Month: May 2018

Хан-Уул дүүргийн Засаг даргын Тамгын газар, Боловсролын хэлтсээс өнгөрсөн хичээлийн жилд “Мэргэжил бүхэн сайхан” аяныг амжилттай зохион байгуулан ажилласан нь сургууль төгсөгчдөөс элсэлтийн ерөнхий шалгалтад гаргах амжилт дээшилж, суралцагчид мэргэжлээ хэрхэн сонгох, эцэг эх олон нийтийг мэдээ мэдээллээр хангасан үр дүнтэй ажил болсон билээ.

Ирээдүйн эзэд болсон хүүхэд багачуудыгаа мэргэжлээ зөв сонгоход туслах, тэдний эрүүл аюулгүй сурч хөгжих нөхцөлийг хангах, мансууруулах бодисын хорт нөлөөг таниулах, түүнээс урьдчилан сэргийлэх, эерэг хандлагатай иргэн болон төлөвшүүлэх, өөрөө өөртөө эзэн байх нөхцөл боломжийг бүрдүүлэх зорилгоор “MИНИЙ ИРЭЭДҮЙ- МИНИЙ ГАРТ” сарын аяны зорилго оршино.

Аяны нээлтийн үйл ажиллагаанд Хан-Уул дүүргийн удирдлагууд болон ХУД- сургуулийн захирал, цэцэрлэгийн эрхлэгч, багш, эцэг эх, сурагчдын 260 гаруй төлөөлөгч оролцлоо.

Дүүргийн Засаг дарга Ж.Алдаржавхлан Миний ирээдүй-Миний гарт аяны нээж үг хэлэхдээ Боловсролын салбарын хамт олон маань маш олон ажлуудыг санаачлан ажиллаж байгаа бөгөөд өнгөрсөн хичээлийн жилд зохион байгуулсан “Мэргэжил бүхэн сайхан” аян их үр дүнтэй болж, хүүхэд багачууд мэргэжлээ сонгохдоо гэр бүл, хамт олонтойгоо олон талаас нь ярилцаж, судалдаг, зохих мэдээ мэдээллээр хангагдаж байна. Мэргэжлээ зөвхөн сонгоод сургуульд элсэн суралцах биш, түүнийхээ төлөө тууштай байж илүү ихийг сурч боловсордог, хичээдэг, үр дүнтэй ажиллаж жинхэнэ эзэн нь байх учиртай гэж тодотгов.

Нээлтийн үйл ажиллагаан дээр Оюуны чадвар төвийн захирал н.Мөнгөн, Карьер хөгжлийн төвийн карьер зөвлөх Ц.Булган, Нэгүүндрийлинг Ёлууд багийн ахлагч Спортын дэд мастер, Мастер Класс ХХК-ийн захирал И.Мишээл нар сонирхолтой лекц уншлаа.

Аяны хугацаанд сургууль, цэцэрлэгийн хүүхдүүдэд сургалт, үзүүлэх ажил, зохион байгуулагдах бөгөөд үйлдвэр аж ахуйн нэгж байгууллагуудтай танилцах аялал, замын хөдөлгөөний аюулгүй байдлыг хангах, мансууруулах бодисын хор нөлөө түүнээс урьдчилан сэргийлэх зэрэг ажлуудыг үе шаттайгаар зохион байгуулна. Мөн анги дэвших болон сургууль төгсөх шалгалт, элсэлтийн ерөнхий шалгалтад бэлтгэх, амжилт гаргах нөхцөл боломжийг бүрдүүлэн түүнд чиглэсэн ажлуудыг сургууль бүр зохион байгуулан ажиллахаар төлөвлөөд байна гэж Хан-Уул дүүргийн ЗДТГ-аас мэдээллээ.

НӨАТ-ын тайлан хүлээн авах хугацаа дуусахад зургаан хоног үлдлээ. Тодруулбал, татвар төлөгч IV сарын НӨАТ-ын тайлангаа тавдугаар сарын 10-ны дотор тайлагнаж, татварын тооцоогоо хийх ёстой.

Татвар төлөгч та тайлангаа хэзээ, хэрхэн ирүүлэх талаар мэдээллийг хүргэе.

• Та тайлангаа өөрийн биеэр болон цахим хэлбэрээр, мөн шуудангаар ирүүлж болно.
• Та татварын тайланг хуулиар тогтоосон хугацаанд гаргаж татварын албанд ирүүлнэ. Жишээлбэл: Аж ахуйн нэгжийн орлогын албан татварын улирлын тайланг улирлын дараа сарын 20-ны дотор, тухайн жилийн эцсийн тайланг дараа жилийн 2 дугаар сарын 10-ны дотор, НӨАТ-ын тайланг дараа сарын 10-ны дотор, онцгой албан татварын тайланг дараа сарын 5-ны дотор татварын албанд тушааж, татварын тооцоо хийнэ.
• Татвар төлөх, тайлагнах эцсийн хугацаа адил байдаг. Энэ нь тайлан хүргүүлэхдээ татвараа төлсөн байх ёстой гэсэн үг.
• Татвар тайлагнах хугацаа долоо хоног бүрийн амралт, нийтээр амрах баярын өдөртэй давхацвал түүний өмнөх ажлын өдөр татварын тайлангаа ирүүлнэ.
• Та татварын хуулийн дагуу татварын хөнгөлөлт, чөлөөлөлтөнд хамрагдах бол тайлан тушаах үүргээс чөлөөлөгдөхгүй бөгөөд уг тайлан нь татварын хөнгөлөлт, чөлөөлөлтөнд хамруулах үндсэн баримт болно. Энэ нөхцөлд та тайлангаа тайлбарын хамт өөрийн биеэр татварын албанд ирүүлэх ёстой гэдгийг анхаарна уу.
• Та татварын албанд ирүүлсэн тайлангаа тайлагнах эцсийн хугацаа хүртэл засварлах эрхтэй ба засварлах тухай хүсэлтээ бичгээр илэрхийлэх ёстой.
• Татварын алба тайлан хүлээн авсан хугацааг татвар төлөгч өөрийн биеэр ирүүлсэн тайлангийн хувьд уг тайланг татварын албанд хүлээн авч баталгаажуулсан өдрөөр, шуудангаар ирүүлсэн тайлангийн хувьд илгээсэн өдрөөр, интернетээр ирүүлсэн бол цахим мэдээллийн системд илгээсэн өдрөөр тооцох аж.

Монгол Улсын Ерөнхийлөгч Х.Баттулгын Монгол бичгийн хэрэглээг нэмэгдүүлэх ажлыг эрчимжүүлэх тухай зарлигийг гардууллаа

Монгол Улсын Ерөнхийлөгч Х.Баттулга Үндэсний бичиг үсгийн баярыг тохиолдуулан 2018 оны тавдугаар сарын 3-ны өдөр Монгол бичгийн хэрэглээг нэмэгдүүлэх ажлыг эрчимжүүлэх тухай зарлиг гаргасан юм.

Зарлигийг өнөөдөр Монгол Улсын Ерөнхийлөгчийн Тамгын газрын дарга З.Энхболд Боловсрол, соёл, шинжлэх ухаан, спортын сайд Ц.Цогзолмаа, Боловсрол, соёл, шинжлэх ухаан, спортын яамны Төрийн нарийн бичгийн дарга Л.Цэдэвсүрэн, Монгол Улсын Шадар сайдын Стандартчиллын асуудал хариуцсан зөвлөх С.Янжинсүрэн, Улаанбаатар хотын ерөнхий менежер бөгөөд Захирагчийн ажлын албаны дарга Т.Гантөмөр зэрэг холбогдох байгууллагын төлөөллүүдэд гардуулав.

Монгол Улсын Ерөнхийлөгчийн зарлигийг гардуулсны дараа Монгол Улсын Ерөнхийлөгчийн Тамгын газрын дарга З.Энхболд:

“Та бүхэнд Үндэсний бичиг үсгийн баярын мэндийг дэвшүүлье. Монгол Улсын Ерөнхийлөгчийн зарлигаар 2004 онд Чингис хааны иггээсэн Монгол төрийн бичиг хэрэглэсний 800 жилийн ойг тэмдэглэж эхэлснээс хойш Монгол Улс 15 дахь жилдээ Үндэсний бичиг үсгийн баярыг жил бүрийн тавдугаар сарын эхний Ням гарагт тэмдэглэж байна.

Үндэсний бичиг үсгийн баярыг тохиолдуулан Монгол Улсын Ерөнхийлөгч Х.Баттулга 2018 оны 5 дугаар сарын 03-ны өдөр “Монгол бичгийн хэрэглээг нэмэгдүүлэх ажлыг эрчимжүүлэх тухай” 46 дугаар зарлиг гаргасныг зарим байгууллагад гардуулан өглөө. Зарлигаар холбогдох байгууллагуудад үүрэг чиглэл өгч,

Монгол Улсын Үндэсний аюулгүй байдлын үзэл баримтлалын 1.1.6-д “Үндэсний түүх, хэл, соёл, өв уламжлал, зан заншлаа хадгалж, хамгаалж хөгжүүлэх нь монгол үндэстний оршин тогтнохын үндэс, амин чухал дархлаа мөн” хэмээн заасан байдаг. Монгол хэл бол монгол хүний оюун сэтгэлгээг бүрэлдүүлж, монгол соёл, монгол хүнийг бүтээдэг билээ. Монгол Улсын Ерөнхийлөгч Х.Батттулга мөрийн хөтөлбөртөө “Даяаршил, технологийн хурдацтай хөгжлийн эрин үед үндэснийхээ түүхэн уламжлал, хэл, соёлын дархлааг хамгаалах” заалт тусгаснаа ард түмний хөдөлгөөн өрнүүлэх замаар хэрэгжүүлэхээр Эх хэлний өдрийг 9 дүгээр сарын 1-ний эрдмийн баярын өдөр байхаар зарлиг гаргалаа. Эрдэм мэдлэг хийгээд монгол хүн байхын үндэс нь эх монгол хэл юм.

Монгол Улсын Их Хурлаас 2015 онд Монгол хэлний тухай хуулийг баталсан. Монгол хэл нь улс орны нэгдмэл байдлын баталгаа болдог учир хуульд Монголын ард түмний эв нэгдлийг илэрхийлэгч Монгол Улсын Ерөнхийлөгчийн дэргэд Хэлний бодлогын үндэсний зөвлөл байгуулахаар заасныг хэрэгжүүлэн ажиллаж байгаа.

Зарлигаар “Эх хэлний өдөр”-ийг угтаж, хэвлэл мэдээллийн байгууллагууд эх хэлээ сурталчлах, түүгээр бахархах, олон нийтэд түгээн дэлгэрүүлэхэд санаачилгатай ажиллахыг уриалсан байгаа. Манай хэвлэл мэдээллийнхэн соргогоор хүлээн авч ажиллана гэдэгт итгэлтэй байна.

Бүх шатны боловсролын байгууллагууд Эх хэлний өдөр буюу жил бүрийн 9 дүгээр сарын 1-нд Монголын ирээдүй хүүхэд залуусыг монгол хүн байлгах үндэсний дархлааг бэхжүүлэн, монгол хэл, монгол уран зохиол, Монголын түүхийн хичээлээр хичээлийн шинэ жилийг эхлүүлж байхаар заасныг холбогдох байгууллагууд өөрсдийн үйл ажиллагааны чиг үүргийн хүрээнд хариуцлагатайгаар биелүүлэн ажиллахыг Та бүхнээр төлөөлүүлэн хүсье.

Монгол хэл бичиг, түүх соёл улам дэлгэрэн батжиж, мөнх орших болтугай” гэв.

Монгол Улсын Ерөнхийлөгч Х.Баттулгын Монгол бичгийн хэрэглээг нэмэгдүүлэх ажлыг эрчимжүүлэх тухай зарлиг:

Монгол бичиг бол монгол үндэстний оюуны соёлын үнэтэй бөгөөд бахархалт өв, монгол хэл, сэтгэлгээ, соёл иргэншлийн аюулгүй байдлыг хадгалан батжуулагч мөн гэж үзэж; Монгол Улсын иргэний үндэсний бичгээ сурч судлах, өвлөх, өвлүүлэх, эзэмших, хэрэглэх, хамгаалах, хөгжүүлэх хуулиар олгогдсон эрх, боломж, нөхцөлийг хангах төрийн үүргийг биелүүлэх, Монгол хэлний тухай хуулийг хэрэгжүүлэх үүднээс; 2025 оноос төрийн болон орон нутгийн өөрөө удирдах байгууллага албан бичгээ кирил болон үндэсний хос бичгээр хөтлөн явуулах бэлтгэлийг хангахыг удирдлага болгон, монгол бичгийн хэрэглээг нэмэгдүүлэх ажлыг эрчимжүүлэх зорилгоор,

Монгол Улсын Үндсэн хуулийн гучин дөрөвдүгээр зүйлийн 1, Монгол Улсын Ерөнхийлөгчийн тухай хуулийн 9 дүгээр зүйлийн 1 дэх хэсэг, Монгол Улсын Үндэсний аюулгүй байдлын үзэл баримтлалын 1.1.6, 3.1.4.2, Монгол хэлний тухай хуулийн 9 дүгээр зүйлийн 9.1.3 дахь заалтыг тус тус үндэслэн ЗАРЛИГ БОЛГОХ нь:

1. Монгол бичгийн цахим кодыг хэрэглэх үндэсний стандартыг холбогдох мэргэжилтнүүдийн саналыг тусган шуурхай боловсруулж, хуульд заасны дагуу батлуулах, цаашид хөгжүүлэн тогтвортой байдлыг хангаж, цахим орчинд үндэсний бичгийн хэрэглээг нэмэгдүүлэх талаар бодлого, төлөвлөгөө гарган ажиллахыг Мэдээлэл, харилцаа холбооны асуудал эрхэлсэн төрийн захиргааны байгууллага болон Монгол хэлний тухай хуулиар үүрэг хүлээсэн эрх бүхий судалгааны байгууллагад; үндэсний стандартыг боловсруулах ажилд хяналт тавьж, боловсруулсан стандартыг судалж батлах, олон улсын байгууллагуудтай хамтран ажиллаж, монгол бичгийн цахим кодчиллын олон улсын стандартад үндэсний стандартыг хэлэлцүүлэх, батлуулах ажлыг зохион байгуулахыг Стандартчилал, тохирлын үнэлгээний асуудал эрхэлсэн төрийн захиргааны байгууллага болон Монгол Улсын Шадар сайдад чиглэл болгосугай.
2. Монгол бичгийн дунд болон урт хугацааны үндэсний хөтөлбөрийг боловсруулан баталж, 2018 онд багтаан хэрэгжүүлж эхлэх; бүх шатны боловсролын сургалтын байгууллагын суралцагч хичээлийн хөтөлбөрөөр монгол хэл, бичгийн хичээлийг судлахдаа цахим орчинд монгол бичгийг ашиглах, бичвэр боловсруулах бүрэн чадамжтай болж төгсдөг байх; монгол бичгийн хичээлээр улсын төрөлжсөн олимпиадыг зохион байгуулж хэвших; элсэлтийн ерөнхий шалгалт өгөх иргэнээс заавал авах монгол хэл, бичгийн шалгалтад босго оноо тогтоох; монгол хэл, бичгийн хичээлийг үр бүтээлтэй заан сургаж, амжилт гаргаж буй багш нарыг урамшуулж ажиллахыг Боловсролын асуудал эрхэлсэн төрийн захиргааны төв байгууллагад үүрэг болгосугай.
3. Албан байгууллага, аж ахуйн нэгж, барилга байгууламж, гудамж, талбайн нэр хаяг, бүтээгдэхүүний шошго, бэлгэ тэмдэг, зар сурталчилгаа зэргийг үндэсний бичгээр бичиж хэвшүүлэх ажлыг зохион байгуулах; үндэсний бичгийн хэрэглээг нэмэгдүүлж, түгээн дэлгэрүүлэхэд чиглэсэн уг үйл ажиллагаа, аливаа идэвх санаачилгыг хөхиүлэн дэмжиж, урамшуулж ажиллахыг бүх шатны Засаг дарга нар, холбогдох төрийн байгууллагуудад чиглэл болгосугай.
4. Энэхүү зарлигт дурдсан ажлуудад болон монгол хэл, бичиг үсгээ сурч судлах, өвлөх, өвлүүлэх, эзэмших, хэрэглэх, хамгаалах, хөгжүүлэх талаар идэвх санаачилга гарган ажиллахыг иргэд олон нийт, эрдэмтэн судлаачид, шинжлэх ухааны ба хэвлэл мэдээллийн байгууллага, төрийн ба төрийн бус байгууллагуудад уриалсугай

Улаанбаатар Хотын Банк, Метатек компани хамтран “ГЭРЭГЭ” цахим төлбөрийн машиныг анх удаа хэрэглээнд нэвтрүүлж, өнөөдөр нийслэлийн Үйлчилгээний нэгдсэн төвийн Дүнжингарав салбарт нээлтээ хийлээ. Нээлтэд нийслэлийн Мэдээллийн технологийн газрын дарга О.Чинзориг, нийслэлийн Татварын газрын дарга Д.Мөнх-Учрал зэрэг албаны төлөөллүүд оролцлоо. Эхний ээлжинд Тээврийн Хэрэгслийн татвар болон Торгуулийг төлөх боломжтой болж байгаа юм. Цаашдаа 30 гаруй төрийн үйлчилгээг үзүүлэхээр зорин ажиллаж байгаа юм байна.

Та тээврийн хэрэгслийн татвар, торгуулиа төлсөн бол баримтаа уг төлбөрийн машинаас аваад ашиглах бүрэн боломжтой. Энэхүү баримт нь QR кодтой тул банкны баримттай адил хүчин төгөлдөр. Түүнчлэн татварын байцаагч дээр олон дахин очих шаардлагагүй болж байгаа юм.

Нийслэлийн Мэдээллийн технологийн газрын дарга О.Чинзориг “Өнөөдөр төрийн цахим үйлчилгээнд нэг суваг нэмэгдэж байна. Гэрэгэ киоскоор иргэд төрийн зарим үйлчилгээг цаг алдалгүй түргэн шуурхай авах боломжтой болж байна гэсэн үг. Эхний ээлжинд авто тээврийн татвар, хураамж, торгууль төлж байна. Удахгүй үзвэр үйлчилгээ болон хот хоорондын тээврийн зорчих тасалбар зэргийг авах боломжтой болно. Цаашдаа бид бүх хороодод энэхүү киоскийг байршуулна. Эхний ээлжинд 2019 он гэхэд 20 хороонд байршуулахаар зорин ажиллаж байна” хэмээн ярилаа.

Улаанбаатар Хотын банк, Метатек компанийн хамтын ажиллагааны хүрээнд нэвтрүүлж буй энэхүү төлбөрийн машины талаар иргэд ам сайтай байна. Өнөөдрийн байдлаар нийслэлийн Үйлчилгээний нэгдсэн төвийн дөрвөн салбар, Авто тээврийн үндэсний төвийн салбарууд, Дүүргийн татварын хэлтэс, дүүргийн нэг цонхны үйлчилгээний байруудад байршуулсан байна.

Удахгүй уг төлбөрийн машинаар дамжуулан орон нутгийн автобус болон галт тэрэгний тасалбар болон үзвэр үйлчилгээний тасалбар худалдан авах гэх мэтээр олон төрлийн үйлчилгээнүүдийг нэмэх юм.Төлбөрийн машинд аль ч банкны картаа уншуулж, тээврийн хэрэгслийн татвар, торгуулиа төлөх боломжтой юм. Ингэхдээ тээврийн хэрэгслийн улсын дугаар, эсвэл өөрийн регистрийн дугаараа оруулаад л төлбөрөө сонгон хоромхон хугацаанд төлөх юм гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээлэв.

БОАЖ-ын сайд Н.Цэрэнбат хог, хаягдал дахин боловсруулагчдыг дэмжих уриалгыг шил, хуванцар ашиглагч аж ахуйн нэгжүүдэд хандан гаргасан байна. Тэрбээр уриалгадаа “Байгаль орчин, аялал жуулчлалын яамнаас Эко төлбөрийн тухай хуулийн төсөл боловсруулж байгаатай холбогдуулан шил болон хуванцар ашиглагч аж ахуйн нэгжүүдэд дараах уриалгыг хүргүүлж байна.Манай улс жилд дунджаар 3,5 сая кг хуванцар, 44 сая ширхэг шилэн лонх болон тэдгээртэй ижил төрлийн бүтээгдэхүүн импортолдог гэсэн ГЕГ-ын мэдээлэл байна. Харин жилд дунджаар 1.2 сая тонн хуванцар, 382 мянган тонн шил, шилэн бүтээгдэхүүнээс үүссэн хог хаягдал ялгарч байна. Энэ тоо жил ирэх бүр өсөх хандлагатай байгаа учир хог хаягдал дахин боловсруулагч аж ахуйн нэгжүүдэд дэмжлэг үзүүлэх, дахин боловсруулсан хог хаягдал ашиглагч аж ахуйн нэгжүүдийг урамшуулах зорилгоор дээрх хуулийн төслийг боловсруулж байгаа юм.Тиймээс та бүхнийг хог хаягдалгүй эх дэлхийгээ гэсэн зарчмыг баримтлан дотооддоо дахин боловсруулсан хог хаягдлаар хийсэн бүтээгдэхүүн хэрэглэх, хүнсний бус зориулалтын хуванцраас татгалзах, шилэн сав баглааг дахин ашиглахыг уриалж байна.Нийгмийн хариуцлагаа ухамсарлаж, хог хаягдалгүй эх дэлхийны ирээдүйг хамтдаа цогцлоохын төлөө “ХАНДЛАГАА ӨӨРЧИЛЬЕ” хэмээжээ.

Зайсангийн аманд байрлах, Бурхантай хөшөөний ард зөвшөөрөлгүй барьсан таван давхар барилгын карказыг өчигдрөөс буулгаж эхэллээ.