Month: May 2018

Аргын тооллын 5 сарын 26, Санчир гараг. Билгийн тооллын 12, Тэргүүн дагуул одтой, шар морь өдөр. Өдрийн наран 5 цаг 04 минутад мандан, 20 цаг 35 минутад жаргана.

Тухайн өдөр бар, нохой жилтнээ аливаа үйлийг хийхэд эерэг сайн ба гахай, хулгана жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр хууль цааз гаргах, батлах, хэрэглэх, хулгай дээрмийг номхотгох, гэмтнийг шийтгэх, мал адгуус номхруулах, лусыг тахих, тангарагаа буцаахад сайн. Гэр бүрэх, хэрүүл тэмцэл хийх, сэтгэлд сэвтэй газар очих, хүүхэд хөлд оруулахад муу. Өдрийн сайн цаг нь хулгана, үхэр, туулай, морь, бич, тахиа болой. Хол газар яваар одогсод баруун урагш мөрөө гаргавал зохистой. Үс шинээр үргээлгэх буюу засуулахад тохиромжгүй.

Боловсрол, соёл, шинжлэх ухаан, спортын сайд Ц.Цогзолмаа өчигдөр Австри Улсын Элчин зөвлөх, Австрийн соёлын форумын дарга Арнолд Обермаяарыг хүлээн авч уулзаж хоёр улсын соёл, боловсролын хамтын ажиллагааг цаашид хэрхэн өргөжүүлэх мөн УДБЭТ–ын тайз, тоног төхөөрөмжийг шинэчлэх асуудлаар санал солилцлоо.

Соёл урлаг тэр дундаа сонгодог урлагийн салбарт ойр нягт харилцаатай явж ирсэн Австри, Монголын харилцаа өргөжин тэлж буйд сэтгэл дүүрэн байгаагаа салбарын сайд Ц.Цогзолмаа онцлоод энэ удаад Элчин зөвлөхтэй биечлэн уулзаж соёл, урлагийн салбарын хамтын ажиллагааны асуудлуудаар санал солилцох завшаан тохиож байгаад баяртай байгаагаа илэрхийллээ.

Дэлхий дахинаа сонгодог урлаг, дуурийн урлагаар алдартай Австри Улстай Монгол Улс нь урлаг, соёл, боловсролын салбарт ойр нягт хамтран ажилласаар ирсэн. Тухайлбал, Австрийн соёлын өдрүүдийг жил бүр уламжлал болгон зохион байгуулдаг, урлаг хөгжмийн салбарт суралцдаг оюутнуудад түлхүү Засгийн газрын тэтгэлэг олгодог, түүнчлэн Богд хааны музей, Соёлын өвийн төв, УДБЭТ зэрэг соёл, урлагийн байгууллагуудтай өндөр түвшинд хамтран ажиллаж буйг Элчин зөвлөх Арнолд Обермаяар онцлоод тус улсын тэргүүлэх компаниудын нэг “Ваагнер Биро” компанийн Азийн борлуулалтын дарга Хесүс Изабелыг танилцууллаа.

160 гаруй жилийн түүхтэй “Ваагнер Биро” компани нь соёлын салбарт бүтээн байгуулалт хийдгээрээ улсдаа төдийгүй олон улсад тэргүүлдэг бөгөөд ОХУ, БНХАУ зэрэг олон орны соёлын объектууд ялангуяа театрын тайз, тоног төхөөрөмж, сэргээн засварын ажлуудыг хийж байжээ. Энэ удаад Австри Улсаас манай улсад үзүүлж буй хөнгөлөлттэй зээлийн хүрээнд УДБЭТ–ын тайз, тоног төхөөрөмжийг шинэчлэх ажлыг эрчимжүүлэх асуудлаар салбарын сайдтай санал солилцлоо.

Соёл, урлагийн бодлогыг дэмжих чиглэлээр ялангуяа түншлэгч байгууллагуудтай бодлогын түвшинд хамтарч ажиллан, үйл ажиллагааны хүрээг агуулгаар нь баяжуулах сонирхолтой байгаагаа Боловсрол, соёл, шинжлэх ухаан, спортын сайд Ц.Цогзолмаа хэлээд УДБЭТ–ын тайз, тоног төхөөрөмжийг шинэчлэх ажилд салбар яамны зүгээс дэмжлэг үзүүлж, эрчимжүүлэхэд анхаарахаа илэрхийллээ.

Нийслэлийн Засаг дарга бөгөөд Улаанбаатар хотын Захирагчийн А/739 дүгээр захирамжийн дагуу зориулалтын бус газарт автомашины худалдаа эрхэлж байгаа иргэн, аж ахуйн нэгжийг зохих хууль, журмын дагуу нүүлгэн шилжүүлэх үүрэг бүхий Ажлын хэсэг байгуулагдаад байгаа билээ. Ажлын хэсгийг Нийслэлийн Засаг даргын ахлах зөвлөх ахлан ажиллаж байгаа бөгөөд өнөөдөр энэхүү Ажлын хэсгийн ээлжит хуралдаан болж өнгөрлөө. Хурлын эхэнд өнгөрсөн хугацаанд авч хэрэгжүүлсэн ажлуудын үр дүнгийн талаар Нийслэлийн Газрын албанаас өгсөн мэдээллийг сонссон бөгөөд төлөвлөгөөний дагуу цаашид авч хэрэгжүүлэх ажлуудыг хэлэлцлээ.

Өнгөрсөн хугацаанд хийж гүйцэтгэсэн Нийслэлийн төвийн зургаан дүүргийн хэмжээнд ил задгай автомашины худалдаа эрхэлж буй иргэн, аж ахуйн нэгжүүдийн шинэчилсэн судалгааг танилцуулаад зөрчилтэй иргэд, аж ахуйн нэгжүүдэд газраа чөлөөлөх 3 ч удаагийн шаардлага хүргүүлээд байгаагаа мэдээлсэн юм. Газрын албаны сүүлийн судалгаагаар эзэмшил, өмчлөлд олгогдсон зориулалтын зохих, зөвшөөрөлгүйгээр дур мэдэн өөрчилж, ил задгай авто машины худалдаа эрхэлж байгаа нийт 41 иргэн, аж ахуйн зөрчил илэрсэн бөгөөд Нийслэлийн Газрын алба, Нийслэлийн Мэргэжлийн хяналтын газар хамтран эдгээр иргэн, аж ахуйн нэгжүүдэд зөрчил арилгах ажиллагаа хийгдэж байгаа юм байна.

Энэ хугацааанд эдгээр 41 иргэн, аж ахуйн нэгжүүдээс Газар эзэмших, өмчлөх эрхгүй 2 аж ахуйн нэгж, Газраа авто худалдааны бус зорилгоор эзэмшиж байгаа иргэн, хуулийн этгээд 17, хувийн зориулалтаар өмчилж байгаа 22, Газрын албаны шаардлагыг биелүүлж, сайн дураараа үйл ажиллагаагаа зогсоосон 7 иргэн, байгууллага байгааг ажлын хэсгийн хуралдаанаар мэдээллээ.

Энэхүү ажлын хэсэг байгуулагдсанаар нийслэлчүүдийн нэрлэж заншсан 1000 машины зогсоол, АСА циркийн талбайд үйл ажиллагаагаа явуулж байсан ил задгай авто машины худалдаа эрхлэгчдийг Авто худалдааны цогцолборт нүүлгэн шилжүүлээд байгаа ч зарим аж ахуйн нэгж, иргэд Газрын алба, Нийслэлийн Мэргэжлийн хяналтын газрын мэдэгдэл, шаардлагыг хүлээж авахгүй байгаа тохиолдлууд байсаар байгаа юм.

Иймд цаашид Нийслэлийн газрын албаны шаардлагыг удаа дараа биелүүлээгүй БЗД, 17-р хороо, иргэн М.Мөнхтөр, БЗД, 17-р хороо, иргэн Д.Наранчимэг, БЗД, 17-р хороо, иргэн Ч.Баянмөнх, БЗД, 17-р хороо, иргэн Ч.Ганбаатар, БЗД, 24-р хороо, иргэн З.Мөнхбат, БЗД, 17-р хороо, “Эс пи сервис” ХХК 1502 м2, БЗД, 17-р хороо, “Дөрвөн-Өлзий” ХХК зэрэг 10 гаруй иргэн, аж ахуйн нэгжийн газар эзэмших эрхийг цуцалж, албадан нүүлгэх арга хэмжээ авч хэрэгжүүлэхээр боллоо гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Эрүүл мэндийн яамнаас хөдөө орон нутгийн хүн амд үзүүлэх эрүүл мэндийн тусламж, үйлчилгээний хүртээмж, чанарыг дээшлүүлэхэд дэмжлэг үзүүлэх зорилгоор Өнөөдөр Өвөрхангай аймгийн Бат-Өлзий сумын ЭМТ, Баянхонгор аймгийн Баян-Овоо сумын ЭМТ, Сэлэнгэ аймгийн Мандал Сумын эмнэлэг түргэн тусламжийн автомашиныг Эрүүл мэндийн яамны төрийн нарийн бичгийн даргын албан үүргийг түр орлон гүйцэтгэгч Э.Содномжамжд аймаг орон нутгаас ирсэн төлөөлөгч нарт гардуулж, алтан шар зам өлзийтэй байхын хүсэн ерөөлөө.

1928 оны энэ өдөр Улсын Бага Хурлаас “Шүүн таслах тухай олон ардад тусламж үзүүлэх бүлгэмийн дүрэм”-ийг баталснаар Монгол Улсад бие даасан мэргэжлийн байгууллага байгуулах үндсийг тавьжээ.

Түүхэн 90 жилийн ой тэмдэглэх ажлын хүрээнд өнөөдөр “Өмгөөлөгчийн хараат бус байдал, өмгөөлөгчдийн өөрөө удирдах ёсны байгууллага” сэдэвт олон улсын олон практикийн бага хурал ГХЯ-ны “Зөвшилцөл” танхимд зохион байгууллаа. ХБНГУ, БНСУ, Япон Улсын ижил төстэй байгууллагаас төлөөлөгчид оролцон өөрийн орны холбооны үйл ажиллагаа, өмгөөлөгчийн эрх зүйн байдлыг хэрхэн хангаж байгаа талаар илтгэл тавьж хэлэлцүүлэв.

2013 онд батлагдсан Хуульчийн эрх зүйн байдлын тухай хуулийн төсөлд экспертээр ажиллаж байсан Германы хуульч Др. Маннсфелд өмгөөлөгчийн хараат бус, бие даасан байдлыг хангах чиглэлээр хийсэн харьцуулсан судалгаагаа танилцуулж, МӨХ-ны Удирдах зөвлөлийн гишүүн Др. Д.Батсүх хүний эрхийг дээдлэхэд баримтлах олон улсын хэм хэмжээтэй уялдуулан өмгөөлөгчийн эрх зүйн байдлын тухай хуулийн хэрэгцээ, шаардлагыг тайлбарлалаа.

“Засгийн газарт өргөн барьсан өмгөөлөгчийн эрх зүйн байдлын тухай хуулийн хэлэлцүүлэг олон нийтийн дунд өрнөж байгаа энэ цаг үед энэхүү хурлыг зохион байгуулж байгаа нь манай холбооны гишүүд нэгдмэл ойлголттой болоход чухал ач холбогдолтой юм” гэж МӨХ-ны ерөнхийлөгч С. Ганбаатар дүгнэв.
Өмгөөлөгчид 90 жилийнхээ ойн хүрээнд Сүхбаатарын талбайд эрх зүйн үнэ төлбөргүй туслалцаа үзүүлсэн бол маргааш хөл бөмбөгийн тэмцээн зохион байгуулж, аваргаа тодруулах юм байна