Month: September 2018

Мэргэжлийн хяналтын байгууллагын хэмжээнд зохиогдож буй “Төрийн хяналт-Иргэн таны төлөө” аяны хүрээнд Баян-Өлгийн аймгийн Мэргэжлийн хяналтын газраас “Төрийн хяналт-Иргэн таны төлөө” аяны хүрээнд сургууль, цэцэрлэгийн орчин, хүнсний бүтээгдэхүүн, цацрагийн аюулгүй байдлыг хангуулах чиглэлээр дараах ажлуудыг хийж гүйцэтгэжээ.

1. Импортоор ургамал тэдгээрийн гаралтай түүхий эд, бүтээгдэхүүн импортлогч ААН-ийн эздийг байлцуулан Тирлик зах дээрх худалдаа, үйлчилгээний салбар дээр сургалт, зөвлөн туслах үйлчилгээг үзүүллээ. Үүнд: ОХУ болон Казахстан улсаас импортоор ургамлын гаралтай бүтээгдэхүүн болох алим, бэрсүүт жүрж, амтат жүрж, усан үзэм, анар, чавга, гадил жимс, шар лууван, сонгино, сармис зэрэг хүнсний ногоог оруулахдаа Амьтан, ургамал, тэдгээрийн гаралтай түүхий эд, бүтээгдэхүүнийг улсын хилээр нэвтрүүлэх үеийн хорио цээрийн хяналт шалгалтын тухай хуулинд заасны дагуу баримт бичгийг бүрдүүлэн Мэргэжлийн хяналтын газраас импортын мэдэгдэл авч хилийн боомтод хүргүүлэх, стандартын шаардлага хангасан тээврийн хэрэгслээр тээвэрлэх, бүтээгдэхүүний хяналтын дээжийг химийн лабораторийн шинжилгээнд хамруулах, гадаад, дотоод хорио цээртэй ургамлын өвчин, хортон шавьж, хог ургамлын үр дамжин тархахаас урьдчилан сэргийлэх, таслан зогсоох, хяналт шалгалтанд ашиглаж буй 9.2.3 кодтой хяналтын хуудсыг танилцуулж Жимс, ногооны химийн хортой бодисыг цэвэрлэх арга, Шинэ жимс, ногоог хэрхэн таних вэ, Алимны улаан хачиг, Хүнсний ногоо, жимс, жимсгэнийг хэрхэн сонгох вэ, Жимс, жимсгэний ач тус, Импортын мэдэгдлийн тухай зэрэг гарын авлага зөвлөмжүүдийг тараан зөвлөн туслах үйлчилгээг үзүүлэн ААН-үүдийн саналыг сонсож санал солилцон ажиллалаа.

2.Аймгийн төвийн сургууль, цэцэрлэгүүдэд аюулгүй байдлыг хангах, үүсч болох аливаа эрсдэлээс урьдчилан сэргийлэх хяналт шалгалтыг хийхээр аймгийн Мэргэжлийн хяналтын газрын даргын баталсан ажлын хэсэг хүүхдийн аюулгүй байдлыг хангах, шингэрүүлсэн шатдаг хийн аюулгүй, зөв хэрэглээг хэрэглэгчдэд хэвшүүлэх, буруу хэрэглээнээс гарч болзошгүй аюул осол, эрсдэлийг арилгах, бууруулах зорилгоор ахуйн хэрэглээний (жижиг газ) шингэрүүлсэн шатдаг хий худалдаалж байгаа аж ахуйн нэгжүүд, худалдааны төвүүдэд аймгийн Мэргэжлийн хяналтын газар, Цагдаагийн газартай хамтарсан мэдэгдэл хүргүүлэв. Мөн Өлгий сумын ерөнхий боловсролын сургуулиуд, цэцэрлэгүүдийн ойр орчмын цэвэрлэгээний байдалд хяналт тавьж, зөрчлийг газар дээр нь арилгуулах зорилгоор сургуулиудын ойр орчмын задгай хог хаягдлыг цэвэрлүүлж ажиллалаа. Түүнчлэн Өлгий сумын ерөнхий боловсролын сургуулиуд, цэцэрлэгүүдэд, аймгийн Музей, Биеийн тамирын спортын газар, номын сан зэрэг объектуудад хяналт шалгалт хийж, ил задгай цахилгаан монтаж, доторх щитийн бүрэн бүтэн байдлыг хангуулж, 6, 12 дугаар цэцэрлэгүүдийн ойр орчимд онгорхой байсан дэд станц, трансформаторын хаалганд цоож хийлгэж, аюулгүй байдлыг хангуулж ажиллалаа.

3. Экспорт, импорт, хилийн хорио цээрийн хяналтын хэлтсээс Цагааннуур авто замын шалган нэвтрүүлэх боомтод үйл ажиллагаа явуулж буй хил, хяналтын байгууллагуудын улсын байцаагч, албан хаагчдад “Улсын хилээр нэвтрэх цөмийн материал, цацраг идэвхт бодисын хууль бус хөдөлгөөнд хяналт тавих” сэдэвт сургалтыг зохион байгуулж сургалтандЦагааннуурын боомтод суурилуулсан улсын хилээр гарах, орох тээврийг хэрэгсэл, зорчигчдыг шалгах цацрагийн тоног төхөөрөмжийн талаар болон хувийн цацраг илрүүлэгч, цацрагийн байршлыг тогтоогч, илрүүлэгч, цацраг идэвхт изотопыг тогтоох багажны үүргийн талаар танилцуулав. Мөн “Цагааннуур боомтод суурилуулсан цацрагийн хяналтын төхөөрөмжүүдэд цацрагийн сэжигтэй дохиолол илэрсэн үед хамтран ажиллах журам”-д тусгасны дагуу байгууллагуудын гүйцэтгэх үүргийн талаар танилцуулан зөвлөгөө өгч, харилцан санал солилцов. Түүнчлэн Цагааннуур авто замын шалган нэвтрүүлэх боомтоор нэвтэрч буй ОХУ, Казахстан улсын тээврийн хэрэгсэлд цацрагийн хэмжилтийг хийж тээврийн хэрэгслийн эздүүдэд нь цацрагийн талаар ерөнхий ойлголтыг өгч, зөвлөн туслах үйлчилгээг үзүүлэн ажиллав.

Фэйсбүүк компанийн Ази, Номхон далайн бүсийн төлөөлөгчид манай улсад ажилласан. Харилцаа Холбооны зохицуулах хороо, Цагдаагийн ерөнхий газар фэйсбүүк компанитай хамтран ажиллах болсон талаар холбогдох албаныхан өнөөдөр /2018.09.13/ мэдээлэл хийлээ.

Монгол Улс нийт 1,7 сая гаруй фэйсбүүк хэрэглэгчтэй бөгөөд фэйсбүүк хэрэглээгээр Азид нэгдүгээрт, дэлхийд 10 дугаарт багтдаг болохыг Фэйсбүүк компанийн Хонконг, Тайвань, Монголыг хариуцсан бодлогын газрын захирал Жорж Чэн таницуулсан юм. Фэйсбүүк компанийн зүгээс “Ногоон суваг” буюу “Green channel”-ыг Монгол Улсад гаргаж өгсөн байна. Ингэснээр хуурамч мэдээ мэдээллийг цаг алдалгүй түргэн, шуурхай шийдвэрлэх боломж бүрджээ.

Харилцаа холбооны зохицуулах хорооны Хамтын ажиллагаа, харилцагчийн хэлтсийн дарга Б.Мягмарнаран “Фэйсбүүк компанийн төлөөллүүдтэй иргэдийн үг хэлэх, мэдээлэл олж авах үндсэн эрхийн талаар ярилцсан. Хуурмаг мэдээллийн тархалтыг бууруулах, хуурамч хэрэглэгчийг тодорхойлох, цахим гэмт хэрэгтэй хамтран тэмцэх талаар ярилцсан юм. Үүний хүрээнд Харилцаа холбооны зохицуулах хороон дээр мэргэжлийн багийг бүрдүүлж ажиллахаар боллоо. Энэ баг нь ЦЕГ, бусад холбогдох байгууллагатай хамтран фэйсбүүк компанитай шууд холбогдон фэйсбүүкз хаягыг баталгаажуулах тал дээр хамтран ажиллах болно” гэв.

Фэйсбүүк компаниас гаргасан мэдээгээр статистик мэдээгээр зөвхөн 2018 оны нэгдүгээр улиралд 583 сая хуурмаг хаягыг устгажээ. Үүний дараах судалгаагаар 80 гаруй сая хуурмаг хаяг буйг тооцоолсон байна. Мөн Каннын медиа фестивалийн үеэр фэйсбүүкийн мэдээллийн 50 орчим хувь нь хуурмаг байгааг тогтоожээ.

Фэйсбүүк компанийн төлөөллүүд ирэх арваннэгдүгээр сард дахин Монгол Улсад ажиллах юм байна.

Нийслэлийн авто замын газрын санхүүжилтээр хийгдэж буй Улиастайн уулзвараас Баянзүрхийн товчоо хүртэлх зам засварын өргөтгөл, шинэчлэлтийн ажил өнөөдөр эхэлсэн билээ. Эхний ээлжинд Туулын гүүрний урд уулзвараас Баянзүрхийн товчоо хүртэлх 800 метр замыг 72 цагт багтаан засахаар төлөвлөсөн бөгөөд тус зам ашиглалтад орвол иргэд түр тавьсан шороон замаар биш уулын замаар зорчих боломжтой болно.

Баянзүрх дүүргийн харьяа, Шархадны эцсийн 79 дүгээр сургуулийн хөлбөмбөгийн талбайн хаалганы хөндлөвч төмөр унаж тавдугаар ангийн хүүхэд амиа алдсан харамсалтай хэрэг гарсан. Тухайн үед хөндлөвч төмөр байнга унадаг байсан талаар талбай дээр тоглодог хүүхдүүд, оршин суугчид ярьж байсан юм.

Хэрэг гарсны дараа тус сургуулийн захирлыг салбарын сайд тухайн үед ажлаас чөлөөлөх хүртэл арга хэмжээ авч, 79 дүгээр сургуулийн тоглоомын талбайнаас гадна сургууль болон нийтийн амралт, зугаалгын газарт байрлах тоглоомын талбайд Хотын даргын захирамжаар шалгалт хийсэн. Азийн хөлбөмбөгийн холбооноос хүүгийн амиа алдсан сургуулийн талбайг өөрсдийн хөрөнгөөр тохижуулж өгөх хүсэлтээ Хотын дарга С.Батболдтой уулзах үедээ хэлж байсан юм. Тэгвэл өчигдөр Монголын үндэсний хөлбөмбөгийн холбоо тус тоглоомын талбайг стандартын дагуу тохижуулж, талийгаач хүүгийн нэрэмжит болгох саналыг холбогдох газарт нь хүргүүлжээ.

Онцгой байдлын ерөнхий газрын харьяа Эрэлч нохойн албанаас “Нохойн хөтөч, эрэлч нохой бэлтгэх “АНС-18” сургалтыг зохион байгууллаа.

Нохойг эрэн хайх, аврах чиглэлээр сургах, алба хаагчдыг нохойн хөтөчөөр бэлтгэх тус сургалт зургаан сарын турш үргэлжилсэн юм.

Энэ хугацаанд Аврах тусгай анги, НОБГ-ын Нийслэлийн аврах анги-105, бүсийн төвүүд, Булган, Сэлэнгэ, Хэнтий аймгаас нийт 10 алба хаагч нохой хөтлөгчөөр суралцаж, 10 албаны нохойг эрэн хайх, аврах чиглэлээр сургаж, дадлагажуулжээ.

Ингэснээр аливаа гамшиг ослын үед улсын болон орон нутгийн хэмжээнд эрэлч нохойг ашиглан эрэн хайх, аврах ажиллагааг зохион байгуулах боломж бүрдэж байна гэж Онцгой байдлын ерөнхий газраас мэдээллээ.

Сүхбаатар аймгийн Баруун-Урт сумын 3 дугаар багийн нийтийн орон сууцанд 5 давхар барилгын 4 дүгээр давхрын цонхоор бага насны хүүхэд унах гэж байна гэсэн дуудлагыг 09.12-ны өдрийн 13:00 цагт тус аймгийн Онцгой байдлын газарт иржээ.

Дуудлагын дагуу тус газрын Гал түймэр унтраах, аврах 15 дугаар ангийн 5 алба хаагч, 1 автомашинтай 1,2 км замыг туулан 13:03 цагт очиход тус байрны оршин суугч иргэн Б-гийн хүү Ж /5 настай, эрэгтэй, гэртээ ганцаараа цоожлогдсон/ цонхны гадна талын тавцан дээр зогсож байсныг аварч ар гэрийхэнд нь хүлээлгэн өгсөн байна.