Month: May 2018

Өнөөдөр болох ОХУ-ын ерөнхийлөгчийн тангараг өргөх ёслол хэрхэн явагдах талаархи дэлгэрэнгүй мэдээллийг тус улсын ерөнхийлөгчийн хэвлэлийн албаны дарга Дмитрий Песков өгчээ.

Д.Песковын мэдэгдсэнээр, ёслолын эхэнд ерөнхийлөгч В.Путин Кремлийн их ордонд очиж, Георгийн болон Александрын танхимаар дамжин Андрейн танхимд тангараг өргөх бөгөөд хожим нь Сүмийн талбайд болох Кремлийн торгон цэргийн хорооны жагсаалыг үзэж сонирхох юм байна. Дараа нь уламжлал ёсоор Благовещенскийн сүмд шашны ёслолд оролцоно.

Тангараг өргөх ёслолд ерөнхийлөгчийн итгэмжлэгдсэн хүмүүс болон ерөнхийлөгчийн ажил хэрэг, түүний сонгуулийн кампанит ажилд тусалсан янз бүрийн хөдөлгөөн, байгууллагын төлөөлөгчдийг урьжээ.

В.Путин гуравдугаар сард болсон сонгуульд 76 хувийн саналаар ялсан билээ. Үндсэн хуулийн дагуу өнөөдөр тангараг өргөсний дараа тэрбээр төрийн тэргүүний албан тушаалыг 6 жил буюу 2024 он хүртэл хаших эрхтэй болох юм.

ОБЕГ-ын харъяа “Аврагч” биеийн тамир, техник спортын хорооноос төв, орон нутгийн Онцгой байдлын газар, хэлтэс, анги байгууллагын алба хаагчдийн дунд зохион байгуулж буй спортын аварга шалгаруулах тэмцээн энэ сарын 18-19-ний өдрүүдэд Дорнод аймагт болно.

Тус тэмцээнд нийт 15 багийн 300 орчим тамирчин хурд хүч, авхаалж самбаагаа сорин өрсөлдөнө.

Мөн энэ үеэр Дорнод аймгийн Онцгой байдлын газраас санаачлан байгуулж байгаа “Аврагчийн гараас-Амьдрал цэцэглэнэ” хөшөөт цогцолборын нээлт болох юм.

Албан үүргээ гүйцэтгэж аваад амь үрэгдсэн баатруудынхаа гэгээн дурсгалыг хүндэтгэж, үе үеийн аврагч, гал сөнөөгчдийг алдаршуулах, баатарлаг үйлсийг нь ард иргэдэд сурталчлах, шинэ үеийн залууст эх оронч үзлийг төлөвшүүлэх зорилгоор бүтээж буй тус хөшөө Дорнод аймгийн төв Хэрлэн сумын “Найрамдал” цэцэрлэгт хүрээлэнд сүндэрлэнэ.

Түүнчлэн хөшөөг босгох хандивын аян үргэлжилж байгаа бөгөөд та сэтгэлийн хандиваа өргөх бол Хаан банкны 5422227096 тоот дансанд хандивыг хүлээж авч байна хэмээн Дорнод аймгийн Онцгой байдлын газраас мэдээллээ.

2018 оны зуны гэрэлт гудамжийн нээлт тавдугаар сарын 11-нд болохоор төлөвлөгджээ.

Нийслэлийн Засаг дарга бөгөөд Улаанбаатар хотын захирагчийн 2017-2020 онд хэрэгжүүлэх үйл ажиллагааны хөтөлбөрт Улаанбаатар хотыг Зүүн хойд Азийн аялал жуулчлал, бизнесийн төв болгох зорилтыг тусгасан.

Энэхүү зорилтын хүрээнд Сөүлийн гудамжийг автомашингүй, шөнийн гэрэлт гудамж болгон тохижуулсан билээ.

Тодруулбал, циркийн уулзвараас “Наран плаза”-гийн уулзвар хүртэлх талбайг хатуу хучилттай болгож явган замыг нэмэгдүүлэн, олон нийтэд зориулсан үзвэрийн дэлгэц, 400 хүний амралтын суудал бий болгосон юм. Мөн ногоон байгууламжийн нөхөн сэргээлт, сэлгэлт, авто зам болон явган замын гэрэлтүүлэг, гэрлэн чимэглэл зэрэг орчны тохижилтын ажлыг хийсэн байна.

Нийслэлийн Засаг дарга бөгөөд Улаанбаатар хотын Захирагчийн нэрэмжит оюутны тэтгэлэгт хөтөлбөр зарлагдлаа. Уг тэтгэлгэг нь мэдлэг боловсрол, бүтээлч чанар, шинэ санаа, нийгмийн идэвх, авьяас, ур чадварыг хөгжүүлэх, урамшуулан дэмжих зорилгоор дотоодын их, дээд сургуулиудад амжилттай суралцаж буй бакалаврын хөтөлбөрийн өдрийн ангийн оюутнуудыг дэмжих зорилготой юм. Бүтэн жилийн турш хэрэгжих уг хөтөлбөрийн онцлог нь тэтгэлгээс гадна хувь хүний хөгжлийн сургалтад хамрагдаж, сурсан мэдлэгээ бусадтай хуваалцах, дадлага хийх, хүүхэдтэй ажиллах боломжтой.

Тэтгэлэгт хөтөлбөрт

• Нийгмийн ажилтны чиглэлээр магадлан итгэмжлэгдсэн их дээд сургуульд 3.2 ба түүнээс дээш голчтой бакалаврын өдрийн ангийн оюутан байх,

• Төрийн сангийн зээл болон бусад ямар нэгэн тэтгэлэгт хамрагдаагvй байх,
• Аливаа хэрэг зөрчилд холбогдож байгаагүй байх,

• Оюутан залуучуудын дунд зохиогддог нийгмийн аливаа үйл ажиллагаанд манлайлан оролцдог байх,

• Хүүхдийн зусланд ажиллах, өөрийгөө нээн хөгжүүлэх, сурч мэдэх хүсэл эрмэлзэлтэй байх шаардлага хангасан тохиолдолд хамрагдана.

Хөтөлбөрийн хүрээнд хувь хүний хөгжлийн сургалтуудад хамрагдаж, ур чадвараа дээшлүүлэх, хүүхдийн зусланд багшаар ажиллаж багаар ажиллах чадвар, сурсан мэдсэнээ хэрэгжүүлэх ажлын туршлагатай болох, “Улаанбаатар хотын хэмжээнд хүүхдийн зуслангийн хөгжлийн хөтөлбөрийн үр дүнг тодорхойлох” судалгаанд хамтран ажиллах юм.

Шалгаруулалт:

1. Нэг жилд нийт 15 хүртэлх оюутанд тэтгэлэг олгох бөгөөд нэг оюутанд олгох тэтгэлгийн хэмжээ 2,000,000 төгрөг байна. (1,500,000 нь мөнгөн дүнгээр сар бүр олгогдох, 500,000 төгрөг нь сургалт хэлбэрээр олгогдоно)
2. Эхний шатны шалгаруулалт: НХГБХГазрын байранд зохион байгуулах бөгөөд оюутны бүрдүүлсэн материал, тавигдах шаардлага, хүсэлт, эссэг харгалзан үзнэ.
3. Хоёр дугаар шатны шалгаруулалт: Эхний шатанд тэнцсэн 30 оюутантай ярилцлага хийж 15 хүртэлх оюутанг шалгаруулна.

Бүртгэл 2018 оны тавдугаар сарын 8-15 хооронд нийслэлийн хүүхэд, Гэр бүлийн хөгжлийн газарт бүртгэнэ гэж нийслэлийн хүүхэд, Гэр бүлийн хөгжлийн газраас мэдээллээ.

Нийслэлийн удирдах ажилтны ээлжит шуурхай зөвлөгөөн өнөөдөр боллоо. Хуралдаанаар Налайх дүүргийн Засаг дарга Ч.Раднаабазар мэдээлэл хийсэн.

Налайх дүүрэг 10547 өрхийн 37 мянган хүн амтай. Хүн амын дийлэнх хувийг хөдөлмөрийн насныхан болон хүүхэд, залуучууд эзэлдэг. Эдийн засгийн бие даасан байдлыг бий болгох, дэвшилтэт технологи бүхий үйлдвэрлэл, технологийн паркийг ажиллагаанд оруулснаар 120 га газарт 1500 гаруй ажлын байр шинээр бий болж, улсын хэмжээний барилгын материал үйлдвэрлэл 2 дахин, Налайх дүүргийн үйлдвэрлэлийн хэмжээ 32 дахин нэмэгдэж, барилгын өртөг буурч, Налайх дүүрэг хот болон хөгжих эдийн засгийн үндэс суурь бий болно гэдгийг тус дүүргийн Засаг дарга Ч.Раднаабазар онцоллоо.

Тэрбээр үргэлжлүүлэн “40 шахам мянган иргэдээ төлөөлж нэн тэргүүнд тулгамдаж байгаа хэд хэдэн асуудлыг хэлье. Налайх дүүрэгт дулаан хангамжийн асуудал хамгийн тулгамдсан асуудал болоод байгаа. Налайхын Дулааны станц ашиглалтад орсон цагаасаа хойш засвар хийгдээгүй, хүчин чадлаа дийлэхээ больж, өвлийн цагт дүүргийн маань иргэд хөлдүү байранд амьдарч байна. Дулааны станц 3.4 км дулаан дамжуулах төв шугамаар хэрэглэгчдэд дулааны эрчим хүчийг түгээж байгаа хэдий ч төв шугамын нэвтрүүлэх чадвар муудаж байгаагаас дулаан түгээлт хүрэлцэхгүй, мөн өвлийн оргил ачааллын үед зуух хүчин чадлаараа буюу бэлтгэл зуухгүйгээр галлагаа хийж 2016, 2017 оны өвлийг давсан. Цаашид өсөн нэмэгдэх хэрэгцээг нэмж холбох ямар ч боломжгүй дөнгөж л гал залгуулж байна. Бид Дулааны станцын хүчин чадлыг нэмэгдүүлэх өргөтгөлийн зураг төсвийн ажлыг хийлгэж байна.

Түүнээс гадна ирэх өвөл хаяанд ирэхэд иргэд маань өнөөх л янзаараа хөлдүү байранд хөдсөн дээлээ нөмөрч өвөлжих асуудал дахин угтана. Ийм байдал гаргахгүйн тулд нэн тулгамдсан асуудал болох орон сууцны байрны 1300 м гадна шугам сүлжээний хөрөнгийн асуудлыг шийдвэрлүүлэх хүсэлтийг НИТХ-ын дарга, Засаг дарга болон Улаанбаатар хотын Захирагчийн ажлын алба, холбогдох хэлтсүүдэд, мөн өвөлжилтийн бэлтгэл ажлын комисст удаа дараа уламжилсан. Дүүргийн 2 дугаар хорооны орон сууцны 48-67 дугаар байранд 609 өрхийн 3045 хүн ам амьдардаг. Эдгээр байрны гадна сүлжээ нь 1985 онд ашиглалтад орсноос хойш 33 жил засвар үйлчилгээ хийгдээгүй. Хэрэгцээний халуун усны шугам нь 1990 онд хөлдөж ашиглалтгүй болсноос айлууд их хэмжээний ус гоожуулан халуун хэрэглэж ирсэн. Гадна шугамууд нь хуучирч муудан, нэвтрүүлэх чадваргүй болсноос бөглөрсөн, мөн 14 хэсэгт цооролт үүссэн. Уг цооролт үүссэн хэсгүүд нь гагнуур авах боломжгүй, их хэмжээний зэвэнд идэгдсэн байдгийг мэргэжлийн хүмүүс тогтоосон.

Дараагийн тулгамдаж байгаа асуудал бол орон сууцны дахин төлөвлөлт юм. Дүүргийн хэмжээнд инженерийн хийцтэй 101 барилга байгууламж байна. 1956-1957 онд ашиглалтад орсон төмөр бетон суурьтай, тоосгон өрөгт, модон дам нуруу, хучилттай 2 давхар барилга 32 байна. Энэ барилгуудыг Нийслэлийн Мэргэжлийн хяналтын газрын даргын 2014 оны долоодугаар сарын 10-ны өдрийн 01-01/05 дугаартай шийдвэрээр байнгын ашиглалтыг хориглосон байдаг. Юу юугүй нурах дөхсөн эдгээр байранд одоо ч олон иргэд аж төрж амьдарч байгаа нь үнэхээр санаа зовоосон асуудал юм” гэв.

Мөн 2017 онд хийж хэрэгжүүлсэн ажлын товч танилцуулга бүхий видео тайлангаа удирдах ажилтнуудад үзүүлсний зэрэгцээ хотын удирдлагуудад зураг төсөв бэлэн, хөрөнгө санхүү дутагдалтай байгаа болон тулгамдаж байгаа асуудлуудаа танилцууллаа гэж Налайх дүүргийн ЗДТГ-аас мэдээллээ.

“2018-2019 оны хичээлийн жилийн цэцэрлэгийн бүртгэл өнгөрсөн жилийнхтэй адил цахимаар явагдана. Бүртгэлийн хугацаа наймдугаар сард тодорхой болно.

Мөн нэгдүгээр ангид орох багачуудын хамран сургах тойрог энэ сарын 15-н гэхэд тодорхой болно” гэв.

Өнгөрсөн жил хоёр настай хүүхдүүдийг цахимаар, 3-5 насны улсын цэцэрлэгт шинээр элсэж буй хүүхдүүдийг уламжлалт аргаар бүртгэж байсан билээ.

УУХҮ-ийн сайд Д.Сумъяабазарын зүүн аймгуудад хий буй айлчлал “Адуунчулуун”-ы уурхайгаас үргэлжилсэн юм. “Дорнод бүсийн эрчим хүчний систем” ХК-ийг 63 жилийн турш эрчим хүчний нүүрсээр тасралтгүй хангаж байгаа “Адуунчулуун”-ы нүүрсний уурхай дээр очлоо. Уурхай нээгдсэн цагаасаа ил болон далд аргаар олборлолт явуулж, 28.4 сая шоо метр хөрс хуулж, 14.9 сая тонн нүүрс олборложээ. “ДБЭХС” ХК-аас гадна аймгийнхаа аж ахуй нэгж байгууллага, айл өрхүүдийг нүүрсээр хангадаг байна. 2017 оны байдлаар нүүрсний уурхайгаас улсын төсөвт тэрбум 157 сая төгрөгийг төвлөрүүлжээ.

1999 онд хувьчлагдсан “Адуунчулуун”-ны уурхайн хувьд өнөөдөр лицензийн маргаантай байдал томоохон асуудал болоод байгааг сайд Д.Сумъяабазарт дуулгав. Тодруулбал, “Адуунчулуун” ХК-ийн эзэмшлийн 029А лицензтэй 400 га талбайгаас 2009 онд 134 га газрыг МАК ХХК-д давхцуулан олгожээ. МАК ХК-ийн хувьд Дорнод аймгийн Хэрлэн сумын нутагт 5104.3 га газрыг хамарсан хоёр лицезийг эзэмшиж, уг талбай дээрээ одоогоор хөрс хуулалтын ажлыг явуулж байна. “Адуунчулуун” ХК лицензын маргаанаас болж давхардсан газартаа олборлолт явуулах боломжгүй болжээ. Хэрвээ асуудлаа шийдвэрлэж чадвал дахиад 30-40 жил үйл ажиллагаа явуулах боломж бүрдэнэ. Учир нь уг давхардсан лицензтэй талбайг 40-50 сая тонн нүүрсний нөөцтэй хэмээн таамаглажээ.

“Адуунчулуун”-ны нүүрсний уурхайн гүйцэтгэх захирал ““Адуунчулуун”-ы нүүрсний уурхай олборлолт явуулах талбайгүй болж, Дорнодын цахилгаан станц нүүрсний нөөцгүй болох, цаашлаад эрчим хүчний хязгаарлалт хийх хүнд байдалд орсон. Хүнд байдалд орсон үед уурхайн үйл ажиллагаа, уулын техник технологитой газар дээр нь салбарын сайдыг өргөн бүрэлдэхүүнтэй ирж танилцаж байгаад талархаж байна” гэв. Иймд Ашигт малтмал газрын тосны газраас Ашигт малтмалын тухай хуулийн 62.4, 62.5, 62.6 дахь заалтаар зохих шийдвэрээ хугацаа алдалгүй гаргахыг компанийн удирдлагуудаас хүслээ.

Сайд Д.Сумъяабазар “Адуунчулуун” ХК-ийн удирдлагуудыг лицензийн асуудалтай холбоотой хүсэлт, бичиг баримтуудаа яаралтай гаргаж өгөхийг хэлж, үүнээс болж эрчим хүч доголдож болохгүй гэлээ.

УУХҮ-ийн сайдын ажлын айлчлал “Петрочайна Дачин Тамсаг”, “Цайрт минерал” зэрэг компанудад очиж ажилласнаар үргэлжилсэн юм.

Өмнөговь аймгийн Ханхонгор сумын Жаргалант багийн Балгасан голын Булаг хаяа гэдэг газар /аймгийн төвөөс урд зүгт 42 км-т/, тавдугаар сарын 7-ны өдрийн 04:26 цагт 3.6 магнитудын хүчтэй газар хөдлөлт болжээ. Тус аймгийн Онцгой байдлын газраар дамжуулан тус сумын Засаг даргын Тамгын газрын дарга, ИТХ-ын дарга нараас тодруулжээ. Тухайн газар нь хоёр малчин айл нутагладаг бөгөөд иргэдэд газар хөдлөлтийн чичирхийлэлт мэдрэгдээгүй, хохирол учраагүй хэмээн мэдэгджээ.