Month: September 2018

Нийслэлийн Засаг даргын орлогч Д.Энхтөр өдөрлөгийг нээж хэлсэн үгэндээ “Нийслэлийн Засаг даргын үйл ажиллагааны хөтөлбөрт тусгагдсан хөдөлмөр эрхлэлтийг дэмжих чиглэлээр дөрвөн зорилт 27 арга хэмжээ бүхий “Нэг өрх Нэг ажлын байр” нийслэлийн дэд хөтөлбөрийг хэрэгжүүлэн ажиллаж байна.

Энэ ажлын хүрээнд нийслэлийн есөн дүүргийн 152 хорооны 244369 өрхийг хамруулсан хөдөлмөр эрхлэлтийн байдлыг тодорхойлох судалгааг явуулсан. Судалгааны дүнд үндэслэн өрх бүрт хандсан хөдөлмөр эрхлэлтийн нийтлэг үйлчилгээ, дэмжих арга хэмжээг үзүүлж байна. Мөн хөдөлмөр эрхлэлтийн үйлчилгээ, арга хэмжээг нэг цэгээс үзүүлэх зорилготой Хөдөлмөр эрхлэлтийг дэмжих төвийг байгуулж, 20 гаруй томоохон ААН, байгууллагатай хамтран ажилласаар байна.

Өчигдрийн байдлаар тус төвд ирсэн ажлын байрны захиалга 8622 хүрээд байна. Мөн 4860 иргэнийг төвөөр дамжуулан ажилд зуучилсан. Түүнчлэн 3294 иргэнд ажил мэргэжлийн болон сэтгэл зүйн зөвлөгөө үзүүлээд байна” хэмээн онцлов.

Тус өдөрлөгт нийслэлийн Хөдөлмөр эрхлэлтийн газрын дэргэдэх Хөдөлмөр эрхлэлтийг дэмжих төв, Цагийн ажлын бирж, ажил олгогч 70 гаруй аж ахуйн нэгж байгууллагын 4000 гаруй ажлын байрны захиалга, Мэргэжлийн сургалтын 34 байгууллага, Хадгаламж зээлийн хоршоод, Гарааны бизнес эрхлэгч, хувийн хөдөлмөрийн биржүүд оролцож байна.

Өнөөдөр “Хөдөлмөрийн нэгдсэн өдөрлөг”-ийн үеэр,

Мэргэжлийн болон давтан сургалтад хамрагдсан иргэдийн дунд оёдол, үсчин, нүүр будалт, хумс засал гэсэн 4 мэргэжлээр ур чадварын уралдаан зохион байгуулна
Хүний нөөцийн мэргэшсэн ажилтан, сэтгэл зүйч, ажил мэргэжлийн чиг баримжаа олгох зөвлөхүүд ажил хайгч иргэдэд зөвлөгөө өгөх
Ажил олгогч 60 аж ахуйн нэгж байгууллага болон 15 хувийн хөдөлмөрийн биржүүд 4000 гаруй нээлттэй ажлын байраа танилцуулж, хүний нөөцийн бүрдүүлэлт хийнэ
Гарааны бизнес эрхлэгчид үйлдвэрлэсэн бараа, бүтээгдэхүүнээ олон нийтэд сурталчлах, таниулах
Мэргэжлийн сургалтын байгууллагууд үйл ажиллагаагаа сурталчлах, таниулах
Хөдөлмөрийн хувийн биржүүд үйл ажиллагаагаа сурталчлах, таниулах, иргэдэд хөдөлмөр эрхлэлтийн нийтлэг үйлчилгээ үзүүлэх

Политехник коллеж болон Мэргэжлийн сургалт үйлдвэрлэлийн төвийн оюутан суралцагчдад нийтийн тээврээр үнэ төлбөргүй зорчих Смарт картын бүртгэл, олголт хийгдэнэ.

Баянгол дүүргийн нутаг дэвсгэр, 10 дугаар хороололд энэ сарын 17-ны өдөр “Приус 30” маркийн автомашин шатсан хэрэг гарсан.

Орон сууцны гадна байрлуулсан тоёото приус 30 маркийн автомашины зай дэлбэрсэн бололтой хойд тал нь тэр чигтээ шатсан бөгөөд гал нь хажуу тийшээ шилжиж, бас нэгэн машиныг шатаасан байсан аж.

“Машин шатаж байна” гэсэн дуудлагын дагуу Нийслэлийн онцгой байдлын газрын гал унтраах ангийнхан яаралтай арга хэмжээ авч, галыг бүрэн унтраажээ. Уг машин юунаас болж шатсан талаар шинжээчийн дүгнэлт гараагүй байгаа хэдий ч шатсан машины жолооч “Хэн нэгний санаатай үйлдэл байж магадгүй. Түүнээс машины зай дэлбэрээгүй байх. Худалдаж аваад сар ч болоогүй шинэ машин дэлбэрнэ гэж байхгүй. Өөрийнхөө нэр дээр ч шилжүүлж амжаагүй байхад шатчихлаа.

Машины хойд талын хоёр дугуйнаас бөөрөнхийлөөд шатааж байсан цамц мөн машины хажууханд нь тарваганы мах хүртэл олдсон. Бүгдийг нь шинжлүүлэхээр өгсөн. Гэтэл гадуур худлаа цуурхал мэдээлэл тарсанд харамсаж байна” хэмээн ярьжээ.

Цагдаагийн газраас уг машин шатсан шалтгааныг тодруулахаар ажиллаж байна.

Нийслэлийн Эрүүл мэндийн газраас ХУД-ийн ЗДТГ, тус дүүргийн Эрүүл мэндийн төвтэй хамтран өнөөдөр “Нийслэлийн Эрүүл мэндийн газрын 80 жилийн ойд зориулсан эрдэм шинжилгээний хурал-2018” арга хэмжээг Нийслэлийн иргэний танхимд зохион байгууллаа.

НЭМГ нь харьяа эрүүл мэндийн байгууллагаас шалгарсан эрдэм шинжилгээ, судалгааны ажлыг хэлэлцэх зорилгоор эрдэм шинжилгээний онол практикийн хурлыг жил бүр уламжлал болгон зохион байгуулдаг билээ. Энэ удаагийн хурал нь НЭМГ-ын 80 жилийн ойн баярыг тохиолдуулан зохион байгуулснаараа онцлог юм.

Мөн эрүүл мэндийн салбарын тулгамдсан асуудлууд болон нас баралт өндөр байгаа өвчин эмгэгийг тэргүүлэх чиглэл болгон тодорхойлж, эрдэм шинжилгээ, судалгааны ажлыг хийж, нотолгоонд тулгуурласан нийгмийн эрүүл мэндийн болон эмнэлгийн тусламж, үйлчилгээг үзүүлэх зорилтын дагуу харьяа эрүүл мэндийн байгууллагын эмч, эмнэлгийн мэргэжилтэн, судлаач нарын чадамжийг сайжруулж, дэмжих ажлын хүрээнд шилдэг илтгэл болон ханын илтгэлийг шалгарууллаа.

ШИЛДЭГ ИЛТГЭЛ:

Нэгдүгээр байр: Хан-Уул дүүргийн Эрүүл мэндийн төвийн эмч Ё.Бумдарь “M2BPGi өвөрмөц уургийг цусны ийлдсэнд тодорхойлсон судалгаа”

Хоёрдугаар байр: Нийслэлийн Өргөө амаржих газрын Бодлого төлөвлөлт хариуцсан дарга Д.Наранцацралт “Кесар мэс заслын дараах үхжлийн шалтгаан ба антибиотик мэдрэг чанарыг тодорхойлсон үр дүн”

Гуравдугаар байр: Нийслэлийн Хүрээ амаржих газрын нярайн их эмч Г.Аюуш “Хүрээ амаржих газарт хийгдсэн сурфактант эмчилгээний үр дүнг тооцсон нь”

Шүүгчдийн нэрэмжит шагнал: Баянгол дүүргийн “Учрахуй” өрхийн эрүүл мэндийн төвийн эмч Э.Долгорсүрэн “Билискейн аппликкейшн ашиглаж нярайн шарлалтыг хэмжсэн дүн”

ХАНЫН ИЛТГЭЛ:

Нэгдүгээр байр: Нийслэлийн түргэн тусламжийн төв – Л.Тамир “НТТТ-ийн Баянзүрх дүүргийн хүүхдийн дуудлагын хуудсанд хийсэн тархалт, давтамж, эрсдэлт хүчин зүйлийн судалгаа”

Хоёрдугаар байр: Баянзүрх эмнэлгийн ерөнхий эмч Л.Баярцэцэг “Баянзүрх эмнэлгийн 2014, 2015, 2016 оны хоног болоогүй нас барсан тохиолдолд амилуулах суурь болон лавшруулсан тусламж үзүүлсэн байдлын судалгаа”

Дашрамд дурдахад, Төрөөс эрүүл мэндийн талаар баримтлах бодлогод “Эрүүл мэндийн салбарын эрдэм шинжилгээ, судалгааны ажлын санхүүжилтийг нэмэгдүүлэх, салбарын инноваци, эрдэм шинжилгээ, судалгааны ажлын тэргүүлэх чиглэлийг тодорхойлж, судалгааны ажлын үр дүнг практикт өргөнөөр нэвтрүүлэх” гэж тусгасан байдаг. Энэхүү дагуу 2017 оны 06 дугаар сарын 07-ны өдрийн НИТХ-ын тэргүүлэгчдийн хурлаар баталсан “Нийслэлийн эрүүл мэнд” дэд хөтөлбөрийн хүрээнд нийслэлийн эрүүл мэндийн бодлого, түүний төлөвлөлт хэрэгжилтийг шинжлэх ухааны үндэслэл, зөвлөмжөөр хангах зорилгоор эрдэм шинжилгээ болон судалгааны ажлыг дэмжин ажиллаж байна.

Гэрэл зургийг Ц.МЯГМАРСҮРЭН

Монголын сэтгүүл зүйн шилдэг бүтээлд олгодог “Балдорж” шагналын шилдгүүдэд шагнал гардуулах 10 дахь удаагийн ёслолын арга хэмжээ өчигдөр боллоо. Энэ удаагийн арга хэмжээнд уламжлал ёсоор Монголын үе үеийн Төрийн тэргүүн нар хүрэлцэн ирснээс гадна улс төр, нийгэм, эдийн засаг, соёлын салбарын нэрт зүтгэлтнүүд хуран чуулсан юм.

Ёслолын арга хэмжээний нээлтийн үгийг Монгол Улсын хоёр дахь Ерөнхийлөгч Н.Багабанди хэллээ. Тэрбээр “Миний дотно нөхөр Ц.Балдорж цагаасаа урьд биднээсээ салан одсон ч үйл хэрэг нь мөнхрөн үргэлжлэх тавилантай, амьдрал нь богино ч алдар гавьяа, үйлс бүтээл нь уртаас урт цаг хугацааг дамнан үргэлжлэх заяатай байсны гэрч нь та бид билээ. Сэтгүүлчдийн ёс төртэй, ёс суртахуунлаг үйлд бялдууч орогнох орон зай байх ёсгүй гэж Ц.Балдорж үгээр хэлж, үйлдлээрээ хязгаарладаг байсан юм. Сэтгүүлчийн ган үзэг зөвхөн үнэний тухай бичиж, сэтгүүлч үнэний дуу хоолой болон дуугарч байвал уншигч, үзэгч, сонсогчид бидний хойноос эргэлзээ тээнэгэлзээгүйгээр явах болно гэдэгт тэрээр бат итгэлтэй байсан юм.

Хүн төрөлхтний түүхээс үзвэл сайн төрийн толгойд хууль, муу төрийн толгойд дарга даамлууд заларч ирсэн байна. Монгол төрийн толгойд хууль заларч, хаад харцаас ялгаагүй тав толгойтой бүхэн нэгэн адил байх зарчимыг Ц.Балдорж чанга баримтлахыг дэмжихийн зэрэгцээ хуулийн засаглал тогтоход сэтгүүлчдийн эх оронч үзэл, мэргэжлийн ёс зүйн үүрэг хууль сахиулагчдаас дутуугүй үйлчлэх ёстойг тэрээр гүн ухамсарласан байсан юм” хэмээн хэллээ.

Түүнчлэн тэрбээр “Бусдын захиалгаар буюу баримт нотолгоогүйгээр хүний нэр төрийг сэвтээх бусармаг үйлдэлд орооцолдох нь сэтгүүлчдийн мэргэжлийн ёс зүйд гал ус мэт харш. Хууль зөрчсөн болон ёс зүйн үүргээ умартсан хэн боловч түүний дотор сэтгүүлчид гэм хийсэн бол зэм хүртэх нь зүйн хэрэг. Сэтгүүлчид нийгмийн өмнө хүлээсэн давуу үүрэгтэй болохоос давуу эрхийг хэнд ч өгөөгүй. Өгөх ч учиргүй гэдгийг ямагт санаж ажиллах учиртай. Хууль зөрчигчид, хууль завхаруулагчидтай хийх амаргүй тэмцэлд дөрөв дэх засаглалын хүчирхэг дуу хоолой, дэмжлэг туслалцаа ус агаар мэт хэрэгтэй хэвээр байна” гэж онцоллоо.

Энэ жилийн Балдорж шагналын шилдэг аравт “Өнөөдөр” сонины сэтгүүлч Х.Уянга, Tv9 телевизийн сэтгүүлч Д.Ганзориг, Үндэсний шуудан сонины хариуцлагатай нарийн бичгийн дарга Б.Энхмарт нар шалгарсан юм. Мөн 25-р суваг телевизийн Д.Эрдэнэбаяр, Ж.Пүрэвдаваа, Г.Мөнхбаяр нарын “Нэг удаа үндэсний контент” цуврал нэвтрүүлэг шилдэгт багтлаа. Түүнчлэн Ийгл телевизийн сэтгүүлч С.Батзаяа, Зууны мэдээ сонины Б.Солонго, Засгийн газрын мэдээ сонины сэтгүүлч З.Цэлмэг, Өдрийн сонины сэтгүүлч Э.Хүрэлбаатар, Монцамэ агентлагийн сэтгүүлч Б.Алтанхуяг, Bloomberg телевизийн сэтгүүлч М.Хонгорзул нар шалгарч шагналаа гардан авлаа.Харин тусгай шагнал буюу Канадын ЭСЯ-ны нэрэмжит шагналтнаар чөлөөт сэтгүүлч Ж.Мандхай тодорсон юм.

“Балдорж” шагналын шилдэг дэд байрт МҮОНРТ-ийн Баримт нэвтрүүлгийн багийн Г.Батзаяа, Ж.Золзаяа, Б.Лхагвасүрэн нар шалгарч, “Уул уурхайтай “ханилсан” орчин цагийн малчин” цуврал сурвалжлагаараа “Өнөөдөр” сонины Ж.Сувдмаа, Т.Энхбат нар шилдэгийн шилдэг “Гран-При”-гийн эзэд боллоо.

Энэ дашрамд онцлоход манай сонины нийтлэлч Ж.Гангаа агсан 2011 онд “Хялганат талын цагаан зээр хар цээр биш ээ” нийтлэлээрээ шилдгийн шилдэг сэтгүүлчээр шалгарч байсан билээ. 2015 онд манай сонины сэтгүүлч Э.Хүрэлбаатар “Зүүн гурван аймгийн хуульгүй ардууд зээрийн сүргээ хүйс тэмтрээд дуусаж байна”, “Би Монгол Улсаа дэлхийн хамгийн том орон гэж боддог буюу Хануйн бага сургуулийн сурагчид”, “Бөгтөр бөхөнгийн мөхөл ирэв үү” нийтлэлүүдээрээ “Балдорж” шагналын шилдгийн шилдэг сэтгүүлчээр шалгарч байсан юм.

Шагнал гардуулах ёслолын дараа “Өдрийн сонин“-ы сэтгүүлч Э.Хүрэлбаатар “Балдорж” шагналын шилдэг 10-т “Замын-Үүдээр зэрлэг адуу мэт чихцэлдэн дайралдах монголчуудын нэг өдөр” тэмдэглэлээрээ шалгарлаа. Өмнө нь гурван удаа айрагдаж, нэг удаа түрүүлсэн. Энэ жилийн хувьд дахин айрагдлаа. Сүүлийн жилүүдэд ийш тийш явж сурвалжлага хийж байсан бол энэ жил нэлээд суурин өнжлөө. Найман настай охин Замын-Үүдэд алга болсон хэргийг сурвалжлахаар явахдаа гэрэл зурагчин Ц.Мягмарсүрэнтэй хамт Монгол Улсын хамгийн том хилийн боомт дээр очиж нэг өдрийн сурвалжлага бэлтгэсэн. Монголын хилээр хууль бус эд бараа яаж гардаг, ордгийг энэ сурвалжлагаар харуулахыг зорьсон” хэмээн ярилаа.

Мөн Ийгл телевизийн сэтгүүлч С.Батзаяа “Нийтдээ 20 гаруй нийтлэл, гурван нэвтрүүлгийг тэмцээнд илгээсэн. Үүнээс “Өв соёлгүй Монгол” нэвтрүүлэг маань “Балдорж” шагналын шилдэг 10-т багтлаа. Түүхийн соёлын салбар орхигдсон байсан учраас энэ асуудлыг хөндөж нэвтрүүлэг хийсэн” хэмээн ярилаа.

Үндэсний шуудан сонины Хариуцлагатай нарийн бичгийн дарга Б.Энхмарт “Өмнөх жилүүдэд эрэн сурвалжлах чиглэлийн цуврал нийтлэлүүд болон байгаль орчны нийтлэл ихэвчлэн бичдэг байсан. Энэ жил хөрөг ярилцлага, тойм, тэмдэглэлүүд илүүтэй бичлээ. Онцолж хэлэхэд “Бид болон Монголын тал нутаг чамд хайртай” гэсэн япон залуугийн тухай бичсэн тэмдэглэл, дурсамж маань “Балдорж” шагналын шилдэг 10-т багтсан явдалд баяртай байна” гэв.

– Тусгай шагнал буюу Канадын ЭСЯ-ны нэрэмжит шагналтан Чөлөөт сэтгүүлч Ж.Мандахай
ШИЛДЭГ 10
10. Bloomberg телевиз. Сэтгүүлч М.Хонгорзул
9. Монцамэ агентлаг. Cэтгүүлч Б.Алтанхуяг
8. Өдрийн сонин. Э.Хүрэлбаатар
7. Засгийн газрын мэдээ сонин. З.Цэлмэг
6. Зууны мэдээ сонин. Б.Солонго
5. Мongolian мedia corporation. С.Батзаяа
4. 25-р суваг телевиз. Д.Эрдэнэбаяр, Ж.Пүрэвдаваа, Г.Мөнхбаяр. Нэг удаа үндэсний контент.
3. Үндэсний шуудан сонин. Б.Энхмарт.
2. Tv9 телевиз. Д.Ганзориг
1. Өнөөдөр сонин. Х.Уянга.
ДЭД БАЙР
МҮОНРТ. Баримт нэвтрүүлгийн баг. Г.Батзаяа, Ж.Золзаяа, Б.Лхагвасүрэн.
ШИЛДЭГИЙН ШИЛДЭГ СЭТГҮҮЛЧ
Өнөөдөр сонин. Ж.Сувдмаа, Т.Энхбат

2018 оны 9 дүгээр сарын 19-ний өдөр I, II, III ангиллын 19 хувьцаат компанийн 344,510 ширхэг хувьцаа арилжигдсанаас 8 хувьцаат компанийн хувьцааны ханш өсч, 8 хувьцаат компанийн хувьцааны ханш буурсан бол 3 компанийн ханш тогтвортой байллаа. Үүнээс “Ремикон” ХК (RMC+9.72%) болон “Хөх ган ХК (HGN+6.02%) компаниудын хувьцааны ханш хамгийн өндөр өсөлттэй байсан бол “Монгол нэхмэл ХК (MNH-15.00%) болон “Хөвсгөл алтан дуулга ХК (ADU-14.63%) компанийн хувьцаа хамгийн их уналттай байлаа.

Тендер саналын арилжаагаар “Монголын цахилгаан холбоо” ХК-ийн 7,572 ширхэг хувьцаа 542 төгрөгөөр, ЗГҮЦ-ны хоёрдогч зах зээлийн арилжаанд 1 ширхэг үнэт цаас 103,280 төгрөгөөр арилжигдсан байна. Энэ өдөр “TOP 20” индекс 19951.76 нэгж болж 0.01 хувиар буурсан бол зах зээлийн үнэлгээ 2,324,806,953,100 төгрөг боллоо.

Арилжааны дэлгэрэнгүй мэдээллийг ЭНД ДАРЖ үзнэ үү.

Зам барилгын ажлын хүрээнд Яармагийн зам, Богд уулын арын зам болон Чингисийн өргөн чөлөөний авто замуудын хөдөлгөөнийг хэсэгчилэн хааж, авто замын суурь, дунд ба өнгө үеийн хучилтын ажлууд хийгдэж байна.

Мөн Богд уулын арын замаас Яармагийн замтай шууд холбох “D” рамп гүүрийн үлдсэн 6 алгасалын дам нурууны угсралтын ажлын хүрээнд есдүгээр сарын 20-оос эхлэн замын хөдөлгөөнийг хэсэгчлэн хаана.

Түүнчлэн жаазан гүүрийн бетон цутгалтын ажил хийгдэж, арчилгааны ажил хийгдэж байна.

Чингисийн өргөн чөлөөг Ажилчны гудамжтай холбох U сувгийн баруун хэсгийн 2 талын авто зам болох AR ба AL чиглэлийн авто замын далангийн дүүргэлтийн ажил хийгдэж буй. Мөн AR ба ML чиглэлийн авто замыг тусгаарлах түшиц хана байгуулах ажил явагдаж байна.

Түүнчлэн хуучин гүүрийн засварын ажлын хүрээнд дам нуруу хоорондын завсрын бетон ба хучилтын хавтан цутгах, явган зам болон хучилтын хавтан зэрэг бетон эдлэл үйлдвэрлэх ажил хийгдэж байна гэж НАЗХГ-аас мэдээллээ.