Month: June 2018

Азийн хөгжлийн банкнаас санхүүжүүлэн Монгол Улсад хэрэгжүүлж байгаа “Замын хөдөлгөөний аюулгүй байдлыг хангах бодлого, хэрэгжүүлэх үйл ажиллагааны төлөвлөгөө боловсруулах” техникийн туслалцааны төслийн тайлангийн хурал өнөөдөр боллоо.

Уг төслийгДани Улсын “Консиа Зөвлөхүүд” /Consia Consultants/ компаниас Азийн хөгжлийн банкнаас томилогдсон үндэсний мэргэжилтнүүдийн багтай хамтарч нэг жилийн хугацаанд хэрэгжүүлж байгаа юм.

Төслийн хүрээнд зам тээврийн ослын бүртгэлийн системийг шинэчлэн олон улсын жишигт нийцсэн бүртгэлийн систем, Вэб аппликейшн, Бүртгэлийн аппликейшн, шаардагдах сервер болон Ipad зэрэг тоног хэрэгслийн үзүүлэлтүүдийг боловсруулан нэвтрүүлж, хоёр ширхэг сервер, 85 ширхэг Ipad-ыг өнөөдөр Замын цагдаагийн албанд хүлээлгэж өглөө.

Өнөөдрийн байдлаар цагдаагийн байгууллагад ашиглаж буй программ хангамжид зам тээврийн ослын дагнасан бүртгэлийн систем байхгүй өөрөөр хэлбэл бусад төрлийн гэмт хэрэг, зөрчилтэй хамтатган бүртгэх байдлаар мэдээ, мэдээлэл боловсруулан ашиглаж байгаа үед зам тээврийн олсын бүртгэлийн сан бидэнд хэрэгтэй, цаг үеэ олсон ажил болсон юм.

Мөн зам тээврийн осол, хэргийн газрын үзлэгийг цахим хэлбэрээр хийх боломжтой болсонтой холбоотойгоор 2018 оны дөрөвдүгээр сараас эхлэн зам тээврийн ослын бүртгэлийн систем болон Ipad ашиглах талаар сургалтыг Хууль сахиулахын их сургууль дээр зохион байгуулж, цагдаагийн алба хаагчид болон ХСИС-ын багш нар хамрагдсан юм.

Дээрх бүртгэлийн системийг ашиглаж нэвтрүүлсэнээр:

• Зам тээврийн ослын хар цэг бүрэн тодорхойлогдох-хар цэгийн байрлалыг зөв тогтоож тэдгээрт тохирсон арга хэмжээг авсанаар аюултай цэгүүдэд аюулгүй байдал хангах ажиллагаа хийгдэх,
• Осол гарсан шалтгаан хэлбэрийг нарийвчлан тодорхойлох- ослын шалтгааныг тогтоосноор тэдгээрт тохирсон арга хэмжээ авах боломж бүрдэж, ослоос хамааралтай үүсэх үр дагавар, хохирлыг бууруулах үр нөлөөтэй, оновчтой арга хэмжээг авч хэрэгжүүлэх,
• Осол гарсан зам орчинг тодорхойлох– зам орчинг зөв тодорхойлсоноор замын байгууламжийн хийцийг өөрчлөх, осол нас баралт, гэмтэлд хүргэх ямар нөхцөл байдал үүссэнд хариу авах арга хэмжээг тодорхойлох зэрэг чухал ач холбогдолтой юм.

Азийн Хөгжлийн банкны буцалтгүй тусламж болон зээлээр хэрэгжиж буй Эрүүл мэндийн салбар хөгжил хөтөлбөр-4 /ЭМСХХ-4/ төслийн хүрээнд Сонгинохайрхан дүүргийн Жишиг нэгдсэн эмнэлгийн барилгын ажлын явцтай өнөөдөр Эрүүл мэндийн сайд Д.Сарангэрэл тэргүүтэй албаныхан танилцлаа.

Тус эмнэлгийн барилгын ажлын ерөнхий төлөвлөлтийг Нидерланд улсын Симед компани, барилгын зураг, төслийг Солонгосын Жунглим компани боловсруулж, барилга угсралтын ажлын гүйцэтгэгчээр Австри улсын Вамед компани тендерт шалгаран гүйцэтгэж байна. Эмнэлэг нь нийт 4 давхар, эмнэлзүйн долоогоос доошгүй үндсэн мэргэжлийн тусламж үйлчилгээг хэвтүүлэн эмчлэх болон амбулаториор үзүүлэх 200 хүртэлх ор бүхий, жилд дунджаар 10 мянга гаруй өвчтөн хэвтэн эмчлүүлэх, 47 мянга гаруй хүнд амбулаторийн тусламж үйлчилгээ үзүүлэх хүчин чадалтай бөгөөд оношилгоо эмчилгээний шинэлэг арга хэлбэр, өдрийн эмчилгээ, мэс засал, бөөрний диализын тусламж үйлчилгээг үзүүлэх юм.

Түүнчлэн тус жишиг эмнэлэгт ажиллах боловсон хүчнийг бэлтгэх зорилгоор 17 чиглэлийн 29 эмч, 100 гаруй сувилагчийг төрөлжсөн мэргэшлээр, 50 гаруй сувилагчийн туслагч болон бусад ажилтнуудыг АШУҮИС болон ЭМЯ-ны харьяа Эрүүл мэндийн хөгжлийн төвтэй гэрээ байгуулан сургаж байгаа аж.

Дүүргийн жишиг эмнэлэг ашиглатад орсноор Улаанбаатар хотын хоёр дахь шатлалын эмнэлгийн тусламжийн хүртээмж, чанарыг сайжруулснаар гурав дахь шатлалд төвлөрөөд буй ачааллыг сааруулах, цаашлаад иргэд гадаадад эмчлүүлэхээр олноор явж буй урсгалыг зогсоох юм. Одоогийн байдлаар барилгын ажлын гүйцэтгэл 38 хувьтай явагдаж байна.

Мэргэжлийн хяналтын байгууллагаас дэд бүтэц, цацрагийн хамгаалалт, аюулгүй байдлын чиглэлээр “Бүтээгдэхүүн, ажил үйлчилгээний чанар, аюулгүй байдал” сэдэвт сарын аяныг эхлүүлсэн. Аяныг 2018 оны зургадугаар сарын 04-29-ний өдрүүдэд улсын хэмжээнд зохион байгуулан ажиллаж байна.

Сарын аяны хүрээнд дараах ажлуудыг төлөвлөн хэрэгжүүлж байна.

Судалгаа шинжилгээ, аж үйлдвэрийн салбарт цацрагийн үүсгүүр ашиглан үйл ажиллагаа явуулж буй байгууллагууд болон Эрүүл мэндийн байгууллагуудад рентген шинжилгээний үед бага насны болон өсвөр насны хүүхдийг хэрхэн хамгаалах талаар мэргэжил арга зүйг зөвлөн туслах үйлчилгээ үзүүлнэ.

“Дэд бүтцийн салбарын улсын байцаагчдын мэргэжлийн ур чадварыг нэмэгдүүлэх” , “Барилгын материалаас үүсэх шарлагаас хүн амыг хамгаалах”, “Улсын хилээр нэвтэрч буй цацраг идэвхт бодисын хууль бус хөдөлгөөнд хяналт тавих” зэрэг нэгдсэн сургалтыг хөтөлбөрийн дагуу зохион байгуулж, хэлэлцүүлэг өрнүүлэхээр болсон.

Түүнчлэн Улаанбаатар хотын шинэ нисэх онгоцны буудлын барилга байгууламжийн аюулгүй байдал, Дулааны цахилгаан станцын хаягдал үнс ашиглан үйл ажиллагаа явуулж буй барилгын материал үйлдвэрлэгчдийг хамруулан сургалт зохион байгуулна.

Хяналт шалгалт хийн, урьдчилан сэргийлэх ажлын хүрээнд, гамшгийн эрсдэлийг бууруулах Азийн сайд нарын бага хурлын бэлтгэхажлын хүрээнд зочид төлөөлөгчид байрлах 29 зочид буудлын хүнс, эрүүл ахуй, дэд бүтцийн аюулгүй байдлыг хангуулах ажлыг хийнэ.

Мөн авто зам, барилгын материалын чанар болон цацрагийн аюулгүй байдал, түүний зөвшөөрөгдөх үзүүлэлтийн талаар үйлдвэрлэгч, хэрэглэгч нарт зориулсан нэвтрүүлэг бэлтгэж, олон нийтийн хэвлэл мэдээллийн хэрэгслээр үйл ажиллагаагаа сурталчлах зэрэг болно.

Э.АНУДАРЬ

Нийслэлийн Засаг даргын орлогч П.Баярхүүгээр ахлуусан ажлын хэсэг Сүхбаатар дүүргийн 20 дугаар хороо, Хандгайт, Шарга морьт орчмын нутаг дэвсгэр дээр ажиллаж байна. Зуслангийн бүсийн ой, усны сан бүхий газруудад зөвшөөрөлгүй хашаа барьсан иргэдийн газрыг чөлөөлөх, орц гарцыг нээх ажлыг эхлүүлэхээршалгалт хийлээ. Ажлын хэсэгт нийслэл, дүүргийн Газрын алба, Нийслэлийн ардчилсан залуучуудын холбооны гишүүд, Нийслэлийн Байгаль орчны газар, Нийслэлийн Мэргэжлийн хяналтын газар, тус дүүргийн цагдаагийн хэлтэс, уг нутаг дэвсгэрийг хариуцсан байгаль орчны хамгаалагч нар оролцсон юм.

Хэд хэдэн байршлуудыг шалгаж, Нийслэлийн Засаг даргын орлогч П.Баярхүү ойн тухай хууль, Усны тухай хууль, Газрын тухай хуулийг зөрчин ойн санд газар олголт хийсэн, гэрчилгээ бичигдсэн, ой, мод бут сөөгийг сүйтгэсэн, зөвшөөрөлгүй барьсан хашааны зөрчлүүдийг илрүүлэн хуулийн дагуу арга хэмжээ авах, цаашид бүр цуцлах хүртэл арга хэмжээ авахыг Нийслэлийн Байгаль орчны газар, Нийслэлийн Газрын албанд үүрэг болголоо.

Тэрээр холбогдох албаныханд ажлын хоёр өдрийн дотор зөвшөөрөлгүй хашаа татсан, зөвшөөрөлтэй боловч зуслангийн ой, усны сан бүхий газарт хашаа, хаалт барьсан бүх зөрчлүүдийн нэгдсэн жагсаалтыг гаргаж, иргэд, аж ахуй нэгжүүдэд яаралтай албан мэдэгдэл хүргүүлэх үүрэг даалгавар өглөө.

Т.ЭНХНАРАНЖАВ

Өмнөговь аймаг нь тарьмал ойн сангаар улсдаа тэргүүлдэг. Ногоон байгууламжийг нэмэгдүүлэхэд анхаарч жил болгон иргэд, байгууллагууд мод тарьдаг ба мод тарьж ургуулсан иргэдийг урамшуулдаг.

Аймгийн төв Даланзадгадын саадны модыг 1950-иад оноос эхлэн арчилж, ургуулж ирсэн нь улсын хэмжээнд хамгийн том ногоон байгууламж бүхий саадтай аймгуудын нэгт тооцогддог байна. Энэхүү ногоон байгууламжийг услахад бэрхшээлүүд тулгардаг байсан ба бүтээн байгуулалтын жилийн хүрээнд Даланзадгадын төв сааданд хоногтоо 70 гаруй тонн ус гарах гүн өрмийн худгийг байгуулж байна. Ажлын гүйцэтгэл өнөөдрийн байдлаар 50 хувьтай явж байгаа бөгөөд тус худгийг гаргаснаар төв саадны ногоон байгууламжийг усалж ургуулах ая тухтай нөхцөл бүрдэх юм.

Замын цагдаагийн албаны Жижүүрийн шуурхай удирдлагын хэлтэс өчигдөр зам тээврийн ослын шинжтэй 212 дуудлага мэдээллийг хүлээн авч шалгажээ. Нийт бүртгэгдсэн ослын улмаас нийслэлд нэг хүний амь нас хохирч, найман хүн гэмтэж бэртсэн бол орон нутагт гурван хүний амь нас хохирсон осол бүртгэгдсэний хоёр нь мотоциклтой холбоотой осол байна.

Тухайн өдөр гудамж замд хийсэн хяналт шалгалтаар согтуугаар тээврийн хэрэгсэл жолоодсон 43 жолоочид хуулийн дагуу хариуцлага тооцож, дөрвөн хүнийг 7-30 хоногоор баривчлах шийтгэл ногдуулжээ.

Бүртгэгдсэн осол, хэргийг хэлбэрээр нь үзвэл явган зорчигч мөргөж гэмтээсэн зургаан осол, мөргөлдөх хэлбэрээр есөн осол, үл хөдлөх зүйл мөргөсөн нэг осол тус тус бүртгэгджээ.

Тухайлбал, Амгалангийн зам, Оргил худалдааны төвийн зүүн хойд замд “H.Acty” маркийн автомашин нь “Dongfeng Eq”, “Hino Ranger” маркийн автомашинуудтай мөргөлдөж, нэг хүн гэмтсэн.

Хан-Уул дүүргийн нутаг Хөшигтийн хөндийн шинэ замд “Тоёота Алион” маркийн автомашины жолооч нь замын тусгаарлах голын шон мөргөж, 47 настай М-н амь нас хохирсон,

Төв аймгийн Сэргэлэн сумын нутаг “Довын хайрхан” гэх газар асфальтан замд “Эс Ти Эм” маркийн улсын дугааргүй мотоцикль онхолдож, жолооч 45 настай эрэгтэй Б-н амь нас хохирсон ослууд бүртгэгдсэнийг харъяа цагдаагийн байгууллагууд шалгаж байна.

“Монгол наадам цогцолбор” ОНӨТҮГ болон Монголын морин спорт уяачдын холбоо хамтын ажиллагаагаа нэмэгдүүлэн, харилцан дэмжлэг үзүүлэх, ажлын уялдаа холбоогоо сайжруулан бодит үр дүнд хүрэх үүднээс өнөөдөр хамтран ажиллах санамж бичиг байгууллаа.

Хамтын ажиллагааныхаа зарчим, чиглэлийг нарийвчлан тодорхойлсон санамж бичигт “Монгол наадам цогцолбор” ОНӨТҮГ-ын дарга Н.Батсүмбэрэл, Монголын Морин спорт уяачдын холбооны ерөнхийлөгчийн үүрэг гүйцэтгэгч М.Мөнхбаясгалан нар гарын үсэг зурсан юм.

Энэхүү санамж бичгийн гол зорилго нь Хүй долоон худагт уламжлалт болон сонгомол морин уралдааныг хөгжүүлэх, морин тойруулгын үйл ажиллагааг явуулахад хамтран ажиллах, Үндэсний их баяр наадам, олон нийтийг хамарсан баярын үеэр байгалийн гамшиг болоход нийтийн аюулгүй байдлыг хангах, уяачдын гэрийн буйр, хурдан морины бэлчээрийг хамгаалах, наадамчин олон болон хурдан морьдыг ундны усаар хангах, наадмын үеэр морьтой үзэгчдийн наадам үзэх бололцоог бий болгох, МНЦ-оос хийж хэрэгжүүлж буй олон нийтийг хамарсан баяр наадам болон бусад үйл ажиллагааг уяачдад сурталчлан таниулах, мэдээллийг түгээх, оролцоогоор хангахад орших юм.