Month: May 2018

2010 оноос эхлэн жил бүрийн 5, 10 дугаар сарын хоёр дахь долоо хоногийн “Бямба” гарагийг бүх нийтээр мод тарих үндэсний өдөр болгон зарласан.

Энэ жилийн хаврын мод тарилт “Хүн бүхэнд цэвэр агаар, Мод бүхэнд ус” уриан дор зохион байгуулагдаж буйтай холбогдуулан Улсын Их Хурлын Тамгын газрын ажилтнууд Үндэсний цэцэрлэгт хүрээлэнд мод тарилаа.

“Хүн бүхэнд цэвэр агаар, Мод бүхэнд ус” уриатай хаврын мод тариалтын нээлтийн үйл ажиллагаанд Монгол Улсын Ерөнхий сайд У.Хүрэлсүх, УИХ-ын Тамгын газрын Ерөнхий нарийн бичгийн дарга Ц.Цолмон, Нийслэлийн Засаг дарга бөгөөд Улаанбаатар хотын захирагч С.Батболд болон албаны бусад хүмүүс, нийслэлийн төр, захиргаа, аж ахуйн нэгж, байгууллагын ажилтан албан хаагчид, иргэд оролцов. УИХ-ын Тамгын газрын ажилтнууд өнөөдөр голт бор, улиас, шар хуайс гэсэн гурван төрлийн 60 ширхэг мод, бут тарихын сацуу өмнөх жилүүдэд Үндэсний цэцэрлэгт хүрээлэнгийн талбайд тарьсан модондоо арчилгаа, усалгаа хийж, ногоон байгууламжийг нэмэгдүүлэхэд бодит хувь нэмэр орууллаа.Энэ жилийн хаврын мод тариалтаар төр болон хувийн хэвшлийн 30 гаруй байгууллага, иргэд оролцож, нийтдээ хайлаас, чацаргана, монос, голт бор, улиас, гацуур, нарс, шар хуайс гэсэн найман төрлийн 5000 орчим мод тарих аж. Өнгөрсөн жилээс 3-р ээлжийн 50 га талбайд ногоон байгууламж тохижолтын ажил эхэлсэн бөгөөд энэ жилийн мод тарилт Ус сувгийн удирдах газрын гүний худгийг хамгаалах хамгаалалтын зурвас хэлбэрээр таригдаж байгаа юм байнагэж УИХ-ын Хэвлэл мэдээлэл олон нийттэй харилцах хэлтсээс мэдээллээ.

Элсэлтийн ерөнхий шалгалтын бүртгэл хоёрдугаар сарын 5-ны өдөр орон даяар эхэлж, дөрөвдүгээр сарын 16-ны өдөр дууссан юм. Энэ хугацаанд шалгалтад нийт 43846 шалгуулагч бүртгүүлжээ. Нийт бүртгүүлсэн шалгуулагчдын 37950 нь энэ оны төгсөгчид байгаа бол 5896 нь өмнөх оны төгсөгчид байна.

Нийт бүртгүүлсэн шалгуулагчдын дийлэнх нь буюу 32235 буюу 73.5 хувь нь математикийн хичээлийг сонгожээ. Харин Монголын түүх, Орос хэлний хичээлийн шалгалтыг хамгийн цөөн хүүхэд өгөхөөр бүртгүүлсэн аж. Дашрамд, Боловсролын үнэлгээний төвөөс ЭЕШ-ын материалыг газар дээр нь засдаг төхөөрөмж нэвтрүүлэхийг зорьж байгаа аж. Уг системийг ирэх 2019 онд бүрэн нэвтрүүлэхээр төлөвлөж байгаа бөгөөд энэ жилийн шалгалтын үеэр туршилтын ажлыг хийх гэнэ.

Нийслэл хотын Захирагчийн ажлын албанаас Сөүлийн гудамжинд “Аз жаргалтай Улаанбаатар” чимэглэлийн гурван хөшөөг өнгөрсөн онд хийсэн билээ. Сөүлийн гудамжинд байрлах уг баримлыг тавдугаар сарын 3-ны шөнө үл таних этгээдүүд танхайн сэдлээр эвдэж сүйтгэсэн нь камерын бичлэгт үлдсэн.

Тэгвэл уг хөшөөг нийслэлээс дахин сэргээн засварласан аж. Харин хөшөөг эвдэлж, танхайрсан этгээдүүдийг илрүүлж, хохирлыг яаралтай барагдуулах арга хэмжээг авч ажиллахаар цагдаагийн байгууллага ажиллаж байна. Энэхүү баримал болон 45-р сургуулийн өмнө байрлуулсан гэр бүлийн дүрс бүхий баримлуудыг Нийслэлийн төсвийн хөрөнгөөс 20 сая төгрөг гаргаж бүтээсэн аж.

Улсын Их Хурлын Хууль зүйн байнгын хороо, Хууль зүй, дотоод хэргийн яам, Фридрих Эбертийн сантай хамтран Зөрчлийн хууль тогтоомжийн хэрэгжилтийн талаархи уулзалт, хэлэлцүүлгийг Хууль сахиулахын их сургууль дээр зохион байгууллаа. Зөрчил шалган шийдвэрлэх үүрэгтэй 27 байгууллагын 11 мянган субъектийн төлөөлөл болсон 300 гаруй оролцогч бүхий тус хэлэлцүүлгийг Улсын Их Хурлын гишүүн Х.Нямбаатар удирдан явууллаа. Хэлэлцүүлэгт хууль сахиулагч байгууллагууд, тухайлбал прокурор зөрчлийн хэрэг бүртгэлтэд тавих хяналт, прокурорын нэгдсэн бүртгэлд бүртгэх ажиллагаа түүнд тулгамдаж буй асуудлаа, цагдаа, гааль, татвар, мэргэжлийн хяналтын газрууд болон Эрүү, захиргааны хэргийн шүүхүүд Зөрчлийн тухай хууль, Зөрчил шалган шийдвэрлэх тухай хуулийг хэрэглэх, түүнд тулгамдаж буй асуудлаа тус тус танилцуулж, хуулиудад оруулах нэмэлт өөрчлөлтөд санал, зөвлөмжөө өглөө. Хууль сахиулахын их сургуулийн Цагдаагийн эрх зүйн тэнхмийн эрхлэгч, доктор, цагдаагийн хурандаа Н.Ганбадрал хууль тогтоогч, хууль сахиулагчид хамт суугаад хуулиа сайжруулж, боловсронгуй болгох шаардлагуудыг бүх талаас нь хэлэлцэж байгаагаараа онцлог байгааг дурдаад аливаа хуулийн төслийг боловсруулахдаа эрдэмтэн судлаачдын судалгаа, дүгнэлтэд үндэслэх шаардлагатай байна гэлээ.

ЦЕГ-ын Нийтийн хэв журам хамгаалах, олон нийтийн аюулгүй байдлыг хангах албаны дарга, цагдаагийн хурандаа Ж.Амгалан Зөрчлийн тухай хууль, Зөрчил шалган шийдвэрлэх тухай хуулиуд бол нийгмийн хэв журмыг хангах тулгуур хууль төдийгүй цагдаагийн албан хаагчдын гарын авлага юм. Цагдаагийн байгууллагад хуулиар харьяалуулсан Зөрчлийн хуулийн 200 гаруй зүйл, заалтыг хэрэгжүүлэх явцад илэрч байгаа хүндрэл бэрхшээлийг засаж, залруулахад өнөөдрийн хэлэлцүүлэг чухал алхам болж байна. Зөвхөн цагдаагийн байгууллагын зүгээс гэхэд гэр бүлийн хүчирхийлэл, танхайрах, жижиг хулгай, малын гоц халдварт өвчинтэй тэмцэх, жагсаал цуглаан зохион байгуулах, иргэн, цагдаагийн харилцааны асуудал зэргийг хөндсөн 26 төрлийн нэмэлт, өөрчлөлтийн санал өгч байна гэв. Хэлэлцүүлэгт оролцогчид Зөрчлийн хууль, Зөрчил шалган шийдвэрлэх тухай хуулиудад зайлшгүй нэмэлт, өөрчлөлт оруулах шаардлагатай асуудлуудыг нэгтгэн, зөвлөмж гаргаж, Хууль зүй, дотоод хэргийн яаманд хүргүүллээ. Тус яам уг зөвлөмжид үндэслэн эдгээр хууль, тогтоомжид нэмэлт, өөрчлөлт оруулах тухай хуулийн төсөл боловсруулах юм гэж УИХ-ын хэвлэл мэдээлэл, олон нийттэй харилцах хэлтсээс мэдээлэв.

Монгол Улсын зүүн хязгаар болох Дорнод аймагт хятадууд гаарч эхэллээ гэсэн мэдээлэл гарсаар байгаа. Учир нь хэдхэн хоногийн өмнө монгол хүнийг “Миний газар нутаг дээгүүр явлаа” хэмээн загнаж буй хятад иргэн Мио Фуюан гэгч эрийн эрээ цээргүй авирласан бичлэг олон нийтийн сүлжээнд хүчээ авсан.
Тэрбээр Дорнод аймагт олон жил амьдарч байгаа бөгөөд монгол эхнэртэй аж. Ноосны үйлдвэр барих газрын зөвшөөрөлтэй байсан бөгөөд түүнийг нь аймгийн Засаг дарга М.Бадамсүрэн захирамж гаргаж зөвшөөрлийг нь цуцалсан. Гадаадын иргэнд газар урт хугацаагаар газар эзэмшүүлэх эрх зүйн орчин байхгүй учраас эхнэрийнхээ нэрээр газар авсан байжээ.
Үйлдвэр барихаар барьсан барилгыг нь нурааж, газрыг нь албадан чөлөөлөх болсныг ч дуулгасан юм.
Ноосны үйлдвэрийн барилга барьж, түүгээр ч зогсохгүй химийн хорт бодис ашиглан Хэрлэн голын эрэг дээр ноос угааж болзошгүй байсан энэ үйлдлийг таслан зогсоож, эзэмшлийн газрын зөвшөөрлийг нь цуцлах болсонд орон нутгийн иргэд дэмжиж байгаа ажээ.