Month: May 2018

1. СБД, 1-р хороо, Ерөнхий сайд Амарын гудамжинд “Таван богд” ХХК ийн “Марафон гүйлт”-ийн дараа буюу 20:00 цагт зам хааж, дулааны шугам татах ажил хийхээр төлөвлөжээ. Замын хөдөлгөөнийг 5 сарын 20-ны 07:00 цагт нээнэ.

2. .СБД, 11-р хороо, Ногоон нуурын гудамжинд “Гом Илч” ХХК зам хаана. Дулааны шугам татах ажил хийнэ. Замын хөдөлгөөн 6 сарын 04-ний өдрөөс хэвийн үргэлжилнэ.

3. СБД, 2-р хороо, “Жигүүр гранд” группын барилгын зүүн талын туслах замыг “Наран шилтгээн” ГҮТББ сэтэлж, дулааны шугам татах ажил хийхээр боллоо. Тус замыг 5 сарын 20-ны 07:00 цагт нээж, тээврийн хэрэгслийн хөдөлгөөн саадгүй нэвтрүүлнэ.

Өчигдөр Дарханы замд зорчиж явсан галт тэрэг замаасаа гарч ноцтой осол гарсан. Тодруулбал, “Дархан-1” өртөөний 15 дугаар замаар ОХУ-БНХАУ чиглэлд тээвэрлэлт хийж явсан, төмрийн хийц, үр тариа ачсан, 2508 дугаартай ачааны галт тэрэгний 15-24 дэх вагон сэлгээ хийх явцдаа баруун тийш найман чиглэлийн вагон хажуулдан унасан нь тогтоогдсон. Замаасаа гарсан найман вагоны нэгээс үр тариа асгарч, нэг вагон хажуулдсан байдалтай, бусад нь босоогоороо байсан аж. Уг асуудлыг одоогоор үргэлжлүүлэн шалгаж байна.

Ослын газарт “УБТЗ” ХНН-ийн дарга Д.Жигжиднямаа тэргүүтэй ажлын комисс гаран шуурхай ажиллаж, Улаанбаатар хотоос сэргээн босгох галт тэрэг очсон байна. Ослын шалтгаан нь төмөр замын дэр мод ялзарч муудсанаас вагон замаасаа гарсан гэх дүгнэлт гарчээ.

-300 ГАРУЙ МЯНГАН ДЭР МОДЫГ СОЛИХ ШААРДЛАГАТАЙ БАЙНА-

2012 онд Байгаль орчны сайдын тушаалаар төмөр замын дэр мод бэлтгэхийг хориглосны улмаас дэр модыг солих ажил олон жил удааширсан байна. 2016 онд уг асуудлыг Байгаль орчны сайдад тавьж хоригийг цуцлуулж хугацаа дууссан дэр модыг сольж байгаа ч өнөөдөр 300 гаруй мянган дэр модыг солих шаардлагатай байгаа аж. 2012 онд дэр мод бэлтгэхийг хориглосон Байгаль орчны сайдын тушаал гарахаас өмнө УБТЗ жилдээ 200 мянга шахам дэр мод бэлтгэж сольдог байсан бөгөөд үүний 100 орчим мянгыг 330 гаруй ажилчинтай дэр мод боловсруулах үйлдвэр гүйцэтгэж байсныг зогсоосны улмаас 270 гаруй хүн ажилгүй болж галт тэрэгний хөдөлгөөний аюулгүй байдал алдагдаж эхэлсэн байна. Мөн дэр мод боловсруулах үйлдвэр нь жилдээ 500-600 мянган суулгац мод үржүүлэн ойд тарьж ургуулдаг байсан ажил ч зогсоход хүрч, нэг мод огтолсон бол арван мод суулгадаг төмөр замчдын уриа алдагдахад хүрчээ. УБТЗ замаа бетон дэрээр солих ажлыг эрчимтэй хийж байгаа ч манай улсын эдийн засгийн бололцоо, эрс тэс уур амьсгал, газар орны нөхцөлөөс шалтгаалж модон дэрээр солих шаардлагатай байдаг байна.

-ОСЛЫН УЛМААС ХҮН БЭРТЭЖ ГЭМТЭЭГҮЙ-

Зам, тээврийн хөгжлийн яамны мэдээлснээр ослын улмаас хүн бэртэж гэмтээгүй ажээ. Улаанбаатар төмөр замын хэвлэлийн төлөөлөгч “Ослын шалтгаан нь төмөр замын дэр мод ялзарч муудсанаас вагон замаасаа гарсан гэдгийг тогтоосон. УБТЗ-ын сэргээн босгох ангийнхан шөнөдөө хажуулдсан вагоныг босгосон. Одоогоор галт тэрэгний хөдөлгөөн хэвийн үргэлжилж байна” гэжээ.

Монгол Улсад нисэх хүчин үүсч хөгжсөний 93 жилийн ойг тохиолдуулан Үндэсний цэцэрлэгт хүрээлэнд маргааш өдөр “Нисэх-Миний ирээдүй” мэргэжил сурталчлах өдөрлөг зохион байгуулагдахаар болжээ.

Өдөрлөгөөр нисэхийн салбарт ажиллах хүсэл, сонирхолтой оюутан залуус, ерөнхий боловсролын сургуулийн төгсөх ангийн сурагчдад зориулан нисэхийн чиглэлийн ямар мэргэжил эзэмших, гадаад, дотоодын их, дээд сургуулиудын мэдээлэл, ажлын байранд тавигддаг шаардлага гээд олон талын мэдээ, мэдээллийг нэг дороос авч болох байна юм.

Өглөөний 09:00 цагаас оройн 17:00 цаг хүртэл үргэлжлэх тус өдөрлөгт Иргэний нисэхийн ерөнхий газар, түүний алба салбарууд, “МИАТ ХК, “Хүннү эйр” ХХК, “Аэро монголиа” ХХК, “Отгонтэнгэр”, “Их-Засаг” зэрэг их, дээд сургууль гээд 20-оод байгууллага оролцож үйл ажиллагаагаа танилцуулах юм байна шүү.

Урин дулааны цаг, төгсөлтийн баяр, сургууль, цэцэрлэгийн амралт давхцаж байгаа энэ үед бага насны хүүхэд зам тээврийн осолд өртөх тохиолдол бүртгэгдсээр байна.

Энэ оны эхний дөрвөн сарын байдлаар л нийслэл хотын хэмжээнд зам тээврийн осолд 218 хүүхэд өртөж, хоёр хүүхдийн амь нас хохирч, 18 хүүхэд хүн байдлаар гэмтжээ.
Нийслэлд явганаар замын хөдөлгөөнд оролцож осолд өртсөн 12 хүртэл насны хүүхдийн 40 хувь нь насанд хүрсэн харгалзах хүнтэй замын хөдөлгөөнд оролцсон бол 50 хувь нь харгалзах хүнгүй ганцаараа, 10 хувь нь насанд хүрээгүй найз, ах, эгч дүү нартайгаа замын хөдөлгөөнд оролцож байсан байна.

Ер нь бага насны хүүхэд нь гараас мултарч гүйх буюу гэрэл зөрчөөд явчихдаг гэдгийг санахад илүүдэхгүй. Эцэг эхтэйгээ хамт явж байхад хийсэн үйлдэл бүхэн нь зөвшөөрөгдөх мэт, хэрэв тухайн үед юу ч тохиолдоогүй бол дахин тэр замаар явахад бүх зүйл тийм л байх юм шиг бодох төдийгүй аав, ээжүүдийн хийсэн үйлдлийг ямагт зөв гэж үзэж, хүүхэд дахин давтах нь элбэг байдаг.

Иймд эцэг эх, жолооч та бага насны хүүхдээ харгалзах хүнгүйгээр замын хөдөлгөөнд оролцуулахгүй байх, тэдэнд тавих хараа хяналтаа сайжрууулж, замын хөдөлгөөнд аюулгүй зөв оролцох мэдлэг, дадлыг тогтмол хэвшүүлж байхыг Замын цагдаагийн албанаас зөвлөж байна.

Зүүн Хүрээ Дашчойлон хийдээс Майдар эргэх их ёслолыг өнөөдөр зохион байгуулж байна.

Майдар бурхан нь Буддагийн ирээдүйн дүр бөгөөд энэ орчлонд Буддагийн үе дуусмагц Майдар бурханы үе эхэлнэ хэмээн үздэг. Майдар эргэх ёслол гэдэг нь Майдар бурхан залран ирж эх болсон зургаан зүйл хамаг амьтны тусын тулд тэдний амар амгалан оршихыг бэлгэдэн ач ивээлээ хайрлаж буйг харуулсан шашны зан үйл юм.

Энэхүү шашны зан үйл нь Майдар бурхныг урин залж цөвүүн цагийн зовлон бүгдийг амирлуулан сайн сайхан бүхнийг дэлгэрүүлэх тухайд Майдар бурхныг 4 зүг 8 зовхист нар зөв урин дуудан мөн Жамбын чого хурал хурдаг болой.

Алтан Майдар бурханыг ногоон морин тэргүүнтэй, хорол дөрвөн дугуйтай тэргэн дээр дэвжээ сэнтий засаж залаад хүрээ хийдээ нар зөв тойрон дөрвөн зүгт нь үдлэн эргэдэг. Ногоон морин тэргүүнт тэргэнд залсан Майдар бурханы баруун, зүүнд Додигалсан, Жадамба, Жамчой динаа, Алтангэрэл судруудыг Боди суврагын хамт залан, номт хувцас соёрхсон хоёр тахилч сүнтагийн хадгийн үзүүрийг Майдар бурханы зүрхэн тус уяад түмэн олноо адис хүртээж явдаг юм байна.

Зүүн Хүрээ Дашчойлин хийдийн тамгийн лам Ц.Алтанхүү ярихдаа “Манай Зүүн Хүрээ Дашчойлон хийдэд жил бүр Майдар эргэх ёслол болдог. Бурхан багшийн дараа замбуу тивд заларч ирэх, энэрэл нигүүлсэл, эв нэгдэл, сэргэн мандалт, амар амгалан, хөгжил дэвшлийн бэлэг тэмдэг болсон Майдар бурхан юм. Бид өглөө 08:00 цагаас номоо хураад, Майдар бурхнаа залан тойрч байна. Энэ үйл нь хуучин хүрээнд байсан уламжлал. Жил бүр зуны эхний сарын шинийн гуравны өдөр зүүн хүрээний 30 аймгийн лам хуврагууд өөрсдийн Майдар бурхнаа аваад тойрдог. Буян хураадаг. Ирээдүй цагийн бурхан Майдар бурхантай уулзах ерөөл тавьдаг юм. Бурхны шашинтай бүх оронд өөр өөр цагт энэхүү ёслол маань болдог. Манайд жилд нэг удаа болдог гэлээ.

Б.НОМИН-ЭРДЭНЭ