Month: September 2018

Санхүүгийн зохицуулах хороонд хөрөнгө оруулагч, үйлчлүүлэгчдээс энэ оны эхний хагас жилд нийт 172 өргөдөл, гомдол ирүүлснээс банк бус санхүүгийн байгууллага (ББСБ)-ын үйл ажиллагаатай холбоотой 29 өргөдөл гомдол ирж, тэдгээрийн 28 нь хуулийн хугацаандаа шийдвэрлэгдэж дууссан бол үлдсэн нэг нь хугацаандаа хянагдаж байна.

Банк бус санхүүгийн байгууллагын үйл ажиллагаатай холбоотойгоор ирүүлсэн өргөдөл, гомдлын дийлэнх буюу 34.5 хувийг зээлийн мэдээллийн санд зээлдэгчийн мэдээллийг тухай бүрт нь шинэчлээгүйгээс зээлдэгчийн зээлийн ангилалд сөргөөр нөлөөлсөн талаарх өргөдөл эзэлж байсан нь өмнөх оны мөн үеийнхээс 2.5 дахин ихэссэн байв. Өргөдөл гомдлуудын төрлүүдийг өнгөрсөн онтой харьцуулсан үзүүлэлтийг доорх хүснэгтэд харуулав.

Хорооноос дээрх өргөдөл гомдлуудыг хянаж, барагдуулахаар санал дүгнэлт гарган хуульд заасан эрх, хэм хэмжээний хүрээнд 9-д нь хууль, хяналтын байгууллагад хандан шийдвэрлүүлсэн бол 14-д нь холбогдох хариуг өгч, 4-д Хорооноос үүрэг даалгавар хүргүүлэн үлдсэнд нь зөрчил шалган шийдвэрлэх тухай хуулийн дагуу хариуцлага оногдуулах зэргээр ажилласан байна.

Хан-Уул дүүрэгт хөдөлмөрийн насны 98215 иргэн оршин суудгийн 54,5 хувь буюу 53611 нь 15-34 насны залуучууд байна. 2018 онд дүүргийн хөдөлмөр халамжийн үйлчилгээний хэлтэст 302 залуучууд ажил хайгчаар бүртгүүлжээ.

Хэлтсээс бүртгэлтэй ажилгүй, зорилтот бүлгийн болон хувиараа хөдөлмөр эрхэлдэг иргэдийг идэвхжүүлэх, бизнес эрхлэх хүсэл төрүүлэх, сэдэлжүүлэх,тэдэнд холбогдох хууль тогтоомжийн талаар тодорхой мэдээлэл өгөх зорилгоор “Залуучуудын өртөөчилсөн аялал”-ыг 2018 есдүгээр сарын 7-ны өдөр зохион байгуулах гэж байна.

Нийслэлийн ерөнхий боловсролын сургууль, цэцэрлэгийн 2018-2019 оны хичээлийн шинэ жил эхэлж байгаатай холбогдуулан Хүүхэд тээвэрлэх автобус ба үйлчилгээнд хяналт тавих нэгдсэн үзлэг, шалгалтыг Нийслэлийн Тээврийн газар, Замын цагдаагийн алба, Нийслэлийн Боловсролын газартай хамтран явуулжээ.

Шалгалтад Нийслэлийн 7 дүүргийн 39 сургуулийн нийт 72 автобус хамрагдсанаас 23 сургуулийн 46 автобус тэнцсэн тул үйлчилгээнд явах зөвшөөрлийг нь олгосон бөгөөд үлдсэн 26 автобус стандартын шаардлага хангаагүй шалтгаанаар дахин үзлэгт хамрагдах шаардлага хүргүүлжээ.

Үзлэгт хамрагдсан хүүхдийн автобусны тоо өмнөх оны мөн үеэс 43,9 хувиар буурсан үзүүлэлтэй байна.

Монгол Улсын төрийн хошой шагналт, нэрт түүхч, академич Ш.Нацагдоржийн мэндэлсний 100 жилийн ойд зориулсан “Евроазийн нүүдэлчдийн түүхэн замнал: төр, нийгэм ба соёл” олон улсын эрдэм шинжилгээний хурал өнөөдөр болж байна. Нэрт эрдэмтний ойд зориулсан энэхүү хурлын нээлтийн үйл ажиллагаа БСШУСЯ-нд болов. Нээлтийн үеэр Монгол Улсын Ерөнхийлөгч Х.Баттулга, БСШУС-ын сайд Ц.Цогзолмаа нар нэрт эрдэмтний 100 жилийн ойд зориулан илгээлт ирүүлснийг олон улсын эрдэм шинжилгээний их хуралд оролцогчдод уншиж сонсголоо.

БСШУС-ын сайд Ц.Цогзолмаа илгээлтдээ “Их эрдэмтний мэндэлсний ойг тэмдэглэх тухай Монгол Улсын Засгийн газрын 149-р тогтоол 2018 оны тавдугаар сарын 23-ны өдөр гарч, түүний дагуу ойг зохион байгуулах комисс ШУА, Түүх, археологийн хүрээлэн хамтран “Ш.Нацагдорж. Эрдмийн бүтээлийн эмхэтгэл” 10 боть, академич Ж.Болдбаатар “Түүх гэгээн, ид хав нэвт их эрдэмтэн” нэгэн сэдэвт бүтээл, “Нацаг багш” баримтат кино зэргийг бүтээгээд байна.Энэхүү ойн хүрээнд Монгол Улс, Япон улс, БНХАУ, ОХУ-ын эрдэмтэн судлаачид хамтран зохион байгуулж буй “Евроазийн нүүдэлчдийн түүхэн замнал: төр, нийгэм, соёл” олон улсын эрдэм шинжилгээний хуралд 50 шахам эрдэмтэн судлаачид оролцож, академич Ш.Нацагдоржийн амьдрал үйл ажиллагаа, эрдэм судлалын бүтээл болон XVII-XIX зууны Монголын түүхийн асуудлыг Евроазийн нүүдэлчдийн нийгмийн түүхийн дэвсгэр дээр авч үзэн, задлан шинжилсэн илтгэлүүдийг хэлэлцүүлж байгаад талархаж байна” хэмээн онцолжээ.

“Евроазийн нүүдэлчдийн түүхэн замнал: төр,нийгэм, соёл” олон улсын эрдэм шинжилгээний хурлыг Монгол Улсын ШУА-ийн Түүх, археологийн хүрээлэн, Япон улсын Тохокү их сургуулийн Зүүн хойт Ази судлалын төв, БНХАУ-ын Өвөрмонголын Багшийн их сургуулийн Аялал жуулчлалын дээд сургууль, ОХУ-ын Бүгд найрамдах Саха улсын Хүмүүнлэгийн ба умардын цөөн тоот үндэстний судалгааны хүрээлэнгээс хамтран зохион байгуулж байгаа юм байна.

Монгол Улсын ШУА-ийн Түүх, археологийн хүрээлэн болон Япон улсын Тохокү Их сургуулийн Зүүн хойт Ази судлалын төвөөс хоёр жил тутамд зохион байгуулдаг уламжлалт эрдэм шинжилгээний энэхүү хурал энэ удаад зохион байгуулагчид ба оролцогчдын хувьд илүү өргөн цар хүрээтэй болж, XVII-XX зууны Монголын түүхийн талаар судалгаа хийдэг тэргүүлэх эрдэмтэд оролцож судалгааныхаа сүүлийн үеийн ололтыг танилцуулж буйгаараа онцлог юм байна.

XX зууны Монголын нэрт эрдэмтэн, Монголын түүхчдийн эцэг, багш хэмээн хүндлэгдсэн Ш.Нацагдорж нь гурван үеийн сэхээтэн гаралтай их бичгийн хүн байв. Түүний Монголын түүхийн талаар бичсэн бүтээлүүд нь эх орондоо төдийгүй дэлхий дахинд үнэлэгдсэн үе үеийн түүхчдийн ширээний ном болж чадсан юм. Академич Ш.Нацагдоржийн бүтээлүүд нь орос, герман, англи, хятад, франц, япон хэлээр нийтлэгдсэн байна. Монголын түүхийн шинжлэх ухаанд дорвитой бүтээлүүдээрээ бусдаас ялгарч байдаг нэрт эрдэмтний бичсэн “Болор толь”, “Мандухай цэцэн хатан” зохиолоор нь уншигчид андахгүй. “Монгол Улсын түүх” /гурван боть/, “Халхын түүх”, “Чингис хааны цадиг” болон “Хубилай цэцэн” зэрэг ном, эрдэм шинжилгээний бүтээлүүд нь түүх бичлэгт хүндтэй байр суурь эзэлдэг юм.

НИТХ-ын Тэргүүлэгчдийн хурлаар Үндэсний цэцэрлэгт хүрээлэнд хийсэн шалгалтын дүнг хэлэлцлээ. Шалгалтаар стандартын шаардлага хангахгүй ажлын байранд хоол үйлдвэрлэл явуулан, түргэн муудах хоол хүнсийг тасалгааны температурт нарны шууд тусгалтай газарт ил задгай хадгалж, худалдаалдаг нь илэрчээ. Үүнээс гадна хоол үйлдвэрлэлийн ажиллагаанд оролцож буй ажиллагсад ажлын байранд хувийн ариун цэвэр сахидаггүй гэх мэт зөрчил ихээр гарчээ. Холбогдох албаныхан хууль бус үйл ажиллагаа эрхэлж буй иргэдийн үйл ажиллагааг зогсоож, торгуулийн арга хэмжээ авсан байна. Мөн зориулалтын бус байранд хоол үйлдвэрлэл болон ил задгай талбайд шорлог шарах үйл ажиллагааг Үндэсний цэцэрлэгт хүрээлэн ОНҮӨТҮГ нь дотоод хяналт шалгалт явуулан таслан зогсоож, цаашид зөрчлийг гаргахгүй байх тал дээр хяналт тавьж ажиллахыг үүрэг болгожээ.

Үндэсний цэцэрлэгт хүрээлэнгийн дарга С.Эрдэнэтуул “Үндэсний цэцэрлэгт хүрээлэн 2009 оноос хойш үйл ажиллагаа явуулж байгаа. 2018 онд 355 сая төгрөгийн төсөвтэй экстрим талбай бариулж байна. Одоогоор ажлын явц 40 хувьтай байна. Цаашид гүүрэн гарцны ажил хийхээр төлөвлөж байна. Улсын болон хувийн байгууллагын төсвөөр зарим нэг бүтээн байгуулалтын ажлыг хийдэг. Ирэх жилийн төсөвт Маршал таун хотхон руу гарц хийх ажлыг тусгахаар төлөвлөж байна. Цэцэрлэгт хүрээлэнд хууль бус худалдаа эрхэлж байгаа иргэдтэй бид байнга тэмцдэг. Манай ажилчид оройн цагаар ээлжилж ажилладаг. 26 түргэн үйлчилгээний цэг гурвалсан гэрээгээр төлбөр мөнгөө өгөөд зөвшөөрөлтэй ажилладаг. Эдгээр ТҮЦ-үүд нэг нэгэнтэйгээ барьцсан байдлаас үүдэн хоол бэлтгэн, худалдаалах үйл ажиллагаа явуулж байна” гэв.

Нийслэлийн Мэргэжлийн Хяналтын газраас Нийслэлийн нутаг дэвсгэрт барилгын материалын үйлдвэрлэл эрхлэгчдийг шалгаж байна.