцэтгэдэг хэсэгт маш сайн гэдэг.

Авокадод агуулагддаг Е, А аминдэмүүд нь эмэгтэйчүүдийн шээс бэлгийн тогтолцоонд сайнаар нөлөөлдөг. Ацтекаар төмсөг гэсэн утга бүхий авокадо жимсийг бэлгийн сэрэл өдөөгч гэх нь ч бий.

Хичээлийн шинэ жил эхэлсэнтэй холбоотой авто замын ачаалал эрс нэмэгдсэн. Үүнтэй холбоотой зарим зохицуулалтыг нийслэлийн Засаг дарга бөгөөд Улаанбаатар хотын дарга С.Батболд хийлээ. Нийслэлийн Засаг даргын орлогч П.Баярхүүгээр ахлуулсан Авто замын түгжрэлийг бууруулах ажлын хэсгийн хуралдаанд хотын дарга оролцож зарим шийдвэрийг гаргасан байна.

Гадаад харилцааны сайд Д.Цогтбаатар 2018 оны 9 дүгээр сарын 9-10-ны өдрүүдэд ОХУ-ын Алс Дорнодын бүс нутагт ажлын айлчлал хийж байна. Айлчлалын хүрээнд Д.Цогтбаатар сайд Хабаровскийн хязгаарын Амбан захирагч В.И.Шпорттой 2018 оны 9 дүгээр сарын 9-ний өдөр уулзалт хийв.

Уулзалтын үеэр Монгол Улс, ОХУ-ын Хабаровскийн хязгаарын харилцаа, хамтын ажиллагааг хөгжүүлэх ихээхэн нөөц боломж байгааг талууд тэмдэглэхийн сацуу цаашдын хамтын ажиллагааны чиглэлийн талаар санал солилцов. Тухайлбал, Монгол Улсын уул уурхайн бүтээгдэхүүнийг ОХУ-ын Алс Дорнод, Хабаровскийн хязгаарын далайн боомтуудыг ашиглан Ази, Номхон далайн бүс нутгийн орнуудад нийлүүлэх ажилд хамтран ажиллах талаар ярилцаж, бодит хамтын ажиллагааг эхлүүлэх санал, хэлбэрийг хамтран боловсруулахаар тохиролцов. Уг ажлыг харилцан ашигтай байх зарчимд тулгуурлан хэрэгжүүлэхэд орон нутгийн удирдлагын зүгээс бүхий л дэмжлэг үзүүлж ажиллахаа Хабаровскийн хязгаарын Амбан захирагч В.И.Шпорт нотлов. Түүнчлэн Хабаровскийн хязгаарт Монгол Улсын мах, махан бүтээгдэхүүний нийлүүлэлтийг нэмэгдүүлэх, цаашид хоёр талын хамтын ажиллагааг соёл, боловсрол, спорт, эрүүл мэндийн салбарт хамтран хөгжүүлэх боломжийн талаар санал солилцлоо.

Гадаад харилцааны сайд Д.Цогтбаатар 2018 оны 9 дүгээр сарын 10-ны өдөр ОХУ-ын Хабаровскийн хязгаарын Ванино далайн боомтын удирдлага болон уг боомтод үйл ажиллагаа явуулж буй аж ахуйн нэгжүүдийн удирдлагатай уулзаж, хамтын ажиллагааны талаар санал солилцоно.

Италид мууруудад зориулсан зочид буудал нээгдэж, үйлчлүүлэгчиддээ үзвэр үйлчилгээний танхим, тусгай өрөөнүүд, ахлах тогоочийн бэлтгэсэн тусгай хоолны цэс зэргийг санал болгож байгаа талаар “РИА Новости” агентлаг мэдээлжээ.

Зочид буудалд байрлах үнэ харьцангуй бага аж. Нэг өдрийн 15 еврогоор тус зочид буудалд тухлах боломжтой бөгөөд түүнд бүх төрлийн үйлчилгээ, мөн хоол багтдаг байна. Зочид буудлын эздийн хэлж буйгаар, таван одтой энэхүү зочид буудал нь бусад, ялангуяа онцгой анхаарал, халамж тавьдаггүй, төмөр торонд байдаг мууранд зориулсан халамжийн газруудаас тэс өөр аж.

Тус зочид буудлаар 3-4 сараас дээш настай муурууд үйлчлүүлэх боломжтой юм байна. Бусад зочдын аюулгүй байдлыг хангах үүднээс мууруудад гэрийн тэжээвэр, тарилга хийлгэсэн, гэрчилгээтэй байх шаардлага тавьдаг ажээ.

Монгол Улсын Ерөнхийлөгч Х.Баттулга ОХУ-ын Владивосток хотноо есдүгээр сарын 11-нээс 13-ны өдрүүдэд зохиогдох Дорнын эдийн засгийн IV чуулга уулзалтад оролцохоор мордлоо.

ОХУ-ын Ерөнхийлөгч Владимир Владимирович Путины санаачлагаар дөрөв дэх жилдээ зохион байгуулагдаж буй энэ удаагийн чуулга уулзалтад БНХАУ-ын дарга Си Зиньпин, Япон Улсын Ерөнхий сайд Шинзо Абэ, БНСУ-ын Ерөнхий сайд Ли Наг Ён нар оролцох ажээ.

Монгол Улсын Ерөнхийлөгч Х.Баттулга тус эдийн засгийн чуулга уулзалтын нэгдсэн хуралдаанд оролцож, ОХУ-ын Ерөнхийлөгч В.В.Путин болон бусад орны төрийн тэргүүн нартай хоёр талын уулзалт хийх юм байна.

Энэхүү чуулга уулзалтад оролцох нь Монгол Улсад хөрөнгө оруулах, харилцан ашигтай хамтран ажиллах ихээхэн нөөц бололцоо байгааг ОХУ болон гуравдагч орнуудын төрийн болон хувийн хэвшлийн компаниудын төлөөлөгч нарт таниулах, дэлхий, бүс нутгийн эдийн засгийн хөгжлийн ирээдүйн чиг хандлага, бусад улс орны бодлого, байр суурийн талаар мэдээлэл авах чухал ач холбогдолтой юм.