Month: June 2018

Үндэсний статистикийн хорооноос танилцуулсан Монгол Улсын нийгэм, эдийн засгийн эхний таван сарын байдлаар аж үйлдвэрийн салбарын нийт үйлдвэрлэл 6 их наяд төгрөгт хүрч өмнөх оны мөн үеэр 1.1 их наяд төгрөгөөр өсөөд буй дүн мэдээ гараад байна.

Улаанбаатар цэргийн хүрээний ангиудад шинэ цэргүүд сүр хүч, тэмцэл ялалтын бэлгэдэл болсон тугийн дор цэцэн буугаа мөрлөн жагсч, Монгол Улсын Үндсэн хуулиар хүлээсэн үүргээ биелүүлж цэргийн тангарагаа өргөв.

Зэвсэгт хүчний 013 дугаар ангийн хугацаат цэргийн алба хаагчдын цэргийн тангарах өргөх ёслолын арга хэмжээнд УИХ, Засгийн газрын гишүүн, Батлан хамгаалахын сайд Н.Энхболд, ЗХЖШ-ын Ажиллагааны удирдлагын газрын дарга, бригадын генерал Д.Ганзориг, БХЯ-ны Төрийн захиргаа, удирдлагын газрын даргын албан үүргийг түр орлон гүйцэтгэгч, хурандаа Ө.Эрдэнэ-Очир болон сайдын зөвлөх Д.Бүрэнтогтох тэргүүтэй албаныхан, дайчдын ар гэрийн төлөөлөл оролцлоо. Батлан хамгаалахын сайд Н.Энхболд цэргийн тангараг өргөсөн дайчдад золбоо хийморьтой байж, албандаа зүтгэлтэй, аливаад шударга хандлагатай, сурлага сахилгын өндөр амжилт гаргахыг захисан бол дайчдын ар гэрийнхэн хүүгээ болон дүүгээ өнгө жавхаатай, хийморьлог эр цэргийн нэр төрийг өндөрт өргөж албаа хаагаад ирэхийг захиж байв.
Цэргийн тангараг өргөсөн хугацаат цэргийн алба хаагчдыг төлөөлж байлдагч Х.Очирбат, “Ээж аавын хүүгээс эх орны хүү боллоо. Цэргийн албаа нэр төртэй хаагаад очно оо. Цэргийн бахдам түүх, бахархам амжилтыг сонсч биш дунд нь орж бүтээлцэж байгаадаа бид баяртай байгаа”гэсэн бол хүүгийнхээ тангараг өргөх ёслолын сонирхохоор Увс аймгийн Түргэн сумаас ирсэн Н.Цэвээн “Миний хүүг Ц.Ариунболд гэдэг. Хүүгээ хараад таньсангүй. Ямар сайхан тохитой, өнгө жавхаатай болоо вэ. Цэргийн алба хүнийг сэтгэлзүй, бие бялдарыг нь хөгжүүлж төлөвшүүлдэг сайхан газар юм даа” гэв.

Өвөрхангай аймгаас татагдан ирсэн байлдагч Н.Батжаргалын ээж Н.Түвшинжаргал “Би 4 хүүгийнхээ 3-ыг нь цэргийн албанд явуулсан. Цэргийн алба хаагаад ирсэн хүн амьдралд хандах хандлага нь өөрчлөгдөж, хөдөлмөрч, эх оронч үзэлтэй, хүний үг даах чадвартай, тэсвэр хатуужилтай, хариуцлага үүрч чаддаг. Тийм болохоор хөвгүүдээ цэргийн алба хаахыг дэмдэг. Энэ завшааныг ашиглаад БХЯ, ЗХЖШ-ын удирдлагад баярлалаа” гэв.
Зэвсэгт хүчний 013, 150 дугаар ангийн шинэ цэргүүд ийнхүү өнөөдөр тангараа өргөв хэмээн БХЯ-ны хэвлэл мэдээллийн албанаас мэдээллээ.

ОБЕГ-ынхан баруун бүст олон улсын сургалт хийж дуусаад өнөөдрөөс өмнөд бүсийн сургалт дадлага хийж эхэллээ. Онцгой байдлын газрын офицер , бие бүрэлдэхүүнийг хамруулсан “Гамшгийн нөхцөл байдал үүссэн үеийн бүсийн төвийн удирдлага, зохицуулалт, хариу арга хэмжээ, харилцан ажиллагаа” сэдэвт гамшгаас хамгаалах команд штабын сургуулийн удирдагчаар ОБЕГ-ын дэд дарга, хурандаа Б.Ууганбаяр ажиллаж байна.
Сургалтын хүрээнд аймгийн Онцгой комисс, нутгийн захиргааны байгууллага болон орон нутгийн гамшгаас хамгаалах албад, мэргэжлийн ангийн удирдах бүрэлдэхүүнд сургуулийн бодлого, төлөвлөгөөг танилцуулан сургуулийн бэлтгэл ажлыг хангажээ. Гамшгаас хамгаалах менежментийн хөгжлийн чиг хандлага, бүс, бүсийн төвийн удирдлага зохицуулалт, гамшгийн үеийн харилцан ажиллагаа, удирдлага зохион байгуулалт, үүссэн цагийн байдлыг үнэлж, шийдвэр гаргах, офицер бүрэлдэхүүний штабын жигдрэлтийг хангах зорилготойгоор гамшгаас хамгаалах команд штабын сургуулийг астрономийн 48 цаг, оперативын 168 цагийн багтаамжтай 3 үе шаттайгаар зохион байгуулна. Офицер бүрэлдэхүүний команд штабын сургууль 06 дугаар сарын 15-ныг хүртэл үргэлжилнэ.

ОБЕГ-аас Төрийн тусгай хамгаалалтын газарт ой, хээрийн түймэр унтраах, тэмцэх үйл ажиллагаанд дэмжлэг үзүүлэх зорилгоор 10 ширхэг үлээгч аппаратыг өнөөдөр хандивлав.
Тус үлээгч аппарат нь БНХАУ-д улсад үйлдвэрлэсэн 6МF-22-50 загварын 35-50 м/с үлээх чадвартай ой, хээрийн түймэр унтраах үйл ажиллагаанд Онцгой байдлын байгууллагад сүүлийн үед ашиглаж байгаа багаж юм.

Өнөөдөр Үндэсний Статистикийн Хорооноос энэ оны Монгол улсын нийгэм, эдийн засгийн эхний таван сарын статистик мэдээллийг танилцууллаа.

Нийгмийн даатгалын ерөнхий газар,Эрүүл мэндийн даатгалын ерөнхий газрын мэдээллээр нийгмийн даатгалын сангийн орлого 2018 оны эхний таван сард 921 тэрбум гаруй төгрөг болсон. Энэ нь өмнөх оноос 100 тэрбум орчим төгрөгөөр нэмэгдэхэд эрүүл мэндийн даатгалын сангийн орлого 10 хувиар, ажилгүйдлийн даатгалын сангийн орлого 16 орчим хувиар буурсан хэдий ч тэтгэврийн даатгалын сангийн зарлага 13 хувиар, эрүүл мэндийн даатгалын сангийн зарлага 16 орчим хувиар өссөн нь голлон нөлөөлсөн байна.

МОНГОЛ УЛС ДЭЛХИЙН 131 УЛСТАЙ ХУДАЛДАА ХИЙЖЭЭ

Улсын хэмжээнд энэ оны эхний таван сард 31574 эх амаржиж, 31785 хүүхэд төржээ.Цаг уур, орчны шинжилгээний газрын мэдээгээр тав дугаар сард хамгийн их хур тунадас Хөвсгөл аймгийн Цагаан-Үүр суманд 54.5 мм-т хүрсэн бөгөөд аюулт үзэгдэл, ослын тохиолдол энэ оны эхний таван сарын байдлаар 1993 болж, өмнөх оны мөн үеэс 1.5 хувиар буурчээ.

Улсын хэмжээнд эхний таван сард 17980 гэмт хэрэг бүртгэгдсэн нь өмнөх оны мөн үеэс63 гаруй хувиар өсч, мөнгөний нийлүүлэлт энэ оны таван сарын эцэст 17.0 их наяд төгрөг болж, өмнөх сараас 5 гаруй хувиар, өмнөх оны мөн үеэс 31 гаруй хувиар өссөн байна. Улсын нэгдсэн төсвийн тэнцвэржүүлсэн орлого, тусламжийн нийт хэмжээ энэ оны эхний таван сард 3.3 наяд төгрөг, зарлага, эргэж төлөгдөх цэвэр зээлийн хэмжээ 3.3 их наяд төгрөгт хүрлээ.

Төлбөрийн тэнцлийн урсгал ба хөрөнгийн дансны тэнцэл 2018 оны эхний улиралд урьдчилсан гүйцэтгэлээр 348 гаруй ам долларын алдагдалтай гарч, өмнөх оны мөн үеэс 6.6 сая америк доллараар буурсан ба Монгол Улс энэ оны эхний таван сарын байдлаар дэлхийн 131 улстай худалдаа хийсэн ажээ. Харин хэрэглээний бараа үйлчилгээний үнэ өмнөх оноос зургаа орчим хувиар өссөн байна.

Аж үйлдвэрийн салбарын үйлдвэрлэгчийн үнэ V сард өмнөх сарынхаас 0.5 хувиар буурсан бол хөдөө аж ахуйн салбарт улсын хэмжээнд өмнөх оны эцэст тоологдсон төллөх насны нийт 28 гаруй сая хээлтэгч малын 19 гаруй сая нь энэ оны эхний таван сард төллөжээ.

Аж үйлдвэрийн салбарын нийт үйлдвэрлэл энэ оны эхний таван сард урьдчилсан гүйцэтгэлээр өмнөх оны үеэс 23 гаруй хувиар өссөн ба төмөр замын тээврээр эхний таван сард 10 гаруй сая тонн ачаа, нэг сая хүн тээвэрлэсэн нь өмнөх оны мөн үеэс 1.8 сая тонноос өсөж, зорчигчид 3 гаруй хувиар буурсан аж.

Энэ болон бусад дэлгэрэнгүй мэдээллийг nso.mn-ээс авах боломжтой.

Д.ХУЛАН

Тайваний “Сунрэн” ротари клуб Монголын “Улаанбаатар” ротари клубтай хамтран энэ сарын 9-нд АШУҮИС-д “Сул харааны төв”-ийг байгуулж, харах чадвараа алдахаас сэргийлэх, нүдний харааг хамгаалах үйлчилгээ үзүүллээ.

“Сунрэн” ротари клубын Тэргүүн Ван Вэн Чөн “Сул харааны төв”-ийн нээлтийн ёслолд хэлсэн үгэндээ, “Тус ротари клуб нь үнэнч шударга, сайн санааны, гоо сайхан нийгмийг бүтээн байгуулах эрмэлзлийн дор 2016 оноос эхлэн Монгол дахь олон улсын эрүүл мэндийн үйлчилгээг хөгжүүлэх төлөвлөгөө хэрэгжүүлж, нүдний эмч нарын сургалт, нийгмийн зорилтот бүлгийн харааны чадварыг нөхөн сэргээх сургалтыг тус тус зохион байгуулсан. Мөн “Сул харааны төв”-ийг байгуулж буй нь Тайваний ард иргэдийн сайхан сэтгэлийн илэрхийлэл болоод зогсохгүй “хүмүүнийг анагаахад хязгаар үгүй” хэмээх ухагдахууны бодит илрэл боллоо” гэв. Түүнчлэн тэрбээр Тайваний Чан Гөн эмнэлэг, Му Гуан хараагүйчүүдийн нөхөн сэргээх төвийнхний тусламж дэмжлэгт онцгойлон талархал илэрхийлж, эмч нарыг сургалтад хамруулж, Монголын хөдөө орон нутагт очиж сайн дурын үнэ төлбөргүй оношилгоо хийж, харааны чадварыг нөхөн сэргээх сургалт явуулсанд талархаж буйгаа илэрхийлэв.

Улаанбаатарт суугаа Тайваний төлөөлөгчийн газрын төлөөлөгч Хуан Куо Рун, “Ротари клубын амин сүнс нь Ротаричууд өөрчлөлтийг бий болгох /Rotary making a difference/ буюу “өгөөмөр, нөхөрсөг, үйлчлэл” гэсэн зарчим юм. Тайваний Сунрэн, Дунбэй, Руйан, Цаосин ротари клуб, Монголын Улаанбаатар, Энхтайвны өргөн чөлөө, Сэлбэ, Өргөө, Тамир зэрэг ротари клуб хамтран энэхүү төсөлд анхаарал тавин дэмжсэнд талархал илэрхийлэхийн ялдамд Монголчуудын нүдний хараагаа хамгаалах мэдлэг улам бүр нэмэгдэж, хүн бүр өөрсдийн эрүүл мэнд, дэлхийг харах цонхоо эрхэмлэн хайрлах болтугай” гэлээ.

Сүүлийн өдрүүдэд согтуугаар тээврийн хэрэгсэл жолоодох зөрчил нэмэгдсэн тухай албаныхан мэдээллээ. Тухайлбал амралтын өдрүүдэд Цагдаагийн байгууллагаас гудамж замд хийсэн хяналт шалгалтаар согтууруулах ундааны зүйл хэрэглэсэн үедээ тээврийн хэрэгсэл жолоодсон 114 зөрчлийг илрүүлсэн байна. Үүнээс согтууруулах ундааны зүйл хэрэглэсэн үедээ зам тээврийн осолд холбогдсон жолооч хоёр, явган зорчигч хоёр бүртгэгдсэнийг шалгаж байгаа аж.

Энэ нь томоохон фестиваль, задгай талбайн арга хэмжээнүүд зохион байгуулагдаж байгаатай шууд холбоотойг албаныхан хэлж буй юм. Түүнчлэн удахгүй Дэлхийн хөл бөмбөгийн аварга шалгаруулах тэмцээн эхлэхтэй холбоотойгоор оройн цагаар задгай талбайд тэмцээн үзэх үедээ архи, согтууруулах ундааны зүйл хэтрүүлэн хэрэглэх, хэрэглэсэн үедээ замын хөдөлгөөнд оролцох нь эрс нэмэгддэг. Энэ нөхцөл байдлаас урьдчилан сэргийлэх зорилгоор Замын цагдаагийн албанаас задгай талбайн үйл ажиллагаа явуулж байгаа аж ахуйн нэгж байгууллагуудтай урьдчилан сэргийлэх чиглэлээр хамтран ажиллах, нэгдсэн хяналт шалгалтыг зохион байгуулах ажээ.