Байгаль орчныг хамгаалахад иргэдийн оролцоог нэмэгдүүлэх, хөрс усны бохирдлоос сэргийлэх зорилгоор Нийслэлийн Залуучуудын Хөгжлийн газар Нийслэлийн Тээврийн газар, Нийслэлийн Байгаль орчны газар, хамтран энэ сарын 26-ны өдөр ногоон бүсийн их цэвэрлэгээг зохион байгуулах гэж байна. Энэ талаар Нийслэлийн Залуучуудын хөгжлийн газрын дарга С.Сүх-Очир, Нийслэлийн Байгаль орчны газрын Усны асуудал хариуцсан ахлах мэргэжилтэн Ч.Дамбасүрэн, Зуслангийн бүсийн аюулгүй байдлын асуудал хариуцсан ахлах мэргэжилтэн Г.Энхжаргал, Нийслэлийн Тээврийн газрын Зорчигч тээврийн үйлчилгээний хэлтсийн дарга Э.Баярт, Баянзүрх дүүргийн Тохижилт нийтийн аж ахуйн хэлтсийн дарга Б.Отгонхүү нар өнөөдөр мэдээлэл өгөв.
“Гүйе! Түүе!” уриатай залуучуудын сайн дурын оролцоонд суурилах “Зуслангийн ногоон бүсийн их цэвэрлэгээ” нийслэлийн Баянзүрх дүүргийн 20 дугаар хорооны нутаг дэвсгэрийн Гачуурт тосгон, Туул гол дагуу “Шинэ амралт”-ын урд талаас “Минж нутагшуулах төслийн нэгж” ОНӨҮГ-ын доод талын тохой хүртэл 5-6 км орчим газрыг цэвэрлэх аж.
Нийслэлийн Тээврийн газраас тухайн өдөр оролцох иргэд, залуучуудыг тээвэрлэх үйлчилгээнд их багтаамжийн 6 автобус гарган, цэвэрлэгээнд оролцогчдод аюулгүй ажиллах заавар, зөвлөгөө өгөх зэргээр нийгмийн хариуцлагат ажилд хамтран ажиллаж байна. Тус цэвэрлэгээнд оролцогчдыг Нийслэлийн Засаг захиргааны II-р байр Хангарди ордны гаднаас 10:00 цагт хөдөлнө.
“Тус үйл ажиллагааг дэмжиж “Монголын Бодибилдинг фитнессийн холбоо” ТББ-ын гишүүн 100 гаруй залуучууд оролцохоос гадна нийт 20 гаруй байгууллагаас 400 гаруй залуучууд оролцох саналаа ирүүлжээ.
Хогоо түүнгээ дасгал хийх “Гүйе! Түүе!” залуучуудын сайн дурын аяныг цаашид тогтмол зохион байгуулж, нийслэлийн иргэд Улаанбаатар хотдоо тав тухтай, цэвэр цэмцгэр орчныг хамтдаа бүрдүүлэх болно” гэж Нийслэлийн Залуучуудын хөгжлийн газрын дарга энэ үеэр онцлов.
Баянзүрх дүүргийн 20 дугаар хорооны нутаг дэвсгэр, Гачууртын гүүрнээс “3-н модны рашаан”, “Маршалын гүүрнээс Баянзүрх хайрхан, Хар усан Тохойгоос “Монгол Шилтгээн” хүртэл гол дагуу явагдах тул аж ахуйн нэгж байгууллага, айл өрх идэвхтэй оролцохыг уриалж байна. Дэлгэрэнгүй мэдээллийг 9712-5557 / 9812-5557 лавлана уу гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
Нийслэлийн 379, Монголын Өмгөөлөгчдийн Холбоо үүсэн байгуулагдсаны 90 жилийн ойн өдрийг тохиолдуулан энэ сарын 25-нд Жанжин Д.Сүхбаатарын талбайд хуулийн салбарынхны хамтарсан өдөрлөг болно. Өдөрлөгийг НЗДТГ, Монголын Нотариатчдын танхим, Монголын Өмгөөлөгчдийн холбоо, Монголын Хуульчдын холбоо, 9 дүүргийн Засаг даргын Тамгын газар хамтран зохион байгуулах юм. Бүтэн өдрийн турш үргэлжлэх өдөрлөгийн үеэр төрөөс батлан гаргаж буй хууль тогтоомжийг олон нийтэд таниулах, сурталчлах, иргэдэд хууль, эрх зүйн зөвлөгөөг үнэ төлбөргүй үзүүлнэ гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
Нийслэлийн мэргэжлийн хяналтын газраас өнгөрсөн гуравдугаар сарын 12-наас дөрөвдүгээр сарын 20 хүртэл нийслэлийн нутаг дэвсгэрт үйл ажиллагаа явуулж буй 14 саун, 7 халуун ус, 10 усан бассейнд шалгалт хийжээ.
Өнөөдөр эрүүл мэндийн салбарын үйлдвэрчний эвлэлийн сонгуульт ажилтнуудад зориулсан “Хүний эрх ба Манлайлал” сургалт болов.
УИХ-ын чуулганы нэгдсэн хуралдаанаар Үндсэн хуулийн цэцийн гишүүнийг томилох, чөлөөлөх асуудлыг хэлэлцэж байна.
Дорнод аймгийн нутаг нэлэнхүйдээ хуурайшилт их байгаа учраас “Онон-Бороо” экспедиц цаг агаарт зориудаар нөлөөлөх ажиллагааг явуулж байна. Яг одоогийн байдлаар Матад суманд хур тунадас нэмэгдүүлэхээр ажиллаж байгаа юм.
Нийслэлийн Засаг дарга бөгөөд Улаанбаатар хотын захирагч С.Батболд өнөөдөр БНСУ-ын Пүчонь хотын дарга Ким Мансүг хүлээн авч уулзлаа. 
Нийслэлийн Тээврийн газраас Улаанбаатар болон Пүчонь хотын нийтийн тээврийн үйлчилгээний ерөнхий үзүүлэлтүүд, өмнө нь гарч байсан нөхцөл байдал, хүндрэлүүд төстэй тул ухаалаг тээврийн систем, тээврийн төлөвлөлт, үйлчилгээний цагийн хуваарийн боловсруулалтын чиглэлээр мэргэжилтэн солилцох, нийтийн тээврийн төлөвлөлттэй холбоотой сургалтуудыг үе шаттай зохион байгуулах зэрэг тодорхой арга хэмжээ авч ажиллах, Ухаалаг тээврийн системийн талаар Пүчонь хоттой хамтран ажиллах, Улаанбаатар хотын тээврийн мэдээллийн удирдлагын төвийн үйл ажиллагааг сайжруулах талаар туршлага судлах, дэмжлэг авах, Улаанбаатар хотын тээврийн салбарын мастер төлөвлөгөө боловсруулах техник эдийн засгийн үндэслэлийн судалгаанд дэмжлэг авах, Зорчигч тээврийн дамжин суултын төв /терминаль/ байгуулах зэрэг асуудлуудаар санал солилцлоо.
Хүүхдийн уран бүтээлийн урын сангаа шинэ бүтээлээр баяжуулан үзэгчдийн хүртээл болгох, Монгол ардын аман зохиол, үлгэрийн өгүүлэмж үйл явдлаар дамжуулан хүүхэд багачуудад эрдэм боловсролын чухлыг таниулах, өв соёл, ёс заншлаа эрхэмлэн дээдлэх хүсэл эрмэлзэлд хөтлөн төлөвшүүлэх зорилгоор УДЭТ-ын уран бүтээлчдийн БСШУСЯ-ны “Хүүхдэд зориулсан уран бүтээл”-ийн төслийн уралдаанд шалгарсан Я.Баяраа, Б.Хишигзаяа нарын зохиол “Царцаа Намжил” хүүхдийн жүжиг тайзны бүтээл болоод буй. Эл бүтээл УДЭТ-ын тайзнаа 6 дугаар сарын 01-нд үзэгчдийн хүртээл болно. Тасалбар нь 8000 төгрөг байх юм. Эрт урьдын цагт Эзэн Чингис ч төрөхөөс өмнө Намжил нэрт нэгэн хүү бурхны оронд очиж, эрдэм сурахаар явсан агаад түүнд тохиолдсон элдэв сонин хэрэг явдлын талаар энэхүү жүжигт өгүүлнэ.
Хүн бүхний танил дэлхий дахинд алдартай “Цасангоо” хэмээх энэхүү үлгэрийг ах дүү Гримм 1812 онд зохиосон бөгөөд дэлхийн 100 гаруй хэлнээ орчуулагдан тайз, дэлгэцийн олон арван бүтээлийн гол сэдэв болсон гайхалтай бүтээл юм. 1937 онд Уолт Дисней студийн 5 жилийн турш хөдөлмөрлөж бүтээсэн “Цасангоо ба долоон одой” бүрэн хэмжээний, хөгжимт хүүхэлдэйн кино хамгийн алдартай Цасангоогийн дүр нь өнөөгийн хүүхэд багачууд төдийгүй насанд хүрэгчдийн зүрх сэтгэлд мөнхөрсөн, хайртай дүр билээ. Энэхүү бүжгэн жүжгийг 6 дугаар сарын 01-нд 11.00, 14.00, 16.00 цагт Улаанбаатар чуулгын тайзнаа тоглоно. Тасалбар нь 25 мянган төгрөгийн үнэтэй бөгөөд хүрэлцэн ирсэн хүүхэд бүрт бэлэгтэй аж.
Эвтэй найрамдалтай амьдардаг амьтдын ойд Бүлтээхэй Дэлдээхэй хоёр бүжин амьдардаг байжээ. Бүлтгэр нүдтэй Бүлтээхэй бушуухан том болоод хөөрхөн мисс туулай болох юмсан гэж бодож мөрөөднө. Тэр ч бүү хэл Эрвээхэй шиг болно гэж бодно. Харин Дэлдээхэй бушуухан том болоод булчин шөрмөс нь товойсон жентельмэн туулай болохыг мөрөөднө. Хоёр бүжин шидэт цэцэг дэлгэрч жимсээ гарахад ганцхан долооход хүсэл нь биелэх байтал шуналтайгаар долоож хөгшин муухай туулай болдог. Хүүхдүүдээ шунал ихэдвэл ямар болдог вэ, гэмээ ойлгоод алдаагаа засвал ямар вэ гэдгийг эл жүжгээс үзээрэй. Улсын хүүхэлдэйн театрын тайзнаа энэхүү жүжгийг энэ сарын 31, 6 дугаар сарын 01-нд 13.00 цагт тус тус тоглоно. Тасалбар нь 15 мянган төгрөг байх бөгөөд бэлэгтэй.
Ойн чөлөөнд Муур, Хөөндий шувуу, Алтанхан залаат азарган тахиа гурав амьдарна. Намар сэрүүн орж мод түлээгээ бэлдэх цаг ирж муур хөөндий найзаа дагуулан ой руу явах болжээ. Алтан залаат азарган тахиаг гэрээ сайн сахиж байгаарай хаалгаа нээж болохгүй, зальт үнэг чамайг өлхөөн идчихнэ шүү гэж захиад явжээ. Тэр хойгуур зальт шар алтан залаат азарган тахиаг пицца колагаар дайлж, гар утасны тоглоомонд донтуулж, бүр од болгоно гэж ч хуурна. Энэ бүгдэд хууртан үнэгний хоол болох шахдаг алтан залаат азарган тахиаг муур хөөндий 2 найз авардаг. Улсын Хүүхэлдэйн театрын тайзнаа энэ сарын 29, 30-нд тоглох энэхүү жүжгийн тасалбар нь 15 мянган төгрөгийн үнэтэй.
Олон улсын хүүхдийн эрхийг хамгаалах өдрийг тохиолдуулан хүүхэд багачууддаа зориулан “Шидэт алчуур” хүүхдийн жүжиг, хүүхдийн баяр Корпорейт Конвеншн центр-концертын танхимд 6 дугаар сарын 01-нд 15.00 цагт эхэлнэ. Тоглолтын тасалбар нь 40 мянган төгрөг бөгөөд байгууллага, хамт олноороо захиалбал хөнгөлөлттэй аж.
“Фантастик продакшн”-ы уран бүтээлчид хүүхэд багачуудад зориулан “Улаан малгайтын адал явдал” үлгэрээс сэдэвлэн бүтээсэн жүжгийг толилуулна. Уг жүжгийг найруулагч Б.Тамир найруулсанб өгөөд М.Баярбат, Э.Алдар, Б.Ганчулуун, Б.Барслхагва, Э.Одбаяр, Т.Бадамжав, Ж.Алтаншагай, Э.Баярмагнай, Б.Саруулбуян, М.Аззаяа нарын жүжигчид тоглох юм.
ЭМЯ-ны Эмнэлгийн тусламжийн газар, ЭХЭМҮТ нь “ЭХ, ХҮҮХДИЙН ЭНДЭГДЛИЙН ТУЛГАМДСАН АСУУДАЛ” шуурхай цахим хурал эрүүл мэндийн байгууллагуудтай хамтран хийлээ. 2018 оны 5 сарын 23-ны өдрийн цахим хурлыг ЭХЭМҮТ-ийн эмчилгээ эрхэлсэн дэд захирал Г.Баттулга удирдан, ЭМЯ-ны Эмнэлгийн тусламжийн газрын дарга М.Баттүвшин, ЭХЭМҮТ-ийн эмчилгээ эрхэлсэн дэд захирал Ц.Алтантуяа, ЭТҮЧА-ны дарга А.Оюунчимэг, Статистик Мэдээлэлзүйн тасаг, Тандалт судалгааны алба, эрүүл мэндийн байгууллагуудын эх, хүүхдийн асуудал хариуцсан мэргэжилтэн, зөвлөх эмч, чанарын менежер, эмч, мэргэжилтэн бүхий 90 гаруй хүн оролцлоо.