Month: June 2018

“Хүн амын хоол тэжээл хүнсний аюулгүй байдлын өнөөгийн байдал сайжруулах арга зам” хамтрагч талуудын уулзалтад төрийн болон төрийн бус байгууллага МУ-д үйл ажиллагаа явуулж буй НҮБ-ын төрөлжсөн байгууллагын төлөөллүүд оролцож байна.

“Хүн амын хоол тэжээлийн байдал” үндэсний V судалгааны түүвэрт сонгогдсон 5 хүртэлх насны хүүхэдтэй 2250 өрхөөс 2249 нь судалгаанд хамрагджээ.

Хоол тэжээлийн үндэсний V судалгаагаар хүүхэд эмэгтэйчүүдийн дунд аминдэм, эрдсийн дутлын тархалт түгээмэл хэвээр байна. Түрүү оны үндэсний IV судалгааны түвшингээс буураагүй байгааг тогтоожээ. Мөн илүүдэл жин таргалалтын тархалт нь бүс нутаг амьжиргааны түвшинг үл харгалзан бүх насны хүн ам ялангуяа насанд хүрэгчдийн дунд маш өндөр нэмэгдэж байгааг судалгаагаар тогтоосон байна.

Мөн Д аминдэмийн хангамжын түвшин туйлын хангалтгүй байгаа аж. Судалгаанд хамрагдсан хүмүүсийн 5 хүртэлх насны хүүхдийн 90 хувь, жирэмсэн эмэгтэйчүүдийн 95 хувь, эрэгтэйчүүдийн 82 хувь нь Д аминдэмийн дутагдалтай байгааг тогтоосон байна. Д аминдэм нь өөхлөг загас, загасны элэгний тос, өндөгний шар уураг, үхрийн элэг зэрэг цөөн тооны хүнсний бүтээгдэхүүнд агуулагддаг. Нарын гэрлийн хэт ягаан туяаны нөлөөгөөр хүний арьсан дор нийлэгждэг байна. Д аминдэм дутал нь ясны өсөлт хөгжилтөд сөргөөр нөлөөлж, хүүхдийн өсөлт хоцрох, насанд хүрэгчдийн яс сийрэгжихэд хүргэдэг байна. Сүүлийн үеийн судалгаагаар Д аминдэмийн хангамж зохистой түвшинд байх нь зүрхний шигдээсээр өвчлөх, зүрхний өвчний улмаас нас барах эрсдэлийг бууруулдаг болохыг нотолжээ.

Нийслэлийн удирдах ажилтны ээлжит шуурхай зөвлөгөөн өнөөдөр боллоо. Сарын хугацаанд хоол үйлдвэрлэл, худалдааны чиглэлээр үйл ажиллагаа явуулж буй 252 иргэн, 741 аж ахуй нэгжид эрүүл ахуй, халдвар хамгаалал, хүнсний чанар, стандартын хяналт, хөдөлмөрийн хяналтын чиглэлээр 150 улсын /ахлах/ байцаагч хяналт тавин ажиллаж, нийт 368 зөрчил илрүүлснээс 297 зөрчлийг газар дээр нь арилгуулсан. Нийслэлийн ногоон бүсэд үйл ажиллагаа явуулах 12 зуслангийн үйл ажиллагаанд урьдчилан сэргийлэх хяналт шалгалт хийж, шалгалтаар илэрсэн зөрчлийг арилгуулахаар улсын /ахлах/ байцаагчийн 77 заалт бүхий 10 албан шаардлагаар хугацаатай үүрэг өглөө. Зуслангуудын ундны уснаас дээж авч Төв лабораторит хими, нян судлалын шинжилгээнд хамруулахад Монгол Улсад мөрдөгдөх “Ундны ус“ Эрүүл ахуйн шаардлага, чанар, аюулгүй байдлын үнэлгээ стандартын шаардлагыг хангаж байна. Төвийн зургаан дүүрэгт баригдаж буй барилгуудын хөдөлмөр аюулгүй байдалд хяналт шалгалт хийж, нийт 408 зөрчил илрүүлж, газар дээр нь 210 зөрчлийг арилгуулж, 15 ААНБ-д 16.5сая төгрөгийн торгууль ногдуулан барагдуулсан. Илэрсэн зөрчлийг арилгуулахаар 39 ААНБ-д улсын /ахлах/ байцаагчийн 198 заалттай албан шаардлага хүргүүлж биелэлт 74 хувьтай байна” гэж Нийслэлийн Мэргэжлийн хяналтын газрын дарга Л.Эрдэнэчулуун ярилаа.

Зөвлөгөөний төгсгөлд Нийслэлийн Засаг даргын Дэд бүтэц, гэр хорооллын хөгжлийн асуудал хариуцсан орлогч П.Баярхүү “Төсвийн орлогын төлөвлөгөөг тасалдуулсан Нийслэлийн Татварын газар болон бусад байгууллагууд орлого бүрдүүлэх ажлыг эрчимжүүлж, орлогын тасалдлыг энэ сардаа багтаан нөхөн төвлөрүүлэх шаардлагатай байна” гээд “Улсын болон орон нутгийн төсвийн хөрөнгө, бусад эх үүсвэрээр санхүүжүүлэх барилга, зам, инженерийн шугам сүлжээ зэрэг улирлын шинж чанартай төсөл арга хэмжээний худалдан авах ажиллагааг шуурхай зохион байгуулж, удаашралтай байгаа ажлуудын хэрэгжилтийг эрчимжүүлж ажиллах, нийтийн эзэмшлийн гудамж талбайн ногоон байгууламжуудын усалгаа, хог хаягдалгүй байлгахад анхаарч, цэвэрлэгээний ажлыг тогтмол зохион байгуулж ажиллах, Инженер, хангамжийн байгууллагууд энэ онд хөрөнгө оруулалт, болон урсгал засвараар хийгдэж байгаа барилга, зам, шугам, сүлжээний ажлуудаа графикт хугацаанд хийж гүйцэтгэх, засварын ажлуудын талаар иргэд, олон нийтэд тогтмол мэдээлж, Захирагчийн ажлын албанаас гүйцэтгэлд тогтмол хяналт тавих, зуслангийн чиглэлийн нийтийн тээврийн үйлчилгээг эхлүүлж, машрут, чиглэл, цагийн хуваарийг тодорхой гаргах, иргэд, олон нийтэд хэвлэл мэдээллийн байгууллагуудаар мэдээлэх, зуслангийн чиглэл болон засварын ажлын хүрээнд хаагдаж байгаа авто замуудын хөдөлгөөний аюулгүй байдлын зохицуулалтыг сайтар хийж ажиллах, нийслэлийн нутаг дэвсгэрт баригдаж дуусаагүй байгаа болон баригдаагүй зогссон барилгын нарийвчилсан судалгааг гаргаж нийслэлийн удирдлагуудад танилцуулах”-ыг холбогдох албан тушаалтнуудад үүрэг болгов гэж нийслэлийн Засаг даргын Тамгын газрын Хэвлэл мэдээлэл, олон нийттэй харилцах хэлтсээс мэдээллээ.

85 жилийн буурал түүхтэй, Хил хамгаалах байгууллагын таван удаагийн аварга, “Цэргийн гавьяаны одон”-т Хилийн цэргийн 0131-р ангийн хугацаат цэргүүд тангараг өргөлөө. Энэ жил Өвөрхангай, Дархан уул аймгаас цэргүүд татагдан ирснээрээ онцлог ажээ. 2017 оны Монгол улсын шилдэг аймаг Өмнөговь, Хилийн цэргийн 0131-р ангид алба хаахаар 90 гаруй цэрэг тангараг өргөв.

Цэргийн тангаргийн баярт үе үеийн ахмад хилчид дайчид, аймаг орон нутгийн удирдлага, аймгийн Засаг даргын орлогч Х.Батболд, Өвөрхангай, Дархан уул аймгаас эцэг эхчүүд хүрэлцэн ирсэн байлаа. Өмнөговь аймаг нь энэ жил 200 орчим сая төгрөгөөр хил хамгаалах салбартаа хөрөнгө оруулж, автомашин, мотоцикль унааны асуудлыг шийдэж өгсөн байна.

Баянзүрх дүүргийн Засаг даргын Тамгын газрын Төрийн захиргааны удирдлагын хэлтсээс дүүргийн Засаг даргын Тамгын газарт иргэд, албан байгууллагаас ирж буй албан бичиг, санал, хүсэлт, өргөдөл, гомдолыг холбогдох албан тушаалтан болон хэлтэс албадад танилцуулан шилжүүлж ажиллаж байна.

Тухайлбал 2018 оны зургадугаар сарын 4-ний өдрөөс зургадугаар сарын 08-ны өдрийг хүртэлх хугацаанд ирсэн нийт 72 өргөдөл гомдол, 118 албан бичгийг холбогдох албаны хүмүүст танилцуулан шийдвэрлэлтийн үйл явцад заавар зөвлөгөө өгч, хяналт тавин ажиллаж байна.

Энэ хугацаанд иргэдээс ирсэн эдгээр өргөдөл, хүсэлтийн 38 буюу 53 хувийг хугацаанд нь шийдвэрлэсэн бол шийдвэрлэх шатандаа 34 өргөдөл, бүртгэгдээд байна. Мөн 118 албан бичгийн 22 нь хариутай албан бичиг байгаа бөгөөд 86 хувьтай шийдвэрлэж байна.

Монгол Улсын Засгийн газрын Хэрэг эрхлэх газрын даргын 2018 оны тавдугаар сарын 18-ны өдрийн 159-р тушаал, Нийслэлийн Засаг даргын 2018 оны тавдугаар сарын 21-ний өдрийн А/462 дугаар захирамжаар Налайх дүүргийн нутаг дэвсгэрт хийгдэж байгаа хууль бус нүүрс олборлолт, түүнээс иргэдийн эрүүл мэнд, амь насыг хамгаалах зорилгоор Зөвлөлдөх санал асуулгыг зохион байгууллаа.

Зөвлөлдөх санал асуулга бол ардчилсан тогтолцооны дэвшилтэт хувилбар бөгөөд тухайн нэг асуудлын шийдлийг тухайн нутаг дэвсгэрийн ард иргэдийн саналд үндэслэн шийдвэрлэх явдал юм.

Налайхын Зөвлөлдөх санал асуулгын эхний шатны хэлэлцүүлэгт тус дүүргийн 940 өрх хамрагдсан. Эхний шатны хэлэлцүүлэгт оролцсон 940 өрхийн гишүүнээс 2018 оны зургадугаар сарын 08-11-ний өдрүүдэд Нийслэлийн Статистикийн Газрын мэргэжилтэн, судлаачид биечлэн очиж судалгаа авав. Налайхын Зөвлөлдөх санал асуулгын хоёр дахь шатны хэлэлцүүлэгт эхний шатны санал асуулгад оролцсон 940 өрхөөс оролцох хүсэлтээ илэрхийлсэн 470 өрхийн төлөөлөл оролцох юм гэж нийслэлийн Статистикийн газраас мэдээллээ.

Нийслэлийн удирдах ажилтны ээлжит шуурхай зөвлөгөөн өнөөдөр боллоо. Хуралдааны эхэнд өнгөрсөн зөвлөгөөнөөр нийслэлийн Засаг даргын өгсөн үүрэг даалгавар болон түүний биелэлтийн талаар НЗДТГ-ын Хяналт шинжилгээ, үнэлгээний хэлтсийн дарга Х.Гантулга танилцууллаа.

Цагдаагийн ерөнхий газрын дэд дарга бөгөөд Нийслэлийн цагдаагийн газрын дарга, цагдаагийн хурандаа Д.Ядамдорж “Өнгөрсөн 14 хоногт нийслэлийн дүүрэг дэх цагдаагийн хэлтсүүдэд гэмт хэрэг, зөрчлийн 24156 дуудлага, мэдээлэл хүлээн авсан. Үүнээс гэмт хэргийн шинжтэй 1598, зөрчлийн шинжтэй 18482, зам тээврийн 4075 дуудлага мэдээлэл байна. Гэмт хэргийн шинжтэй нийт дуудлага, мэдээлэл 87, хулгайлах гэмт хэргийн шинжтэй дуудлага, мэдээлэл 54 нэгжээр тус тус буурсан байна. “Аз жаргалтай хот”, “Эргүүл дэд” хөтөлбөрийн хүрээнд Нийслэлийн Аялал жуулчлалын газар, Монголын оюутны холбоотой хамтран оюутан залуучуудыг гэмт хэрэг, зөрчлөөс урьдчилан сэргийлэх ажилд татан оролцуулах, гадаадын иргэд, жуулчдын аюулгүй байдлыг хангах, тэдэнд аялал жуулчлал, соёлын үйлчилгээний мэдээлэл түгээх зорилгоор 40 оюутанг сонгон шалгаруулж “Оюутан цагдаа-2018” арга хэмжээг энэ оны зургаадугаар сарын нэгний өдрөөс эхлүүлээд байна” гэж танилцуулав.

“Замын цагдаагийн албаны Мэдээлэл шуурхай удирдлагын хэлтэст 2746 дуудлага мэдээлэл хүлээн авч 815 эд материалын хохиролтой ослыг даатгалаар шийдвэрлэж, хүн гэмтсэн гэмт хэргийн шинжтэй 128 бүртгэгдсэн байна. Өнгөрсөн оны мөн үед хүний амь нас, эрүүл мэнд хохирсон осол 135 бүртгэгдэж байсан бол энэ оны мөн үед 128 бүртгэгдэж 5.2 хувиар буурсан дүнтэй байна” гэж Замын цагдаагийн албаны Нийслэлийн замын хөдөлгөөнийг зохицуулалтын хэлтсийн дарга, цагдаагийн дэд хурандаа Б.Батболд мэдээллээ.

Нийслэлийн онцгой байдлын газрын дарга, хурандаа Ж.Чүлтэмсүрэн “Ойрын өдрүүдэд Улаанбаатар хотод өдөртөө 22-24 хэм, шөнөдөө 11-13 хэм дулаан, салхины хурд 7-8 м/с байх төлөвтэй байна. Өнгөрөгч 14 хоногийн хугацаанд аюулт үзэгдэл, техникийн холбогдолтой ослын 147 удаагийн дуудлагыг хүлээн авч Гал унтраах, аврах ангиуд объектын гал түймрийн 134, аврах ажиллагааны 13 удаагийн дуудлагаар үүрэг гүйцэтгэж, гал түймэр, техникийн холбогдолтой ослоос 23 иргэний амь бие, төр, аж ахуйн нэгж байгууллага, иргэдийн 810 гаруй сая төгрөгийн өмч хөрөнгийг авран хамгаалсан байна. Сэлэнгэ аймгийн Ерөө сумын Бугант багийн Баавгайт уулын Шарлангийн гол гэдэг газар гарсан ойн түймрийн голомтод нийслэлийн Онцгой байдлын газраас 71 албан хаагч, 6 автомашинтайгаар тавдугаар сарын 19-ний өдрөөс одоог хүртэл гал түймрийг цурманд нь оруулан бүрэн унтраахаар ажиллаж байна. Нийслэлийн Засаг даргын А/520 дугаар захирамжийг хэрэгжүүлэх ажлын хүрээнд Туул гол дагуу амарч, аялал зугаалгаар явж байгаа иргэдийг усны ослоос урьдчилан сэргийлэх чиглэлээр, нийслэлийн Цагдаагийн газартай хамтран зохион байгуулдаг “завьт эргүүл” нэгдсэн арга хэмжээг өнөөдрөөс эхлүүлээд байна” гэж танилцуулав.

Нийслэлийн Удирдах ажилтнуудын шуурхай зөвлөгөөнд дүүргийн Засаг дарга нар мэдээлэл хийж байгаа юм. Өнөөдрийн хуралдаанд Багахангай дүүргийн Засаг дарга С.Эрдэнэбаяр мэдээлэл хийв. Тэрбээр дүүргийн төсөв, хөрөнгө оруулалтын өнөөгийн байдал, цаашид шийдвэрлүүлэх асуудлаа танилцууллаа.

Багахангай дүүрэг нь Улаанбаатар-Замын-Үүд, Улаанбаатар-Багануур чиглэлийн төмөр замын зангилаа болон Улаанбаатар-Замын-Үүдийн босоо тэнхлэгийн хатуу хучилттай авто зам дайран өнгөрдөг хэсэг дээр оршдог 29 жилийн түүхтэй дүүрэг юм. Засаг дарга С.Эрдэнэбаяр танилцуулгадаа “Манай дүүргээс Засгийн газрын болон нийслэлийн бодлого шийдвэрийн хэрэгжилтийг хангуулах, төрийн үйлчилгээг иргэдэд түргэн шуурхай, чанартай хүргэхийг зорин ажиллаж ирлээ. Иргэд төрийн байгууллагын үйлчилгээнээс алслагдмал, мэдээ мэдээллийг тухай бүрт нь авч чаддаггүй, төрийн үйлчилгээнд хамрагдах боломж хязгаарлагдмал байдгаас шалтгаалан, “Засаг даргын явуулын өрөө” үйлчилгээг 1997 оноос үзүүлж эхэлсэн. Энэхүү явуулын үйлчилгээгээр 2018 оны эхний хагас жилийн байдлаар долоон төрлийн үйлчилгээг 64 өрхийн 192 иргэнд хүргэж, 26 иргэний гаргасан 45 санал хүсэлтийг хүлээн авч үйл ажиллагаандаа тусган ажиллаж байна. Мөн манай дүүрэг “Иргэн таныг сонсьё” уулзалтыг зорилтот бүлгүүдийн дунд зохион байгуулж хэвшсэн. 2018 оны эхний хагас жилийн байдлаар уг уулзалтад 327 иргэн хамрагдаж, тэдний гаргасан нийт саналын 90.2 хувийг бүрэн шийдвэрлэж ажиллажээ. Монголын хэт холын марафон гүйлтийн холбоотой хамтран “Багахангай Марафон” улсын аварга шалгаруулах тэмцээнийг долоо дахь жилдээ уламжлал болгон тавдугаар сарын 31-ний өдөр зохион байгуулсан. Тэмцээнд 12 аймаг, найман дүүрэг, зургаан клуб, таван спорт хороо, 21 байгууллагын 800 гаруй тамирчин оролцлоо” гэв.

Засаг дарга С.Эрдэнэбаяр дүүрэгт хийгдэж буй хөрөнгө оруулалтын ажлуудын явц, хэрэгжилтийг танилцуулаад зарим ажилд нийслэлээс анхаарч өгөхийг хүссэн юм. Дүүрэгт баригдаж буй “Жижиг, дунд үйлдвэрийг дэмжих төв”-ийн барилгын ажил, Багахангай мах боловсруулах НӨҮГ-ын байнгын үйл ажиллагааг сэргээх, Дүүргийн нэгдүгээр хорооны 129 айлын орон сууцыг дүүргийн мэдэлд шилжүүлэн ашиглалтанд оруулан байр орон сууцны хэрэгцээ шаардлага бий болоод байгаа төрийн албан хаагчид болон залуу боловсон хүчинг орон байраар хангах боломж бүрдүүлэх зэрэг хэд хэдэн саналаа нийслэлийн удирдлагуудад танилцууллаа гэж НЗДТГ-ын Хэвлэл мэдээлэл, олон нийттэй харилцах хэлтсээс мэдээлэв.

Нийслэлийн Залуучуудын хөгжлийн газрын дэргэдэх “Залуучуудын хөгжлийг дэмжих төв”-ийн компьютерийн үндсэн хэрэглээний программын сургалтыг 17 иргэн амжилттай төгсөж, сертфикатаа гардан авлаа.

Энэхүү сургалтыг БНСУ-ын Олон Улсын хамтын ажиллагааны байгууллага “КОИКА”-гийн санхүүжилттэй төслийн гүйцэтгэгч “Эм Кэй Ай Ти” сургалтын төвтэй хамтран зохион байгуулдаг бөгөөд компьютерийн үндсэн хэрэглээнээс гадна мэдээллийн технологийн чиглэлийн 7 төрлийн нарийн мэргэжлийн сургалтуудыг үнэ төлбөргүй зохион байгуулж байна.

Тус төв нь 72 компьютертой гурав сургалтын танхим, Инкубатор төвөөс бүрдэх бөгөөд 2017 оны гуравдугаар сараас хойш 1500 орчим залуучуудыг мэдээллийн технологийн чиглэлээр үнэ төлбөргүй сургаж, 20 иргэнийг инкубатор төвөөр дамжуулан бойжуулж, 45 залууг ажлын байранд холбож ажилласан юм. гэж нийслэлийн Залуучуудын хөгжлийн газраас мэдээллээ.