Month: September 2018

ИНЕГ-ын Ерөнхий зориулалтын нисэхийг хөгжүүлэх албаныхан Бүгд Найрамдах Чех Улсын Прага хотноо албан томилолтоор ажиллаад ирлээ.

Энэ үеэр БНЧУ-ын Тээврийн яаманд ажиллаж тус улсын Иргэний нисэхийн газрын захирал Зденёк Елинектэй уулзан Монгол Улсын Засгийн газрын 120 дугаар тогтоолоор батлагдсан “Ерөнхий зориулалтын нисэхийг хөгжүүлэх хөтөлбөр”-ийг танилцуулж улмаар үндсэн 7-н зорилтын хүрээнд хамтран ажиллах, ялангуяа БНЧУ-д мэргэжилтнүүдээ бэлтгэх, БНЧУ-ын мэргэжилтнүүдийг Монгол Улсад урьж сургалт зохион байгуулах, туршлага авах, Ерөнхий зориулалтын нисэхийн үйл ажиллагааны хяналт, зохицуулалт болон агаарын навигацийн үйлчилгээний чиглэлээр туршлага солилцох, хамтарсан сургалт зохион байгуулах талаар ярилцжээ.

Түүнчлэн Монгол Улсад бага оврын агаарын хөлгийн угсралт, үйлдвэрлэл эхлүүлэхэд эрх зүйн таатай орчин байгаагаас гадна цаашид урт хугацаанд хамтран ажиллах боломж өргөн байгаа талаар нээлттэй санал солилцсон байна. БНЧУ-ын Тээврийн яамны зүгээс манай “Ерөнхий зориулалтын нисэхийг хөгжүүлэх хөтөлбөр”-ийг хэрэгжүүлэхэд хамтран ажиллахад бэлэн гэдгээ илэрхийлж хоёр улсын иргэний нисэхийн ерөнхий газрууд, БНЧУ-ын “Хөнгөн агаарын хөлгийн холбоо” болон Монгол улсын иргэний нисэхийн мэргэжлийн холбоод хоорондын хамтын ажиллагааг эхлүүлэхэд өндөр ач холбогдол өгч ажиллахаа илэрхийлсэн байна.

Мөн Чех болон Монгол Улсын Иргэний нисэхийн байгууллага хооронд Ерөнхий зориулалтын нисэхийг хөгжүүлэх ажлын хүрээнд Харилцан ойлголцлын санамж бичиг байгуулж, цаашид хамтын ажиллагаагаа улам өргөжүүлэх боломж байгаа тал дээр санал нэгдсэн гэдгийг Ерөнхий зориулалтын нисэхийг хөгжүүлэх албаны дарга Э.Энхзориг хэллээ.

Ерөнхий зориулалтын агаарын тээврийг хөгжүүлэх хөтөлбөрийн хүрээнд БНЧУ-тай хамтран ажиллах зорилтод дараах ажлуудыг тусгасан байна.

1. Эрх зүйн зохицуулалтыг боловсронгуй болгоход шаардлагатай сургалтыг хамтран зохион байгуулах,

2. Ерөнхий зориулалтын нисэхийн ирээдүйн хүний нөөцийг бэлтгэхэд хамтран ажиллах, Олон улсын иргэний нисэхийн байгууллагын /NGAP/ хөтөлбөрийг хэрэгжүүлэх,

3. Ерөнхий зориулалтын нисэхийн дэд бүтцийг хөгжүүлэхэд туршлага авч хамтран ажиллах, сургалт зохион байгуулах,

4. Агаарын навигацийн үйлчилгээг хялбаршуулах ажлын хүрээнд БНЧУ-ын Агаарын навигацийн үйлчилгээний байгууллага /ANS/-аас туршлага авах, сургалт зохион байгуулах,

5. Ерөнхий зориулалтын нисэхийг хөгжүүлэх чиглэлээр Харилцан ойлголцлын санамж бичиг байгуулах.

Чехийн Иргэний нисэхийн ерөнхий газрын зүгээс дээрх саналуудыг ажил хэрэг болгох тал дээр цаг алдалгүй шуурхай арга хэмжээ авч ажиллахаа илэрхийлээд санамж бичгийн төслөө ойрын хугацаанд Монгол Улсын иргэний нисэхийн ерөнхий газарт хүргүүлхээ илэрхийлжээ.

Чехийн агаарын навигацийн үйлчилгээний байгууллага нь тусдаа бие даасан статустай үйл ажиллагаагаа явуулдаг ба агаарын навигацийн бүх төрлийн бүтээгдэхүүн, үйлчилгээг гадаад, дотоодын хэрэглэгчдэд үзүүлдэг байна. Тус байгууллагын Бизнесийн газрын дарга Лукас Прочазка байгууллагынхаа үйл ажиллагааны талаар болон гадаад, дотоод хамтын ажиллагааныхаа талаар мэдээлэл өгчээ. Энэ үеэр Агаарын навигацийн чиглэлээр Монгол Улсын иргэний нисэхийн байгууллагатай хамтран ажиллах бүрэн боломж байгаа саналаа илэрхийлэхийн зэрэгцээ, Монголын ИНЕГ-т шинээр ашиглалтад орох Aera Control Center/ACC/-г барьж байгуулах ажилд дэмжлэг үзүүлхээс гадна шаардлагатай сургалт зохион байгуулж хамтран ажиллах боломж байгаагаа илэрхийлжээ.

Тус улсын Агаарын навигацийн институт нь Агаарын навигацийн үйлчилгээний байгууллагын харьяа бөгөөд нислэгийн удирдагч бэлдэхээс гадна хэд хэдэн агаарын хөлгийн маягын зэрэглэл буюу “TYPE RATING”–ийн сургалтад гадаад, дотоодын нисгэгчдийг бэлтгэдэг байна.
Ерөнхий зориулалтын нисэхийг хөгжүүлэх алба/ЕЗНХА/-ныхан БНЧУ-ын Засгийн газрын “AID FOR TRADE” хөтөлбөрийг хэрэгжүүлэгч, Үйлдвэр худалдааны яамны Эдийн засаг, гадаад бодлогын газрын дэд дарга Петр Куловану, Ази, Африк, Австрали хариуцсан мэргэжилтэн Лаура Српова, “Aid for trade” хөтөлбөрийн зохицуулагч Вилем Пардупски нартай мөн уулзаж Ерөнхий зориулалтын нисэхийг хөгжүүлэх хөтөлбөрийн хүрээнд хэрэгжүүлэх арга хэмжээ, хөгжлийн асуудлаар танилцуулж цаашид хамтран ажиллах боломж, хөтөлбөрийн хүрээнд хэрэгжүүлэх төсөл, хөтөлбөрүүдийг дэмжих бололцоо, барилга байгууламжийн нөөцийн талаар танилцуулаг хийжээ.

БНЧУ-ын Үйлдвэр худалдааны яамны Эдийн засаг, гадаад бодлогын газрын дэд дарга Петр Куловану Монгол Улсын иргэний нисэхийн салбарын хөгжилд хамтран ажиллаж Үйлдвэр, худалдааны яамны зүгээс боломжит бүх талын дэмжлэг үзүүлэхэд бэлэн гэдгээ илэрхийлсэн байна. Тиймээс хоёр улсын Иргэнхий нисэхийн ерөнхий газар хооронд харилцан ойлголцлын санамж бичиг зурах, энэ нь цаашдын олон талт хамтын ажиллагааны эхлэл болно хэмээн дурджээ.

БНЧУ-д “Хөнгөн агаарын хөлгийн холбоо” гэж байдаг. Энэ холбоо нь Тээврийн яамныхаа харьяа үйл ажиллагаа явуулдаг ба хөөрөлтийн дээд жин нь 450 кг-аас ихгүй, бүх хөнгөн болон хэт хөнгөн агаарын хөлгийн үйл ажиллагааны хяналт, зохицуулалтыг хийж, гэрчилгээжүүлхээс гадна шаардлагатай нислэгийн мэдээлэл, ил харааны нислэгийн зурагууд болон бусад мэдээллийг хэрэглэгчдэд мэдээлэх, агаарын спорт, ерөнхий зориулалтын нисэхийн сэтгүүл, товхимолыг эрхлэн гаргаж байдаг.

Тус холбооны дэд ерөнхийлөгч Камил Вечера Монголын төлөөлөгчдөд холбооныхоо чиг үүргийн хүрээнд хэрэгжүүлж байгаа үйл ажиллагаагаа танилцуулж, агаарын хөлгийн маягын гэрчилгээжүүлэлт буюу “TYPE CERTIFICATE” олгох үйл ажиллагаа, агаарын хөлөг болон нисгэгч, техникч гэрчилгээжүүлэх явц зэргийг мөн танилцуулсан. Цаашид Чех улсад үйлдвэрлэгдсэн агаарын хөлгийн “TYPE CERTIFICATE”-ийг Монгол Улсад шууд хүлээн зөвшөөрүүлэх гэрээг байгуулж хамтран ажиллах боломж байгаа талаар төлөөлөгчдөд санал тавьжээ. Хамгийн сүүлийн байдлаар БНХАУ нь БНЧУ-ын TYPE CERTIFICATE-ийг шууд хүлээн зөвшөөрөх гэрээнд гарын үсэг зурсанаар БНХАУ-д бага оврын агаарын хөлөг худалдаж авах сонирхолтой хувь хүн нэмэгдэж байгаа юм байна.

ЕЗНХА-ныхан ерөнхий зориулалтын нисэхийн үйл ажиллагааны хяналт, зохицуулалт, гэрчилгээжүүлэлт болон эрх зүйн орчныг бүрдүүлэхэд хамтран ажиллах, тус улсын мэргэжилтнүүдийг урьж богино хугацаанд сургалт зохион байгуулах саналаа илэрхийлсэн. Цаашид БНЧУ-ын Ерөнхий зориулалтын нисэхийн үйл ажиллагаа, агаарын хөлгийн үйлдвэрлэл, хөгжлийн талаар нэвтрүүлэг бэлтгэхэд хамтран ажиллах боломж байгаа, энэ асуудлыг БНЧУ-ын “Хөнгөн агаарын хөлгийн холбоо” болон Тээврийн яам, Иргэний нисэхийн ерөнхий газар нь дэмжинэ гэдгийг ч хэлжээ.

ИНЕГ-ын Ерөнхий зориулалтын нисэхийг хөгжүүлэх албаныхан Бүгд Найрамдах Чех Улсад албан томилолтоор ажиллахад БНЧУ-аас Монгол Улсад суугаа онц бөгөөд бүрэн эрхт Элчин сайд Ийржи Бродский болон Монгол Улсаас БНЧУ-д суугаа Онц бөгөөд бүрэн эрхт Элчин сайд Н.Наранбат, элчин сайдын яамныхан онцгой дэмжлэг үзүүлж ажилласан юм.

Тиймээс Монголын төлөөлөгчид Чехэд ажиллах үеэрээ Монгол Улсаас БНЧУ-д суугаа Онц бөгөөд бүрэн эрхт Элчин сайд Н.Наранбат тэргүүтэй элчингийн ажилтнуудтай уулзаж “Ерөнхий зориулалтын нисэхийг хөгжүүлэх хөтөлбөр”-өө танилцуулан Монгол Улс, БНЧУ-тай хамтран ажиллах, боломжуудын талаар мэдээлэл өгч хоёр улсын Иргэний нисэхийн ерөнхий газар хооронд Ерөнхий зориулалтын нисэхийг хөгжүүлэх чиглэлээр харилцан ойлголцлын санамж бичиг байгуулахад Элчин сайдын яамны зүгээс онцгой дэмжлэг үзүүлхийг хүсчээ.

Элчин сайд Н.Наранбат Монгол Улсын Ерөнхий зориулалтын нисэхийн өнөөгийн байдал болоод цаашид авч хэрэгжүүлэх арга хэмжээг хэрэгжүүлэхэд анхаарч ажиллан Иргэний нисэхийн ерөнхий газар хооронд байгуулагдах Харилцан ойлголцлын санамж бичиг байгуулах асуудлыг ажил хэрэг болгоход өндөр ач холбогдол өгч ажиллана гэдгээ мэдэгдлээ.

Монгол Улс, БНЧУ-ын Гадаад харилцааны яам хоорондын хоёр дахь удаагийн Консулын зөвлөлдөх уулзалт Прага хотноо энэ сарын 17-ны өдөр боллоо. Консулын зөвлөлдөх уулзалтад монголын талын төлөөлөгчдийг ГХЯ-ны Төрийн нарийн бичгийн дарга Д.Даваасүрэн, чехийн талын төлөөлөгчдийг тус улсын ГХЯ-ны Эрх зүй, консулын асуудал хариуцсан дэд сайд Мартин Смолек нар тэргүүлэн оролцсон бөгөөд хоёр улсын иргэдийн зорчих нөхцлийг хөнгөвчлөх, албан паспорттай иргэдийг харилцан визийн шаардлагаас чөлөөлөх, нийгмийн хамгааллын хэлэлцээрийг ойрын хугацаанд байгуулах болон хөдөлмөр эрхлэх виз олголтын асуудлаар санал солилцож ярилцлаа.

Энэ оны 11 дүгээр сарын 1-ний өдрөөс эхлэн богино хугацааны шенгений визийн мэдүүлгийг Улаанбаатар хотноо нээгдэх Визийн төвд, урт хугацааны болон хөдөлмөр эрхлэх визийн мэдүүлгийг ЭСЯ-нд авах болсон тухайгаа чехийн тал мэдэгдсэн бөгөөд ингэснээр виз олгох үйл явц илүү хялбаршиж, виз хүсэгчдэд түргэн шуурхай үйлчлэх боломж бүрдэх юм. Үүний зэрэгцээ тус улсын Засгийн газраас баталсан журмын дагуу тусгай зөвшөөрөл бүхий Чех Улсын аж ахуйн нэгж байгууллагууд Монгол Улсаас ажиллах хүч авахад визийн тусгай журам энэ оны тавдугаар сарын 1-ний өдрөөс эхлэн үйлчилж байгаа болно.

Түүнчлэн талууд 2018 онд багтаан “Монгол Улс, Бүгд найрамдах Чех Улс хооронд Нийгмийн хамгааллын салбарт хамтран ажиллах тухай” хэлэлцээрт гарын үсэг зурахаар тохиролцсон бөгөөд энэхүү хэлэлцээрийг байгуулснаар тус улсад хөдөлмөр эрхэлж байсан болон хөдөлмөр эрхэлж байгаа иргэдийн нийгмийн хамгааллын асуудлыг шийдвэрлэх боломж бүрдэх юм.

Дараагийн Консулын зөвлөлдөх уулзалтыг ирэх 2019 онд Улаанбаатар хотноо хийхээр талууд тохиролцсон бөгөөд өнгөрөгч наймдугаар сарын байдлаар БНЧУ-д манай улсын 8677 иргэн оршин сууж байна.

Хөдөлмөр эрхлэлтийн нийслэлийн зөвлөлөөс Хөдөлмөр эрхлэлтийн үндэсний зөвлөл, Нийслэлийн ажил олгогч эздийн холбоотой хамтран “Хөдөлмөр эрхлэлт-нийгмийн түншлэл, ажил олгогчдын оролцоо” нийслэл, дүүргийн зөвлөлийн гишүүдэд зориулсан сургалт зохион байгууллаа.

Сургалтад зургаан дүүргийн Засаг даргын орлогч – Хөдөлмөр эрхлэлтийн дүүргийн зөвлөлийн дарга, нарийн бичгийн дарга болон ажил олгогч эзэд, үйлдвэрчний эвлэлийн төлөөлөл оролцлоо.

Сургалтаар Хөдөлмөр эрхлэлтийн нийслэл дүүргийн зөвлөлийн чиг үүрэг, үйл ажиллагаа, Хөдөлмөр эрхлэлтийг дэмжих бодлого үйл ажиллагаа, хөтөлбөр төслүүдийн онцлог, “Нэг өрх нэг ажлын байр” нийслэлийн дэд хөтөлбөрийн хэрэгжилт, цаашид авч хэрэгжүүлэх арга хэмжээ, Албан бус сектороос албан секторт шилжүүлэхэд ажил олгогч эздийн орлцоо, олон улсын туршлага, Залуучуудын хөдөлмөр эрхлэлт, гарааны бизнесийг дэмжих хөтөлбөр, хэрэгжүүлэх арга зүйн асуудлын талаар ярилцаж, санал солилцлоо.

Мөн сургалтад хамрагдсан зөвлөлийн гишүүдээс хөдөлмөр эрхлэлтийн үндэсний болон нийслэл, дүүргийн зөвлөл уялдаа холбоотой ажиллах, мэдээлэл сургалтыг зохион байгуулах, Хөдөлмөр эрхлэлтийн нийтлэг үйлчилгээнд зарцуулагдах санхүүжилтийг нэмэгдүүлэх, Ажлын байрны зуучлал хариуцсан нэш хүн ажиллаж байгааг анхаарч дундажаар 3-5 хүнтэй болгох, Хөдөлмөр эрхлэлтийг дэмжих сангийн санхүүжилтээр хийгдэж байгаа төсөл хөтөлбөрүүдийг үр дүнтэй, хүртээмжтэй хэрэгжүүлэх зэрэг саналууд дэвшүүлж байв гэж НЗДТГ-ын Хэвлэл мэдээлэл, олон нийттэй харилцах хэлтсээс мэдээлэв.

Баянхонгор аймгийн нэгдсэн эмнэлэгт үзүүлэхээр очсон иргэн яаралтай тусламжийн тасагт ажиллаж байсан эмчийг “Үзлэг хийлгүй удлаа” гэх шалтгаанаар зодож танхайрсан хэрэг долдугаар сарын 26-ны өдөр гарсан. Уг хэргийн бичлэгийг Баянхонгор аймгийн нэгдсэн эмнэлгийн удирдлагууд цахим хуудастаа байршуулснаар нийтэд ил болсон билээ. Зодуулсан эмчийн уруул сэтэрч, толгой тархи доргин, нуруу нь хөхөрч , биеийн байдал нь хүнд байгаа тухай мэдээлсэн байсан. Тэгвэл эмч зодож танхайрсан иргэнд холбогдох хэргийг прокурорын байгууллагад шилжүүлжээ. Халдлагад өртсөн эмч амралтаа аваад, ажилдаа ороод удаагүй байгаа аж.

Хүүхэд бүр эрүүл аюулгүй орчинд сурч боловсрох эрхтэй. Гэхдээ энэ эрх нь хэрхэн баталгаажиж хангагдаж байгаа билээ гэдэг зүйл асуулт дагуулсан хэвээр байна. Тэгвэл хүүхдийн эрхийг хангах, болзошгүй аюул, эрсдэлээс хамгаалах тодорхой бодлоготой боллоо. Өөрөөр хэлбэл, ЕБС-ууд Хүүхэд хамгааллын бодлоготой болж, удирдах ажилтнуудад зориулсан “Ерөнхий боловсролын сургуулийн орчин дахь хүүхэд хамгааллын бодлогыг хэрэгжүүлэх арга зүй” сургалтыг зохион байгуулсан юм. Сургалтаар хүүхэд хамгаалах чиглэлийн олон асуудлыг хөндөн ярилцаж, хэрхэн аюулгүй орчин бий болгох, бодлогоо хэрхэн хэрэгжүүлэх зэргийг хэлэлцлээ.

Боловсрол, соёл, шинжлэх ухаан, спортын сайд Ц.Цогзолмаа сургалтыг нээж хэлсэн үгэндээ “Хүүхдийн эрх хохирсон, хүчирхийлэлд өртсөн гэдгийг ямар түвшинд авч үзэх вэ гэдэг хамгийн чухал юм. Үүний эсрэг хэрхэн ажиллах, хамгаалах вэ гэдэг эцэг, эхчүүд, сурган хүмүүжүүлэгч багш, нийгмийн ажилтан та биднээс асар өндөр сонор сэрэмж шаардсан ажил. Тиймээс бүх хүүхдийг нь ерөнхийд нь авч үзэлгүй анги даасан багш нар маань маш сайн судалгаа явулж, тухайн хүүхдэд тулгамдаж байгаа асуудлыг олж харах нь чухал.

Сүүлийн үед багш нар авьяастай, олимпиадад оролцдог хүүхдүүдтэйгээ түлхүү ажилладаг болчихсон байна. Ингэхээр олонх хүүхэд хаягдаж байгаа хэрэг. Энэ байдлыг зогсоож бүх хүүхдүүдэд ижил тэгш байдлаар хандан, зөв, мэдлэг боловсролтой иргэн болгохын төлөө ажиллах хэрэгтэй. Үүнд онцгойлон анхаарна. Цаашид хүүхэд хамгааллын асуудлаар ямар сайн туршлага, сургалт болох энэ бүхэнд яам анхаарч, багш нараа сургах болно. Захирал, багш, нийгмийн ажилтнуудын мэдлэг дээшилж, арга барил өөрчлөгдсөнөөр хүүхэдтэй ажиллах арга зүй шинэчлэгдэх юм” гэж онцлоод сургалтанд амжилт хүслээ.

Ерөнхийдөө гэр бүл, эцэг эх, олон нийтийн санамсаргүй үйлдэл, хайхрамжгүй байдлаас шалтгаалж хүүхэд аливаа эрсдэл, хүчирхийлэлд өртөх нь сүүлийн үед нэмэгдэж байна. Ерөнхий боловсролын сургуульд суралцаж байгаа хүүхэд бүрийг сургууль, дотуур байрын орчинд бие махбодийн шийтгэл, сэтгэл зүйн болон үе тэнгийнхний дарамт, үл хайхрах байдал, гэмт хэрэг, зөрчил, хорт зуршилд өртөхөөс урьдчилан сэргийлэх цогц арга хэмжээг авч хэрэгжүүлэх нийгмийн хүлээлт үүссэн. Тэгвэл өнөөдөр хүүхэд хамгааллын бодлого гарч, хэрэгжихээр болоод байна.

Хуулийн хэрэгжилтийг хангах хүрээнд НҮБ-ын Хүүхдийн сангийн дэмжлэгтэйгээр “Ерөнхий боловсролын сургуулийн орчин дахь хүүхэд хамгааллын бодлого”-ыг боловсруулж, батлуулжээ. Хүүхэд хамгааллын бодлогыг хэрэгжүүлэхэд сургуулийн удирдах ажилтны чадавхийг бэхжүүлэх, арга зүйгээр хангах сургалтыг НҮБ-ын Хүүхдийн сан, Дэлхийн зөн ОУБ, ЦЕГ, Замын цагдаагийн алба, Багшийн мэргэжил дээшлүүлэх институт, Гэр бүл, хүүхэд залуучуудын хөгжлийн газар, Нийслэлийн боловсролын газар зэрэг байгууллагуудын хамтын оролцоотойгоор зохион байгуулж байна.

Өнгөрсөн баасан гарагт цагдаагийн дарга нарыг АТГ-аас баривчилсан гэх мэдээлэл өчигдөр гарсан.

Сар бүрийн 3 дахь долоо хоногийн Лхагва гарагт “Нийслэлийн иргэдэд хууль, эрх зүйн үнэ төлбөргүй зөвлөгөө өгөх өдөрлөг”-ийг холбогдох нутгийн захиргааны болон хуулийн байгууллагуудтай хамтран тогтмол зохион байгуулан ажиллаж байна.

Энэ удаагийн өдөрлөгийг 9 дүгээр сарын 19-ний өдөр буюу Лхагва гарагт Нийслэлийн үйлчилгээний нэгдсэн төвийн 4 салбар /Дүнжингарав, Драгон, Мишээл, Оргил-ын байранд 09:00-16:00 цагийн хооронд зохион байгуулна.

Нийслэлийн иргэдийн Төлөөлөгчдийн Хурлын 2018 оны 16/08 дугаар тогтоолоор батлагдсан “Нийслэлийн иргэдийн хууль, эрх зүйн боловсролыг дээшлүүлэх дэд хөтөлбөр”-ийг хэрэгжүүлэх ажлын хүрээнд хийгдэж буй ажил юм гэж нийслэлийн ЗДТГ-ын Хууль, эрх зүйн хэлтсээс мэдээллээ.

Дуатлоны улсын аварга шалгаруулах тэмцээн 9-р сарын 22-ны бямба гаригт Улаанбаатар хотноо болно.Триатлоны нэгэн төрөл буюу “Гүйлт, дугуй , гүйлт”-ийн төрлийг нэгтгэсэн Дуатлоны тэмцээнийг Ironman club, Монголын Триатлоны холбоо болон Нийгмийн ардчилал Монголын залуучуудын холбоо хамтран зохион байгуулж байгаа юм.