Month: July 2018

Нийслэл хотод зам засвар өргөтгөл шинэчлэлийн ажил үргэлжилж байна. Нийслэлийн Засаг даргын орлогч П.Баярхүү өнгөрсөн амралтын өдрүүдэд Сүхбаатар дүүргийн 19-р хороо, Шаргаморьт зуслангийн чиглэлийн авто замын засвар, шинэчлэлтийн ажлын явцтай танилцав.

Тус чиглэлд шинээр зам тавихаас гадна хуучин шороон замыг хусч, тэгшлэх ажил дуусах шатандаа орсон байна. Удахгүй ашиглалтад оруулж, бүрэн хүлээлгэж өгөх аж. Тус шороон замд ээлжит болон их засвар хийгээгүйн улмаас шороон замын зорчих хэсэг бүхэлдээ бүтцийн эвдрэлд орж, иргэд зорчиход хүндрэл үүсээд олон жилийн нүүр үзээд байсан юм.

Нийслэлийн Засаг даргын орлогч П.Баярхүү авто замын засвар, шинэчлэлийн ажлыг наадмаас өмнө бүрэн дуусгаж, нээхийг замын ажил гүйцэтгэгч компанийн удирдлагуудад үүрэг болголоо.

Авто замыг өргөтгөн шинэчлэхэд замын хөдөлгөөнийг бүрэн хаалгүйгээр урсгал тус бүрээр хэсэгчлэн хааж, засварын ажлыг гүйцэтгэж байна.

Нийслэлийн Засаг дарга бөгөөд Улаанбаатар хотын Захирагчийн 2016-2020 оны үйл ажиллагааны хөтөлбөрт Гадаадад сурч, боловсрол эзэмшсэн залуучуудыг эх орондоо хөдөлмөр эрхлэхийг дэмжих төсөл хөтөлбөрийг хэрэгжүүлэхээр тусгасны дагуу нийслэлийн Залуучуудын хөгжлийн газар, “Гадаадад Төгсөгчдийн Нэгдсэн Зөвлөл” ТББ-тай хамтран “Монгол оюуныг Монголын төлөө” Гадаадад төгсөгчдийн нэгдсэн анхдугаар чуулга уулзалтыг нийслэлийн Засаг даргын ивээл дор 2018 оны 6-р сарын 30-ны өдөр Шангри-Ла цогцолборт зохион байгууллаа.

Энэхүү чуулга уулзалтаар дэлхийн өнцөг бүрт суралцаж, дээд боловсрол эзэмшсэн, олон талт туршлага хуримтлуулсан залуучууд эвлэлдэн нэгдэж, эх орныхоо хөгжил дэвшилд, түүний дотор нийслэл Улаанбаатар хотын хөгжилд хувь нэмрээ оруулах боломж, бололцоог хамтдаа эрэлхийлж, гадаадад сурч боловсрол эзэмшсэн шилдэг залуучууд илтгэл тавьж, хэлэлцүүлэг өрнүүлсэн юм.

“Гадаадад төгсөгчдийн нэгдсэн чуулга уулзалт”-д “Юнител” групп, “Говь” ХК, “Петровис” групп, “Монос” групп, “Бишрэлт” групп, “Голомт” банк, “Богд” банк, “Би Эс Би” ХХК, “Монсертф” ХХК зэрэг Монголын шилдэг аж ахуйн нэгжүүд оролцож, гадаад, дотоод худалдаа, эдийн засаг, хүний нөөц, маркетинг, брендинг, мэдээллийн технологийн чиглэлээр 90 орчим нээлттэй ажлын байр зарлалаа.

Нийслэлийн Залуучуудын хөгжлийн газрын дарга С.Сүх-Очир “Энэ чуулга уулзалтаас Монгол орны хөгжилд дорвитой хувь нэмэр болохуйц шинэ санаа, санаачилгууд гарч байна.

Мөн Гадаадад төгсөгч залуучуудыг бодлоготойгоор дэмжих нэгдсэн хөтөлбөр”-ийг нийслэлийн Засаг даргад танилцуулж, хөтөлбөрийн төслийг өргөн барих гэж байгаагаараа онцлогтой үйл ажиллагаа болж байна” хэмээв.

Энэ удаагийн үйл ажиллагаа дараах үр дүнд хүрэх ач холбогдолтой гэж үзэж байна. Үүнд:

Гадаадад төгсөгч залуучуудын дуу хоолойг нэгтгэн, тодорхой төсөл, хөтөлбөрт уриалан оролцуулах, идэвхжүүлэх, үүнийг Нийслэлийн хөгжилд чиглүүлэх,

Өндөр хөгжилтэй орны хөгжсөн, шалгарсан туршлагаас судлах, цаашлаад Нийслэлийн бүтээн байгуулалт, хөгжилд бодитоор хувь нэмэр болох 2 төслийг жил бүр Нийслэлийн удирдлагад танилцуулах, төслүүдийг хамтран хэрэгжүүлэх,

Суралцсан орныхоо чадварлаг боловсон хүчин, мэргэжилтэн, түншүүдийг төрийн болон хувийн хэвшлийн салбарт шаардлагатай ажлын байранд нь холбож, гүүр болсноор хамтын ажиллагааг өндөр түвшинд гаргах,

Хөгжлийн тусламж үзүүлдэг улс орнууд, хандивлагч олон улсын байгууллагуудтай эдийн засгийн хамтын ажиллагааг гүнзгийрүүлэхэд дэмжлэг үзүүлэх чиглэлээр ажиллах,

Гадаадад төгсөгч залуучуудын мэдээллийн нэгдсэн санг үүсгэх, улмаар шаардлагатай ажил олгогч болон төсөл хөтөлбөрт оролцуулах боломжийг бүрдүүлэх болно гэж нийслэлийн Залуучуудын хөгжлийн газраас мэдээллээ.

Аймгийн Засаг даргын 2018 оны 06 дугаар сарын 28-ны өдрийн А/311 дугаар захирамжаар сумдын баяр наадмын товыг гаргажээ.

Харин шүлхийн голомттой сумд баяр наадам зохион байгуулахгүй гэсэн үг юм.

Энэхүү захирамж гарсантай холбоотойгоор сумдын Засаг дарга, багийн Засаг дарга нарт сумын баярыг сум дотроо зохион байгуулахыг үүрэг болголоо. Өөрөөр хэлбэл, сумдын уяачдыг сум дамжин хурдан морь уралдуулахыг хориглосон байна.
Дээрх товын дагуу
Ихтамир сум – 2018.07.10-11
Чулуут сум – 2018.07.10-11
Хангай сум – 2018.07.09-10
Тариат сум – 2018.07.08-09
Өндөр-Улаан сум – 2018.07.08-09
Эрдэнэмандал сум – 2018.07.09-10
Жаргалант сум – 2018.07.09-10
Цэцэрлэг сум – 2018.07.09-10
Хайрхан сум – 2018.07.08-09
Булган сум – 2018.07.08-09
Цахир сум – 2018.07.09-10-ны өдрүүдэд наадмаа хийх ажээ.

Харин аймгийн баяр наадмыг хэзээ зохион байгуулах нь тодорхойгүй байна.

Дорноговь аймгийн Сайхандулаан суманд Японы “Megatech” корпораци цахиур олборлох, баяжуулах үйлдвэр байгуулж нээлтээ хийлээ.

Энэхүү үйлдвэр нь түүхий эдийг боловсруулж, экспортлох анхны үйлдвэр болж байгаа аж. Тус үйлдвэр нь 10 сая ам.долларын хөрөнгө оруулттай бөгөөд сард 200-400 тонныг баяжуулах хүчин чадалтай юм байна. Мөн Сайншанд суманд 20 сая ам.долларын хөрөнгө оруулалтаар боловсруулах үйлдвэрийн бүтээн байгуулалтын ажлыг хийж байгаа аж. Ингэснээр “Megatech” корпораци нь Япон дахь өөрийн үйлдвэрийн түүхий эдийг Монголоос бэлтгэн авах боломж бүрдэх юм байна.

Монгол Улсын Иогийн Спортын Аварга шалгаруулах анхдугаар тэмцээн өчигдөр амжилттай зохион байгуулагдаж 4 алт, 7 мөнгө, 9 хүрэл медалийн эзэн тодорлоо.

Насанд хүрэгчдийн ангилалд Пүрэвсүрэнгийн Элбэгсүрэн, Даваажамцын Норжин нар, өсвөр нас (11-17)-ны ангилалд Тэнгисийн Ялгуун, Мөнхбаатарын Бүжмаа нар алтан медаль хүртлээ.

Насанд хүрэгчдийн ангилалд Гансүхийн Номин-Эрдэнэ, Өлзийсайханы Уянга, Сүхбаатарын Батзаяа, Балдангийн Мөнхбаяр нар, ахмад (50+) насны ангилалд Хорлоогийн Үржинсүрэн, өсвөр насны ангилалд Батмөнхийн Мөнх-Ундрам, Цогтсайханы Энхжин нар тус тус мөнгөн медалийн эзэн боллоо.

Хүрэл медалийг Самданжамцын Уламбаяр, Тортвойн Туул, Тувааны Оюунгэрэл, Уртнасангийн Насанбаяр, Цогтын Ундрал, Панигын Гантуяа нар, өсвөр насны ангилалд Цэдэн-Ишийн Очирхүү, Ганбатын Өлзийсайхан, Бадарсангийн Нарангоо нар тус тус хүртлээ.

Дэлхийн 182 орныг эгнээндээ нэгтгэн, үйл ажиллагаа явуулдаг Дэлхийн Гаалийн байгууллагад Монгол Улс 1991 онд 111 дэх гишүүнээр элсэн орсноос хойш тус байгууллагаас хэрэгжүүлж буй бодлого, чиглэлийг үйл ажиллагаандаа тусган ажиллаж иржээ.
Тэгвэл тус байгууллагын гишүүн улсуудын Гаалийн байгууллагын дарга нар жил бүрийн 6 дугаар сард дээд хэмжээний чуулганаа зохион байгуулж, өөрийн хэрэгжүүлж буй үйл ажиллагаа, цаашдын чиглэлээ хэлэлцэн, тодорхойлдог байна.
Дэлхийн гаалийн байгууллагын гишүүн орнуудын гаалийн байгууллагын дарга нарын 132 дугаар чуулганд Гаалийн ерөнхий газрын дарга Б.Асралт тэргүүтэй Монголын гаалийн төлөөлөгчид өнгөрсөн сарын 28-30-ны өдөр оролцжээ. Энэ удаагийн чуулганд дэлхийн 182 орны гаалийн байгууллагын дарга, төлөөлөгч, олон улсын байгууллагын нийт 700 гаруй төлөөлөгч тулгамдаж буй олон чухал асуудлыг хэлэлцэв. Чуулганы гол онцлог нь Дэлхийн гаалийн байгууллагын Ерөнхий нарийн бичгийн даргын ээлжит сонгууль, Аудитын хороо, Бодлогын хороо, Дэлхийн гаалийн байгууллагын ирэх жилийн Чуулган даргалагчийн зэрэг 8 сонгууль явуулав. Түүнчлэн гаалийн хөгжил, цаашдын үйл ажиллагааны чиглэлийг тодорхойлох бодлогын баримт бичгийг батлах, Дэлхийн банктай “Бизнес эрхлэхүй дүгнэлт”, бусад олон улсын байгууллагатай хууль бус санхүүгийн урсгал, дүн шинжилгээний чадавхыг бэхжүүлэх замаар мэдээллийн чанарт анхаарах, цахим худалдааны орчин, кибер аюулгүй байдал болон бусад чиглэлээр хамтран ажилласан үр дүн, цаашдын хамтын ажиллагаа, агаарын тээврийн аюулгүй байдал, худалдааг хөнгөвчлөх зэрэг олон асуудлын хүрээнд харилцан санал солилцож, цаашдын үйл ажиллагаагаа уялдуулан төлөвлөжээ.
Монголын төлөөлөл чуулганд оролцохын зэрэгцээ, гаалийн байгууллагын чадавхыг бэхжүүлэх хүрээнд Нарийн бичгийн дарга нарын чиглэл хариуцсан удирдлага, ажилтнуудтай худалдааны аюулгүй байдлыг хангах, худалдааг хөнгөвчлөх үйл ажиллагаа, гаалийн байгууллагын гүйцэтгэлийг хэмжих арга зам, их хэмжээний тоон мэдээлэлд дүн шинжилгээ хийх арга зүй, хил дамнасан хууль бус худалдааны урсгалтай тэмцэх чиглэлээр Дэлхийн гаалийн байгууллагаас хэрэгжүүлж буй санаачилга, агаарын тээврийн аюулгүй байдал, түүнд үр дүнтэй гаалийн хяналт тавих боломж чиглэлээр уулзаж, харилцан санал солилцлоо.Гаалийн гадаад хамтын ажиллагааг хөгжүүлэх чиглэлээр БНХАУ, Унгар, Япон, Киргиз, ХБНГУ, БНСУ-ын гаалийн байгууллагын удирдлагуудтай уулзаж хамтын ажиллагаа, харилцан туслалцах өргөн хүрээтэй асуудлаар санал солилцов.
Энэ удаагийн Чуулган ирэх 5 жилд Дэлхийн гаалийн байгууллагын Ерөнхий нарийн бичгийн дарга нарын газрын тэргүүнийг сонгохоос гадна, Гаалийн байгууллагууд, Гааль-Бизнес, Гааль-Засгийн газар хоорондын хамтын ажиллагааг хөгжүүлэх бодлогын асуудлыг оновчтой хэлбэрээр хэрэгжүүлэхэд харилцан санал бодлоо хуваалцахад чиглэгджээ.

Онцгой байдлын ерөнхий газар, Цагдаагийн ерөнхий газар, Замын цагдаагийн албатай хамтран цаг үеийн асуудлаар өнөөдөр хэвлэлийн бага хурал хийлээ. Хэвлэлийн бага хуралд ОБЕГ-ын дэд дарга, хурандаа Б.Ууганбаяр, ЦЕГ-ын олон нийтийн аюулгүй байдлыг хангах газрын дарга, дэд хурандаа Ц.Цэрэнпунцаг, Замын цагдаагийн албаны урьдчилан сэргийлэх хэлтсийн дарга, хурандаа Э.Бөхбат нар оролцож, долдугаар сарын 3-6-ны өдрүүдэд Улаанбаатар хотноо зохион байгуулагдах Гамшгийн эрсдэлийг бууруулах Азийн сайд нарын бага хурлын талаар мэдээлэл хийсэн юм.

Монгол Улсын Засгийн газар, НҮБ-ын Гамшгийн эрсдэлийг бууруулах газар, Онцгой байдлын ерөнхий газартай хамтран зохион байгуулах Гамшгийн эрсдэлийг бууруулах Азийн Сайд нарын бага хуралдаанд Ази, Номхон далайн бүс нутгийн 50 гаруй улс, орны өндөр дээд хэмжээний төлөөлөгчид оролцоно. Хурлын үеэр үүсэх замын ачаалалыг бууруулах зорилгоор Замын цагдаагийн албатай зөвшилцсөний дагуу Гэндэнгийн гудамж, Сүхбаатарын гудамжийн замуудыг хэсэгчлэн хаах юм байна. Иймд тус хамгаалалтын бүсэд орших айл, өрх, аж ахуйн нэгжүүд аль болох хувийн тээврийн хэрэгслээс татгалзаж, нийтийн тээврийн хэрэгслээр зорчихыг ЦЕГ, Замын цагдаагийн албанаас зөвлөлөө.