Month: May 2018

Нийслэлийн Засаг дарга бөгөөд Улаанбаатар хотын Захирагчийн 2016-2020 үйл ажиллагааны хөтөлбөрт Хог хаягдлыг дахин боловсруулж, Эко-Паркийн дэд бүтцийг байгуулж, хог хаягдлын менежментийг сайжруулна гэж заасан. Морингийн давааны хогийн цэгт ландфил үйлдвэр байгуулах, барилгын болон барилга нураалтын хог хаягдлыг дахин боловсруулах байгууламж байгуулах төслийг Европын сэргээн босголт хөгжлийн банкны санхүүжилтээр хийхээр төлөвлөн зээлийн хэлэлцээрт гарын үсэг зурах асуудал энэ оны 03 дугаар сарын 27-ны өдрийн Засгийн газрын хуралдаанаар дэмжигдсэн билээ. Тэгвэл энэ ажлын хүрээнд Европын Сэргээн Босголт Хөгжлийн Банкны Тэргүүн дэд ерөнхийлөгч ноён Юрген Ригтеринк, МУ-ын Сангийн дэд сайд Х.Булгантуяа болон Нийслэлийн Заса гдаргын орлогч П.Баярхүү нар “Улаанбаатар хотын хатуу хог хаягдлыг дахин боловсруулах байгууламжийг шинэчлэх төсөл”-ийн зээлийн гэрээ болон төсөл хэрэгжүүлэх гэрээнүүдэд гарын үсэг зурлаа. Уг үйл ажиллагаа нь Йорданы Хашемын Хаант улсын нийслэл Амман хотноо болж өнгөрлөө.

Үндэсний аудитын газраас “Оюу толгойн далд уурхайн бүтээн байгуулалт, санхүүжилтийн төлөвлөгөө”-нд хийх аудит хийхээр болжээ. Ингэхдээ

• “Оюу толгойн далд уурхайн бүтээн байгуулалт, санхүүжилтийн төлөвлөгөө”
• “Оюу толгой төслийн нэг болон хоёр дахь шатны хөрөнгө оруулалтын гүйцэтгэл, хувь эзэмшигчид ногдох хөрөнгө оруулалтын болон хөрөнгө оруулалтад зориулж авсан зээлийн тооцоо, ирээдүйд төлөгдөх өр төлбөрийн байдал” гэсэн 2 бүлэг сэдвээр 2018-2019 оныг дамжин аудит хийх юм байна.

Энэ талаар Монгол Улсын ерөнхий аудитор Д.Хүрэлбаатар “Олон улсын стандартад “Аудитын дээд байгууллагууд хараат бус байдлаа бууруулахгүйгээр олон нийтийн хүсэн хүлээлт буюу, таамаглалыг мэдэж авч, түүнд цагаа олсон, тохиромжтой хариултыг өгч байх хэрэгтэй” гэж заасны дагуу мэргэжлийн зөвлөх, шинжээч, инженер, техникийн багуудтай хамтран бодит мэдээлэл, баталгаат баримт бичигт тулгуурлан тус аудитуудыг хууль, эрх зүйн хүрээнд гүйцэтгэж дүгнэлт гарган, олон нийтийг үнэн зөв мэдээллээр хангах үүргийг гол зарчим болгон ажиллахаа” илэрхийлэв.

Чөлөөт бөхийн Армийн ДАШТ энэ сарын 15-17-нд ОХУ-ын нийслэл Москвад болно. 33 дахь удаагийн тэмцээнд Зэвсэгт хүчний “Алдар” спорт хорооны бөхчүүд оролцохоор өчигдөр эх орноосоо мордов. Багийн бүрэлдэхүүнд ДАШТ-ий алт, мөнгөн медальт, гавьяат тамирчин С.Цэрэнчимэд, ДАШТ-ий хүрэл медальт, ОУХМ Б.Одончимэг, Азийн АШТ-ий хошой хүрэл медальт, Э.Цэвэгмид, цэргийн дэлхийн аварга Н.Лхамгармаа, Г.Отгонжаргал, залуучуудын ДАШТ-ий хүрэл медальт Б.Болор-Эрдэнэ тэргүүтэй эрэгтэй, эмэгтэй бүтэн багаараа оролцоно. Харин цэргийн дэлхийн аваргууд болох гавьяат тамирчин Г.Мандахнаран, П.Орхон, ОУХМ О.Үйтүмэн нарын шилдгүүд өнжжээ. Монголын багийн ахлагчаар хошууч Б.Мөнхтуул, дасгалжуулагчаар МУГД Ц.Хосбаяр, ОУХМ Д.Цогтбаатар, шүүгчээр олон улсын шүүгч ОУХМ Г.Амархүү нар явсан юм. Монголын армийн бөхчүүд өнгөрсөн жил Литвын Клайпеда хотод болсон ДАШТ-ээс хоёр алт, дөрвөн хүрэл медаль хүртэж байв.

‘’Мод тарих үндэсний өдөр’’-т дүүргийн Иргэдийн Төлөөлөгчдийн хурал, Засаг даргын Тамгын газрын харъяа хэлтэс, албад сургууль, цэцэрлэг, хороод болон дүүргийн нутаг дэвсгэрт үйл ажиллагаа явуулж буй иргэн, аж ахуйн нэгж байгууллагууд идэвх, санаачлагатай оролцсон юм.

Тухайлбал дүүргийн Иргэдийн төлөөлөгчдийн хурал, Засаг даргын Тамгын газрын хэлтэс, албад хамтран ‘’Баянзүрх хайрхан’’-ы энгэрт 160 ширхэг хар мод, гацуур модыг тарилаа. Харин дүүргийн 28 хорооны ажилчид ‘’Дарь-Эх’’ цогцолборт нийт 300 улиас, хайс мод тарив. Харин дүүргийн Прокурорын газрын албан хаагчид байгууллагынхаа өмнөх талбайд 70 гаруй бутны суулгац тарьж, мод зүлэг хамгаалах хайс хийсэн байна. Үндэсний цэцэрлэгт хүрээлэнд нийт 34 аж ахуй нэгж байгууллага 1600 орчим мод, бут сөөг тарьжээ. ‘’Мод тарих үндэсний өдөр’’-т дүүргийн хэмжээнд нийт 831 иргэн, 42 аж ахуйн нэгж байгууллага оролцож 2160 гаруй мод, бут, сөөг тарилаа хэмээн Баянзүрх дүүргийн ЗДТГ-ын Хэвлэл мэдээллийн албанаас мэдээллээ.