Month: June 2018

Хөдөлмөрийн бүтээмж 2016 онд 1.4 хувиар өссөн бол өнгөрөгч 2017 онд 2.3 хувиар буурсан үзүүлэлттэй гарчээ. Тодруулбал, бизнесийн салбар дундаас мэдээлэл, холбооны салбар өнгөрсөн жил хамгийн их хөдөлмөрийн бүтээмжтэй ажилласан бол уул уурхай, олборлолтын салбар хамгийн бүтээмж муутай ажилласан аж. Тус салбарт ажиллах иргэдийн тоо өнгөрсөн онд 30.8 хувиар өссөн ч гарц буюу үйлдвэрлэл 7.1 хувиар буурсан нь энэ салбарын бүтээмж өмнөх оноос 37.9 хувиар буурахад нөлөөлжээ. Харин Мэдээлэл, холбооны салбарт өнгөрсөн онд 14,500 хүн ажиллаж, 394.6 тэрбум төгрөгийн нэмэгдэл өртөг бүтээсэн нь хамгийн өндөр бүтээмжид тооцогдож байна.

Монгол Улсын хөдөлмөрийн бүтээмжийн үзүүлэлтүүдийг Үндэсний статистикийн хороо тусгай аргачлалаар тооцон гаргадаг бөгөөд уг аргачлалыг 2017 оны нэгдүгээр сарын 6-нд шинэчилсэн байдаг. Тэгвэл уг шинэ аргачлалаар 2017 онд хөдөлмөрийн бүтээмж ямар байсныг доорх үзүүлэлтүүд харуулжээ.

Бүтээмжийн үзүүлэлтийг нийт эдийн засаг, бизнесийн сектор болон эдийн засгийн үйл ажиллагааны салбарын түвшинд тооцжээ. Ингэхдээ нийт эдийн засгийн түвшинд хөдөлмөрийн бүтээмжийг нэг ажиллагчид ногдох бодит ДНБ‐ээр хэмждэг байна. Гэтэл нэг хүнд ногдох ДНБ (2010 оны зэрэгцүүлэх үнээр) 2016 онд 0.9 хувиар буурсан бол 2017 онд 2.7 хувиар өссөн байна. Өөрөөр хэлбэл, хөдөлмөрийн бүтээмж нэмэгдсэн жилд нь ДНБ багасч, ДНБ өссөн жилд нь хөдөлмөрийн бүтээмж буурсан байгаа биз. Энэ нь хүн амын өсөлт харьцангуй тогтвортой байхад ажиллагчдын тооны өөрчлөлт тогтворгүй байсантай холбоотой аж. Тухайлбал, ажиллагчид 2013 онд 4.4, 2014 онд 0.6, 2015 онд 3.6 хувиар өсөж байсан бол 2016 онд 0.3 хувиар буурч, харин 2017 онд 7.6 хувиар өссөн байна.

Үндэсний статистикийн хорооны эл судалгаанаас харахад бизнесийн салбарын бодит гарц 2011‐2017 онд жилд дунджаар 9.3 хувиар өсжээ. Зөвхөн 2016 онд 1.7 хувиар өссөн бол 2017 онд 3.6 хувиар өссөн байна. Энэ салбарт ажиллагчдын тоо ч мөн 2017 онд өмнөх жилээсээ 2.8 хувиар нэмэгджээ. Нийт эдийн засаг болон бизнесийн секторын хөдөлмөрийн бүтээмжийг харьцуулахад 2013 оноос бизнесийн секторын бүтээмжийн өсөлт нийт эдийн засгийнхаас өндөр байна. Нөгөө талаар бизнесийн бус секторын бүтээмжийн өсөлт доогуур байгаа аж. ДНБ‐ээр хэмжигдэх гарц нь тухайн улсад үйлдвэрлэсэн бараа, үйлчилгээний нийт өртөг гэсэн үг. ДНБ (2010 оны зэрэгцүүлэх үнээр) 2017 онд урьдчилсан гүйцэтгэлээр 16.1 их наяд төгрөгт хүрч, өмнөх оноос 5.3 хувиар өссөн үзүүлэлттэй байна. 2017 оны байдлаар манай улсад 1,238,300 хүн хөдөлмөр эрхэлж байгаа нь өмнөх оныхоос 7.6 хувиар өссөн дүн юм.

Урин дулааны улирал эхэлсэнтэй холбогдуулан дүүргийн Засаг даргын Тамгын газраас ‘’Цэвэрч-Баянзүрх’’ аяныг санаачлан долоо хоног бүрийн Бямба гарагт бүх нийтийн их цэвэрлэгээг тогтмол зохион байгуулан ажиллаж байгаа билээ.

Тэгвэл иргэдийн ая тухтай, таатай орчинд амьдрах нөхцөлийг бүрдүүлэхийн тулд дүүргийн Нийтлэг үйлчилгээний газар-1, 2, 3, 4 ОНӨААТҮГ-ууд хариуцсан бүсийнхээ нийтийн эзэмшлийн гудамж зам талбайн цэвэрлэгээ үйлчилгээ хайс, хашлага, замын нуух, зорчих хэсэг болон үерийн хамгаалалтын далан суваг, гуу, жалганд үүссэн хог хаягдлыг өдөр бүр цэвэрлэж байна.

Тухайлбал 2018 оны 05 дугаар сарын 20-ны өдрөөс 06 сарын 20-ны өдрийг хүртэлх хугацаанд Нийтлэг үйлчилгээний газрууд нийт 457.515 м.кв талбайн 1.698 тонн хог хаягдлыг цэвэрлэсэн байна. Мөн зам талбайн болон иргэдийн бүлгийн ажилчиднийтийн зам талбайн цэвэрлэгээ, модны хэлбэржилт тайралт болон ногоон байгууламжийн усалгаа арчилгааг тогтмол хийж байна хэмээн Баянзүрх дүүргийн ЗДТГ-ын Хэвлэл мэдээллийн албанаас мэдээллээ.

Өргөн хэрэглээний нийлэг нэг удаагийн уутыг 2019 оны 3 дугаар сарын 1-нээс эхлэн худалдаанд гаргах, хэрэглэхийг хориглосон шийдвэрийг Засгийн газраас гаргажээ.
Энэ талаар УИХ-ын гишүүн, БОАЖ-ын сайд Н.Цэрэнбат мэдээлэл хийхдээ “0,035 мм-ээс нимгэн сав баглаа боодлын зориулалтаар хэрэглэгддэг хальсан уутыг хориглож байна. Энэ бол байгальд хамгийн хор хөнөөлтэй.Ингэснээр цаашид байгаль орчинд сөргөөр нөлөөлж байгаа бүх эх үүсвэрийг хязгаарлах бодлогыг эхлүүлж байна. Энэхүү шийдвэрийн хэрэгжилтэд Гаалийн ерөнхий газар болон Мэргэжлийн хяналтын ерөнхий газар хяналт тавьж ажиллах юм. Нөгөөтэйгүүр, жил орчмын өмнөөс энэхүү шийдэвэрийг гаргаж, олон нийтэд зарлаж байгаа нь иргэд болон импортлогчдод эртнээс мэдээлэл хүргэж, бэлтгэлээ хангах боломж олгож байгаа явдал. 10 сарын өмнө мэдэгдэж байгаа учир одоо байгаа нөөцөө дээрх хугацаанаас өмнөх дуусгах ёстой” гэлээ.

Мөн БОАЖЯ-наас “Цэвэрхэн наадацгаая” аяныг санаачилж байгаа бөгөөд энэ хүрээнд хийж буй нэг ажил нь Засгийн газрын дээрх шийдвэр гэдгийг Н.Цэрэнбат сайд хэлэв. Засгийн газраас гаргаж буй тогтоолд Өргөн хэрэглээний нийлэг нэг удаагийн уутыг импортлох, үйлдвэрлэхийг хориглож байгаа юм байна.

Нийслэлийн Засаг дарга бөгөөд Улаанбаатар хотын Захирагчийн 2016-2020 оны үйл ажиллагааны хөтөлбөрийн засаглал, эрх зүйн орчныг сайжруулах, ил тод, нээлттэй байдлыг нэмэгдүүлэх чиглэлээр хийх ажлуудтай холбоотой заалтууд болон Авлигатай тэмцэх нийслэлийн хөтөлбөрийг хэрэгжүүлэхэд хамтран ажиллахаар болж Нийслэлийн Засаг даргын Тамгын газар, АНУ-ын Азийн сан хооронд санамж бичгийг 2016 онд байгуулсан. Энэ хүрээнд төрийн албан хаагчдад зориулсан сургалт, төсөл, арга хэмжээнүүдийг амжилттай хамтран зохион байгуулсаар ирсэн. Төрийн байгууллагын хариуцлагыг дээшлүүлэх, авлигатай тэмцэх бодлого, хэрэгжилтийг хангах, нийгмийн шударга ёсыг сахин хамгаалах, албан тушаалтныг соён гэгээрүүлэх ажлын хүрээнд удирдах албан тушаалтнуудад сургалт зохион байгууллаа. Сургалт өнөөдөр “Инновацийн төв”-д боллоо.

Нийслэлийн Засаг даргын Тамгын газрын дарга М.Отгонбаяр сургалтыг үйл ажиллагааг нээлээ. Сургалтаар Удирдлагын академийн Эрх зүйн тэнхимийн багш, дэд профессор, доктор н.Алтанзул Төрийн албаны тухай хуулийн шинэчилсэн найруулга, Төрийн албаны сахилга, хариуцлагын тухай хуулийн төслийн үзэл баримтлал, зохицуулалт сэдвээр илтгэл тавилаа.

Монгол Улсын Ерөнхийлөгчийн 38 дугаар зарлигаар 2018-2019 оныг “Авлигаас татгалзах, илчлэх, авлигын гэрч, мэдээлэгчийг хамгаалах жил” болгон зарласан. Тиймээс АТГ-ын урьдчилан сэргийлэх, соён гэгээрүүлэх хэлтсийн дага Т.Баярхүү Авлигаас татгалзах, илчлэх, авлигын гэрч мэдээлэгчийг хамгаалах жилийн хүрээнд зохион байгуулж байгаа ажил, арга хэмжээний тухай сургалтад хамрагдсан удирдах албан тушаалтнуудад мэдээлэл өглөө гэж нийслэлийн ЗДТГ-ыг Хэвлэл мэдээлэл, олон нийттэй харилцах хэлтсээс мэдээллээ.

2018 оны эхний 5 сард нийслэлд 16457 эх амаржиж, 16604 хүүхэд мэндэлжээ. Үүнээс 8535 нь эрэгтэй хүүхэд, 8069 нь эмэгтэй байна. Шинэ төрсөн нийт хүүхдийн 239 нь 2 ихэр, 7 нь 3 ихэр бүртгэгджээ.

Хөдөлмөр, нийгмийн хамгааллын яамнаас өгсөн захиргааны статистик мэдээгээр дүүргүүдийн хөдөлмөр, халамж үйлчилгээний хэлтэст бүртгэлтэй, ажил идэвхтэй хайж байгаа ажилгүй иргэдийн тоо нийслэл хотод 2018 оны 5 дугаар сарын эцэст 8270 болж, өмнөх оны мөн үеэс 20 хүнээр (0.2%) буурчээ. Нийт ажилгүйчүүдийн 4364 (52.8%) нь эмэгтэйчүүд байна гэж нийслэлийн Статистикийн газраас мэдээллээ.