Month: June 2018

НҮБ-ын Хүн амын сан болон Үндэсний статистикийн хороо /ҮСХ/ хамтран 2017 онд явуулсан “Эмэгтэйчүүдийн эсрэг хүчирхийлэл” сэдэвт үндэсний хэмжээний анхны судалгаагаар 10 эмэгтэй тутмын нэг нь 15 нас хүрэхээсээ өмнө хүчирхийлэлд өртдөг гэдгийг өнөөдөр “Blue Sky” зочид буудлын танхимд болсон Хэвлэлийн бага хурлын үеэр мэдээллээ.
Тус судалгаанд хүчирхийлэлд өртсөн 15-64 насны 7300 гаруй эмэгтэй хамарсан бөгөөд Монгол Улсын 21 аймаг, 9 дүүргийн 7860 өрхөөс нийт 95 судлаач эмэгтэй 15 баг болж, мэдээлэл цуглуулжээ. Түүнчлэн 392 иргэнээс зорилтот бүлгийн 64, гүнзгийрүүлсэн 87, хүчирхийлэлтэй холбоотой үйл ажиллагаа явуулдаг байгууллагын 59 мэргэжилтэнтэй ярилцлага хийсэн байна. Мөн хүчирхийлэлтэй холбоотой сэдвээр бэлгийн цөөнх, ахмад настнуудтай ч ярилцлага хийж судалгаанд ашиглажээ.
Судалгаагаар монголд ойр дотны хамтрагч болон гадны нөлөөлөөс эмэгтэйчүүдийн эсрэг үйлдэж буй хүчирхийллийн түвшин хэт өндөр байгааг тогтоожээ.
Энэхүү өргөн судалгааны ажил нь жендерт суурилсан хүчирхийллийн талаарх тоон болон чанарын мэдээлэлтэй болсон төдийгүй мэдээллийн мөрөөр үйл ажиллагаагаа эрчимжүүлэх, хүчирхийллийн үйлдлүүдийг нийтэд ил болгох зэрэг чухал ач холбогдолтой хэмээн зохион байгуулагчид хэллээ.

Судалгаанд оролцогчдын 23.6 хувь нь сүүлийн 12 сард бие махбод, бэлгийн болон сэтгэл санааны хүчирхийлэлд өртөж байснаас дийлэнх нь 30-34 насныхан байв. Мөн 15 хүртэлх насны эмэгтэй хүүхдийн 29.5 хувь нь гэр бүлийн гишүүндээ, 19 хувь найздаа, 18.7 хувь танихгүй хүний бэлгийн хүчирхийлэлд өртөж байсан бол 10 эмэгтэй тутмын нэг нь 15 нас хүрэхээсээ өмнө хүчирхийлэлд өртсөн нь илэрчээ. Мөн аливаа хэлбэрийн хүчирхийлэлд өртөж байсан эмэгтэйчүүдийн эзлэх хувь Хэнтий, Дархан-Уул, Өмнөговь, Говьсүмбэр, Улаанбаатар хотод өндөр байсан бол бэлгийн болон биемахбодын хүчирхийлэлд өртсөн эмэгтэйчүүд Дархан-Уул, Өмнөговь, Говьсүмбэр, Булган, Ховд аймагт хамгийн их байна гэсэн статистик мэдээлэл гарчээ.
НҮБ-ын Хүн амын сангийн суурин төлөөлөгч Наоми Китархара, “Хүчирхийллийн улмаас эмэгтэйчүүд нийгэм, эдийн засгийн амьдралд бүрэн оролцох эрхээ эдэлж чадахгүй байна. Энэ нь бие махбодын болон сэтгэцийн эрүүл мэндийн маш олон хүндрэлийг үүсгэж, зарим тохиолдолд хохирогчид амиа алдах ч байдал үүсч буйг хэллээ. Иймд жендерт суурилсан хүчирхийллийг таслан зогсоохын төлөө бид чадах бүхнээ хийх ёстой” хэмээв.
Судалгааг явуулахад НҮБ-ын Хүн амын сан, Швейцарийн Хөгжлийн агентлаг, Австралийн Гадаад хэрэг, Худалдааны яам санхүүгийн дэмжлэг үзүүлжээ.

Нийслэлийн Засаг даргын Тамгын газрын Цэргийн штабаас нийслэлийн Прокурорын газартай хамтран Зөрчлийн тухай хууль болон Зөрчил шалган шийдвэрлэх тухай хуулиудаар нийслэл, дүүргийн Засаг даргын Тамгын газрын Цэргийн штабын офицер, ахлагч нарт энэ сарын 13-ны өдөр сургалт зохион байгуулав.

Сургалтад “Зөрчлийн тухай хуулийн ерөнхий ойлголт, Цэргийн албаны тухай хуулийн зөрчлийг шалган шийдвэрлэх ажиллагаа”-ны талаар Нийслэлийн Прокурорын газрын хяналтын прокурор Б.Чинзориг, “Зөрчлийн тухай болон Зөрчил шалган шийдвэрлэх тухай хуулийн дагуу цэргийн бүртгэл, цэрэг татлагаас хоцорсон иргэдийн зөрчлийг шалган шийдвэрлэж буй байдал” сэдвээр Сонгинохайрхан дүүргийн Засаг даргын Тамгын газрын Цэргийн штабын дарга, дэд хурандаа Г.Ялалт нар хичээл орлоо гэж НЗДТГ-ын Хэвлэл мэдээлэл, олон нийттэй харилцах хэлтсээс мэдээлэв.

Онцгой байдлын ерөнхий газраас Өмнөд бүсийн Онцгой байдлын газрын офицер бүрэлдэхүүнийг хамруулан “Гамшгийн нөхцөл байдал үүссэн үеийн бүсийн төвийн удирдлага, зохицуулалт, хариу арга хэмжээ, харилцан ажиллагаа” сэдэвт гамшгаас хамгаалах команд штабын сургуулийг Өмнөд бүсийн төв Өмнөговь аймагт зохион байгууллаа.

Команд штабын сургуульд Өвөрхангай, Баянхонгор, Өмнөговь, Дорноговь, Дундговь, Говьсүмбэр аймгийн Онцгой байдлын газрын нийт 50 гаруй офицер хамрагдсан юм.

Гамшгаас хамгаалах менежментийн хөгжлийн чиг хандлага, бүс, бүсийн төвийн удирдлага зохицуулалт, гамшгийн үеийн харилцан ажиллагаа, удирдлага зохион байгуулалт, үүссэн цагийн байдлыг үнэлж, шийдвэр гаргах, офицер бүрэлдэхүүний штабын жигдрэлтийг хангах зорилготой тус команд штабын сургуулийг астрономийн 48 цаг, оперативын 168 цагийн багтаамжтай гурван үе шаттайгаар зохион байгууллаа.

Гамшгаас хамгаалах команд штабын сургуулийн удирдагчаар ОБЕГ-ын дэд дарга, хурандаа Б.Ууганбаяр ажилласан бөгөөд команд штабын сургуулийг дүүрэн хангалттай дүгнэлээ гэж Онцгой байдлын ерөнхий газраас мэдээллээ.

Нийслэлийн Засаг даргын 2018 оны “Гамшгаас хамгаалах дадлага, сургууль, бэлэн байдлын үзлэг зохион байгуулах тухай” 41 дүгээр захирамжийг үндэслэн Баянзүрх дүүргийн Засаг дарга А/211 дүгээр захирамж гаргаж дүүргийн хэмжээнд “Гамшгаас хамгаалах иж бүрэн сургууль, дадлага”-ыг зохион байгуулахаар болсон.

Тэгвэл Баянзүрх дүүргийн гамшгийн үед үүрэг гүйцэтгэх хүч хэрэгсэл, болзошгүй гамшгийн үед хэрхэн хамтран ажиллахталаар туршлага солилцож,мэдээлэл авах гамшгаас хамгаалах иж бүрэн сургууль өнөөдөр эхэллээ.

Энэхүү гамшгаас хамгаалах иж бүрэн сургуулийн нээлтийн арга хэмжээндНийслэлийн дэд бүтэц, гэр хорооллын хөгжлийн асуудал хариуцсан Засаг даргын орлогч П.Баярхүү, Нийслэлийн Онцгой байдлын газрын дарга Ж.Чүлтэмсүрэн,Баянзүрх дүүргийн Онцгой комиссын дарга Т.Баясах болон дүүргийн онцгой комиссын гишүүд, албан хаагчид,дүүргийн гамшгаас хамгаалах алба, шуурхай команд, мэргэжлийн анги, аж ахуй нэгж байгууллагууд оролцсон юм.

Тус иж бүрэн сургууль нь гамшгаас урьдчилан сэргийлэх, аврах, хор уршгийг арилгах, хойшлуулшгүй сэргээн босгох үеийн удирдлага, гамшгаас хамгаалах алба, хороо, аж ахуй нэгж байгууллага мэргэжлийн ангиудын харилцан ажиллагааг уялдуулан зохицуулах, мэдлэг дадлага олгох үүрэг гүйцэтгэх чадавхыг сайжруулах зэрэг ач холбогдолтой.

Гамшгаас хамгаалах дадлага сургуультай холбогдуулан Засаг даргын захирамжаардүүргийн Онцгой комисс, гамшгаас хамгаалах албад, мэргэжлийн анги болон аж ахуйн нэгж байгууллагуудөндөржүүлсэн бэлэн байдалд шилжин ажиллаж байна.

Түүнчлэн өнөөдөр гамшгаас хамгаалах сургуулийн Гамшгаас хамгаалах бэлэн байдлын үзлэгийг Дүнжингарав худалдааны төвийн өмнөх талбайд зохион байгуулсан бол штабын дадлага 14 дүгээр сургуулийн спорт зааланд үргэлжилж байна гэж Баянзүрх дүүргийн Онцгой комиссоос мэдээллээ.

Нийслэлийн Онцгой байдлын газраас “Гамшгаас урьдчилан сэргийлэхэд хэвлэл мэдээллийн хэрэгслийн оролцоо” сэдэвт сургалтыг өнөөдөр зохион байгууллаа.

Гамшгийн эрсдэлийг бууруулахад хэвлэл мэдээллийн байгууллагын оролцоог нэмэгдүүлэх, гамшгийн нөхцөл байдлыг олон нийтэд хүргэх, гамшгаас хамгаалах мэдээ мэдээллийг олон нийтэд шуурхай хүргэхэд сэтгүүлчдийг мэдээллээр хангах, хамтран ажиллах зорилготой тус сургалтад төвийн хэвлэл мэдээллийн 30 орчим сэтгүүлч хамрагдсан юм.

Мөн сургалтын үеэр зохион байгуулагдсан гамшгаас хамгаалах мэдлэг, чадвар олгох “Хэн ч, хаана ч, хэзээ ч БЭЛЭН” буухиа тэмцээнд сэтгүүлчид авьяас чадвараа сорин өрсөлдлөө гэж Онцгой байдлын ерөнхий газраас мэдээллээ.

Өнөөдөр Монгол японы төвд Хөдөлмөр Нийгэм Хамгааллын Яам, Япон улсын ЖАЙКА байгууллагатай хамтран хөгжлийн бэрхшээлтэй иргэдэд зориулсан сургалтыг хийв. Уг сургалт семинараар дохионы орчуулга, үсгэн тайлбар, дуут тайлбарыг Монголд нэвтрүүлэх талаарх асуудлыг хөндсөн юм.

Хөгжлийн бэрхшээлтэй хүний эрхийн тухай хуульд “мэдээлэл, харилцаа холбооны үйлчилгээ үзүүлж, олон нийтийн байгууллагын цахим хуудсыг хөгжлийн бэрхшээлтэй иргэдийн хэрэгцээ шаардлагад тохируулах“ талаар туссан байдаг. Гэвч бодит байдал дээр уг хуулийг хэрэгжүүлэх стандарт, дүрэм журам хангалтгүй, авч байгаа арга хэмжээ нь хоцрогдмол байна.

Энэ хүрээнд тус төслөөс цуврал семинарыг зохион байгуулсан ба 2016 оны 10 дугаар сарын 13-нд анхны семинарыг зохиож байжээ. Уг цуврал семинарын үр дүнд харааны бэрхшээлтэй иргэд “телевизийн дүрс бичлэгийн талаарх дуут тайлбар байхгүй”, сонсголын бэрхшээлтэй иргэд “Телевизийн мэдээндээ дохионы хэлмэрчтэй ганцхан телевизтэй, хэлмэрчийн дүрс жижигхэн учир харахад хэцүү, үсгэн тайлбар байдаггүй” гэсэн асуудлуудыг гаргаж тавьсан байна.

Хөгжлийн бэрхшээлтэй иргэдийн эдгээр асуудлуудад шийдэл болгож Япон улсаас зөвлөх Кавамур Хироши,Кейо их сургуулийн профессор Кавамори Масахито болон “ASTEM” ХХК-ны төлөөлөл нар хүрэлцэн ирж, Японд хэрэгжиж байгаа телевизийн нэвтрүүлэгт дохионы орчуулга болон үсгэн тайлбар оруулдаг “Set Top Box” төхөөрөмжийн танилцуулгыг хийжээ.

“Энэ төхөөрөмжийг хэрэглэснээр монголын телевизэд дохионы орчуулга, үсгэн тайлбар зэргийг гаргах боломжтой болно. Монголын засгийн газар мөн адил мэдээллийн хүртээмжтэй байдал дээр анхаарч байгаа нь харагдаж байна” гэж ЖАЙКО байгууллагын Монгол дахь төлөөлөгч Танака онцолж байв.

Тус семинараар дохионы орчуулга, үсгэн тайлбар, дуут тайлбарыг монголд нэвтрүүлэхийн тулд хэрхэн арга хэмжээ авах талаар, орчин цагийн уг технологийг бодитоор туршиж үзүүлэв. Уг төхөөрөмжийн танилцуулыг Хөдөлмөр, нийгмийн хамгааллын яам, Харилцаа холбооны зохицуулах хороо, Юнивишн болон Монголын Үндэсний Телевиз зэрэг байгууллагуудад хийжээ.

Д.ХУЛАН

Нийслэлийн мэргэжлийн хяналтын газраас жил бүр Үндэсний соёл амралтын хүрээлэнд хяналт шалгалт явуулж зөвлөн туслах үйлчилгээ үзүүлж ажилладаг. Хамгийн сүүлд 2018 оны тавдугаар сарын 22-ны өдөр зөвлөн туслах үйлчилгээ үзүүлж, осол аваараас урьдчилан сэргийлэх тухай зөвлөмж хүргүүлжээ.

Тус зөвлөмжинд Үндэсний Соёл амралтын хүрээлэнд буй барилга байгууламж, 22 тоглоомын техник, тоног төхөөрөмжийн бүрэн бүтэн байдал, хөдөлмөрийн аюулгүй байдал, эрүүл ахуйн шаардлагыг хангаж, засвар үйлчилгээг тогтмол хийх зэрэг асуудлуудыг зөвлөжээ.
Паркийн сансрын хөлөг тоглоомонд гарсан ослын учир шалтгааныг тодруулахаар НМХГ-ын улсын байцаагчид ажиллаж байна. Урьдчилсан байдлаар техникийн аюулгүй байдлыг хангаагүй , тоглоомын гар буюу суманд ан цав гарсны улмаас ачаалал дийлэлгүй осол гарсан, өдөр тутмын дотоодын хяналт шалгалт, цэвэрлэгээг хангалтгүй хийснээс шалтгаалсан гэсэн дүгнэлтийг хийгээд байна.
Одоогоор Үндэсний Соёл Амралтын хүрээлэнгийн ажиллагааг түр хаасан бөгөөд паркийн бүх тоглоомонд аюулгүй байдлыг хангах үүднээс бүх тоглоомонд хяналт, шалгалтын ажлыг эхлүүлээд байна. Осол гарсан тоглоомыг актлах шийдвэр гаргасан. Хэрэв осол эрүүгийн шинжтэй гэж үзвэл цагдаагийн байгууллагад шилжинэ, харин зөрчлийн шинжтэй гэж үзвэл НМХГ-аас захиргааны арга хэмжээ авах юм.

2018 оны зургадугаар сарын 14-ний байдлаар Алтай нуруунаас ихтэй Ховд, Буянт, Харбут, Увс нуурын сав Хархираа, Хариг зэрэг голууд үерийн түвшинг 10-30 см даван үерлэж байна. Иймд дээрх голын сав дагуу суурьшиж, зусаж буй малчид тариаланчид, аж ахуйн нэгж, байгууллага ард иргэдийг үер усны аюулаас болгоомжлохыг Ус цаг уур орчин шинжилгээний хүрээлэнгээс анхаарууллаа.

Э.АНУДАРЬ