Month: May 2018

Эрдэм шинжилгээний бага хурлыг Монгол Улсаас БНПУ-д суугаа Элчин сайд Н.Батаа, Монгол судлалыг дэмжих сангийн нарийн бичгийн дарга Д.Заяабаатар, Олон Улсын Монгол Судлалын Холбооны Ерөнхийлөгч Агнэш Бирталан нар нээж үг хэлж, хүндэт зочноор уригдсан монголч эрдэмтэн професор Д.Төмөртогоо эхний илтгэлийг тавив. Уг бага хуралд Урадын Булаг, Вэсна Воллэс, Хөхбаатар, Мария Петрова, Бүрэнбилигэ зэрэг арваад орны 50 гаруй эрдэмтэн судлаачид оролцож, монгол судлалын өнөөгийн байдал болон ирээдүйн хөгжлийн талаар хэлэлцэж, санал солилцов.

Нийслэлийн Засаг даргын 2018 оны А/298 дугаар захирамжийн дагуу Налайх дүүргийн нутаг дэвсгэрт нүүрс олборлож буй иргэн, нөхөрлөл болон аж ахуйн нэгж байгууллагуудын үйл ажиллагааны улмаас тус дүүргийн иргэдийн эрүүл мэнд, амь нас хохирох, тав тухтай амьдрах үндсэн эрх зөрчигдөж байгаатай холбогдуулан Зөвлөлдөх санал асуулгын тухай хуулийн дагуу Налайх дүүргийн иргэдийн дунд “Зөвлөлдөх санал асуулга”-ыг зохион байгуулах ба тус санал асуулгыг олон нийтийн ашиг сонирхлыг төлөөлөх Зөвлөлдөх зөвлөлийн бүрэлдэхүүн удирдан зохион байгуулахаар хуульчилсны дагуу тус бүрэлдэхүүнийг сонгон шалгаруулах, хамтран ажиллах урилгыг хүргүүлж байна.

Зөвлөлдөх зөвлөлийн бүрэлдэхүүнд тухайн асуудлаар мэргэшсэн, хараат бус, мэдлэг, туршлага бүхий хорин нэгэн насанд хүрсэн Монгол Улсын иргэн, эрдэмтэн, судлаач, хувийн хэвшлийн болон тухайн чиглэлийн төрийн бус байгууллагын төлөөлөл оруулах ба эдгээр шаардлагыг хангасан эрдэмтэн, судлаачийг их сургууль, эрдэм шинжилгээний байгууллагаас, хувийн хэвшлийн төлөөллийг мэргэжлийн холбооноос, иргэнийг нийгэмд үйлчилдэг төрийн бус байгууллагаас, эсхүл өөрөө нэр дэвшүүлэн санал болгоно.

Жич: Зөвлөлдөх зөвлөлийн бүрэлдэхүүнд төрийн улс төрийн болон төрийн жинхэнэ албан хаагч, улс төрийн намын удирдах болон гүйцэтгэх албан тушаалтныг томилохгүйг анхаарна уу.

Хүсэлтийг 2018 оны тавдугаар сарын 17-ыг хүртэл хүлээн авах бөгөөд өргөдөл гаргаж өөрийн биеэр авчрах юм. Холбоотой мэдээллийг нийслэлийн Засаг захиргааны 2 дугаар байр, Хангарди ордон, 4 давхар, 406 тоот өрөө, Мэргэжилтэн Ж.Батзолбоотой \Утас:11-318003, 99198140\ холбогдож авна уу гэж нийслэлийн Байгаль орчны газраас мэдээллээ.

Монгол Улсын Ерөнхийлөгчийн Зарлигаар жил бүрийн 5, 10 дугаар сарын хоёр дахь долоо хоногийн Бямба гаригийг ‘’Мод тарих үндэсний өдөр’’ болгосон билээ. Иймд Баянзүрх дүүргийн Засаг дарга Захирамж гаргаж 5 дугаар сарын 12,13-ны өдөр ‘’Мод тарих үндэсний өдөр’’-ийг дүүргийн хэмжээнд зохион байгуулахаар боллоо. Тухайлбал эдгээр өдрүүдэд дүүргийн харьяа хэлтэс албад ‘’Шинжлэх Ухааны Академийн Ерөнхий болон Сорилын Биологийн Хүрээлэнгийн Ботаникийн цэцэрлэг’’-д мод тарих бол Засаг даргын Тамгын газрын ажилтан, албан хаагчид ‘’Баянзүрх хайрхан’’-д мод тарих юм.

Тус арга хэмжээ нь ногоон байгууламжийг нэмэгдүүлэх, нөхөн сэргээх, агаарын бохирдлыг бууруулах, байгаль орчноо хамгаалах зэрэг өндөр ач холбогдолтой тул дүүргийн нутаг дэвсгэрт үйл ажиллагаа явуулж буй иргэн, аж ахуй нэгж байгууллага, харьяа хэлтэс албадыг идэвхтэй оролцохыг уриалж байна хэмээн Баянзүрх дүүргийн ЗДТГ-ын Хэвлэл мэдээллийн албанаас мэдээллээ.

Монголын орчин үеийн утга зохиолыг үндэслэгч, соён гэгээрүүлэгч, нийгэм улс төрийн нэрт зүтгэлтэн, их зохиолч Д.Нацагдоржийн “Хойчийг залгамжлагч багачуудын холбоо” нэртэй Пионерийн байгууллага байгуулагдсаны түүхт 93 жилийн ой тохиож байна. Энэхүү тэмдэглэлт өдрийн хүрээнд нийслэлийн Хүүхэд гэр бүлийн хөгжлийн газраас хүүхдийн байгууллагын түүх, дурсамжийг харуулсан “Хүүхдийн амьдрал түүх бүтээдэг” зургийн үзэсгэлэнг Монголын хүүхдийн ордонд зохион байгууллаа. Уг үзэсгэлэнд хүүхдийн байгууллагын түүхийг хураангуйлсан есөн самбар, түүхийн онцлох үйл явдлуудын зургуудыг дэлгэн харуулсан. Мөн анхны пеонирийн бүлгэмийн тугаас авахуулаад үе үеийн дурсамж ном, товхимол, дурсгалын зүйлсүүдийг дэлгэн үзүүллээ. Үзэсгэлэнг Хүүхдийн байгууллагын үе үеийн ахмадууд, хүүхэд багачууд үзэж сонирхсон юм гэж нийслэлийн Хүүхэд, гэр бүлийн хөгжлийн газраас мэдээллээ.

Төр нийгмийн зүтгэлтэн С.Зориг агсны гэргий Д.Булганыг С.Зоригийн амь насыг хөнөөсөн хэрэгт захиалагчаар оролцсон байж болзошгүй хэмээн яллагдагчаар татаад буй. Тиймээс өнгөрсөн дөрөвдүгээр сарын 18-ны өдөр ТЕГ-т дуудаж байсан. Тэгвэл өчигдөр түүнийг дахин байцаасан байна. Мөн эх сурвалжийн мэдээлж буйгаар удахгүй цагдан хорьж шалгана гэв.

Сануулахад, С.Зоригийн амь насыг хөнөөсөн хэргийг Б.Содномдаржаа, Ц.Амгаланбаатар, Т.Чимгээ нар үйлдсэн хэмээн 20 жил хорих ял оноогоод байгаа. Харин захиалагчийн хэргийг тусгаарлан ажлын хэсэг гарган шалгаж байгаа юм.

“Монгол базальт” ХК нээлттэй хувьцаат компани боллоо. “Монголын хөрөнгийн бирж” ТӨХК-ийн Гүйцэтгэх захирлын энэ оны 4 дүгээр сарын 05-ны өдрийн А49 тоот тушаалаар “Монгол базальт” ХК-ийн нэг бүр нь 100 төгрөгийн нэрлэсэн үнэ бүхий, нийт 56,417,000 ширхэг энгийн хувьцааг үнэт цаасны бүртгэлийн II ангилалд бүртгэжээ.

Үүнийг Санхүүгийн зохицуулах хорооны хурлаар хэлэлцэж, 169 тоот тогтоолоор нийт гаргасан хувьцааны 30 хувь буюу 16,925,100 ширхэг хувьцааг тогтоосон үнийн аргаар буюу нэгж хувьцааг 380 төгрөгөөр нийтэд санал болгон худалдахыг зөвшөөрсөн байна.