Month: September 2018

Дорноговь аймгийн Замын-Үүд суманд оршин суух хаягтай Д.Сэржмядаг охин 2017 оны 11 дүгээр сарын 02-ны өдрийн 12 цагийн орчимд гэрээсээ гарч яваад одоог хүртэл сураггүй байгаа юм.

Цагдаагийн байгууллагаас уг хэрэгт мөрдөн шалгах ажиллагааг тасралтгүй явуулсан боловч охины сураг олдоогүй хэргийг илрүүлэхэд чухал ач холбогдол бүхий баримт мэдээ өгсөн иргэний мэдээллийг үнэлж авахаар болжээ.

Орон нутагт малын хулгайн гэмт хэрэг буурахгүй байгаа талаар албаныхан мэдээлж байна.

Өнгөрсөн онд малын хулгайн гэмт хэрэг улсын хэмжээнд 901 бүртгэгдсэн бол энэ оны эхний зургаан сарын байдлаар 600 гаруй хэрэг бүртгэгдэн шалгагдаж байгаа ажээ.

Уг нь малын хулгайчидтай тэмцэхийн тулд хууль эрх зүйн зохицуулалт сайжруулж байж гэмт хэргийн тоо буурах хандлагатай байгаа юм. Гэвч арга хэлбэр улам нарийссан байгаа гэнэ.

Иймд малчин та өөрийн эрдэнэт мал сүргээ байнгын хариулгатай байлгаж, анхаарлаа алхам ч бүү холдуулаарай. Мал сүргээ хамгаалах нь зөвхөн цагдаагийн байгууллагын биш иргэн бүрийн үүрэг оролцоо чухал гэдгийг ойлгоорой.

Хэнтий аймгийн Мэргэжлийн хяналтын газраас тус аймгийн Баянхутаг, Галшар суманд шонхор шувуу барьж байгаа Арабын Бүгд найрамдах Сири Улсын дөрвөн отгийн үйл ажиллагаа, холбогдох журмын хэрэгжилтэд хяналт тавин ажиллав.

Хяналт шалгалтаар эдгээр отгууд нь Монгол Улсын нутаг дэвсгэрт идлэг шонхор шувуу барих, арчлах, тээвэрлэх, экспортод гаргах үйл ажиллагаанд хяналт тавих журмын дагуу отог бүр орчуулагч, сум орон нутгаас шонхор барих, буцааж тавих тохиолдолд хяналт тавих үүрэг бүхий ажилтан сумаас томилуулан аваагүй, орон нутагтай гэрээ байгуулаагүй зэрэг зөрчил дутагдал илэрч, Зөрчлийн хэрэг үүсгэсэн байна.

Түүнчлэн зэргэлдээ аймаг, сумдаас Баянхутаг, Галшар сумдад малын халдварт өвчин тараах эрсдэлийг дагуулж байгаа аж.

Монголын Үндэсний музейн үзэсгэлэнгийн танхимд өнөөдөр “Тал нутгийн соёл, шашны харилцаа ба үсэг бичгийн дурсгалууд: Монгол-Японы хамтарсан Бичээс төслийн 22 жилийн үр дүнгээс” үзэсгэлэн нээлтээ хийлээ.

Монгол нутагт монгол, түрэг, уйгур, хятан, нанхиад, перс, араб, согд, баракми зэрэг олон хэлээр хаданд бичсэн, гэрэлт хөшөөнд сийлсэн эртний бичгийн арвин дурсгал өдгөө болтол хадгалагдан иржээ. Монгол-Японы хамтарсан “Бичээс” төслийн баг 1994 оноос хойш эдгээр янз бүрийн хэлээр бичиж үлдээсэн хадны бичээс, гэрэлт хөшөө зэрэг бичгийн дурсгалуудыг судалж байна. Дэлхийн хамгийн эртний байж болох хаданд сийлсэн бичээсийг Дундговь аймгийн Хүрэн хайрхан уулаас олсон бөгөөд хаданд цавчиж сийлсэн нанхиад бичээсийг манай тооллын 89 онд буюу 1929 жилийн өмнө бичсэнээрээ одоогоор хамгийн эртний хадны бичигт тооцогдож байна.

“Бичээс” төслийн бас нэг сонирхолтой ховор олдвор бол хусны үйсийг тусгайлан боловсруулж, түүн дээр бичсэн монгол номууд юм. Уг төслийн А.Очир, М.Эрдэнэболд, К.Мацуда, Т.Мураока, Т.Мацукава нар 2010, 2011 онд Булган аймгийн Дашинчилэн сумын Харбух балгаснаас 100 гаруй хуудас үйсэн ном олж, Япон улсад сэргээн засварлуулаад, өдгөө уншиж тайлан, тайлбар, удиртгалын хамт хэвлүүлэх гэж байна. Үйсэн ном бүтээх арга бол монголчуудын үндэсний технологи мөн бөгөөд тэр технологийг дээрх үйсэн номууд бидний үед тээн авчирсанаараа маш үнэ цэнтэй аж.

Энэхүү үзэсгэлэнд 20 гаруй жилийн судалгааны дүнд шинээр нээн илрүүлж, тайлан уншиж судалсан 20-иод гэрэлт хөшөөний эх бичээсийн хуулбарыг анх удаа нэгэн дор үзэгч олонд толилуулж байна.