Month: September 2018

“Эх орондоо хөдөлмөр эрхэлцгээе” хөдөлмөрийн үзэсгэлэн, яармагийг өнөөдөр 13:00-17:00 цагийн хооронд МҮХАҮТ-ын Их танхимд зохион байгуулна.

Тус хөдөлмөрийн үзэсгэлэн яармагийг Гадаад харилцааны яам, Нийслэлийн Залуучуудын хөгжлийн газар, Монголын Үндэсний Худалдаа Аж Үйлдвэрийн Танхим (МҮХАҮТ), “Хилийн чанад дахь Монголчуудын зөвлөл” ТББ, “Гадаадад Төгсөгчдийн Нэгдсэн Зөвлөл” ТББ, хүний нөөцийн чиглэлээр үйл ажиллагаа явуулдаг “Шинэ хөгжлийн түлхүүр” (MSDI) ТББ-ууд хамтран зохион байгуулах юм.

Үзэсгэлэн яармагийн үеэр үндэсний тэргүүлэгч 50 аж ахуй нэгж, байгууллагууд нээлттэй 500 ажлын байр зарлаж, эх орондоо хөдөлмөр эрхлэх, тав тухтай амьдрах боломж ба тулгамдаж буй асуудлаар мэдээлэл хийж, нээлттэй ярилцлага өрнүүлэн, гадаадад төгсөгчид болон хилийн чанадад амьдарч буй иргэд эргэн ирэхэд хөдөлмөр эрхлэх боломж, нөхцөл байдлын талаар харилцан санал солилцож, зөвлөгөө, мэдээлэл өгнө. Мөн энэхүү хөдөлмөрийн үзэсгэлэн яармагт гадаадад суралцаж, ажиллаж амьдарч байгаагүй залуучууд ч оролцох боломжтой юм.

Онцгой байдлын ерөнхий газраас эрэн хайх, аврах үйл ажиллагаанд нохойг ашиглах, сургаж дадлагажуулах, нохойн сургагч, хөтлөгчийг бэлтгэх зорилгоор Засгийн газрын 2016 оны 282 дугаар тогтоолын дагуу ОБЕГ-ын харьяа Эрэлч нохойн албыг байгуулсан.

Тус албанаас зохион байгуулсан эрэн хайх, аврах чиглэлээр эрэлч нохдыг сургах, алба хаагчдыг нохойн хөтөчөөр бэлтгэх сургалт зургаан сарын хугацаанд үргэлжлэн амжилттай өндөрлөлөө.

Сургалтад Үндэсний аврах бригад, НОБГ-ын Нийслэлийн аврах анги-105, Дорнод, Өмнөговь, Ховд, Булган, Сэлэнгэ, Хэнтий аймгийн Онцгой байдлын газраас нийт 10 алба хаагч нохой хөтлөгчөөр суралцаж төгсөн, “Аврагч, нохой-хөтлөгч” мэргэжлийн үнэмлэхээ гардан авлаа.

Мэргэжлийн үнэмлэхийг ОБЕГ-ын Захиргаа удирдлагын газрын дарга, хурандаа Л.Болдбаатар гардуулан өгч, амжилт хүссэн юм.

Онцгой байдлын байгууллагаас эрэлч нохойн албатай болсноос хойш 10 алба хаагчийг нохой хөтлөгчөөр бэлтгэн,10 албаны нохойг эрэн хайх, аврах чиглэлээр сургаж, дадлагажуулаад байгаа нь энэ юм.

Ингэснээр албаны гамшигтай тэмцэх бэлтгэл, бэлэн байдал дээшилж, аливаа гамшиг ослын үед эрэн хайх, аврах ажиллагаа явуулахад цаг хэмнэх, алба хаагчдын ажлыг хөнгөвчлөх боломжтой боллоо гэж Онцгой байдлын ерөнхий газраас мэдээллээ.

“Эмэгтэй хүн би чамд хайртай гэж хүнээр хэлүүлэхээр гоё байх хэрэгтэй, яршиг л байна” гэсэн үгээр мянга мянган эмэгтэйчүүдэд зориг, ухаан, хүч бэлэглэсэн МУСГЗ, сэтгүүлч Д.Амбасэлмаа Үндэсний хэмжээгээр өргөн тэмдэглэдэг “Номын баярт” оролцохоор болжээ. Уншигч, үзэгч, сонсогчидтойгоо тэрээр 2018.09.15-ны бямба гарагт 14.00-15.00 цагийн хооронд Төв талбай дээр саатан уулзах юм байна.

Монголын сэтгүүлзүйд өөрийн нэрийг брэнд болтол нь явсаар ирсэн МУГЗ, нэрт сэтгүүлч Дүгэрийн Амбасэлмаагийн эрч хүчтэй, эрүүл саруул амьдрах ухаан, залхууралгүй дайчин чанар, амьдралын даваа саадыг сөрөх тэвчээр хийгээд хувьд эмэгтэй хүнийх нь амьдралын бодит түүхийг зээ охин Б.Саруул нь өөрийн өнцгөөр харж “Өөрөөс эхлэх амьдрал” номыг бичжээ.

Ажилдаа амьдралаа бүрэн зориулсан, ард олны хайртай сэтгүүлч, арагш биш урагш тэмүүлж явсан гал цогтой эмээгийнхээ мэргэжил, уран бүтээлийн онцлогоос илүү тус номондоо эмээгийнхээ хувь хүнийх нь онцлог, эмээ хүн, ээж хүн, эмэгтэй хүн гэдэг талаас нь харуулахыг зорьжээ.

Ингэхдээ гэр бүлийн нандин түүх, эмээгийнхээ сургааль, бага балчир наснаас ой дурсамжинд нь үлдсэн бодит түүхийг сөхөн баримтжуулсан байна.

Хамгийн сонирхолтой нь сэтгүүлч Амбасэлмаагийн залуу наснаасаа өглөө бүр ганц ч өдөр алгасалгүй хийдэг, өдгөөг хүртэл эрүүл саруул аж төрж буйн бяцхан “нууц” болох 5 минутын дасгал нь хүртэл тус номд бичлэгтэйгээр багтсан ажээ.

Дашрамд дуулгахад ном борлуулах эрхийг Интерном албан ёсоор авсан байна.

Баянгол дүүргийн 10 дугаар хорооны нутаг дэвсгэрт баригдаж буй “Хөх сувд” хорооллын эхний ээлжийн 17 давхар 112 айлын орон сууц ашиглалтад орж өчигдөр /2018.09.13/ нээлтээ хийлээ. Уг байранд газраа чөлөөлсөн 23 айл шинэ байрандаа орлоо.

Гэр хорооллын дахин төлөвлөлтийн хүрээнд баригдаж буй уг хороолол нь 31 блок орон сууцаас бүрдэх бөгөөд дараагийн буюу II ээлжийн 222 айлын орон сууц 2019 оны II улиралд ашиглалтад орох юм байна.

Нийт 30,6 га газар буюу 408 нэгж талбарт баригдах уг хороололд өрхийн эмнэлэг, цэцэрлэг, сургууль, онцгой байдлын гал унтраах анги баригдахаар төлөвлөгдсөн бөгөөд эдгээрийг 5 жилийн хугацаанд барьж ашиглалтад оруулах аж.

Гэр хорооллын айл өрхүүдийг орон сууцжуулснаар агаар, хөрсний бохирдлоос ангижирч иргэд тохилог шинэ байранд амьдрах боломжийг бүрдүүлж байна. Төслийн гүйцэтгэгчээр “Грийн Pесурс Констракшн” ХХК ажиллаж байна.

БНЧУ-ын Засгийн газрын Хөгжлийн тусламжийн хүрээнд “Тахийг эх нутагт нь эргэн нутагшуулах, хамгаалах” хөтөлбөрийг санаачлан амжилттай хэрэгжүүлж байгаа Прага хотын Амьтны хүрээлэнгийн захирал Мирослав Бобекыг Элчин сайд Н.Наранбат хүлээн авч уулзлаа. Прага хотын Амьтны хүрээлэн нь төрөл зүйлийнхээ хувьд устах аюулд тулгараад байсан тахийг үржүүлэн хамгаалж, эх нутагт нь хүргэх хөтөлбөрийг сүүлийн 8 жилийн хугацаанд хэрэгжүүлж байгаа бөгөөд нийтдээ 31 тахийг Говийн их дархан цаазат газрын Хөмийн тал болон Тахийн талд нутагшуулаад байна. Уулзалтын үеэр “Тахийг эх нутагт нь эргэн нутагшуулах, хамгаалах” хөтөлбөрийг цаашид үргэлжүүлэх улмаар Монгол Улсын БОАЖЯ болон Прага хотын Амьтны хүрээлэн хооронд Монголын баруун хэсэг дэхь бөхөн болон хавтгайг хамгаалах, тоо толгойг нь нэмэгдүүлэх зорилгоор байгуулсан “Нэн ховор зүйл амьтдыг хамгаалах тухай хамтын ажиллагааны санамж бичиг”-ийн хэрэгжилтийг хангаж хамтран ажиллах асуудлаар санал солилцож ярилцлаа.

Баянзүрх дүүргийн Гэмт хэргээс урьдчилан сэргийлэх ажлыг зохицуулах салбар зөвлөл, дүүрэг дэх Замын цагдаагийн хэлтэс хамтран хүүхдийг зам тээврийн осол аваараас урьдчилан сэргийлэх ажлыг өдөр бүр зохион байгуулан ажиллаж байна. Тухайлбал, өчигдөр Тээврийн цагдаагийн алба, дүүрэг дэх Замын цагдаагийн хэлтсээс “СҮҮ” ХХК хамтран ерөнхий боловсролын 48 дугаар сургуулийн 3,5 дугаар ангийн хүүхдүүдэд “Замын хөдөлгөөнд хэрхэн оролцох,Явган хүний гарцаар яаж гарах, Тээврийн хэрэгслээр зорчихдоо яагаад заавал хамгаалах бүс хэрэглэх ёстой вэ” зэрэг сэдвээр хичээл оржээ.

Түүнчлэн Замын хөдөлгөөнд оролцохдоо бага насны хүүхдийг зөв тээвэрлэн явж байгаа ‘’Сайн жолооч’’-ыг урамшуулж, урьдчилан сэргийлэх ажлыг зохион байгууллаа хэмээн Баянзүрх дүүргийн ЗДТГ-ын Хэвлэл мэдээллийн албанаас мэдээллээ.

Чөлөөт бөхийн залуучуудын ДАШТ Словак улсын Трнава хотноо болно. Манайхаас тус тэмцээнд оролцох бөхчүүд энэ бямба гарагт эх орноосоо мордохоор төлөвлөж буй. Гэвч нэг ч тамирчин, багш визээ аваагүй байгаа аж.

Тодруулбал, МЧБХ-ноос нэг сарын өмнөөс эхлэх Монгол Улсад суугаа Чех улсын элчин сайдын яаманд виз мэдүүлэхээр хөөцөлдсөн боловч тамирчид болон багш нарт визэнд орох цаг авч чадаагүй байна.

Чех улсаас монголд суугаа элчин сайдын яамнаас визэнд орох гэж буй хүмүүс зөвхөн утсаар цаг авдаг бөгөөд нэг удаагийн холболтоор зөвхөн нэг хүнд л цаг өгдөг аж. Залуучуудын ДАШТ-д манайхаас 16 тамирчин, гурван дасгалжуулагч явна. Гэтэл өчигдрийн байдлаар зөвхөн ганцхан тамирчныг визэнд оруулаад байгаа юм байна.

Энэ асуудлаар МЧБХ-ноос Гадаад харилцааны дэд сайд Б.Батцэцэгт хандаж, дэд сайд шуурхай арга хэмжээ авч Консулын газраар дамжин Чехийн элчин сайдын яамны консулын газарт нот бичиг илгээсэн ч огт хэрэгсээгүй зарим хэвлэл мэдээллийн хэрэгслүүдэд мэдээлжээ. Иймд манай тамирчид энэ удаагийн Залуучуудын ДАШТ-д явах эсэх нь тодорхойгүй болоод байгаа юм байна.