Month: June 2018

Гэр хорооллын бүсэд хэсэгчилсэн буюу бие даасан инженерийн хангамжийг нэвтрүүлэх “Дэд бүтцийн төв”-ийн шав тавих ёслол боллоо. Энэхүү арга хэмжээнд УИХ-ын гишүүн Д.Оюунчимэг, НИТХ-ын төлөөлөгчид, Нийслэлийн Засаг дарга бөгөөд Улаанбаатар хотын Захирагч С.Батболд болон дүүргийн удирдлага, иргэд оролцлоо.

Гэр хорооллын дундын бүсэд хэрэгжүүлэх, агаар, хөрсний бохирдлыг бууруулах, иргэдийн амьдрах орчин нөхцөлийг сайжруулах үндсэн шийдэл нь “Дэд бүтцийн төв” юм. Нийслэл хотын хамгийн их нягтралтай суурьшлын бүсийн нэг болох Чингэлтэй дүүргийн 7 дугаар хорооны нутаг дэвсгэрийн 201 нэгж талбарыг хамарсан 14 га газарт эхний “Дэд бүтцийн төв” баригдах юм.

Уг төв нь төлөвлөж буй нутаг дэвсгэрийн байрлал, газрын гадаргын онцлог, инженерийн дэд бүтцийн хангамжийн байдал зэрэг хүчин зүйлээс хамааран бие даасан болон хэсэгчилсэн байж болох бөгөөд 200-300 өрхийн хэрэгцээг хангах юм.

Нийслэлийн Засаг дарга бөгөөд Улаанбаатар хотын захирагч хэлсэн үгэндээ “Гэр хорооллын дэд бүтцийн төв нь иргэдийн хувьд хувьсгалын чанартай томоохон ажил болж байна. Олон жил гэр хорооллын иргэд энгийн модон жорлонтой ийм байдлаар амьдарч ирлээ. Тэгэхээр бид амьдралын хэв маягаа өөрчлөх, нөхцөл байдалд шинэчлэлт, өөрчлөлт хийх хэрэгтэй. Тиймээс амьдралын энэ хэвшилд хувьсгалын чанартай өөрчлөлт болох юм. Энэ төсөл гэр хорооллын иргэд болон бидний хувьд хүч, хөдөлмөр шингэсэн төсөл юм. Төслийг хугацаанд нь хэрэгжүүлж ажил болгохын төлөө ажиллана. Бид 50 байршилд төслийг хэрэгжүүлэхээр төлөвлөсөн. Энэ төсөлд төр, хувийн хэвшил, иргэд хамтран оролцож байгаагаараа онцлог юм” гэлээ.

Дэд бүтцийн төв”-ийг барьж байгуулах 50 байршлыг баталсан. Төсөл хэрэгжсэнээр 20-30 мянган айл өрхийн инженерийн дэд бүтцийн асуудал бүрэн шийдэгдэж 61.3 га газрын хөрсийг бохирдуулагч эх үүсвэр устах юм. Улаанбаатар хотын гүний усны нөөц, эх үүсвэрүүдийг хамгаалах, бохирдох эрсдэлийг бууруулж, 439,200 м3 хөрсийг нөхөн сэргээнэ.

Гэр хорооллын иргэдийн дунд явуулсан судалгаагаар 80 гаруй хувь нь амьдарч буй газраа орон сууцаар солихоос илүүтэйгээр амьдрах орчин нөхцөлөө сайжруулах тухтай орчинд амьдарч, үр хүүхдүүддээ өвлүүлэн үлдээх хүсэлтэй байна гэж дүн гарчээ. Энэхүү “Дэд бүтцийн төв” нь иргэд инженерийн болон нийгмийн дэд бүтцээр бүрэн хангагдсан орон сууцны айл өрхтэй адил тав тухтай орчинд амьдрах боломжтой болох юм гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Ховд аймагт зохион байгуулж буй “Говийн чоно-2018” олон улсын сургалт, дадлага сургуулийн хүрээнд Монгол, Америкийн аврагчид хамтран уулнаас, уснаас эрэн хайх, аврах ажиллагааны үзүүлэх дадлага сургуулийг амжилттай зохион байгууллаа.

Дадлага сургуульд ОБЕГ-ын харьяа Аврах тусгай анги, Эрэлч нохойн алба, НОБГ-ын Нийслэлийн аврах анги-105, Ховд, Увс, Баян-Өлгий, Говь-Алтай, Завхан аймгийн Онцгой байдлын газар, АНУ-ын Аляскийн үндэсний гвардын 50 гаруй аврагч оролцож, харилцан туршлагаа солилцсон юм.

Энэ удаагийн дадлага сургуульд анх удаа эрэлч нохойг ашиглан, эрлийн үйл ажиллагааг зохион байгуулснаараа онцлог байлаа.

Дадлага, сургуулийн үйл ажиллагаатай ОБЕГ-ын дарга, хошууч генерал Т.Бадрал танилцсан юм.

Туршлага солилцох хамтарсан дадлага сургуулиар алба хаагчид өөрсдийн болон хүч хэрэгслийн бэлтгэл, бэлэн байдлаа дээшлүүлж, гамшиг ослын үед түргэн шуурхай эрэн хайх, аврах ажиллагаа явуулах, нэрвэгдэгсдийг авран хамгаалах, аюулгүй талбайд нүүлгэн шилжүүлэх зэрэг чиглэлээр Монгол, Америкийн аврагчид харилцан мэдээлэл солилцсон юм гэж Онцгой байдлын ерөнхий газраас мэдээллээ.

2018 оны 4 дүгээр сард ОХУ-ын Мал, амьтан хамгаалах холбооноос шүлхий өвчнөөс сэргийлэх II ээлжийн 4 сая тун вакцин нийлүүлсэн. Уг вакцинаар Сүхбаатар, Дорнод, Хэнтий, Дорноговь, Говьсүмбэр, Булган, Архангай, Өвөрхангай, Сэлэнгэ, Дархан-Уул, Орхон, Өмнөговь, Дундговь, Төв, Улаанбаатар гэсэн 15 аймгийн 99 сум, дүүргийн 6 сая толгой малыг дархлаажуулалтад хамруулахаар төлөвлөсөн. Энэ дагуу 2018 оны хаврын шүлхийн вакцинжуулалтын гүйцэтгэл 17-96 хувийн биелэлттэй байгаа бөгөөд улсын хэмжээнд вакцинжуулалт 80 хувьтай явагдаж байна.

Одоогоор Архангай аймгийн Өгийнуур сумын Тоглох багт 5 дугаар сарын 26-нд бог малд шүлхий өвчний шинж тэмдэг илэрсэн. Тиймээс Өгийнуур сумын болон зэргэлдээ сумдын малыг вакцинжуулж байна.

“Монгол-Оросын санаачилга 2018” эдийн засгийн чуулга уулзалтын хүрээнд “Хөдөө аж ахуй, газар тариалан, хүнс, хөнгөн үйлдвэрийн салбарын хоёр талын хамтын ажиллагааны хөгжлийн үндсэн чиглэлүүд болон стратегийн хэтийн төлөв” сэдэвт салбар хуралдаан боллоо.

Салбар хуралдааныг нээж, ХХААХҮ-ийн дэд сайд Ж.Сауле: “Монгол Улс, Оросын Холбооны Улстай уламжлалт сайн хөршийн харилцаа, хамтын ажиллагаатай байдаг. Хоёр улс 2009 оноос Стратегийн түншлэлийг хөгжүүлж эхэлснээр Монгол Улс стратегийн түншлэлийн харилцааг хамгийн анх ОХУ-тай тогтоосон. Стратегийн түншлэл, хамтын ажиллагааны хүрээнд 2 улсын Засгийн газар энэ удаагийн “Монгол Оросын санаачилга-2018” форумын арга хэмжээг зохион байгуулж байгаа нь цаг үеэ олсон, нийгэм, эдийн засаг, салбарын хөгжилд чухал ач холбогдолтой үйл явдал” гэдгийг цохон тэмдэглэлээ.

Тэрбээр, цаашид ОХУ-тай мал эрүүлжүүлэх, хөдөө аж ахуйн техник технологийг шинэчлэх, салбарын мэргэжилтэн бэлтгэх, дадлагажуулах, ноолууран бүтээгдэхүүн үйлдвэрлэх, эрдэм шинжилгээ, судалгааны хамтарсан төсөл хэрэгжүүлэх, таримал ургамлын шинэ сорт гаргах, үр үржүүлэх чиглэлээр судалгааны ажил хийх зэрэг өргөн хүрээнд хамтарч ажиллах өргөн боломж бий талаар онцолсон.

Уг салбар хуралдаанд ХХААХҮ-ийн Газар тариалангийн бодлогын хэргэжилтийг зохицуулах газрын дарга Ц.Болорчулуун, Хүнсний үйлдвэрийн бодлогын хэрэгжилтийг зохицуулах газрын дарга Т.Гантогтох нарын албаны хүмүүс оролцож, салбарын бодлого, цаашид авч хэрэгжүүлэх арга хэмжээний талаар танилцуулсан. Манай улсын газар тариалангийн салбарын онцлог, эрэлт хэрэгцээнд тохирсон хөдөө аж ахуйн техник, тоног төхөөрөмжүүдийг нийлүүлэх боломжтой талаараа ОХУ-ын талаас илэрхийлсэн юм. Одоогийн байдлаар газар тариалангийн үйлдвэрлэлд ашиглаж байгаа техникийн 60 хувь ОХУ-ынх байна. Манай улс хөдөө аж ахуйн техник хэрэгслээ шинэчлэхийн тулд Оростой хамтарч ажилласнаар 54.6 мянган тонн үр тариа, 50.4 мянган тонн ногоон тэжээлийг технологийн хугацаанд хураан авчээ.

Мөн махны экспортын чиглэлээр хамтран ажиллаж, 2017 онд 600 тонн, 2018 оны 4 дүгээр сарын байдлаар 440 тонн махыг хойд хөрш рүү экспортолжээ. Тус улстай хамтран “Мал эрүүлжүүлэх” төслийг үе шаттайгаар хэрэгжүүлж байгааг онцлох нь зүйтэй. Төслийн хүрээнд шүлхийн вакцин 4,2 сая тунг хүмүүнлэгийн тусламжаар нийлүүлэхээс өнгөрсөн онд 2,8 сая нийлүүлээд байна. Цаашид мал, амьтны гоц халдварт өвчнөөр тайван байдлаа хадгалах, түүхий эд, бүтээгдэхүүний олон улсын стандартыг хангах улмаар ОХУ-ын Сибирийн зах зээлд мах нийлүүлэх зорилт тавин ажиллаж байна.

“Монгол-Оросын санаачилга-2018” цуврал арга хэмжээ хоёр улсын төрийн тэргүүн нарын ивээл дор өнөөдрөөс эхлэн Улаанбаатар хотноо зохион байгуулагдаж байна.