Month: September 2018

Энэ бямба гараг буюу есдүгээр сарын 15-ны бямба гарагт Маршалын гүүрний хойд уулзвар-Дүнжингаравын уулзвар-Улиастайн уулзвар хүртэлх авто замын хөдөлгөөнийг 08:00-17:00 цагийн хооронд түр хаана.

Хөгжлийн бэрхшээлтэй иргэдэд спортоор хичээллэх боломжийг бий болгох, тэдний өөртөө итгэх итгэлийг спортоор дамжуулан нэмэгдүүлэх зорилготой ‘’Итгэл найдвар, боломж-Улаанбаатар’’ хандивын марафон гүйлтийн тэмцээн энэ өдөр болох бөгөөд тэмцээнтэй холбогдуулан замын хөдөлгөөнийг түр хаана гэж Замын цагдаагийн албанаас мэдээллээ.

Завхан аймгийн Отгон сум Отгонтэнгэр хайрханы бэлд гурван иргэн хулгай хийж, гал нээн нутгийн иргэнийг буудан шархдуулсан мэдээлэл энэ сарын 10-ны өдөр тус аймгийн цагдаагийн хэлтэст ирсэн байна. Хэргийг тодруулбал, тус нутгийн уугуул гурван иргэн Отгонтэнгэр хайрханы бэлд орших Бадархундага нууранд өргөл барьц өргөж, мөргөл үйлдэхээр очиход нуураас усанд шумбахад хэрэглэдэг зориулалтын хувцас хэрэглэлтэй гурван этгээд шуудайтай зүйл барин гарч ирсэн байна. Нутгийн иргэд тэднийг нууранд өргөсөн мөнгөн аяга, бусад эд зүйлсийг хулгайлан шуудайлж гарч ирснийг мэдсэн бөгөөд тэднийг барихаар хөөжээ. Гэтэл гурван этгээд нутгийн иргэдийн машиныг унан зугтжээ. Улмаар нэг этгээд нь тэдэн рүү гал нээсэн байна. Бууны суманд иргэн О өртөж хүзүүн тус газраа шархдаж сумын эмнэлэгт хүргүүлэн, цагдаагийн байгууллагад дуудлага өгсөн аж. Дуудлагын дагуу цагдаагийн алба хаагчид хэргийн газар очиж, хоёр этгээдийг нь баривчилсан бол гал нээсэн гэх этгээд нь зугтаж амжжээ. Зугтсан этгээдийг дараа өдөр нь буюу энэ сарын 11-ний 15 цагийн орчимд Отгонтэнгэр хайрханы ойролцоогоос илрүүлэн саатуулсан байна. Энэ хэргийг одоогоор Завхан аймгийн цагдаагийн байгууллагаас шалгаж байна. Шалгалтын явцад хэрэг үйлдсэн гурван этгээдийн хоёр нь казах иргэд байсан гэнэ. Шархадсан иргэний хувьд аймгийн нэгдсэн эмнэлэгт анхан шатны эмчилгээ үйлчилгээ аван өчигдөр орой онгоцоор Улаанбаатар хот руу хүргэгдэн ирсэн байна. Отгонтэнгэр хайрханыг сүсэглэн зорьж ирсэн хүмүүс Бадархундага нууранд алт, мөнгөн эдлэлээр өргөл барьц өргөдөг. Үүнд шунасан этгээдүүд ийнхүү Бадар хундага нуурнаас хулгай хийжээ.

З.СУВД

УИХ-ын гишүүн асан Д.Гантулгад холбогдох шүүх хурал өнөө өглөө 10.30 цагт эхэлсэн бөгөөд яг одоо БЗД-ийн эрүүгийн хэргийн анхан шатны шүүхэд хаалттай үргэлжилж байна.
Хурлын өмнө хохирогчоор оролцож байгаа Ч.Наранзаяагийн эгч Ч.Саранзаяа шүүх хурлын хуваарь харах гэж явсан Д.Гантулгын хэвлэлийн төлөөлөгч Ц.Одгэрэлийн бие болон эд зүйлсэд нь халдаж хэл амаар доромжилжээ. Эх сурвалжийн хэлж байгаагаар Ч.Саранзаяа дүүгийнх нь зургийг авлаа гэж хардан Ц.Одгэрэлийн гар утсыг булаахыг оролдож, биед нь халдсан аж. Энэ үеэр тус шүүхийн байрыг хамгаалж байсан цагдаа нар гарч ирж энэ үйлдлийг нь таслан зогсоож, Д.Гантулгын хэвлэлийн төлөөлөгчийн утсанд тэр даруй үзлэг хийсэн бөгөөд хохирогч Ч.Наранзаяагийн зураг байгаагүй нь тогтоогдсон байна.

Ус сувгийн удирдах газар нь Улаанбаатар хотын хүн амыг унд ахуйн усаар хангаж, гарсан бохир усыг нь татан зайлуулах эрхэм үүргийг хүлээн ажилладаг. Улаанбаатар хотын хүн амыг унд, ахуйн цэвэр усаар хангадаг 619 км шугам сүлжээ байдгаас 310 км нь ган, шилээр хүчитгэсэн хуванцар, 251 км нь хуванцар, 40 км нь ширмэн материалаар хийгдсэн байдаг.

Эдгээр шугам сүлжээ нь 1959 оноос хойш ашиглагдаж ирсэн 50-60 жилийн насжилттай болж, шугам сүлжээнд гэмтэл саатал ихээр гарч байна. Иймээс цэвэр усны шугамыг сэргээн засварлах шаардлага зүй ёсоор тулгарч байгаа учраас эдгээр шугам сүлжээг шуудуу ухалгүйгээр шинэчлэн засварлах Дэлхийн тэргүүний технологийг Монгол Улсад анх удаа нэвтрүүлэх ажлыг эхэлж байна.

Энэхүү төслийг Австри улсын Засгийн газрын 7 сая еврогийн хөнгөлөлттэй зээлээр санхүүжүүлж, тус Улсын RTI компани машин механизм, тоног төхөөрөмж, шугам доторлох багаж хэрэгсэл, материал зэргийг ханган нийлүүлсэн.

Нийслэлийн Засаг дарга бөгөөд Улаанбаатар хотын Захирагч С.Батболд “Австри Улсын Засгийн газрын хөнгөлөлттэй зээлийн хүрээнд энэ төсөл хэрэгжиж байгаа. Улаанбаатар хотын иргэдийг цэвэр усаар хангах, шугам сүлжээг цэвэрлэх ажилд шинэ техник технологийг нэвтрүүлж байгаагаараа энэ төслийн онцлог оршиж байна. Зун бүр гудамж, замыг ухаж, сэтэлж иргэдийн бухимдлыг төрүүлдэг байсан. Шинэ технологийг нэвтрүүлснээрээ зун бүрт суваг, шуудуу ухаж дэд бүтцээ эвдэхгүй байх боломжтой болж байна.

Мөн зарим орон сууцны хорооллын ундны ус зэвтэй гарч байгаа нь иргэдийг бухимдуулж байгаа. Энэ төслийг хэрэгжүүлснээр ундны усыг эх үүсвэрээсээ хэрэглэгчид хүртэл ямар нэгэн завсрын бохирдолгүйгээр хүргэх бололцоотой. Цаашдаа бид орон сууцны хороолол дундах шугамыг стандартад нийцсэн цайртсан, ган шугам ашиглуулах шаардлагатай байгаа” хэмээлээ.

Шугам хоолойг шуудуу ухалгүй доторлох шинэ технологи болохClose Fitболон CIPP(Cured In Place Pipe) арга нь зам талбайг гэмтээж хөндөлгүй, газар шорооны ажил хийлгүйгээр шугаман дээрх хоёр худгийн хооронд полиэтилин резинэн материалыг шугаман дотор сүвлэж доторлоно.

Үүнд:

ØШугамын ашиглалтын хугацааг нэмэгдүүлнэ

ØУсны алдагдлыг бууруулна

ØТүгээх шугамын усны чанар дахь механик нөлөөг багасгана

ØШугамын даралтыг нэмэгдүүлж цахилгааны зардлыг бууруулна

ØЗам талбай, ногоон байгууламжийг сүйтгэхгүй, газар шорооны ажил хийгдэхгүй учраас Байгаль орчин ээлтэй зэрэг ач холбогдолтой.

Ус сувгийн удирдах газрын холбогдох ажилтнууд Австри улсад энэхүү шинэ техник технологийг эзэмших сургалтанд хамрагдаж шинэ дэвшилтэт технологи эзэмшсэн. Үүний зэрэгцээ Австри улсын “RTI”компанийн мэргэжилтнүүд шугам угсралт суурилуулалтын үед талбайн сургалтыг зохион байгуулж, ажлын явцад хяналт тавьж, зөвлөгөө өгөн ажиллаж байна.

Уг төслийн хүрээнд 20 км гаруй цэвэр усны шугам сүлжээг доторлох төлөвлөгөөтэй байгаа бөгөөд энэ онд Сүхбаатар дүүргийн нэгдүгээр хороо Сөүлийн гудамжны 1.7 км орчим цэвэр усны ширмэн шугамыг доторлож засварлана.

Цаашид Ус сувгийн удирдах газар нь шугам доторлох дэвшилтэт техник технологийг нутагшуулан өөрсдийн хүчээр дээрх машин механизм, тоног төхөөрөмжөө ашиглан Улаанбаатар хотын цэвэр усны гол шугам сүлжээг доторлох ажлаа үе шаттайгаар хийнэ.

“Өнөөдөр нээж буй энэ төслийг цаашид манай шилдэг сайн нженерүүд аваад явах болно. Бид бүхэн 619 км үргэлжлэх шугаман дээр энэ ажлыг хийнэ гэж төлөвлөсөн. Цаашид бохирын шугаман дээр бас хийнэ. Урд нь шуудуу ухахаас эхлүүлээд газар шорооны ажилд өндөр зардал гардаг байсан. Энэ зардал нэг дахин багасна” хэмээн УСУГ-ын дарга Ц.Төрхүү ярилаа гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээлэв.

Азийн сангийн “Хотын засаглалыг сайжруулах төсөл”-ийн хүрээнд “Гэр иргэдийн оролцоотой амьдрах орчны зураглалын төв”-өөс зохион байгуулж буй “Хоёр хотын цадиг 2018” үзэсгэлэн өнөөдөр нийслэлийн Засаг даргын Тамгын газарт дэлгэгдлээ.

Уур амьсгалын өөрчлөлт, хөдөөнөөс хот руу чиглэсэн шилжилт хөдөлгөөн, агаарын бохирдол, хотын засаглал зэрэг сэдвээр хоёр дахь жилдээ дэлгэгдэж байна. Иргэдийн оролцоотой хөгжүүлсэн газрын зургуудыг фото болон бусад хэлбэрээр харуулсан энэхүү үзэсгэлэнгийн нээлтэд НЗДТГ-ын дарга М.Отгонбаяр оролцлоо.

“Хоёр хотын цадиг- 2018” үзэсгэлэн нь үндсэн дөрвөн сэдвийн хүрээнд иргэдийн оролцоотойгоор хөгжүүлсэн газрын зураглал болон Улаанбаатар хотод шилжин ирэгсдийн чанарын судалгааны үр дүнг тусган уур амьсгалын өөрчлөлт, хөдөөнөөс хот руу чиглэсэн шилжилт хөдөлгөөн, агаарын бохирдол, хотын засаглал зэрэг иргэдийн оролцоотой хөгжүүлсэн фото зургуудыг дэлгэн үзүүлж буй юм.Тус төслийн хүрээнд ард иргэдийн мэдлэг, мэдээллийг нэмэгдүүлэх, тулгамдаж буй асуудлуудыг бодлого боловсруулагч, шийдвэр гаргагч нарт хүргэх зорилготойгоороо онцлог юм гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Засгийн газрын өнөөдрийн хуралдаанаар Радио долгионы тухай хуульд нэмэлт өөрчлөлт оруулах тухай хуулийн төслийг УИХ-д өргөн мэдүүлэхээр болов. Энэхүү хууль батлагдсанаар гар утасны хэрэглээ, бааз станцуудын байршил нь хүний эрүүл мэндэд сөрөг нөлөө үзүүлж байгаа эсэх талаар иргэд, байгууллага аж ахуйн нэгжүүдээс ирүүлдэг олон тооны гомдол. Мөн хэмжилт хийлгэх хүсэлтэд хариу өгөх, сөрөг нөлөөлөл тогтоогдсон тохиолдолд тэднийг урьдчилан сэргийлэх, хязгаарлах нэгдсэн бодлогыг хэрэгжүүлэх гэх мэт эрхзүйн зохицуулалтын боломжтой болох юм.

Монгол Улсын Засгийн газрын “Төрөөс мэдээлэл, харилцаа холбооны хөгжлийн талаар баримтлах бодлого”-ын хүрээнд Радио долгионы зохицуулалт, төлөвлөлтийг сайжруулж, үр ашигтай хувиарлалтыг бий болгохоор тусгасан байдаг. Гэтэл 1999 онд Радио долгионы тухай хуулийг баталснаас хойш шинэчлэлт хийгдээгүй нь улс орон, дэлхийн хөгжлийг даган шинэ тутам үүсч буй нийгмийн харилцааг зохицуулахад эрхзүйн зохицуулалтын хувьд учир дутагдалтай нь бэрхшээл үүсгэж байна.

Иймд тус хуульд радио долгионы ашиглалтын зөвхөн техник, технологитой холбоотой асуудлыг тусгаж авч үзэхээс гадна түүний хүн амын эрүүл мэнд, байгаль орчинд үзүүлэх нөлөөлөл, давтамжийн хязгаарлагдмал нөөц баялгийг үр ашигтай ашиглах, радио давтамжийн нэгдсэн бодлого, төлөвлөлтийг хийнэ. Төрийн шинэлэг, бүтээлч үйл ажиллагаанд тулгуурлан иргэдийн эрэлт, хэрэгцээг хангасан шинэ төрлийн хэрэглээ, үйлчилгээг нэвтрүүлэх, дэмжих эрхзүйн шинэ зохицуулалтыг гаргахаар Засгийн газраар дээрх хуулийг шинэчлэн боловсруулаад байна.