Month: September 2018

“Дэлхийн тууль ба Жангар” сэдэвт олон улсын наадмыг энэ сарын 21-23-ны өдрүүдэд Улаанбаатар хотноо зохион байгуулав. Уг наадмыг Жангар судлал төрийн бус байгууллага БСШУСЯ, ЮНЕСКО-ийн Монголын үндэсний комисс, ШУА-ийн Хэл зохиолын хүрээлэн, Нүүдлийн соёл иргэншлийг судлах олон улсын хүрээлэнтэй хамтран зохион байгуулжээ.

Энэхүү наадамд 10 улсын 80 гаруй эрдэмтэн, судлаачид оролцож, “Жангар” туулийн судалгааг гүнзгийрүүлэн хөгжүүлэх, туулиар мэргэшсэн залуу судлаачдыг дэмжих, тулгамдаж буй асуудлуудыг шийдвэрлэх арга замын талаар хэлэлцсэн байна.

Уг наадмын үеэр Монгол Улс, БНХАУ-ын ӨМӨЗО, ОХУ-ын эрдэмтдийн хамтран бэлтгэсэн “Жангар товч лавлах толь”, “Жангар-2017” олон улсын эрдэм шинжилгээний хээрийн судалгааны тайлан, мөн түүхч, зохиолч Д.Суръяагийн “Жангар тууль” зэрэг номуудыг танилцуулж олон нийтийн хүртээл болгожээ.

Ховд аймагт уран хатгамалчдын уралдаан боллоо. Арга хэмжээг уран хатгамалчдыг дэмжих “Эгнэшгүй санаа” төвийн санаачилгаар БСШУСЯ, Засгийн газрын хэрэгжүүлэгч агентлаг Соёл, урлагийн газар, Соёлын өвийн үндэсний төв, Монголын Уран зургийн галерей, Монголын Эмэгтэйчүүдийн холбоо, “NZ” сан хамтран зохион байгуулжээ. Уралдаанд нийслэл болон 21 аймгаас шалгарсан ардын авьяастнууд, мэргэжлийн уран бүтээлчид нийлсэн 120 гаруй оролцогч, 300 гаруй бүтээлээр өрсөлдөхөд Ховд аймгийн Дарви сумын үйлчин, уран хатгамалч П.Бадамхорол аав,ээжийнхээ хөргийг хатгамлын төрлөөр оёж мөнхөлсөн бүтээлээрээ тэргүүн байрт шалгарав. Тэрээр аав,ээжийнхээ хөргийг урлахдаа гурван жилийн хөдөлмөрөө, зориулж нэг ширхэг ч хээг алдахгүй хичээж сэтгэл зүрхээ зориулан бүтээсэн нь ховор бөгөөд өвөрмөц бүтээл болсныг улсын уралдааны шүүгчид онцолсон байна. Түүний аав Пүрэвхүү хэмээх жолооч насаараа тээврийн байгууллагад ажиллаж байсан бол, ээж нь олон сайхан хүүхдээ өсгөж хүмүүжүүлж эрийн цээнд хүргэсэн сайхан буурлуудын нэг байжээ.

Өмнөговь аймгийн ИТХ-ын дарга Х.Сугар өнөөдөр хэвлэлийн бага хурал хийж тус аймгийн өмчид байдаг “Тавантолгой” ХК-д тус компанийн ТУЗ-ийн гишүүн, УИХ-ын гишүүн асан Д.Бат-Эрдэнэ тэргүүтэй зарим хүн компанийн ашиг орлого, нүүрсний үнийг зориуд бууруулах замаар хуйвалдан дээрх хэмжээний хөрөнгө, мөнгийг завшсан хэмээн мэдэгдлээ.

Зөрчлүүд аудитын болон бусад шалгалтаар илэрсэн гэдгийг тэрээр мэдэгдэж байв. “Хууль хяналтын байгууллагын албан ёсны мэдээлэл гараагүй байхад асуудалд нэг талын байр сууринаас хандаж байгаа юм биш үү?” гэсэн сэтгүүлчдийн асуултанд тэрээр, “Тавантолгой” ХК-ийн 51 хувь аймгийн өмчид байдаг тул орон нутгийн өмчийн хадгалалт, хамгаалалтад хяналт тавих эрх аймгийн ИТХ-д байдаг” гэдгийг тэрээр онцлоод, “Бид 2016 оны наймдугаар сард ажил аваад компанийн санхүүд хяналт хийх ажлын хэсэг байгуулан хөрс хуулалтаас аваад нүүрс экспортлох гэрээг хүртэл хянаж үзэн ажилласан. Тухайн үед ЦЕГ-ын Эдийн засгийн гэмт хэрэгтэй тэмцэх хэлтэст шалгуулах өргөдөл өгсөн. Түүнээс хойш одоо болтол хариу ирүүлээгүй. Тиймээс иргэдийн дунд буруу мэдээлэл яваад байгаа учраас өнөөдөр тайлбар хийж байна. Аймгийн ИТХ-аас 2017 оны есдүгээр сард “ТТ” ХК-д гүйцэтгэлийн аудит хийлгэхээр хүсэлт гаргаж, энэ онд шалгалт хийсэн. Наймдугаар сарын дундуур аудит дүгнэлтээ гаргаж ирүүлж, мөн Засгийн газраас томилсон ажлын хэсэг, Мэргэжлийн хяналт, Татвараас мөн шат шатны хяналт шалгалт хийсэн. Орон нутгийн өмчит Тавантолгойн өмчлөгч нь иргэдийн төлөөлөл учраас хамгийн бодит мэдээллийг бид өгөх ёстой. Ингэхдээ бид төрийн байгууллагаас гаргасан мэдээллийг үндэслэж ярьж байна” гэсэн хариу өгсөн юм. “Тавантолгой” ХК-аас хулгайн байдлаар нүүрс авч хилээр 390 тонн нүүрс гаргасан хэргийг ч хэсэг бүлэг хүний хийсэн үйл ажиллагаатай холбоотой талаар Өмнөговь аймгаас сонгогдсон УИХ-ын гишүүн Л.Энхболд хэлж ярьж орон нутгийн төрийн өмч хариуцлагатай эзэнтэй байх талаар ярьж байсныг дэмжиж байгаагаа илэрхийллээ.

Нийслэлийн төсвийн хөрөнгө оруулалтаар дүүрэг дэх Замын цагдаагийн хэлтэс болон Нийслэлийн авто замын хөгжлийн газраас гэр хороолол дундах болон төв замын нөхөөсийн ажлыг өчигдрөөс эхлүүлсэн. Тухайлбал дүүргийн 22 дугаар хороо Монел, 12 дугаар хороо Жанжин клуб болон 10,23 дугаар хороо Улиастайн засмал замын нийт 3.000 м.кв талбайн нөхөөсийг хийхээр төлөвлөжээ.

Эрүүл хүнс-Эрүүл Монгол хүн уриан дор “Намрын ногоон өдрүүд” арга хэмжээ 13 дахь жилдээ амжилттай болж өндөрлөж байна. Уламжлал болон жил бүр зохион байгуулагддаг үзэсгэлэн худалдаанд дотоодын хүнсний боловсруулах салбарын 180 гаруй аж ахуй нэгж, иргэн хоршоо “Алтан намар” үзэсгэлэн худалдаанд жимс жимсгэнэ, төмс, хүнсний ногоо тариалагч 250 гаруй иргэн, хоршоо, аж ахуйн нэгж оролцлоо.

“Намрын ногоон өдрүүд” арга хэмжээний хаалтын ажиллагаанд нийслэлийн Засаг даргын орлогч Ж.Батбаясгалан оролцож, үзэсгэлэнд амжилттай оролцсон иргэн, аж ахуй нэгжид шагнал гардууллаа.

Нэгдсэн арга хэмжээний хүрээнд “Мах, сүүний анхдугаар аяны үр шим”, “Хэрэглэгч танаа”, “Алтан намар – амтат талх”, “Ногоон хүнс – Эрүүл амьдрал” “Хүүхдэд зориулав” гэсэн нэрэмжит өдөрлөгүүд, хэлэлцүүлгүүд зохион байгуулж Ерөнхий боловсролын сургуулийн хүүхдүүдийг үйлдвэртэй танилцуулах зэрэг олон арга хэмжээг зохион байгуулжээ гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Өвөрхангай аймаг болон Японы Такикава хотын удирдлагууд барилга, эрүүл мэндийн салбарт хамтын ажиллагаа өргөжүүлэх санамж бичигт гарын үсэг зурлаа.

Өвөрхангай аймаг тус хоттой 2011 оноос хойш газар тариалангийн салбарт хамтран ажиллаж ирсэн бөгөөд аймгийн хөдөө аж ахуйн салбараас 19 иргэн Такикаво хотод мэргэжил эзэмшиж туршлага судалж аймагтаа цагаан будаа, бөөрөнхий сонгино тариалж байгаа юм. Цаашид дэд бүтэц болон сувилахуйн чиглэлээр мэргэжилтнүүдээ илгээж сургах, дадлагаар ажиллуулахаар санамж бичигт тусгав.

Арлын орноос ирсэн зочид болох Такикава хотын Иргэдийн төлөөлөгчдийн хурлын дарга, Гадаад харилцааны нийгэмлэгийн тэргүүн Мизүгүчи Нориказү тэргүүтэй төлөөлөгчид Арвайхээр хотын бөөрөнхий сонгино үрслэгээр тарих загвар аж ахуйтай танилцаж, “Өвөрхангай-Түншлэл” үзэсгэлэн худалдааг сонирхсон юм. Мөн барилгын салбарт мэргэжлийн боловсон хүчнийг бэлтгэх боломжийг судлах зорилгоор “Хангамж” группийн үйл ажиллагаатай танилцлаа.