Month: September 2018

Өчигдөр Фэйсбүүк, Твиттер компаниудын дээд удирдлагуудаас мэдүүлэг авах сонсгол АНУ-ын сенатын гадаад бодлогын хороонд зохион байгуулагдлаа.

Тус сонсголд Фэйсбүүкийн Шэрил Сандбэрг, Твиттерийн гүйцэтгэх захирал Жэк Дорси нар оролцсон байна. Эдгээр компаниудын эрхлэн ажиллуулдаг платформд гадаад улс орнуудын зүгээс үзүүлж буй нөлөөний талаар мэдээлэл авах зорилготой байв. Фэйсбүүк, Твиттер компаниудыг 2016 оны ерөнхийлөгчийн сонгуулийн үр дүнд нөлөөлөх гэсэн Оросын засгийн газрын нууц ажиллагааны гол хэрэгсэл болсон гэж үзэж байгаа. Олон ниййтийн сүлжээний удирдлагууд энэ үеэр сонгуулийн үр дүнд нөлөөлөх гадаад орнуудын оролдлогоос бүрэн сэргийлж чадахгүй байгаагаа хүлээн зөвшөөрч, цаашид энэ чиглэлд их зүйл хийхээ амлажээ. Сандбэрг “Бид асуудлыг илрүүлж, хариу арга хэмжээ авахдаа хэт удаан байснаа хүлээн зөвшөөрч байна. Ийм зүйл огт болох ёсгүй байсан” гэж сенатын гишүүдэд хэлсэн байна. Уг сонсголын өмнө Фэйсбүүкийн үүсгэн байгуулагч Марк Зукербэрг Вашингтон Пост сонинд ярихдаа өөрийн компанийг “маш нарийн зохион байгуулалттай, сайн санхүүжилттэй, улам бүр ухаалаг болж байгаа дайсан”-тай ширүүн тэмцэл хийж байгааг өгүүлжээ.Твиттерийн гүйцэтгэх захирал Жэк Дорси “Үзэл бодлоо чөлөөтэй илэрхийлэх арга хэрэгслийг маань манай улс орныг хагаралдуулах зэвсэг болгон ашиглаж байгаад бид харамсаж байна. Ийм асуудалтай тэмцэхэд бид бэлэн биш байснаа хүлээн зөвшөөрч “Доромжлол, хэл амаар үйлдсэн халдлага, троллын арми, хүн болон ботоор явуулж байгаа суртал нэвтрүүлэг, худал хуурамч мэдээлэл, хагаралдуулах өгөөш зэрэг нь олон нийтийн хүрээнд эрүүл үзэгдэл биш. Харьцангуй цөөн тооны хорон санаатнууд Твиттерийг ашиглан өргөн хэмжээнд нөлөөлж байгаа нь муу хэрэг” гэж тэр нэмж бичжээ.

Өвөрхангай аймгийн нийт нутаг дэвсгэрээс 90.7 хувь буюу 5716.9 мянган га нь бэлчээрийн талбай юм. Бэлчээрийн 40 хувийг өвөл, хаврын улиралд, 50 хувийг зун, намрын улиралд ашиглаж, 10 орчим хувийг усгүй болон алс зэлүүд даваа, бартаа саад ихтэй гэдэг шалгаанаар ашиглаж чаддаггүй.

Бэлчээрийн даацыг үнэлэхдээ 100 га талбайд хонин толгойд шилжүүлснээр 80-аас илүүгүй толгой мал ногдож байгаа тохиолдолд хэвийн ачаалалтай гэж үздэг байна. Энэ аргаар авч үзвэл манай аймгийн бэлчээр зун, намрын улиралд 5 сая орчим мал, өвөл, хаврын улиралд 3.5 сая орчим малыг багтаах даац багтаамжтай юм. Гэтэл аймгийн нийт мал сүргийг хонин толгойд шилжүүлснээр 8863411 мал ноогдож байгаа нь бэлчээрийн даац 2,5 дахин хэтрэлттэй байна.

Уг асуудлыг аймгийн ИТХ-ын Тэргүүлэгчдийн хуралдаанаар хэлэлцэж, сумдын удирдлагуудад дараах үүрэг, чиглэлийг өгөв. Тухайлбал, Сумынхаа бэлчээрийн даац төлөв байдлын үнэлгээг тогтоож, хэдэн өрхийн хэдэн мянган мал өөрийн нутагт өвөлжиж, хаваржих бололцоотой байгаа судалгааг нарийвчлан гаргах үүргийг ИТХ, ХХААГ-аас өглөө. Мөн бэлчээрийн хүрэлцээ хангамжгүйгээс хэдэн өрхийн хэдэн мал хаана отроор өвөлжиж, хаваржих боломжтой байгаа судалгааг малчдын нэрс, малын тоогоор нарийвчлан гаргах, байгаль цаг уурт дасан зохицсон таваарлаг, ашиг шим өндөртэй үүлдэр, омгийн малыг өсгөн үржүүлж, сүрэгт эзлэх эр, сувай малыг зах зээлд борлуулж малын тоог бууруулах зэрэг үүрэг даалгаврыг өгөөд байна.

Өмнөговь аймгийн Гурвантэс сумын нутагт орших Тост тосон бумбын нурууг УИХ-ын 2016 оны 36 дугаар тогтоолоор байгалийн нөөц газрын ангилалаар улсын тусгай хамгаалалтад авсан. Улмаар 2017 оны гуравдугаар сард Засгийн газар улсын тусгай хамгаалалтад авах газрын хилийг тогтоож, 743 мянган га газрыг хамгаалалтад авах нь зүйтэй гэж үзсэн юм. Харин одоо Өмнөговь аймгийн ИТХ тус газрын хамгаалалтын захиргааг байгуулахаар ажиллаж байгаа ажээ. Тус аймгийн ИТХ-ын Тэргүүлэгчид өчигдөр хуралдаж энэ асуудлыг хэлэлцжээ. Удахгүй ИТХ-аараа эцэслэн хэлэлцэх юм байна.

Монголын Уулчдын үндэсний холбоо нэг сарын дараа 2018 оны Олон Улсын Уулчдын Холбооны Ерөнхий Ассамблейг Улаанбаатар хотноо зохион байгуулах бэлтгэл ажлаа хангаж байна.

Монголын Уулчдын үндэсний холбоог 1955 онд үүсгэн байгуулсан бөгөөд спорт, уулын аялал жуулчлалыг Монголд хөгжүүлэх эрхэм зорилготой. Уг холбоо 2010 оноос хойш олон улсад зохион байгуулж буй тэмцээн уралдаан бүрт оролцож Олон Улсын Уулчдын холбооны идэвхтэй гишүүн байсаар ирсэн.

Тус холбооны дэд ерөнхийлөгч З.Банзрагч “Энэ нь бидний хувьд түүхэн үйл явдал. Бид энэхүү арга хэмжээнд холбогдох өндөр албан тушаалтнуудыг урьсан бөгөөд өндөр хэмжээнд зохион байгуулна хэмээн найдаж байна” гэлээ.

Түүнчлэн “Монголд ууланд авирах хүмүүсийн тоо сүүлийн таван жилд эрчимтэй нэмэгдсэн. Саяхны судалгаанаас үзэхэд гурван хүн тутмын нэг нь тогтмол ууланд авирдаг болсон. Бид Баян-Өлгий аймагт орших гайхалтай байгалийн тогтоц бүхий Алтай таван богдыг санал болгож байна “гэжээ.

Энэхүү арга хэмжээний хүрээнд хүрэлцэн ирэх зочид дуу, бүжиг, хоол гээд Монголын өв соёлтой танилцах бүрэн боломжтой. Түүнчлэн зочдод мартагдашгүй дурсамж үлдээх үүднээс нэг өдрийг соёлын өдөр болгох юм байна.

Монголын Уулчдын үндэсний холбоо нь 2019 онд “UIAA Respect the Mountains” арга хэмжээг Ази тивд анх удаа зохион байгуулах хүсэлтэй байгаа аж. Ерөнхий Ассамблей-гээр энэхүү асуудлыг хэлэлцэх гэнэ.

“Анагаахын Шинжлэх Ухааны Үндэсний Их Сургууль (АШУҮИС)-ийн тогтвортой хөгжил, багш, ажилчдын” түр хороо болон Монголын багш нарын үйлдвэрчний эвлэлийн хороо, “Монголын багш нарын нэгдэл” төрийн бус байгууллага, “Багшийн цалин нэмэгдүүлэх” төрийн бус байгууллагуудаас Ж.Цолмонг АШУҮИС-ийн захирлын албан тушаалд томилсныг эсэргүүцэж Монгол Улсын Ерөнхийлөгч Х.Баттулгад хандан мэдэгдэл ирүүлсэн байна.

Бүгд Найрамдах Өмнөд Судан улсад явагдаж буй НҮБ-ын мандаттай энхийг сахиулах ажиллагаанд үүрэг гүйцэтгэх Монгол Улсын Зэвсэгт хүчний наймдугаар ээлжийн бие бүрэлдэхүүн эх орноосоо мордоход бэлэн болжээ.

Энэ намар манай улс 425 мяган тонн буудай хураах төлөвлөгөөтэй байгаагаас 330 мянган тонныг гурилын үйлдвэрүүдэд борлуулж, 51 мянган тонныг ирэх жилийн тариалалтын үрийн нөөцөд хадгалах юм.

Үлдэж буй багахан хэмжээний буудайг спирт болон тэжээлийн үйлдвэрт тушаах тооцооллыг салбарын яамнаас гаргаад байна. ХХААХҮЯ-ны Газар тариалангийн бодлого, хэрэгжилтийг зохицуулах газрын дарга Ц.Болорчулуун, “Энэ жил үрийн зориулалтаар борлуулах 14.9 мянган тонн буудайн хэмжээ гарч байна. Өнгөрсөн хавар тариалан эрхлэгч ААН-үүдэд ОХУ-аас 6 мянган тонн элит үр, 2 мянган тонн сортын үр, нийтдээ Тариалан эрхлэлтийг дэмжих сангаас 31 мянган тонн үрийн буудайн дэмжлэг үзүүлсэн. Энэ намар хурааж авах буудайнаас тэжээлийн үйлдвэрт 18.2 мянган тонн, спиртийн үйлдвэрүүдэд 11.2 мянган тонныг хуваарилна. Буудайн хангамж сайн байх тул дотоодын хэрэгцээгээ бүрэн хангана” гэж мэдэгдлээ.

Манай улсад ӨМӨЗО-ы соёл аялал жуулчлалын өдрүүд үргэлжилж байна. Энэхүү үзэсгэлэн, соёлын өдрүүдэд оролцохоор урд хөршөөс 300 гаруй зочид иржээ.