Month: September 2018

2019 онд БНСУ-ын Засгийн газрын тэтгэлгээр баклаврын зэрэгт суралцах гадаадын оюутан сонгон шалгаруулах хөтөлбөр зарлагдлаа. БНСУ-аас Монгол Улсад суугаа Элчин сайдын яамаар дамжуулан сонгон шалгаруулалтад оролцох хүсэлт гаргагчдын материалыг 2018 оны аравдугаар сарын 1-ний өдрөөс аравдугаар 5-ны хооронд Элчин сайдын яамны байранд хүлээн авна.

Бүртгүүлэх хугацаа: Аравдугаар сарын 1 даваа гаригт, аравдугаар сарын 5 баасан гаригт

Материал хүлээн авах газар : БНСУ-аас Монгол Улсад суугаа ЭСЯ

Сонгон шалгаруулах оюутны тоо: 3 хүн

– Монгол улсын харъяат иргэн

– 2019.3.1-ний байдлаар ахлах сургууль төгссөн байх (баклаврын зэрэгтэй хүн материал өгөх боломжгүй)

– 25 нас хүрээгүй байх (1994.3.1-нээс хойш төрсөн иргэн)

Дэлгэрэнгүй мэдээллийг эндээс авна уу.

Төрийн тусгай албан хаагчдын нэгдсэн эмнэлэгт өнөөдөр “Эрүүл мэндийг дэмжих төв”-ийн нээлт болов. Уг төвийг Такамацү Норд Ротари клуб, “Нарлаг Улаанбаатар ротари клуб” ТББ-ын 80 мянган долларын санхүүжилтээр байгуулжээ.

Төрийн тусгай албан хаагчдын эрүүл мэнд, бие бялдар, зан үйлийн цогц үнэлгээ хийж тэдний хөдөлмөрийн бүтээмж, амьдралын чанартай уялдуулан судлах шинэ технологиудыг эрүүл мэндийн тусламж, үйлчилгээнд нэвтрүүлэх нь чухал гэдгийг эмч мэргэжилтнүүд хэлж байна.

Төрийн тусгай албан хаагчдын нэгдсэн эмнэлгийн дарга Л.Баттөр, “Нэг жилийн өмнө манай эмнэлэг болон Такамацү Норд Ротари клуб, “Нарлаг Улаанбаатар ротари клуб” ТББ хамтран “Эрүүл мэндийг дэмжих төв” байгуулах төсөлд гарын үсэг зурсан. Энэ төвийг улсын эмнэлгийн хэмжээнд анх удаа нээж буйгаараа онцлогтой. Иргэд өвдсөн хойноо биш өвдөхөөсөө өмнө урьдчилан сэргийлэх зорилгоор энэ төвийг зорьж үйлчлүүлэх нь нээлттэй” гэв.

Тус төвийг нээснээр төрийн тусгай албан хаагчдын өвчлөл, нас баралтын зонхилох хувийг эзэлдэг урьдчилан сэргийлэх боломжтой бодисын солилцооны хам шинж, зүрх судасны өвчин, чихрийн шижин, хавдар, бөөр, хоол боловсруулах замын өвчин, тамхи архины хортой хэрэглээ, зохисгүй хооллолт, хөдөлгөөний хомсдол, стресс болон халдварын бус гаралтай харшил, урьдчилан сэргийлэх, хянах, биохимийн шинжилгээний үзүүлэлтүүдийг харьцуулан судлах бие бялдар эрүүл мэндийн цогц үнэлгээг хийх юм.

“Манай эмнэлэг урьдчилан сэргийлэх үзлэгийг тогтмол хийдэг. Тиймээс манай төв нь урьдчилан сэргийлэх үзлэгийг чанаржуулах, төрийн албан хаагчдын бие бялдарт эрүүл мэндийн цогц үнэлгээ хийхийг зорьж байна. Мөн хөдөлгөөн, хооллолт, эрүүл мэндийн зан үйлийн зөвлөгөө мэдээлэл өгөх, тухайн хүнд тохирсон бодит үнэлгээг хийж сургалтыг бүлгийн болон ганцаарчилсан байдлаар явуулна. Мөн үүнээс гадна хувь хүнд зан үйлээ өөрчлөхөд нь сэтгэлзүйн үйлчилгээ үзүүлнэ” хэмээн Эмнэлгийн нийгмийн эрүүл мэндийн мэргэжилтэн, ахлах дэслэгч Ц.Батжаргал ярилаа.

Дашрамд мэдээлэхэд, тус эмнэлгийн үйл ажиллагааны үндсэн чиглэлийн 40 хувийг нийгмийн эрүүл мэндийн тусламж үйлчилгээ бүрдүүлдэг бөгөөд 2017 онд 100 мянган хүн амыг эрүүл мэндийн урьдчилан сэргийлэх үзлэгт хамруулжээ.

МУИС, МУБИС болон Ховд их сургуулийн дэргэд 2015 онд байгуулагдсан “Күнзийн институт” хэмээх хятад хэл соёлыг сурталчилдаг байгууллагын төлөөлөгчид есдүгээр сарын 21-нд аймгийн Засаг даргын орлогч Т.Нямсамбуутай уулзаж, Увс, Баян-Өлгий аймагт салбар буюу аль нэг их дээд сургууль, коллежийг түшиглээд “Күнзийн танхим” байгуулах саналтай байгаагаа илэрхийлэв.

“Күнзийн танхим” байгуулагдсанаар ерөнхий боловсролын сургуулийн сурагчид болон насанд хүрэгчдэд хятад хэл зааж, хятадын соёлыг сурталчлах аж. Хятад хэлийг тодорхой түвшинд сурснаар Хятадын засгийн газрын 100 хувийн тэтгэлэгт хөтөлбөрт хамрагдаж, улмаар бакалавр, магистр, докторын зэрэг хамгаалах боломж бүрдэх аж.

“Күнзийн танхим”-д сайн дурын багш нар ирж хичээл заах бөгөөд өрөө байр тохижуулах, тоног төхөөрөмж, сургалтын хэрэглэгдэхүүн бэлтгэх зэргийг Хятадын Засгийн газраас санхүүжүүлэх аж.

Одоогоор аймгийн Боловсрол, соёл, урлагийн газарт “Орос хэлний төв”, Төв номын санд “Америкийн соёл мэдээллийн төв тус тус нээгдэж орос, англи хэлийг Увс аймгийн иргэд, хүүхэд залуучуудад үнэ төлбөргүйгээр зааж, тухайн орны соёлыг сурталчилж байна.

НҮБ-аас жил бүрийн есдүгээр сарын 21-ний өдрийг улс орнууд болон иргэд хоорондын энхтайвны ойлголцлыг бэхжүүлэх зорилгоор дэлхийн энхтайвны өдөр болгон тунхагласан байдаг.

Энэ жил эл өдрийг “Энхтайвны эрх-Хүний эрхийн түгээмэл тунхаглалын 70 жил” уриан дор олон улсад тэмдэглэж байгаа юм. Энэ өдрийг тохиолдуулан ЮНЕСКО-гийн ерөнхий захирал Одри Азулэйгээс ирүүлсэн илгээлтийг хүргэж байна. Уг илгээлтэд, “Хаа нэгэн газар хүний эрх зөрчигдсөөр байх юм бол энэ дэлхий дээр энх амгалан гэж оршихгүй. Энэхүү Олон улсын энх тайвны өдрөөр 1948 оны Хүний эрхийн түгээмэл тунхаглалыг бий болгосон хүмүүсийн нэг болох Рэне Казоны үг бидэнд хүний үндсэн эрх хүндлэгдэхгүй байх аваас энх тайван орших боломжгүй юм гэдгийг сануулж байгаа билээ. Энэ бол хүн бүрийн нэр хүнд хүндлэн дээдлэгдсэн, хүн бүр тэгш эрхийг эдэлсэн тайван нийгмийг цогцлоох гол шаардлага юм.

Эдгээр үгс хүн төрөлхтний нийтлэг эрх ашгийн төлөө бид бүхний хүлээх үүргийг сануулж байна. Энх тайван нь бүх нийтээрээ адилхан эрх ашиг хүртэхгүй бол төгс бус, хэврэг байдаг. Хүний эрх түгээмэл байх бөгөөд эс бөгөөс үл оршино. Хүний эрхийн түгээмэл тунхаглалын 70 жилийн ой тохиож буйг холбогдуулан энх тайван болон хүний эрхийг дээдлэх хүндлэлийг холбож буй энэхүү холбоос нь энэ жилийн сэдэв болж байна.

Энх тайван ба түгээмэл эрх нь өдөр бүр соригдон зөрчигдсөөр байна. Эдгээр сорилт нь эв нэгдэлтэй дэлхийг бий болгох, энх тайвнаар зэрэгцэн орших зэрэгт үүсдэг: гай зовлон, ядууралд хүргэдэг нийгмийн болон эдийн засгийн тэгш бус байдал, шинэ асуудлуудыг бий болгодог уур амьсгалын өөрчлөлт, шинэ хурцдал үүсгэж буй хүн амын өсөлт. Популизм болон хэт туйлшрал зэрэг нь дэлхий даяр мөн адил тархаж байна.

Эдгээр асуудлыг шийдэхийн тулд бид хамтран ажиллаж энх тайван хэмээх барилгыг тоосго тоосгоор нь өрөх хэрэгтэй билээ. Энэ нь дэлхийн ядуурал, өлсгөлөн, жэндерийн тэгш бус байдал зэрэгтэй тэмцэн, боловсролыг хөхиүлэн дэмжих, шударга ёсыг эрхэмлэх, эрүүл хүрээлэн буй орчинг үүсгэх зэргээс бүрдэх 17 зорилго бүхий НҮБ-ын Тогтвортой хөгжлийн 2030 хөтөлбөрийн гол зорилго билээ.

ЮНЕСКО нь эрэгтэйчүүд болон эмэгтэйчүүдийн ухамсарт энх тайванг цогцлоох хэмээн заасан Үндсэн хуулиа мөрдөн өдөр бүр өөрийн хөтөлбөр, үйл ажиллагаагаараа дамжуулан үүрэг амлалтаа биелүүлсээр байна. Соёлын олон улсын найрсаг харилцааны арван жил 2013-2022-ыг удирдан хариуцсан байгууллагын хувьд ЮНЕСКО нь боловсрол, олон улсын хамтын ажиллагаа болон соёл хоорондын харилцан яриагаар дамжуулан урьдчилан хамгаалах тогтолцоог дэлхий даяар хөгжүүлэн ажиллаж байна.

Энх тайванд хүрэх зам хэдийгээр урт ч, бид бүгд нийгмийг улам хамрангуй, хүлцэнгүй, шударга болгохын төлөө өдөр тутамдаа ажиллах хүн бүрийн үүрэг оролцоо чухал юм” гэжээ.

Өнгөрсөн долдугаар сарын 16-ны өдрөөс эхлэн орсон хүчтэй аадар борооны улмаас Баянзүрх дүүргийн зарим хороо үерийн усанд автан онцгой нөхцөл байдал зарлан ажилласан билээ. Иймд Монголын Улаан загалмайн нийгэмлэг, Олон улсын Улаан загалмайн хороо болон Улаан хавирган сар нийгэмлэгээс дүүргийн үерийн гамшигт өртсөн иргэдэд ’’Яаралтай үеийн тусламжийн сан’’-аас мөнгөн тусламж үзүүлсэн юм. Дүүргийн ИТХ-ын дарга Ш.Ганчимэг болон Дэд бүтэц, хот төлөвлөлт хариуцсан төслийн удирдагч-Засаг даргын орлогч Т.Батцогт нар үерийн гамшигт өртсөн нийт 20 өрхөд тус мөнгөн тусламжийн ‘’Батламж’’-ийг гардууллаа.