Month: May 2018

Үндэсний их баяр наадмыг зохион байгуулах хорооны хурал болж, Тулгар төрийн 2227, Их Монгол Улсын 812, Ардын хувьсгалын 97 жилийн ойн баяр наадмыг зохион байгуулахад шаардагдах төсвийн төсөл, нээлт, хаалт, төрийн хүндэтгэлийн концертын найруулагчийг сонгон шалгаруулалтын талаар хэлэлцсэн байна.

Тус хурлаар энэ жилийн наадмын нээлт, хаалт, төрийн хүндэтгэлийн тоглолтын ерөнхий найруулагчаар төрийн соёрхолт Н.Наранбаатарыг ажиллуулахаар болжээ. Түүнчлэн ерөнхий продюссерээр Үндэсний урлагийн их театрын захирал, СГЗ Г.Цоггэрэл ажиллах аж. Мөн баяр наадам зохион байгуулах төсвийн төслийг хэлэлцэн дэмжээд засгийн газрын хуралдаанаар хэлэлцүүлэн батлахаар тогтсон байна.

Монгол Улс Олон улсын хөдөлмөрийн байгууллага (ОУХБ)-ын гишүүнээр элссэний 50 жилийн ой өнөөдөр тохиож байна. Уг ойг угтан зохион байгуулж буй арга хэмжээний талаар өнөөдөр ХНХ-ын сайд С.Чинзориг, ОУХБ-ааас Монгол Улсад суугаа Суурин төлөөлөгч хатагтай Клэр Куртье-Мюлдер болон МҮЭХ, Монголын ажил олгогч эздийн нэгдсэн холбоо (МАОЭНХ)-ны удирдлагууд мэдээлэл хийв.

Улсын нэгдсэн төв эмнэлэг Монголд анх удаа зүрх шилжүүлэн суулгах мэс ажилбарыг амжилттай хийжээ. Тодруулбал, энэ сарын 21-нээс 25-ны өдрүүдэд тус эмнэлэг хийгдэх цусны зохиомол эргэлтийн нөхцөлд хавхлага солих, тосгуур хоорондын таславчийн цоорхой нөхөх, титэм судас сэргээн засах мэс заслууд анх удаа хийсэн нь амжилттай болсон байна. Тус хагалгааг АНУ-ын Юта их сургуулийн баг, Улсын гуравдугаар төв эмнэлэгтэй хамтран хийсэн бөгөөд цаашид гурваас дөрвөн хүнд хийхээр төлөвлөж буй ажээ.

Юта их сургуулиас ирсэн баг долоон хүний бүрэлдэхүүнтэй бөгөөд зүрхний мэс заслын эмч, мэдээгүйжүүлэлтийн эмч, перфузлогич болон бусад мэргэжилтэн багтсан байна. Тэд хагас жилийн дотор 25 орчим зүрх шилжүүлэн суулгах хагалгаа хийдэг ажээ. Энэхүү хагалгааг хийхээс өмнө нэгдүгээр эмнэлэг туршилтын мэс заслын лабораторийг тавдугаар сарын 10-нд шинээр байгуулж, гахайд зүрх шилжүүлэн суулгажээ.

Гүйнгээ байгаль орчиндоо ээлтэй хандах “Гүйе Түүе” арга хэмжээ болох гэж байна. Зохион байгуулагчид нь Нийслэлийн Засаг даргын хэрэгжүүлэгч агентлаг Залуучуудын хөгжлийн газар, Нийслэлийн Байгаль Орчны газар, Нийслэлийн Тээврийн газар, Нийслэлийн Баянзүрх дүүргийн ЗДТ-ын газар юм.

Тэд “Гүйе,Түүе” уриан доор хөрс усны бохирдол, хог хаягдал, халдварт өвчнөөс урьдчилан сэргийлэх зорилгоор “Зуслангийн ногоон бүсийн их цэвэрлэгээ”-г хийх юм. Энэ бямба гаригийн өдрийн 09:00-15:30 цагуудын хооронд зохион байгуулах уг арга хэмжээнд 25 орчим ТББ-ын залуус нэгдэхээр болсон байна. Үйл ажиллагааг дэмжиж “Монголын Бодибилдинг фитнессийн холбоо” ТББ-ын гишүүн 100 гаруй залуучууд оролцохоос гадна нийт 20 гаруй байгууллагуудаас 1000 гаруй залуучууд оролцохоор саналаа ирүүлсэн байна. Нэмж оролцох хүсэлтэй залууст арга хэмжээ нээлттэй гэнэ.

Тэд дараах 3 чиглэлд цэвэрлэгээ хийх юм.

-“Зуслангийн ногоон бүсийн их цэвэрлэгээ” нийслэлийн Баянзүрх дүүргийн 20 дугаар хорооны нутаг дэвсгэрийн Гачуурт тосгон

-“Маршалын гүүрнээс Баянзүрх хайрхан

– Хар усан Тохойгоос “Монгол Шилтгээн” Туул гол дагуу “Шинэ амралт”-ын урд талаас “Минж нутагшуулах төслийн нэгж” ОНӨҮГ-ын доод талын тохой хүртэл 5-6 км орчим газрыг цэвэрлэх юм.

Сайн дурын үйл ажиллагаанд оролцох залуучууд нийслэлийн Хангарди ордны автомашины зогсоолоос 09:00 цагт хөдлөхөөр төлөвлөгдсөн нийслэлийн Тээврийн газраас бэлтгэсэн автобусанд сууж, цэвэрлэгээ хийх газар руу шууд очиж ажээ.

Хогоо түүнгээ дасгал хийх “Гүйе! Түүе!” залуучуудын сайн дурын аянг цаашид тогтмол зохион байгуулж, нийслэлийн иргэд Улаанбаатар хотдоо тав тухтай, цэвэр цэмцгэр орчныг хамтдаа бүрдүүлэх болно гэж Нийслэлийн Залуучуудын хөгжлийн газраас мэдээллэв.

ЭМЯ-ны Эмнэлгийн тусламжийн газар, ЭХЭМҮТ нь “Эх, хүүхдийн эндэгдлийн тулгамдсан асуудал” шуурхай цахим хурал эрүүл мэндийн байгууллагуудтай хамтран хийлээ.

Цахим хуралд ЭХЭМҮТ-ийн ТСА-ны дарга Т.Гантуяа “Эх, хүүхдийн эндэгдлийн өнөөгийн байдал”, ЭХЭМҮТ-ийн эмчилгээ эрхэлсэн дэд захирал Г.Баттулга “Эхийн эндэгдлийн өнөөгийн байдал, мэдээлэл, тохиолдолд суурилсан зөвлөмж, сургамж”, ЭХЭМҮТ-ийн зөвлөх эмч Н.Дашзэвгэ “Жирэмсний хожуу хордлогын хүнд хэлбэр, түүний хүндрэл, тохиолдолд суурилсан зөвлөмж, сургамж”, ЭХЭМҮТ-ийн эмчилгээ эрхэлсэн дэд захирал Ц.Алтантуяа “Хүүхдийн эндэгдлийн тулгамдсан асуудал, мэдээлэл, тохиолдолд суурилсан зөвлөмж, сургамж”, ЭХЭМҮТ-ийн хүүхдийн мэс заслын их эмч Ж.Адъяасүрэн “Хүүхдэд тохиолдох золгүй тохиолдлын сэрэмжлүүлэг, мэдээлэл, зөвлөмж, сургамж” сэдвээр мэдээлэл хийлээ.
ЭМЯ-ны Эмнэлгийн тусламжийн газрын дарга М.Баттүвшин хуралд оролцогсдод эх, хүүхдийн өвчлөл, эндэгдэл тогтмол өндөр байгаа аймгууд ажлынхаа арга барилыг өөрчлөх, эхийн эндэгдэл болон 5 хүртэлх насны хүүхдийн сэргийлж болох эндэгдлийг бууруулахын тулд дорвитой ажил зохион байгуулахыг санууллаа.
Цахим хурлыг ЭХЭМҮТ-ийн эмчилгээ эрхэлсэн дэд захирал Г.Баттулга удирдан, эрүүл мэндийн байгууллагуудын эх, хүүхдийн асуудал хариуцсан мэргэжилтэн, зөвлөх эмч, чанарын менежер, эмч, мэргэжилтэн 90 гаруй хүн оролцов.

Өнөөдөр эрүүл мэндийн салбарын үйлдвэрчний эвлэлийн сонгуульт ажилтнуудад зориулсан “Хүний эрх ба Манлайлал” сургалт болов.

Сургалтаар “Хүний эрх ба жендэр”, “Манлайлал ба тэгш оролцоо”, “Жендэрийн мэдрэмжтэй эрүүл мэндийн салбар” гэсэн сэдвүүдээр хичээл заасан юм. Монголын эрүүл мэндийн ажилтнуудын үйлдвэрчний эвлэлийн холбоо /МЭМАҮЭХ/-ны 60 орчим үйлдвэрчний эвлэлийн дарга, сонгуульт ажилтан тус сургалтанд оролцлоо.

Сургалтын багийн гишүүн, Эмэгтэйчүүдийн улс төрийн манлайлал хөтөлбөрийн оролцогч Э.Пүрэвсүрэн: “Жендэр бол нийгэм дэх хүйсийн тэгш эрх, хүний эрхийн асуудал юм. Тиймээс жендэрийн тэгш байдлыг хангах бодлого барьж ажиллахыг салбар бүр анхаарахаас гадна олон улсын байгууллагууд төсөл хөтөлбөр хэрэгжүүлэхэд жендэрийн дүн шинжилгээ хийх шалгуурыг тавьдаг болоод байна. Эрүүл мэндийн салбарт ч энэ асуудал нь чухал юм. Тухайлбал, манай улсын дундаж насжилтын зөрүү 10 нас руу дөхөж эрэгтэйчүүдийн эрүүл мэндийн асуудлыг анхаарч үзэж халдварт бус өвчнөөс сэргийлэх мэдлэгийг дээшлүүлэх зорилгоор жендэрийн мэдрэмжтэй сургалт, мэдээллийг зохион байгуулах хэрэгцээ байна. Хүн амын насжилт явагдах тусам настан хүн амд ганц бие, эрх толгойлсон эмэгтэйчүүдийн асуудал ч давхар гарч ирдэг тул сургалт, мэдээллийн ажлыг нас, боловсрол, амьдран суугаа газрын ялгаатай байдлыг харгалзан үзэх зайлшгүй шаардлагатай болдог. Эрүүл мэндийн салбарт ажиллагсдын 80 хувь нь эмэгтэйчүүд байдаг ч тухайн салбарын бодлого боловсруулах, шийдвэр гаргах түвшний эмэгтэйчүүдийн оролцоо мөн энэ хэмжээний байгаа эсэх нь эргэлзээтэй юм. Сувилагчдын хүйсийн байдал бас л эмэгтэйчүүд давамгайлсан байдаг. Тэгэхээр эрүүл мэндийн салбарыг эмэгтэйчүүдийн салбар мэт авч үзэх хэвшмэл байдал байхыг ч үгүйсгэхгүй юм” гэж хэллээ.

Тэрбээр Конрад-Аденаурын сангийн дэмжлэгтэй хэрэгжүүлж буй “Эмэгтэйчүүдийн улс төрийн манлайлал хөтөлбөр”-ийн дөрөв дэх жилийн оролцогч юм. Өөрчлөлтийн төлөөх эмэгтэйчүүд ТББ-аас хөтөлбөрийг хэрэгжүүлдэг бөгөөд жил бүрийн оролцогчид ардчилал, хүний эрх, жендэрийн тэгш байдал гэхчилэн сэдвийн хүрээнд сургалт, уулзалт, нөлөөллийн ажлыг зохион байгуулдаг уламжлалтай.

Монголын Эрүүл мэндийн үйлдвэрчний эвлэлийн холбооны дарга Б.Мягмар “Эрүүл мэндийн салбарт хүний эрхийн тулгамдсан асуудлууд бий. Жишээлбэл, зарим эмнэлэгт цолтой ажилчид, энгийн ажилчид гэсэн ойлголт бий. Энэ нь эрх мэдлийн ялгааг бий болгодог. Манай салбарын хувьд 80 гаруй хувь нь эмэгтэйчүүд байдаг, тэдний хөдөлмөрлөх эрх, тэгш байдалд бид анхаарал хандуулж ажиллахыг зорьдог юм. Сургалтанд үйлдвэрчний эвлэлийн хорооны дарга нараас гадна залуучуудын хэсгийн ахлагч, тэргүүлэгч нарыг оролцуулж байна. Манай залуучуудын хороо хөдөлмөрлөх эрхийнхээ төлөө ажиллах үйлсэд нэгдэж байгаа” гэлээ.

“Эмэгтэйчүүдийн улс төрийн манлайлал” хөтөлбөрийн энэ жилийн оролцогчид МЭМАҮЭХ-той хамтран тус сургалтыг зохион байгуулж байна.

Нийслэлийн мэргэжлийн хяналтын газраас өнгөрсөн гуравдугаар сарын 12-наас дөрөвдүгээр сарын 20 хүртэл нийслэлийн нутаг дэвсгэрт үйл ажиллагаа явуулж буй 14 саун, 7 халуун ус, 10 усан бассейнд шалгалт хийжээ.

Сауны газруудаас 14.2 хувь нь бага, 85.7 хувь нь дунд эрсдэлтэй, усан бассейн, чийрэгжүүлэлтийн усан сангаас 50 хувь нь бага эрсдэлтэй, 50 хувь нь дунд эрсдэлтэй, халуун усны газруудаас 85.7 хувь нь дунд, 14.2 хувь нь их эрсдэлтэй гэж үнэлэгджээ.

Илэрсэн нийтлэг зөрчлийн хувьд, дотоодын хяналт тавих журам тогтоож, мөрдөж ажилладаггүй байна. Усан бассейн, спорт сургалтын төвүүд дотоодын хяналтын лабораторигүй, сауны газруудын барилга байгууламжууд нь батлагдсан зураг төслөөр баригдаагүй, барилгын суурин давхрын хийц өөрчилж, үйл ажиллагаа явуулж байв. Үйлчилгээний ажилчид эрүүл мэндийн урьдчилан сэргийлэх үзлэг шинжилгээнд хамрагдаагүй жилд нэг удаа хамрагдсан үзлэгийн дэвтэртэй боловч, эмчийн тамга тэмдэг, гарын үсэг зөрөөтэй хуурамч бичиг баримттай нь үйлчлүүлэгч нарын дунд арьсны болон амьсгалын замын халдварт өвчнийг тархаах нөхцлийг бүрдүүлж байгаа юм.

Харин цэвэрлэгээний байдалд лабораторийн шинжилгээ хийхэд БГД-ийн “Усан спорт сургалтын төв”, “Түмэн занги” ХХК-ийн “Говь” сауны усан бассейн, Максложинг ХХК-ийн “Рамада саун”-ы чийрэгжүүлэх усан сан, МЧБС ХХК-ийн “Соёл саун”-ы чийрэгжүүлэх сангийн ус нянгийн бохирдолтой гарчээ.

“Нарантуул шейл ойл” ХХК-ийн бассейн, “Халиун төгөл” ХХК-ийн бассейны ус нь үлдэгдэл хлор бага гарсан. Усан бассейн, чийрэгжүүлэх усан сангийн усанд гэдэсний бүлгийн савханцар илэрсэн нь тухай газрын ариун цэвэр, халдвар хамгааллын дэглэм хангалтгүй, үлдэгдэл хлор зөвшөөрөгдөх дээд хэмжээнээс бага гарсан нь бассейны усыг байнгын эргэлтэд байлгах шахуурга, шүүлтүүр болон халдваргүйжүүлэлтийн тоног төхөөрөмжийн эргэлт, усан сангийн ус бүрэн солигдох хугацаа шаардлага хангахгүй зэрэгтэй шууд холбоотой байв.

Саун, халуун усны ажлын байрны эд хогшил, тоног төхөөрөмж, зөөлөн эдлэл, үйлчилгээнд хэрэглэгдэж буй шаахай, амралтын хувцас, гар нүүрийн алчуур зэргээс нийт 14 газраас 99 арчдас авсан байна. Мөн 12 газрын 79 арчдасны 15 буюу 18.9 хувьд гэдэсний бүлгийн савханцар E.Coli илэрсэн нь энэ газруудын цэвэрлэгээ, халдвар хамгааллын дэглэм шаардлага хангаагүйг харуулж байв. Мөн уг газруудад эмнэлгийн анхан шатны тусламж үзүүлэх эмийн сангийн бүрдүүлэлт муу байжээ.

Харин 19 газрын үйлчилгээний ажиллагсад нь хувийн дугаар бүхий энгэрийн тэмдэггүй, үйлчилгээний онцлогт тохирсон зориулалтын ажлын хувцасгүй, зөөлөн эдлэл угаах угаалгын өрөө нь эрүүл ахуйн урсгал буруу, цэвэр бохир хэрэглэл нэг дор байрласан, өрөөний хана, тааз мөөгөнцөрдсөн. Саунд орж болохгүй өвчнүүдийн заалтыг ил бичиж байрлуулаагүй байв.

Иймд зөрчил гаргасан 10 аж ахуй нэгжид улсын байцаагчийн албан шаардлага, есөн аж ахуй нэгжид албан даалгавар, 12 аж ахуйн нэгж, хоёр иргэнд нийт 5 сая 500 мянган төгрөгийн шийтгэл ногдуулсан байна.