Хотын даргаар ахлуулсан ажлын хэсэг Чингэлтэй дүүргийн 14 дүгээр хороонд баригдах бага сургууль, цэцэрлэгийн цогцолборын газар чөлөөлөлттэй газар дээр нь очиж танилцлаа.
МУ-ын 2018 оны Төсвийн тухай хуулиар барилга барих хөрөнгө батлагдсан, 39 байршилд сургууль цэцэрлэг төлөвлөн нөхөх олговортойгоор газар чөлөөлөх ажлыг гүйцэтгэж байгаа юм. Чингэлтэй дүүргийн тус хороонд баригдах бага, сургууль цэцэрлэгийн цогцолборын газар нь 20 нэгж талбар /9000м2/ юм.
Нийслэлийн Газрын албаны орлогч дарга Д.Нямдаваа “Нийслэлийн Газрын албанаас 39 байршилд газар чөлөөлөлт хийж байна. Үүнээс 23 байршилд захирамж нь гарсан. 16 байршлыг 100 хувь чөлөөлөөд байна. Газар чөлөөлөх ажил 80 хувьтай явж байна. 14-р хорооны бага сургууль, цэцэрлэгийн цогцолборын газар 100 хувь чөлөөлөгдсөн” гэв.
Үүний дараа Чингэлтэй дүүргийн 3 дугаар хорооны 19 дүгээр цэцэрлэгийн өргөтгөлийн барилгын ажилтай танилцав. Нийслэлийн төсвийн хөрөнгөөр 150 хүүхдийн ор бүхий цэцэрлэгийн өргөтгөлийн барилга угсралтын ажил 2017 оноос эхлэн он дамжин хэрэгжиж байгаа юм. Энэ хичээлийн шинэ жилээр бүрэн ашиглалтад орох юм байна.
Мөн Улаанбаатар Цэвэр агаар төслийн хүрээнд уурын зуухаар халдаг төрийн өмчийн цэцэрлэг болон зарим айл өрхийн дулаалгыг хийж байна. 2018 онд дулаалж буй төрийн өмчийн 5 цэцэрлэгээс 51 дүгээр цэцэрлэгийн дулаалгын ажлын явцтай танилцсан. Энэхүү ажил нь хэрэгжсэнээр тухайн барилгаас үүсч буй агаарын бохирдлыг 50 хүртэл хувиар бууруулах боломжтойгоос гадна тухайн цэцэрлэгт хүмүүжиж буй хүүхдэд тав тухтай орчин нөхцөл бүрдэх юм.
Нийслэлийн Засаг дарга бөгөөд Улаанбаатар хотын Захирагч С.Батболд “Энэ жил Улаанбаатар хотод боловсролын салбарын бүтээн байгуулалт эрчимтэй өрнөж байна. УИХ, ЗГ-аас тавьсан зорилтын хүрээнд нийслэлийн бүх сургуулийг хоёр ээлжинд шилжүүлэх, цэцэрлэгийн хүүхдийн хамрагдалтыг олон улсын стандарт буюу 85 хувьд хүргэх зорилт тавьсан. 34 сургууль, 52 цэцэрлэгийн барилгын ажлыг шинээр эхлээд байна. Энэ бүх барилгууд 2019 оны хичээлийн жилд ашиглалтад орох учиртай. Хамгийн хүндрэлтэй асуудал газар болоод байна. Газрыг нөхөн олговортойгоор иргэдээс худалдан авч байна. Газар чөлөөлөлтийн зардлыг нийслэлийн төсөвт тусгаад явж байна. Ирэх жилээс газар чөлөөлөлтийн зардлыг сургууль, цэцэрлэгийн барих төсөвт нь цуг тавих хүсэлтийг Сангийн яаманд хүргээд байгаа.
Энэ оны хувьд нийслэлийн хэмжээнд 18 цэцэрлэг ашиглалтад оруулна эхний тав нь ашиглалтад орсон, тав нь хичээлийн шинэ жилээс өмнө, үлдсэн нь энэ ондоо багтаад ашиглалтад орно” хэмээв гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээлэв.
Олон улсын эрдэмтдийн баг уур амьсгалын өөрчлөлттэй тэмцэх нэгдсэн арга хэмжээ авахыг олон улсад уриаллаа. Парисын хэлэлцээрээр тогтоосон нүүрстөрөгчийн ялгарлын хэмжээ нь дэлхийн дулаарлыг тогтоон барихад хангалтгүй гэж тэд үзжээ.
Сэлэнгэ аймгийн Баянгол сумын Хараа багийн “Хустайн даваа” гэдэг газар /аймгийн төвөөс урд зүгт 147 км-т, сумын төвөөс баруун хойд зүгт 20 км-т/ өчигдөр зам тээврийн осол гарч, нэг хүн амиа алджээ. Тодруулбал, Улаанбаатар хотоос Дархан-Уул аймгийн чиглэлд зорчиж явсан “СОНАТА-6” загварын суудлын автомашин, “ХОНДА CРВ” загварын суудлын автомашинууд мөргөлджээ. Ослын дуудлагын дагуу Онцгой байдлын газрын Гал түймэр унтраах, аврах 40 дүгээр ангийн долоон алба хаагч 20 км замыг туулан очиход 69 настай, эмэгтэй Х амиа алдсан байсныг цагдаагийн байгууллагад хүлээлгэн өгсөн байна.
Энэ жилийн “Оюутны хөгжлийн зээл”-ийг есдүгээр сарын 1-нээс олгох аж. Их, дээд сургуулийн оюутнуудад “Оюутны хөгжлийн зээл”-ийг олгохдоо банкны барьцаа, хамтран зээлдэгчтэй байхыг шаарддаг байсан. Мөн зээлсэн мөнгөнд хүү тооцдог байсныг Засгийн газрын тогтоолоор батлагдсан журмын дагуу шинэчилсэн юм. “Боловсролын зээлийн сан”-гаар дамжуулан оюутнуудад хүүгүй, барьцаагүй зээл олгохоор журам тогтоож, өнгөрсөн тавдугаар сарын 1-нээс эхлэн хэрэгжүүлсэн. 
Аюулгүй байдлыг хангах зорилгоор 2020 онд Японы Токио хотод болох олимпийн болон паралимпийн тоглолтуудын үеэр хүмүүсийг нүүр царайгаар нь таних технологийг ашиглах гэж байна. Энэ тухай Токио-2020 зохион байгуулах хорооны мэдээллээс иш татан манай сурвалжлагч уламжиллаа.
Нийслэлийн ерөнхий боловсролын сургууль, цэцэрлэгийн “Хүүхдийн автобус”-ны стандарт хангалт, хүүхдийг нэгдсэн зохион байгуулалтаар техникийн шаардлага хангасан автобусаар тав тухтай, аюулгүй тээвэрлэх нөхцөлийг бүрдүүлэх зорилгоор нэгдсэн үзлэг шалгалтыг энэ сарын 13-17-ны өдрүүдэд Нийслэлийн Тээврийн газар, Замын цагдаагийн алба, Нийслэлийн Боловсролын газартай хамтран явуулна.
Нийслэлийн Засаг дарга бөгөөд Улаанбаатар хотын Захирагчийн 2016-2020 оны үйл ажиллагааны хөтөлбөрийн хэрэгжилтийг хангах зорилготой Нийслэлийн Засаг даргын А/107 дугаар захирамжаар төрийн үйлчилгээг цахим хэлбэрт үе шаттайгаар шилжүүлж, үйлчилгээний шат дамжлагыг багасгах, хороодоос үзүүлэх төрийн үйлчилгээний нэр төрлийг нэмэгдүүлэх, нийслэлийн нутгийн захиргааны байгууллагуудын хооронд мэдээлэл солилцох шинэ технологи бүхий цогц системийг нэвтрүүлэх ажлыг хариуцан зохион байгуулах үүрэг бүхий Ажлын хэсэг байгуулсан.
Нийслэлийн төрийн өмчийн цэцэрлэгүүдийн 2018-2019 оны хичээлийн жилийн бүртгэл, элсэлтийн үйл ажиллагааг цахимаар зохион байгуулахаар болсон. Интернетийн орчинд ажиллах боломжгүй иргэдэд дүүрэг тус бүрт 2018 оны долдугаар сарын 25-аас наймдугаар сарын 23-ны өдрүүдэд ажлын цагаар тогтмол бүтгэж байгаа юм.