Month: August 2018

Одоогоос сарын өмнө Б.Ундрах хэмээх бүсгүй “Очир” төвд амиа алдсан охины ар гэрийнхэнд туслалцаа үзүүлэх зорилгоор фэйсбүүк хуудсаараа дамжуулан хандивын аян эхлүүлжээ. Тэрбээр өнөөдөр тус хандивын аяны хүрээнд цугларсан 30 сая төгрөгийн талийгаач охины ар гэрийнхэнд хүлээлгэн өгөх юм байна.

Тэрбээр фэйсбүүк хуудастаа “Чадах болов уу, яах бол гэж эхэлж байсан аян маань та бүхний нэгдмэл сэтгэлийн хүчээр ийм амжилттай явж иржээ. Бидний зорилго бол зүй бусаар бусдын гарт амиа алдсан бяцхан охиноосоо хойш 11 сарын турш өдөр бүр цаг, минут бүрийг шар махтайгаа хатан байж, үнэн шударгын хойноос явахын тулд ажлаасаа гаран идэх хоол амьдрах газраа хүртэл төлөөсөнд нь өгч, өөрсдөө айлд хоргодон, хохирсон дээрээ хохироод ядруухан яваа ар гэрийнхэнд нь туслахыг зорьж, ядаж орох оронтой болоосой, дахин хөөрхөн охинтой болоод, сэтгэлээ дэвтээж амьдраасай гэж сэтгэл шулуудан нэгдсэн билээ” хэмээн бичжээ.

Өнгөрсөн оны наймдугаар сарын 22-ноос 23-ны шилжих шөнө Баянзүрх дүүргийн 21-р хороонд байрлах, “Очир төв” зочид буудалд 13 настай охин бусдын гарт харамсалтайгаар амиа алдсан хэрэг гарсан билээ.

Энэ сарын 2-ны өдөр Дархан-Уул аймгийн Орхон сумын Бүрэн толгой буюу Энхтал багийн малчин Б-н хоёр үхэр галзуугийн шинж тэмдгээр өвчилсөн байна. Өвчилсөн малаас аймгийн мал эмнэлгийн лаборатори, улсын Мал эмнэлгийн ариун цэврийн төв лабораторид дээж өгч, наймдугаар сарын 6-ны өдөр малын галзуу өвчин болох нь тогтоогджээ.

ХХАА-н яамны Сайдын зааврын дагуу хязгаарлалтын дэглэм тогтоох талаар Орхон сумын Онцгой комисс хуралдаж захирамж гаргасан юм. Захирамжийн хүрээнд Энхтал багийн тодорхой бүсэд хязгаарлалтын дэглэм тогтоосон байна.

Тус аймгийн Онцгой байдлын газрын орлогч дарга Б.Ганхүү галзуу өвчин туссан малыг устгаж, халдваргүйжүүлэлт, ариутгал хийсэн талаар мэдээлэв. Тэрээр малчид мал хариулга дээрээ нохой, чоно, хярс, үнэг зэрэг галзуу өвчин тусч болзошгүй амьтад ойртсон эсэхэд тандалт хийж байхыг анхааруулжээ.

Дархан-Уул аймгийн Мэргэжлийн хяналтын газраас малчид, иргэдэд зөвлөмж, сэрэмжлүүлэг, гарын авлага тараах, малын гаралтай түүхий эд худалдан борлуулж буй ААН, иргэдийн үйл ажиллагаанд хяналт шалгалт хийх зэрэг холбогдох арга хэмжээнүүдийг авч ажиллаж байна.

Энэ хүрээнд Сэлэнгэ аймгийн Зоонозын өвчин судлалын төвийн эмч, мэргэжилтнүүдтэй хамтарч хүнсний дэлгүүр, хиамны цех зэрэг нийт 67 ААН-ийн малын гаралтай бүтээгдэхүүн, түүхий эдээс дээж авч шинжилгээнд явуулсан байна. Цаашид өвчин гарсан бүсэд иргэд зорчихгүй байх, малын гаралтай бүтээгдэхүүнийг гарал үүсэл нь тодорхой, баталгаат шинжилгээтэй газраас авахыг тус аймгийн Мэргэжлийн хяналтын газраас анхааруулжээ.

Филиппиний Гадаад хэргийн нарийн бичгийн дарга Алан Питер Кэинэкано Зүүн өмнөд Азийн Үндэстний Байгууллага (АСЕАН), Өмнөд Хятадын тэнгис дэх хамтарсан тэнгисийн цэргийн ажиллагаа явуулах нь маш чухал гэж мэдэгджээ.

Түүнчлэн БНХАУ болон АСЕАН-ы гишүүн орнууд аравдугаар сард хамтарсан тэнгисийн цэргийн сургуулилт хийх гэж байгаа тухай Хятадын Гадаад харилцааны сайд Ван И хэлсэн байна.

1967 онд байгуулагдсан АСЕАН-ы гишүүн оронд Бруней, Камбож, Индонези, Лаос, Малайз, Мьянмар, Филиппин, Сингапур, Тайланд, Вьетнам зэрэг улсууд багтдаг байна.

Баян-Өлгий аймгийн Толбо сум байгуулагдсаны 80 жилийн ойг тохиолдуулан Х.Аманбол, Х.Сүлеймен нарын хэсэг залуусын санаачилгаар тус сумын төвд байрлах Ц.Хасбаатар, К.Байкалов нарын дурсгалт хөшөөг сэргээн засварлажээ.

Уг дурсгалт хөшөөний загварыг Зөвлөлт Холбоот Улсын архитектор В.В.Казаринов, уран барималч К.Г.Чумичёв нар 1981 онд Барнаул хотод хийж, 1984 оны намар босгож байжээ. Холбогдох санхүүжилтийн тухайн үеийн Зөвлөлт-Монголын найрамдлын нийгэмлэгийн тэргүүн Ф.С.Торхов шийдвэрлэн өгсөн аж.

Анх байгуулагдсанаас хойш засвар хийгдээгүй элэгдсэн дурсгалт хөшөөг засварлахад нийтдээ 12 сая төгрөг зарцуулжээ. Тэрээр шинэ хамгаалалтын хашаа, гэрэлтүүлэг тавьж, эргэн тойрны орчныг тохижуулж саяхан ашиглалтад өгсөн байна. Сэргэн засварлалтын ажилд аймаг болон сумын удирдлага, орон нутгийн иргэд санхүүгийн болон холбогдох бусад дэмжлэг үзүүлжээ.

Ц.Хасбаатар, К.Байкалов нар нь 1921 оны 9 дүгээр сарын 17-ны өдөр эхэлсэн Толбо нуурын тулалдаан буюу тусгаар тогтнолын түүхэнд мөнхөрсөн цагаантны 3000 орчим цэргийн 43 хоногийн бүслэлтийг монголчуудын ялалтаар өндөрлүүлсэн цэргийн жанжин юм.

Баян-Өлгий аймгийн Онцгой байдлын газраас аливаа гамшиг, ослын үед удирдлага, зохион байгуулалтын ажлыг газар дээр нь түргэн шуурхай хугацаанд үр дүнтэй явуулах “Хөдөлгөөнт удирдлагын байр”-ыг тохижуулж байна.

Тус “Хөдөлгөөнт удирдлагын байр”-ыг өнгөрсөн жил Онцгой байдлын Ерөнхий газраас олгосон туулах чадвар сайтай ЗИЛ-131 машиныг төхөөрөмжлөн ашиглах юм.

Харин “Дэлхийн зөн-Монгол” олон улсын байгууллагын орон нутгийн хөтөлбөрөөс уг ажилд зориулж дөрвөн сая төгрөгийн өртөг бүхий богино холбоо, лед дэлгэц, дуу өсгөгч, халаалт зэргийн эхний ээлжийн төхөөрөмжүүдийг хүлээлгэж өгсөн байна” хэмээн Онцгой байдлын ерөнхий газраас мэдээллээ.