Month: May 2018

УИХ-ын чуулганы өнөөдрийн хуралдаанаар “Монгол Улсын эдийн засаг, нийгмийг 2019 онд хөгжүүлэх үндсэн чиглэл батлах тухай” тогтоолын төслийн анхны хэлэлцүүлгийг хийлээ.

Засгийн газраас 4 дүгээр сарын 30-ны өдөр өргөн мэдүүлсэн уг төсөлд татварын шинэчлэлийг хөгжүүлэх, иргэдийн худалдан авах чадварыг нэмэгдүүлэх, макро эдийн засгийн эрсдэл даах чадварыг бэхжүүлэх, уул уурхай, дэд бүтцийн томоохон төслүүдийг эрчимжүүлэх чиглэлээр хэд хэдэн зорилт тавьсан байна. Эдгээр зорилтыг хэрэгжүүлснээр эдийн засгийн бодит өсөлт 8 хувь, инфляцын түвшин 8 хувиас ихгүй, төсвийн тэнцвэржүүлсэн алдагдлын ДНБ-д эзлэх хувь 6.1, Засгийн газрын өнөөгийн үнэ цэнээр илэрхийлэгдсэн өрийн түвшин 2019 онд 55.3 хувь, ажилгүйдлийн түвшин 7.5 хувиас хэтрэхгүй байх нөхцөл бүрдэнэ хэмээн Засгийн газар үзжээ. Энэ хүрээнд Эдийн засаг, нийгмийг 2019 онд хөгжүүлэх үндсэн чиглэлийн төсөлд нийт 20 зорилт, 123 арга хэмжээний хүрээнд 8.6 их наяд төгрөг зарцуулахаар тусгаад буй юм.

Тогтоолын төслийг байнгын хороодоор хэлэлцэх үед гишүүдийн зүгээс жижиг дунд үйлдвэрлэлийг дэмжих, цөлжилттэй тэмцэх ажлыг эрчимжүүлэх, багш, эмч нарын цалин хөлсний менежментийг сайжруулах, Улсын бүртгэлийн үйлчилгээний цогцолбор төв байгуулах, олон нийтийн цагдаагийн цалин, урамшууллыг нэмэх, инновацийн салбарт олон улсын жишигт нийцсэн лаборатори бий болгох зэрэг санал ирүүлсэн талаар Эдийн засгийн байнгын хорооноос танилцуулав.

Хэлэлцүүлгийн үеэр УИХ-ын гишүүн М.Билэгт эмч нарын цалинг нэмэх боломж байгаа эсэхийг тодруулав.
Эрүүл мэндийн сайд Д.Сарангэрэл “Монгол Улсын эдийн засаг одоо дөнгөж сэргэж байна. Эмч, эмнэлгийн ажилчид цалингаа нэмэгдүүлэх шаардлага тавьж байгаа. Эдгээр ажилтнуудын цалинг үр ашигтай, хэмнэлттэй, менежменттэй нэмэх хэрэгтэй. Өөрөөр хэлбэл эмнэлгийн байгууллагууд төсвөө өөрсдөө захиран зарцуулж, хэмнэсэн мөнгөөрөө цалин нэмэх байдлаар асуудлыг шийдэж болно” гэлээ.

Өнгөрсөн хугацаанд Улаанбаатар хотын агаарын бохирдлыг бууруулах чиглэлд 216 тэрбум төгрөг зарцуулсан ч үр дүнд хүрээгүй гэдгийг Б.Энх-Амгалан гишүүн шүүмжлэв. Мөн тэрбээр үр дүнгүй арга хэмжээ хэрэгжүүлсэн албан тушаалтнуудад хариуцлага тооцох ёстой гэлээ.

Өнгөрсөн жилүүдэд агаарын бохирдлыг бууруулах нарийн бодлогогүй явж ирснийг Сангийн сайд Ч.Хүрэлбаатар хэллээ. Ирэх оноос түүхий нүүрсний хэрэглээг зогсоож, 100 мянган өрхөд нам даралтын зуух болон бусад арга технологийг нэвтрүүлэхээр төлөвлөж байгаа аж. Үүнд нийт 200 тэрбум төгрөгийн хөрөнгө оруулалт шаардлагатай гэсэн тооцооллыг Сангийн яам гаргажээ.

Асуулт, хариултын дараа гишүүдээс ирүүлсэн зарчмын зөрүүтэй санал тус бүрээр санал хураалт явууллаа. Тухайлбал, М.Оюунчимэг гишүүний гаргасан МСҮТ-д суралцагчдад олгодог байсан 70 төгрөгийг сэргээх санал олонхын дэмжлэг авсан юм. Ийнхүү хуулийн төслийг эцсийн хэлэлцүүлэгт бэлтгүүлэхээр Эдийн засгийн байнгын хороонд шилжүүлэв.

Улсын Нэг болон Гуравдугаар төм эмнэлэг, Юта их сургуулийн эмч нар хамтран нийт 3-5 хүнд цусны зохиомол эргэлтийн нөхцөлд хавхлага солих, тосгуур хоорондын таславчийн цоорхой нөхөх, титэм судас сэргээн засах мэс заслыг ирэх сарын 21-25-нд УНТЭ-т хийнэ.

Эдгээр хагалгааг УГТЭ-д хийдэг бөгөөд энэ удаад тус эмнэлэгт анх удаа зүрхний мэс заслыг хөгжүүлж, эхлүүлж буйгаараа онцлогтой. Цаашид АНУ-ын Юта их сургуулийн баг болон УГТЭ-тэй хамтран Зүрх шилжүүлэн суулгах хагалгааг хийх юм.

Дэлхийн улс орнуудад 1 сая хүн амд 1 зүрхний мэс заслын төв үйлчилж байж хүн амын зүрхний эмгэгийн тусламж үйлчилгээг хангадаг бөгөөд Монгол Улсад ойролцоогоор 3-4 Зүрхний мэс заслын төв шаардлагатай аж.

Монгол Улсын нас баралтын тэргүүлэх шалтгаанд Зүрх судасны тогтолцооны өвчлөл тэргүүлэх шалтгааны нэг байсаар байна. ДЭМБ-ын 2008 онд гаргасан судалгаагаар жилд ойролцоогоор 17.3 сая хүн зүрх судасны өвчнөөр нас барж түүний 7.3 сая нь титэм судасны өвчнөөр нас барсан бөгөөд улмаар энэхүү үзүүлэлт нь 2030 он гэхэд 23.3 сая болно гэсэн урьдчилсан таамаглал гаргасан байна.

Эрүүл мэндийн хөгжлийн төвийн гаргасан 2016 оны статистик мэдээнд зүрх судасны өвчнөөс шалтгаалсан нас баралт тус онд нийт 5390, үүнээс эрэгтэй 3210, эмэгтэй 2270, өвчний ангиллаар нь авч үзвэл цочмог хэрлэгийн шалтгаант 3, хэрлэгийн шалтгаант зүрхний өвчнөөр 48, артерийн даралт ихсэлт 178, зүрхний ишеми өвчнөөр1641, зүрхний цочмог шигдээсээр 838, цочмог миокардит 28, атеросклерок 83, тархи судасны хүндрэлээр 1683, бусад 867 \I26-86\ бүртгэгдсэн байна.

2014 оны жилийн эцсийн байдлаар улсын хэмжээнд нас баралтын 16495 тохиолдол бүртгэгдсэний 34.3 хувийг зүрх судасны өвчин /10000 хүн амд 19.11 буюу 5500-6000 хүн/, 24.3 хувийг хавдар /0000 хүн амд 13.43 буюу 3500 орчим хүн/ эзэлж байгаа нь хорт хавдрын шалтгаант нас баралтаас их байна.

МУБИС-ийн Дүрслэх урлаг технологийн сургуулийн оюутнуудын “ART-2018” үзэсгэлэн өнөөдөр Монголын уран зургийн галерейд нээлтээ хийлээ. Үзэсгэлэн нийтдээ 50 гаруй уран бүтээлийг олон нийтэд дэлгэн үзүүлж байна.

МУБИС-ийн Дүрслэх урлагийн технологийн сургуулийн захирал А.Энхмаа ярихдаа “МУБИС-ийн дүрслэх урлаг технологийн сургууль 60 жилийн түүхтэй. Энэ жил ойн нэрэмжит олон ажил хийгдэж байгаа. Ойн босгон дээр манай сургуулийн оюутнууд бие даасан үзэсгэлэнгээ гаргаж байна. Багш нарын уламжилж ирсэн суурь мэдлэг, онолыг дараагийн үедээ хэрхэн дамжиж байгаа болон сургалтын чанар үр дүнг оюутны бүтээлээс харах боломжтой. Бид жил бүр үзэсгэлэнгээ гаргадаг. Үзэсгэлэнг нээхийн тулд оюутнуудын хичээл зүтгэл их байлаа. Үзэсгэлэн оюутнуудад ирээдүйд чадварлаг уран бүтээлч, багш болохын гараа нь болж өгдөг. Басхүү үзэсгэлэнг тавих, дэглэх, оролцох ажилд тэд суралцаж байдаг. Энэ жил уран зураг, график дизайн, хувцас загвар, уран сийлбэр, дархан гэсэн хэд хэдэн төрлийн бүтээлүүд дэлгэгдэж байна. Багш, шавийн бүтээл бол хамтын хөдөлмөр байдаг. Оюутнуудын бүтээлд багшийн арга барил, чиглэл шингэсэн нь харагддаг. Багш төвтэй сургалт гэхээсээ илүү оролцоо төвтэй, оюутан төвтэй болсон. Хүүхдүүдийг хөгжүүлэх, авъяасыг нь хөтлөх тал дээр түлхүү ажиллаж байна. Оюутнууд өөрсдийн сонгосон чиглэл, сонирхсон сэдвээрээ ур чадвараа харуулсан бүтээлүүдээ дэлгэж байгаа юм. Энэ жил манай оюутнууд олон тэмцээнд амжилттай оролцож байна” гэлээ.

МУБИС-ийн Дүрслэх урлагийн тэнхимийн эрхлэгч Ц.Эрдэнэцог ярихдаа “МУБИС-ийн Дүрслэх урлаг технологийн сургууль байгуулагдсаны 60 жилийн ойг угтаж манай сургуулийн оюутнууд ART-2018 уран бүтээлийн үзэсгэлэнгээ нээж байна. Сургуульд үнэлт дүгнэлт өгөх, багшилж байсан нэрт зүтгэлтнүүд хамтдаа баяраа тэмдэглэх, энэ жилийн төгсөгчид анх удаа Монголын уран зургийн галерейд үзэсгэлэнгээ гаргаж байгаагаар онцлогтой болж байгаа юм. Уран зураг, дүрслэх урлагийн 20 гаруй, дизайны 20 гаруй бүтээл, сийлбэр технологийн 10 гаруй бүтээл нийтдээ 50 гаруй бүтээл дэлгэгдэж байна. Үзэсгэлэн маань ирэх долоо хоногийн даваа гариг хүртэл үргэлжилнэ” гэлээ.

Б.НОМИН-ЭРДЭНЭ

БНСУ-ын Үндэсний төв музей, Монгол Улсын ШУА-ийн Түүх археологийн хүрээлэн, Монголын Үндэсний музей, Богд хааны ордон музейтэй хамтран зохион байгуулж буй “Монгол: Тал нутгийн эзэнт гүрэн” тусгай үзэсгэлэнгийн нээлт энэ сарын 15-нд Солонгосын Үндэсний төв музейд гарлаа.

Үзэсгэлэнд Хүннүгийн булшнаас олдсон Грек-ромын домгийн бурхадын дүрст мөнгөн эдлэл, Түрэгийн Билгэ хааны алтан титэм, Монголын эзэнт гүрний үеийн язгууртны гутал зэрэг нэн эртний болон орчин үеийн Монголын тал нутагт оршин тогтнож байсан нүүдэлчдийн эзэнт гүрнүүдийн түүх, соёлыг төлөөлөхүйц 550 гаруй үзмэр, соёлын өвийг дэлгэжээ.

Үзэсгэлэнгийн нээлтийн үйл ажиллагаанд Боловсрол, соёл, шинжлэх ухаан, спортын дэд сайд Г.Ганбаяр, БНСУ-ын Соёл, спорт, аялал жуулчлалын дэд сайд На Жон Мин, Монгол Улсаас БНСУ-д суугаа элчин сайд Б.Ганболд, Солонгосын Үндэсний музейн захирал Бэ Ги Дун, Солонгос дахь Монгол судлалын нийгэмлэгийн дарга Жан Жан Шиг, ШУА-ийн ерөнхийлөгч Б.Рэгдэл, Түүх археологийн хүрээлэнгийн захирал С.Чулуун, Богд Хааны ордон музейн захирал О.Мэндсайхан тэргүүтэй хоёр улсын эрдэмтэн судлаачид, албаны хүмүүс оролцсон юм.

“Монгол: Тал нутгийн эзэнт гүрэн” тусгай үзэсгэлэн нь Түүх, археологийн хүрээлэн, Монголын Үндэсний музей, Солонгосын Үндэсний музейтэй хамтран 1997 оноос хойш хэрэгжүүлж буй “Мон-Сол” эрдэм шинжилгээний хамтарсан “Мон-Сол” төслийн 20 жилийн ойн арга хэмжээний хүрээнд зохион байгуулагдаж буй. Энэхүү үзэсгэлэн нь Монгол Улсын түүх, соёлыг олон улсад сурталчлан таниулах соёлын томоохон арга хэмжээний нэг болж байна. Үзэсгэлэн БНСУ-ын Үндэсний төв музейд ирэх долдугаар сарын 17 хүртэл гарна.

Улсын Их Хурлын хянан шалгах бүрэн эрхийг хэрэгжүүлэхэд Тамгын газраас /Мэдээлэл, хяналт шинжилгээ, үнэлгээний хэлтэс/ Байнгын хороо, дэд, түр хороо, ажлын хэсэгт арга зүйн туслалцаа үзүүлж ажилладаг. Улсын Их Хурал, Байнгын хорооноос өгсөн чиглэлийн дагуу хууль тогтоомжийн хэрэгжилтэд хяналт шинжилгээ, үнэлгээ хийх ажлыг зохиох, гүйцэтгэлийг хангах, Ерөнхий сайдын мэдээлэл, Улсын Их Хурлын гишүүний асуулга, асуултын хариуг чуулганы нэгдсэн хуралдаан болон Байнгын хорооны хуралдаанаар хэлэлцэх ажлыг зохион байгуулах, Улсын Их Хурлын гишүүн, Байнгын хороо, Тамгын газрын удирдлагын захиалгаар лавлагаа мэдээлэл бэлтгэх, харьцуулсан судалгааг холбогдох журмын дагуу гүйцэтгэх, Улсын Их Хурлаар төсвийн төсөл хэлэлцэх, төсвийн гүйцэтгэлд тавих хяналтыг сайжруулах, үр нөлөөг дээшлүүлэхэд туслах, бодлогын зөвлөмж гаргах үндсэн чиг үүргийг хэрэгжүүлнэ.

Хөгжлийн бэрхшээлтэй хүүхэд, залуусын нийгмийн тэгш эрх, оролцоог хангах, мэдээллийн технологийн мэдлэг ур чадварыг хөгжүүлэх, олон нийтэд таниулах, мэдээлэл, харилцаа холбооны үйлчилгээний хүртээмжийг сайжруулах зорилгоор Нийслэлийн Засаг даргын тамгын газар, Нийслэлийн хүүхэд, гэр бүлийн хөгжлийн газар, Сэргээн засалт, сургалт үйлдвэрлэлийн төв, Мэдээллийн технологийн үндэсний парк, Аймаг, дүүргийн Засаг даргын тамгын газартай хамтран Нийслэлийн засаг даргын нэрэмжит “Хүүхдийн хөгжилд – мэдээллийн технологи” үндэсний уралдааныг 2018 оны 5 дугаар сарын 18-ны өдөр Мэдээлэл технологийн үндэсний паркд амжилттай зохион байгууллаа.

Тэмцээнд хөдөө орон нутаг, нийслэлээс 41 хүүхэд оролцож байгаа бөгөөд тэмцээнд оролцогч хүүхдүүдийн гэр бүлийнхэнд зориулсан сургалтыг тэмцээний үеэр зохион байгууллаа.

Тус сургалтад хамрагдсан эцэг эхчүүдэд Парадигм, хөгжлийн бэрхшээлтэй хүүхэдтэй эцэг эхийн сэтгэлзүй, хүмүүжлийн эерэг арга зэрэг сэдвүүдээр Сэргээн засалт, сургалт үйлдвэрлэлийн төвийн мэргэжлийн багш мэдээлэл өглөө. гэж Нийслэлийн хүүхэд гэр бүлийн хөгжлийн газраас мэдээллээ.