Month: June 2018

Монгол Улсын Их Хурлын дарга М.Энхболд БНАСАУ-ын Ардын Дээд Хурлын депутат, Ардын Дээд Хурал дахь БНАСАУ-Монголын парламентын бүлгийн дарга, БНАСАУ-ын Дээд боловсролын сайд, Ким Ир Сений нэрэмжит их сургуулийн захирал Тэ Хён Чөл тэргүүтэй төлөөлөгчдийг хүлээн авч уулзав.

БНАСАУ-ын төлөөлөгчид УИХ-ын даргын урилгаар манай улсад айлчилж байгаа юм.

УИХ-ын дарга М.Энхболд хэд хоногийн өмнө Сингапурт БНАСАУ, АНУ-ын Төрийн тэргүүн нарын уулзалт амжилттай болсонд баяр хүргэж байгаагаа уулзалтын эхэнд илэрхийллээ. Тэрбээр уулзалт амжилттай болсонтой холбогдуулан Монгол Улсын Ерөнхийлөгч Х.Баттулга баяр хүргэж, цахилгаан утас илгээснийг тэмдэглээд, “Зүүн хойд Азийн аюулгүй байдлын асуудлаарх “Улаанбаатарын яриа хэлэлцээ” санаачилгын ээлжит бага хурал эхэлж буй энэ өдөр найрамдалт БНАСАУ-ын төлөөлөгчидтэй уулзаж байгаадаа баяртай байна” гэв.

Түүнчлэн Сингапурын уулзалт болон өнгөрсөн 4-р сард болсон Умард, Өмнөдийн дээд хэмжээний уулзалт, тэдгээрээр хэлэлцэн тохирсон асуудал нь БНАСАУ-ын удирдагч Ким Жөн Ун-ий Солонгосын хойгт энх тайван, тогтвортой байдлыг бэхжүүлэх талаарх энх тайванч, зоримог, шийдэмгий үйл ажиллагааны үр дүн юм гэдгийг онцлон тэмдэглэлээ.

УИХ-ын дарга М.Энхболд 70 жилийн түүхтэй хоёр орны уламжлалт найрсаг харилцаа, хамтын ажиллагаа тогтвортой хөгжиж байгааг онцлоод, хоёр улсын хууль тогтоох байгууллага, Парламент дахь бүлгүүдийн харилцан айлчлал нь хамтын ажиллагааг тууштай үргэлжлүүлэхэд чухал хувь нэмэр оруулна гэдэгт итгэлтэй байгаагаа илэрхийлэв.

Тэрбээр “Өнгөрсөн оны сүүлчээр Солонгосын хойгт нөхцөл байдал таагүй байх үед миний бие захирамж гаргаж, УИХ дахь Монгол-БНАСАУ-ын парламентын бүлгийн дарга О.Баасанхүүг БНАСАУ-д албан айлчлал хийлгэсэн. Мөн манай Гадаад харилцааны сайд Д.Цогтбаатар БНАСАУ-д албан ёсоор айлчиллаа. Эдгээр нь Монгол Улс бүх түвшинд БНАСАУ-тай хөгжүүлж буй харилцаанд ач холбогдол өгч, уламжлалт найрсаг харилцаагаа хөгжүүлэхийн төлөө тууштай байр суурь баримталж ирсний нотолгоо юм” гэлээ.

Ноён Тэ Хён Чөл хүлээн авч уулзаж, Солонгосын хойгт энхийг сахиулах талаар БНАСАУ-ын Төрийн зөвлөлийн дарга Ким Жөн Ун-ы гаргаж буй хүчин чармайлтыг өндрөөр үнэлж, баяр хүргэсэнд талархал илэрхийлээд “Энэ онд БНАСАУ, Монгол Улсын хооронд дипломат харилцаа тогтоосны 70 жил, манай хайрт удирдагч Ким Ир Сений Монгол Улсад айлчилсны 30 жилийн ой тохиож байна. Эдгээр ойн хүрээнд зохион байгуулагдах арга хэмжээнүүд харилцаагаа цаашид гүнзгийрүүлэх, улам идэвхжүүлэхэд чухал хувь нэмэр оруулна гэдэгт итгэлтэй байна” гэлээ.

Тэрбээр эдийн засгийн хүндрэлийг даван туулж, улс орноо хөгжүүлэх, ард түмнийхээ амьдралыг сайжруулах чиглэлээр Монгол Улсын Их Хурал, Засгийн газраас хэрэгжүүлж буй арга хэмжээ, хүчин чармайлтыг дэмжиж байгаагаа илэрхийлж, тавьсан зорилтоо амжилттай хэрэгжүүлэхийг хүсэн ерөөгөөд, “Энэ оны 4-р сард Пёньян хотноо БНАСАУ-ын Төрийн зөвлөлийн дарга Ким Жөн Ын-ий удирдлага дор болсон Солонгосын Хөдөлмөрийн Намын бүгд хурлаас улс орныхоо эдийн засгийг хөгжүүлэхэд бүхий л хүч, анхаарлаа төвлөрүүлэх шийдвэрийг гаргасан. Манай ард түмэн өөрийн хүчинд тулгуурлан эдийн засгаа эрчмтэй хөгжүүлэхийн зэрэгцээ боловсрол, шинжлэх ухаан, техникийн салбарт томоохон ололт амжилтад хүрэхийн төлөө хөдөлмөрлөж байна” гэв.

Ноён Тэ Хён Чөл “Солонгосын хойгт нааштай, өөдрөг өөрчлөлт гарч байгаа нь бүс нутагтаа төдийгүй дэлхий дахинд энх тайвныг эрхэмлэдэг манай удирдагч Ким Жөн Ын-ий тууштай хүчин зүтгэлтэй салшгүй холбоотой юм” гэж тэмдэглэлээ.

Уулзалтын үеэр УИХ-ын дарга М.Энхболд боловсролын салбарын уламжлалт харилцаагаа идэвхжүүлж монгол, солонгос залуусыг харилцан сургах, худалдаа, эдийн засгийн хамтын ажиллагааны хүрээнд экспорт, импортыг нэмэгдүүлэх, хамтарсан үйлдвэрлэл, аялал жуулчлалыг хөгжүүлэх, Пёньян-Улаанбаатарын хооронд 16 жилийн өмнө тогтоосон “Найрамдалт харилцаат хотууд”-ын хамтын ажиллагааг өргөжүүлэх нь чухал гэж үзэж байгаагаа илэрхийллээ.

Ноён Тэ Хён Чөл хамтын ажиллагааг бодит агуулгаар баяжуулах талаар УИХ-ын дарга М.Энхболдын гаргаж буй санаачилгыг дэмжиж буйгаа илэрхийлж, боловсролын салбар, нийслэл хотуудын хамтын ажиллагааны хүрээнд ойрын үед хэрэгжүүлэх гэж байгаа арга хэмжээний талаар танилцууллаа.

УИХ-ын чуулганы пүрэв гаригийн нэгдсэн хуралдаанаар УИХ-ын гишүүн Д.Гантулгын чөлөөлсөн билээ. УИХ-ын гишүүн асан Д.Гантулгатай уулзаж ярилцлаа.

-Өнөөдөр чуулганы нэгдсэн хуралдаанаар таныг УИХ-ын гишүүнээс чөлөөллөө. Та өөрийн хүсэлтээр гишүүнээс чөлөөлөгдөх хүсэлтээ өгсөн. Цаашид ямар процесс өрнөх бол..

-Миний хувьд Төрийн ордонд хэвлэлийн хурал хийх эрхгүй болсон. УИХ-ын гишүүний бүрэн эрх маань миний өөрийн хүсэлтээр өнөөдөр чуулганы нэгдсэн хуралдаанаар цуцлагдаж байна. Тиймээс цаашид УИХ-ын нөхөн сонгуулийн асуудал Хэнтий аймгийн 42 дугаар тойрогт яригдаж таарна.

Би өөрийгөө Монголын улс төрд нийгмийн шинэ захиалга байсан гэж боддог. Шинэчлэл өөрчлөлтийг хийх залуу хүнийг хүссэн хүсэлтийн илэрхийлэл нь 2016 оны сонгуульд 28 настай Гантулга нэр дэвшин ялалт байгуулж байлаа. Энэ нь Монголын улс төрийн амьдралд шинэчлэл, өөрчлөлт болсон. Энэ удаагийн парламентад 41 гишүүн шинээр сонгогдон орж ирсэн.

Харамсалтай нь үүнийг эсэргүүцдэг нийгэмд олон жил бугшсан давалгаа, зохион байгуулалттай бүлэглэл байгаа юм. Үүний эсрэг амжилттай ажилласан. Тэр шинэчлэл өөрчлөлтийг хийх залуучуудын нэг нь байхыг хичээсэн. Мэдээж энэ цаг хугацаанд гарсан хэл амтай холбогдуулаад УИХ-ын гишүүнээс чөлөөлөгдөх, түдгэлзэх хоёр салаа замын эхэнд ирээд чөлөөлөгдөх хүсэлтэй байсан. Би түдгэлзэхийн эсрэг байсан. Сонгосон төлөөлөгчдөөс илүүтэй парламентын төлөөллийн зарчим алагдаж, шүүх хуулийнханы цаг хугацаа маш их орох байсан. Энэ хугацаанд ямар нэгэн ямар нэгэн нөхөн сонгууль, ямар нэгэн төлөөлөлгүйгээр Их хурал явж болохгүй. Тиймээс би чөлөөлөгдөх хүсэлтээ удаа гаргаж байсан. Харамсалтай нь үүнийг хэлэлцэх боломжтой, боломжгүй гээд явсан.

-Өмнө нь та яагаад чөлөөгдөх хүсэлтээ өгөөд асуудлыг шийдэж болоогүй юм бэ?

-Аргагүйн эрхэнд би дөрөвдүгээр сарын тавны өдөр түдгэлзэх саналаа УИХ-д танилцуулж байсан. Тэр хүсэлтийг маань та харсан байх. Даанч хэлэлцэх хууль эрх зүйн орчин байгаагүй тул хуульд нэмэлт, өөрчлөлт оруулан тавдугаар сарын тавнаас хууль эрх зүйн орчин бүрдсэн. Өнгөрөгч долоо хоногт Их хурал хэлэлцээд шийдвэрээ гаргасан. УИХ-ын гишүүд тэр дундаа бүлэг фракцын шийдвэр байгаагүй гэж боддог. Их хурлын гишүүд өөрсдийн бүрэн эрхийн хүрээнд саналаа өгөөд явсан. Тиймээс цаашид парламентын дархлаа, гишүүний бүрэн эрхээс илүүтэй гэм буруутай нь хууль шүүхийн байгууллагаас гараагүй байхад энэ бүхнийг ярих нь зохисгүй гэдэг итгэл үнэмшлээр гишүүд асуудалд хандсан байх.

Энэ долоо хоног эхэлсэн боловч харамсалтай нь эдгээр асуудал дуусаагүй. Тиймээс энэ байдлыг цаашид үргэлжлүүлэхийг хүсээгүй тул өөрийн хүсэлтээр чөлөөлөгдөх хүсэлтээ өгч чуулганы хуралдаанаар шийдвэр гарлаа. Тиймээс цаашид би жирийн иргэний хувиар асуудлаа шийдүүлнэ. Одоо би жирийн иргэн болсон тул Гантулгыг цаашид эрхтэн дархтан мэт үзэж, хандаасай гэж хүсье. Хэнтий аймгийн сонгогчдоосоо хүлцэл өчье.

-Нэр холбогдоод буй асуудлаа хуулийн байгууллагаар шийдүүлээд улс төрд та эргэн ирэх үү. Залуу хүний хувьд цаашид юу хийхээр төлөвлөөд байна вэ?

-Улс төрд ирж буцахын тухайд улстөрч хүн Их хуралд байснаар хэмжигддэг зүйл гэж бодохгүй байна. Тэр дундаа нийгэмд хийж бүтээе гэсэн санаж, сэдсэн бүхнээ хийгээд явах болно.

-Намын зүгээс чөлөөлөгдөх хүсэлтээ өгөхийн шахсан уу?

-Энэ миний шийдвэр.

-Өнгөрсөн хоёр жилийн хугацаанд та ямар ажил амжуулав?

-Их хурлын гишүүн гэдэг бол зөвхөн тойргийг төлөөлдөг, тойргийнхоо иргэдийн үзэл баримтлалын дагуу заавал ажиллах ёсгүй гэдэг хатуу байр суурьтай байдаг. Тийм ч байгаа учраас өнөөдөр парламент дээр том бодлогууд гацаж, тойргийн хэмжээний жижиг зүйлс шийдэгддэг, бүлэг фракц болдог асуудлууд бий. Би тойргийн гишүүн биш УИХ-ын гишүүний хувьд асуудлыг том хүрээнд нь бүтэн хардаг байхыг хичээдэг байсан. Өнгөрөсөн хугацаанд 21 аймгаа бүтэн тойрч, Төрийн албаны болон Залуучуудын хөгжлийн асуудлыг шийдүүлж байлаа. Монгол Улс 26 жилийн дараа Хүүхэд залуучуудын хөгжлийн төрийн агентлагтай болсон. Үүнийг Засгийн газар дэмжсэнд хувиасаа талархаж явдаг. Өнөөдөр Монгол Улс залуучуудын хуультай болсон. Залуу гишүүний хувьд хийсэн гол алхамуудын нэг энэ байсан.

Э.ЭНХБОЛД