Month: May 2018

Засгийн газрын тэргүүн, танхимын гишүүд хөдөө орон нутагт ажиллаж байна. Монгол Улсын ерөнхий сайд У.Хүрэлсүх тэргүүтэй танхимын дөрвөн гишүүн Өвөрхангай, Баянхоногр, Говь-Алтай аймагт, УУХҮ-ийн сайд Д.Сумъяабазар, ЗТХ-ийн сайд Ж.Бат-Эрдэнэ, БОАЖ-ийн сайд Н.Цэрэнбат нар Өмнөгөвь аймагт тус тус албан томилолттой байна.

Нийслэлийн Мэргэжлийн хяналтын газраас 2017 онд Нийслэлийн нутаг дэвсгэрт зориулалтын бус ил задгай газарт автомашины худалдаа эрхэлж буй 101 газарт хяналт шалгалт явуулж, эзэмшил газраа зориулалтын дагуу ашиглах тухай мэдэгдэл шаардлага хүргүүлэн ажиллажээ. Хяналт шалгалтын үеэр аж ахуйн нэгжүүдийн газрын зориулалтыг шалгахад автомашин худалдаалах зориулалтаар газар эзэмшүүлээгүй иргэний ахуйн, орон сууц, аж ахуйн, үйлдвэрлэл, үйлчилгээ, гэх мэт зориулалтын газарт автомашин худалдан борлуулж байсан зөрчлүүд илэрсэн юм. Мэдэгдэл хүргүүлж ажилласны үр дүнд 51 газар зөрчлөө арилгасан байна. Иймд зөрчлөө арилгаагүй 50 аж ахуйн нэгж иргэдэд дахин мэдэгдэл хүргүүлсэн байна.

НМХГ-ын дэд даргын ахалсан ажлын хэсэг зөрчлөө арилгаагүй ил задгай автомашины худалдаа үйлчилгээ эрхэлж буй газруудад гүйцэтгэлийн хяналт тавьж ажиллалаа. Тус шалгалтын үеэр автомашины зогсоол, үйлдвэрлэл үйлчилгээний зориулалтай газарт автомашины худалдаа үйлчилгээ эрхлэгчдэд 3 хоногийн хугацаатай газар чөлөөлөх тухай мэдэгдэл хүргүүллээ. Энэ хугацаанд зөрчлөө арилгаагүй тохиолдолд газар эзэмших эрхийг цуцлах саналыг нийслэлийн Засаг даргын Тамгын газарт хүргүүлэн ажиллах юм гэж нийслэлийн Мэргэжлийн хяналтын газраас мэдээллээ.

Инновацийн соёлыг төлөвшүүлж, бүтээлч сэтгэлгээг хөгжүүлэх, төр хувийн хэвшлийн түншлэл, хамтын ажиллагааг өргөжүүлэх зорилгоор “Инновацийн 7 хоног-2018” арга хэмжээ 2018 оны 5 дугаар сарын 07-13-ны өдрүүдэд болж байна. Уг арга хэмжээний хүрээнд Дархан-Уул аймагт 2018 оны 5 дугаар сарын 8-9-ний өдрүүдэд “Хөдөө аж ахуйн технологи, инноваци-2018” форум, үзэсгэлэнг ХХААХҮЯ нь БСШУСЯ, Шинжлэх ухаан, технологийн сан, Дархан хотын ЗДТГ-тай хамтран зохион байгууллаа.

Монгол Улсын Татварын ерөнхий газраас жил бүрийн тавдугаар сарын хоёр дахь долоо хоногийг “Татвар төлөгчдийн өдрүүд” хэмээн зарлаж, татвар төлөгчиддөө талархал илэрхийлдэг. Эдүгээ 19 дэх жилдээ тэмдэглэж буй “Татвар төлөгчдийн өдрүүд”-ээр “Эх оронч үзэл татвар төлөхөөс эхэлнэ” уриаг дэвшүүлж буй бөгөөд өнөөдөр сургалт, зөвлөгөө, үйлчилгээ өгөх үйл ажиллагаагаар үргэлжилж байна.

Тодруулбал, Татварын албаны ахмадууд “Ebarimt-аа хэрхэн бүртгүүлэх вэ?” сэдэвт сургалтыг сум, дүүргийн Хорооны байрандаа зохион байгуулж, тухайн орон нутгийнхаа ахмадуудыг сургалтад хамруулж байна. Сургалтыг Татварын ерөнхий газрын дэргэдэх Ахмадын хороо, ТЕГ-ын Татвар төлөгчтэй харилцах газар хамтран зохион байгуулж байгаа бөгөөд ТЕГ-ын Татварын үйлчилгээний төвийн ТУАБ В.Цэнд-Аюуш, ТТХГ-ын ТУБ Н.Жаргалцэцэг нар чиглүүлэх аргазүйн сургалт хийж, гарын авлага сурталчилгааны материалаар хангаж байна.

Өнөөдөр Б.Норжинлхам, Х.Хурметхан нар Чингэлтэй дүүргийн ахмадуудад сургалт явуулсан бол ирэх өдрүүдэд Г.Лувсанцэрэн Сүхбаатар, Д.Банзрагч Баянгол, С.Даян Сонгинохайрхан, Д.Оюун Хан-Уул, Я.Аюушжав Баянзүрх дүүргийн сонгогдсон хороодод очиж, ахмадуудад сургалт явуулна.

Байгаль орчин, аялал жуулчлалын яам, Монгол-Солонгосын “Ногоон хэрэм” төслийн хамтын ажиллагааны хүрээнд “Улаанбаатар хотын ой” цэцэрлэгт хүрээлэнгийн шав тавих ёслолын ажиллагаа өчигдөр боллоо. Энэхүү цэцэрлэг хүрээлэн нь Монгол-Солонгосын найрамдлын цэцэрлэгт хүрээлэн болох бөгөөд Сүхбаатар дүүргийн 16 дугаар хорооны Дамбардаржаад байрлах Модлог ургамлын цуглуулгын цэцэрлэгт байгуулагдаж байгаа юм. Ёслолын үйл ажиллагаанд Байгаль орчин, аялал жуулчлалын сайд Н.Цэрэнбат, дүүргийн ИТХ-ын дарга Э.Ганбат, Засаг дарга Х.Болормаа, БНСУ-аас Монгол Улсад суугаа Элчин сайд У Сун болон, БНСУ-ын Ойн ерөнхий газрын төлөөлөгчид болон бусад албаны хүмүүс, иргэдийн төлөөллүүд оролцлоо. “Улаанбаатар хотын ой” цэцэрлэгт хүрээлэн байгуулах төсөл 2016-2022 хүртэл Байгаль орчин, аялал жуулчлалын яам, БНСУ-ын Ойн ерөнхий газрын хооронд байгуулсан хамтран ажиллах гэрээний хүрээнд хэрэгжинэ.

Улаанбаатар хотын ой нь нийт 3 тэрбум воны санхүүжилттэй, 40 га талбайд бүтээн байгуулалтын ажил хийнэ. Мөн цэцэрлэгт хүрээлэнд танин мэдэхүйн цэцэрлэг, унадаг дугуйн зам, хүүхдийн тоглоомын талбай, спортын талбай зэргийг байгуулах бөгөөд 100 гаруй нэр төрлийн мод, ургамлыг тарьж, хотын ой байгуулах, ногоон байгууламжийг хөгжүүлэх, иргэдийн соёл, амралтын ногоон байгууламж байгуулах юм гэж Сүхбаатар дүүргийн Хэвлэл мэдээллийн хэлтсээс мэдээлэв.

Нийслэлийн Прокурорын байгууллагын нэгж газруудын дунд хоёр жил тутам зохион байгуулагддаг ‘’Спортын бага наадам-2018’’ арга хэмжээ болж Баянзүрх дүүргийн Прокурорын газар амжилттай оролцлоо.

Уг спортын бага наадам нь ажилтан, албан хаагчдын чөлөөт цагийг зөв боловсон өнгөрөөж спортын салбарт шударгаар өрсөлдөх, харилцан ойлголцох, эвсэг хамт олонч байдлыг бий болгох, нийтийн биеийн тамир, спортыг хөгжүүлэх зорилготой билээ. Тэгвэл тус наадамд нийт 11 багийн 240 тамирчин Шатар, Даам, Снукер бильярд, Дартс, Ширээний теннис, Гар бөмбөг, Сагсан бөмбөг гэсэн 7 төрлөөр өрсөлдөж авьяас билэг, хурд хүч, авхаалж самбайгаа сорьсон юм.

Тэмцээнд нэгдсэн дүнгээр Баянзүрх дүүргийн Прокурорын газар тэргүүлсэн бол Сонгино хайрхан дүүргийн Прокурорын газар удаалсан байна. Харин гутгаар байранд Сүхбаатар дүүргийн Прокурорын газрын баг тамирчид шалгарчээ хэмээн Баянзүрх дүүргийн ЗДТГ-ын Хэвлэл мэдээллийн албанаас мэдээллээ.

Монгол Улсын Ерөнхийлөгч Х.Баттулга 2018 оны тавдугаар сарын 1-ний өдөр “Эрдэнэс-Тавантолгой” ХК-ийн Төлөөлөн удирдах зөвлөлийн дарга У.Бямбасүрэн, Гүйцэтгэх захирлын үүрэг гүйцэтгэгч Б.Ганхуяг тэргүүтэй тус компанийн удирдлагуудыг хүлээн авч уулзсан билээ. Уулзалтын үеэр Монгол Улсын Ерөнхийлөгч Х.Баттулга “Эрдэнэс-Тавантолгой” ХК-иас иргэдэд ногдол ашиг хуваарилах асуудлаар компанийн удирдлагуудыг санаачилгатай ажиллахыг шаардаж, долоо хоногийн хугацаанд иргэдэд ногдол ашиг хуваарилах асуудлаар хувилбар гаргаж өөрт нь танилцуулахыг үүрэг болгосон юм.

Энэ дагуу өнөөдөр “Эрдэнэс Монгол” компанийн захирал Ц.Түмэнцогт, “Эрдэнэс-Тавантолгой” ХК-ийн Гүйцэтгэх захирлын үүрэг гүйцэтгэгч Б.Ганхуяг, тус компанийн Хөрөнгө оруулалтын газрын захирал С.Ашидмөнх нар Монгол Улсын Ерөнхийлөгч Х.Баттулгад иргэдэд ногдол ашиг хуваарилах асуудлаар бэлтгэсэн саналуудаа танилцуулав.

Компанийн зүгээс иргэдэд ногдол ашиг тараах хоёр санал бэлтгэсэн бөгөөд эхнийх нь ЭТТ ХК-ийн хувьцааны одоогийн эзэмшлийн дагуу иргэн бүрт 300 мянган төгрөгийн ногдол ашиг тараах, үүний тулд 300 орчим сая м.куб уулын цул хөдөлгөж, 60 сая тонн нүүрс олборлож, борлуулах шаардлагатай юм байна. Гэсэн ч компани 2017 онд 47 сая м.куб уулын цул хөдөлгөж, 10.1 сая тонн нүүрс олборлож, 8.5 сая тонн борлуулсан тул үйлдвэрлэлийн энэ хэмжээг ойрын хугацаанд нэмэгдүүлэх боломжгүй юм байна.

Тэдний санал болгосон нөгөө хувилбар нь, Ирээдүйн өв сангийн тухай хуулийн дагуу иргэдэд ногдол ашиг тараах боломжтой гэж судалжээ. Энэ нь төрийн өмчит уул уурхайн компаниудын орлогоос хуримтлагдаж, одоогоор зарцуулахгүй хадгалж байгаа сангаас хуваарилалт хийх хувилбар юм. Ингэхийн тулд Ирээдүйн өв сангийн тухай хуулийг өөрчилж, тус санд хуримтлагдсан ашгийг ногдол ашиг болгож тараах замыг нээх боломжтой юм байна. Энэ тооцоогоор нэг иргэнд 123 мянган төгрөг хуваарилах боломжтой бөгөөд компанийн өртгийг бууруулснаар нэг иргэнд 300 мянган төгрөгийн ногдол ашиг тараах боломжтой гэсэн урьдчилсан тооцоо хийжээ.

Монгол Улсын Ерөнхийлөгч Х.Баттулга тэдний саналыг сонссоны дараа Ховд, Увс, Баян-Өлгий аймгийн иргэдтэй уулзах үеэр иргэд баялгийн хуваарилалтын асуудлыг их хөндөж байгааг сануулж, иргэдэд ногдол ашиг тараах боломж байгааг сайшаав.

Мөн уулзалтын үеэр Монгол Улсын Ерөнхийлөгч Х.Баттулга Үндсэн хуулийн 6.1-т “… байгалийн баялаг гагцхүү ард түмний мэдэл, төрийн хамгаалалтад байна” гэсний дагуу байгалийн баялгаас ард иргэдэд ногдол ашиг тараах асуудлаар санаачилгатай ажиллаж байгаа болоод удахгүй УИХ-д энэ асуудлаар хуулийн төсөл өргөн барина гэдгээ хэллээ.

Энэ хуулийн төсөлд ЭТТ ХК-ийн төрийн эзэмшлийн 85 хувийг иргэдэд шилжүүлэх замаар иргэн бүрт очих ногдол ашгийн хэмжээг өсгөх болоод иргэдийн хувьцааг хамгаалах асуудал тусгагдаж байгаа юм.

Уулзалтын төгсгөлд ЭТТ ХК-ийн удирдлагууд иргэдэд ногдол ашиг хуваарилах асуудлаар гарсан аливаа саналыг дэмжиж ажиллахаа илэрхийлэв.

Сонгинохайрхан дүүргийн Засаг дарга бөгөөд дүүргийн хүүхдийн элч Ж.Сандагсүрэнгийн нэрэмжит “Хүн болох багаасаа” хүмүүжлийн аяны хүрээнд Сонгинохайрхан дүүргийн Засаг даргын Тамгын газрын Нийгмийн хөгжлийн хэлтэс, Гэр бүл, хүүхэд, залуучуудын хөгжлийн хэлтэс хамтран “Хүүхдийн эрх, хүүхэд хамгаалал”, “Бага насны хүүхдийн нас, бие, сэтгэхүйн онцлог”, “Хүүхэд хүмүүжлийн эерэг арга” сэдэвт сургалтыг дүүргийн цэцэрлэгүүдэд зохион байгууллаа.

Уг сургалтыг 110, 38, 99, 196, 78, 148, 84, 195, 79, 107, 118, 112, 101, 91, 125, 105, 253, 111, 214, 80, 163, 113, 215, 127, 227-р цэцэрлэгийн нийт 1750 багш, ажилтан, эцэг эх, асран хамгаалагч нарт зохион байгуулсан байна. Сургалтаар цэцэрлэгийн багш, ажилтнуудад “Хүүхдийн эрхийн тухай”, “Хүүхэд хамгааллын тухай”, “Зөрчлийн тухай”, “Гэр бүлийн хүчирхийлэлтэй тэмцэх тухай” хуулиудын холбогдох заалтуудыг танилцуулж, мөн хамтарсан багийн тухай мэдээ мэдээлэл өгч, эцэг эх, асран хамгаалагч, харгалзан дэмжигч нарт “Бага насны хүүхдийн нас, бие, сэтгэхүйн онцлог”, “Өдөр тутам хэрэглэх хүүхэд хүмүүжлийн эерэг арга”, “Ахуйн хүрээн дэх осол гэмтлээс хэрхэн урьдчилан сэргийлэх вэ” сэдэвт сургалтыг хүргэлээ.