Month: September 2018

Өмнөговь аймаг дахь төрийн албаны салбар зөвлөл Төрийн жинхэнэ албаны удирдах ажилтны сул орон тоонд томилогдох ажилтны сонгон шалгаруулалт, Төрийн үйлчилгээний удирдах ажилтны сул орон тоонд томилогдох ажилтны сонгон шалгаруулалтыг хийлээ.

Булган сумын ЗДТГ-ын дарга, Ханбогд сумын ЗДТГ-ын Санхүүгийн албаны дарга, Ханбогд сумын Соёлын төвийн эрхлэгч, Цогтцэций сумын ЕБС-ийн захирал, Ханбогд суманд шинээр байгуулагдаж буй сургууль цэцэрлэгийн захирал, эрхлэгч Гуравдугаар сургуулийн захирлын орон тоонд 12 иргэн шалгалт өгснөөс хоёр иргэн тэнцэж, Ханбогд сумын ЕБСургууль, Даланзадгад сумын Гуравдугаар сургууль захиралтай боллоо.

Төрийн албаны удирдах ажилтны улсын зөвлөгөөн 2018 оны есдүгээр сарын 21,22-нд Төрийн ордонд болно. Уг зөвлөгөөнийг Засгийн Газрын Хэрэг Эрхлэх Газраас санаачилж, Монгол Улсын Их Хурал, Төрийн албаны зөвлөл, Удирдлагын академи, Нэгдсэн үндэстний байгууллагын Хөгжлийн хөтөлбөр (НҮБХХ)-тэй хамтран зохион байгуулна.

Төрийн албаны удирдах ажилтны улсын зөвлөгөөн нь Төрийн албаны тухай хууль, төрийн албаны шинэчлэлийн хөтөлбөрийн үзэл баримтлал, агуулга, тэргүүлэх чиглэлийн талаар төрийн албан хаагчдын дунд нэгдсэн ойлголт бий болгох, төрийн албаны шинэчлэлийг амжилттай хэрэгжүүлж иргэдэд хүргэх үйлчилгээг сайжруулсан, үр дүнд хүрсэн улс орнуудын туршлага, дэлхий нийтийн чиг хандлагаас суралцах, Төрийн албаны тухай хуулийг дагалдаж гарах журмуудын төслийн талаар хэлэлцүүлэг зохион байгуулж, төрийн албан хаагчдын саналыг тусгах зорилготой юм.

Монгол Улсын Их Хурал Төрийн албаны тухай хуулийн шинэчилсэн найруулгыг 2017 оны 12 дугаар сард баталж, 2019 оны нэгдүгээр сарын нэгний өдрөөс хүчин төгөлдөр үйлчилнэ. Шинэ хуулийн ерөнхий зорилго нь Монгол Улсын төрийн албанд чадахуйн зарчмыг хүний нөөцийн удирдлагын бүх шатанд мөрдлөг болгох, үр дүнд чиглэсэн соёл, тогтолцоог төлөвшүүлэн бэхжүүлэх юм. Уг хуулиар төрийн албаны стандарт бий болгох, тухайн албан тушаалд зориулсан мэргэшүүлэх багц сургалт, төрийн албанд шатлан дэвшихэд уг сургалтад заавал хамрагдах шаардлага, төрийн албаны шалгалтын агуулгыг шинэчлэх, байгууллагын стратегийн болон гүйцэтгэлийн төлөвлөгөөг боловсруулах зэрэг төрийн албаны шинэчлэлийн чухал үзэл санаанууд тусгагдсан. Үүний зэрэгцээ Төрийн албаны тухай хуулийн шинэчилсэн найруулга баталсантай холбогдуулан авах зарим арга хэмжээний тухай УИХ-ын тогтоолыг баталж, хуулийг дагаж мөрдөхөд шаардлагатай 50 орчим журмыг Улсын Их Хурал, Монгол Улсын Засгийн газар, Төрийн албаны төв байгууллага боловсруулж, батлан гаргахаар бэлтгэж буй.

Мөн Монгол Улсын Засгийн газрын 2018 оны хоёрдугаар сарын 42 тоот тогтоолоор “Гурван тулгуурт хөгжлийн бодлого”-ыг баталж шударга ёсыг дээдлэх, сахилга, хариуцлагыг бэхжүүлэх нь хөгжлийн гурван тулгуурын нэг гэж тодорхойлсон. Энэ хүрээнд төрийн албан хаагчийг мэргэшүүлэх, чадавхжуулах тогтолцооны үндсийг бүрдүүлэх, ёс зүйтэй, шудрага, ил тод төрийн албыг бэхжүүлэх зэрэг зорилтуудыг дэвшүүлэн тавьсан. Гурван тулгуурт хөгжлийн бодлогын хүрээнд Төрийн албаны шинэчлэлийн үзэл баримтлалыг боловсруулах үүрэгтэй Ажлын хэсгийг Засгийн газрын Хэрэг эрхлэх газар энэ оны 6 сараас байгуулан ажиллаж байна. Үүний зэрэгцээ Төрийн албан хаагчийн хариуцлагын тухай хуулийн төслийг Засгийн газраас санаачлан боловсруулж УИХ-д өргөн мэдүүлэхээр бэлтгэж байна.

Төрийн албаны удирдах ажилтны улсын анхдугаар зөвлөгөөн хоёр өдөр үргэлжилнэ. Эхний өдрийн нэгдсэн хуралдаанаар Монгол Улсын төрийн албаны шинэчлэлийн бодлого, олон улсын сайн туршлагын талаар үндэсний бодлого боловсруулагчид, олон улсын шинжээчид илтгэл тавьж хэлэлцүүлнэ. Хоёр дахь өдөр салбар хуралдаануудыг хийж:

• Төрийн албыг шинэчлэх шаардлага, төрийн албаны шинэчлэлийн тэргүүлэх чиглэлүүд

• Монгол Улсын төрийн албанд чадахуйн (мерит) зарчмыг мөрдүүлэх нь (төрийн албан хаагчийн томилгоо, албан тушаал шатлан дэвшүүлэх, ажлын үр дүнг тооцох)

• Төрийн албан хаагчдыг мэргэшүүлэх, чадавхыг бэхжүүлэх бодлого

• Төрийн албан хаагчийн ёс зүй, шударга байдал, сахилга, хариуцлага

• Төрийн албан хаагчийн цалин хөлс, нөхөх төлбөр, тусламж, нийгмийн баталгаа

• Төрийн албаны стратегийн удирдлагыг сайжруулах, үр дүнд чиглэсэн соёлыг төлөвшүүлэх нь

• Иргэдэд үзүүлэх төрийн үйлчилгээг сайжруулах нь зэрэг сэдвээр ярилцаж Төрийн албаны тухай хуулийг дагалдаж гарах журмын төслүүдийг хэлэлцэнэ. Хоёр дахь өдрийн төгсгөлд нэгдсэн хуралдаанаар нэгдсэн зөвлөмж гаргаж төрийн албаны удирдах ажилтнууд улс түмэндээ андгай өргөхөөр төлөвлөж байна.

Зөвлөгөөнд Монгол Улсын төр засгийн байгууллагууд, яам, агентлаг, нутгийн захиргааны байгууллагын төлөөлөл, олон улсын шинжээчид зэрэг 800 гаруй хүн оролцоно.

Архангай аймагт “Гэрээт малчин-өрхийн хөдөлмөр эрхлэлтийг дэмжих туршилтын төсөл” хэрэгжиж буй. Энэхүү төсөл нь хот суурин газраас хөдөө орон нутагт шилжин суурьшиж, мал маллах хүсэлтэй өрхийг цалин хөлстэй ажилд зуучилж, тогтвортой ажлын байр, орлоготой болоход нь дэмжлэг үзүүлэх зорилготой юм байна.

Тус төслийн хүрээнд Архангай аймгийн Батцэнгэл суманд 17 гэрээт малчин өрх, Эрдэнэмандал суманд хоёр гэрээт малчин өрх, Тариат суманд зургаан гэрээт малчин өрх нийт 25 өрхийг сумын 25 малчин ажил олгогчтой гэрээ байгуулан гэрээт малчнаар зуучлан ажлын байраар хангажээ.

Малчдын хөдөлмөр эрхлэлтийг дэмжих хөтөлбөрийн хүрээнд залуу малчдыг малжуулах арга хэмжээнд тус аймгийн Өгийнуур сумын хоёр өрх, Хашаат сумын дөрвөн өрхийг малжуулж 27,0 сая төгрөгийн санхүүгийн дэмжлэг үзүүлсэн байна.

Монгол Улсын Ерөнхийлөгчийн 2017-2021 онд хэрэгжүүлэх Бодлого, үйл ажиллагааны хөтөлбөрийн Боловсрол, шинжлэх ухааныг дэмжих бодлогын хүрээнд Монгол Улсын Ерөнхийлөгчийн ивээл дор Нобелийн шагналтны цуврал лекц, эрдэм шинжилгээний хурлыг Ерөнхийлөгчийн Тамгын газраас Монгол Улсад жил бүр уламжлал болгон зохион байгуулахаар төлөвлөж байна.

Ховд аймгийн Гэр бүл хүүхэд, залуучуудын хөгжлийн газраас “Миний гэр бүл- Миний аз жаргал” аяныг энэ оны тавдугаар сарын 15-наас ирэх оны тавдугаар сарын 15-ныг хүртэл нэг жилийн хугацаанд өрнүүлж байна.

Аймгийн албан байгууллагын удирдлага бүр ажилтан, албан хаагчдынхаа ар гэрийн асуудалд анхаарч, хүүхдүүд эцэг эхээрээ бахархах үзлийг төлөвшүүлэх зорилго бүхий тус аян Онцгой байдлын газарт өрнөлөө. Газрын дарга, дэд хурандаа Б.Алтанбадралт байгууллагын хүүхэд хамгааллын бодлогын баримт бичигт гарын үсэг зурав.

Ингэснээр хүүхдийн эрүүл аюулгүй орчинд амьдрах эрхийг хамгаалах, хүүхдэд үйлчилгээ үзүүлдэг байгууллагуудад тавих анхаарал халамж сайжирна гэж үзэж буй. “Гэр бүлийн үнэ цэнэ-Хамтын амьдралын утга учир” сэдвээр Ховд аймгийн ГБХЗХГ-ын хүүхдийн эрхийн улсын байцаагч О.Мандалсүрэн, залуучуудын асуудал хариуцсан мэргэжилтэн Б.Ичинхорлоо нар “Хүмүүжлийн эерэг арга” сэдвээр Онцгой байдлын газрын ажилтнуудад мэдээлэл өгөв.

Үүний дараа аймгийн Ус цаг уур орчны шинжилгээний төвд аян үргэлжлэв. Төвийн дарга А.Энхзаяа удирдах албан тушаал эрхэлж байгаа эмэгтэйн хувьд өрх гэрийн амьдралын чанарыг дээшлүүлж, гэр бүлийн гишүүдийн хандлага, зан үйлийг өөрчлөх нөлөөллийн ажлуудыг тогтмол зохион байгуулж буй талаар танилцуулав.

Монгол улсын нийт өрхийн тоо 860 гаруй мянгад хүрсэн ч өрх толгойлсон эрэгтэй, эмэгтэйчүүдийн тоо өсч 80 гаруй мянган өрх толгойлсон эхчүүд байгаа нь нийт өрхийн 10 орчин хувийг эзэлж буй аж. Тиймээс эцэг эх, хүүхэд, албан байгууллагын дун өрнүүлж байгаа тус аян орон нутагт гэр бүлийн дулаан уур амьсгалыг бүрдүүлж, эерэг өөрчлөлт авчирна хэмээн албаныхан үзэж буй.

2012 онд Өмнөговь аймгийн Даланзадгад суманд газар өмчилж авахыг хүссэн иргэдийн өргөдлийг 2018 онд багтааж бүрэн шийдвэрлэж дуусгана.

2013-2018 онд Даланзадгад суманд газар өмчилж авахыг хүссэн 6000 гаруй иргэний өргөдөл байгаа бөгөөд тус иргэдийн өргөдлийг шийдвэрлэхээр “Өмчлөлийн газрын нөөц тогтоож, хэсэгчилсэн ерөнхий төлөвлөгөө хийх”-ээр газар дээр нь хээрийн судалгаа хийлээ.

Өмнөговь аймгийн Газар зохион байгуулалтын ерөнхий төлөвлөгөөнд иргэнд өмчлүүлэх боломжтой газраар төлөвлөгдсөн газарт шинээр иргэнд газар өмчлүүлэхээр төлөвлөж байгаа бөгөөд тус газар нь аймгийн төвөөс зүүн хойд зүгт байрлалттай байна.

Хөдөлмөр, нийгмийн хамгааллын яам, НҮБ-ын Хүүхдийн Сан хамтран “Цахим орчин дахь хүүхдийн эсрэг бэлгийн хүчирхийлэл, мөлжлөгөөс урьдчилан сэргийлэх, арга хэмжээ авах нь” сэдэвт хэлэлцүүлгийг 2018 оны 09-р сарын 19-ны өдөр зохион байгууллаа. Хэлэлцүүлэгт НҮБ-ын Хүүдийн Сангийн Монгол дахь Суурин төлөөлөгч Алекс Хайкенс, УИХ-ын Цахим бодлогын түр хороо, Хөдөлмөр, нийгмийн хамгааллын дэд сайд С.Мөнгөнчимэг, ИБУИНВУ-аас Монгол Улсад суугаа Элчин сайд Филип Малон, Засгийн газрын хэрэгжүүлэгч агентлаг Гэр бүл, хүүхэд, залуучуудын хөгжлийн газрын дэд дарга Б.Халиун, Харилцаа холбооны Зохицуулах хорооны дэд дарга Д.Сэрээдорж нар оролцсон. Хэлэлцүүлгийн гол зорилго нь дээрх асуудлаар салбар дундын болон байгууллага хоорондын хамтын ажиллагааны ач холбогдлыг онцлон хөндөж байгаа юм. Хэлэлцүүлгээр дэлхий дахин, бүс нутаг, улс орны түвшинд хүүхдийг цахим орчинд хамгаалах асуудлаар мэдээлэл, харилцаа, технологийн салбарын холбогдох хууль тогтоомж, бодлого хөтөлбөр, тэдгээрийн хэрэгжилт, интернетийн салбарын техник, технологийн асуудлууд, санал, гомдлыг шийдвэрлэх байдал зэрэг сэдвийн хүрээнд явагдаж, салбарын хүмүүс өөрсдийн байр суурь санаа бодлыг илэрхийлсэн юм.

Гэр бүл, хүүхэд, залуучуудын хөгжлийн газрын дэд дарга Б.Халиун хэлэхдээ “Хүүхдийн тусламжийн утас 108 төвд ирсэн дуудлаганаас үзэхэд цахим орчинд хүүхдийн эрх 5 төрөлд зөрчигдөж байна.2017 онд цахим орчинд эрх нь зөрчигдөж байгаа талаар 237 дуудлага ирсэн.Садар самуун бичлэг шууд хүүхдэд хүрдэг, хувийн чат болон бусад хэрэгслээр сүрдүүлэх, дарамтлах зэргээр цахим орчинд хүүхдийн эрх их зөрчигдөж байна. Цахим орчин дахь хүүхдийн эсрэг бэлгийн хүчирхийлэл, мөлжлөгөөс урьдчилан сэргийлэхэд орчин үеийн техник технологитой хөл нийлүүлэн алхах нь чухал. Шүүлтүүрийн программыг үйл ажиллагаандаа хэрхэн, яаж нэвтрүүлэх тал дээр судалгаа хийгдэж байна.