Month: May 2018

“Бүх нийтээр мод тарих үндэсний өдөр”-ийг энэ оны тавдугаар сарын 12-ны өдөр 9 дэх жилдээ зохион байгуулах гэж байна.

Нийслэл хот 2018 оныг “Иргэдийн оролцоотой амьдрах орчныг сайжруулах жил” болгон зарласан бөгөөд нийслэлийн иргэдээ “Бүх нийтээр мод тарих үндэсний өдөр”-өөр нийтийн эзэмшлийн талбай, өөрийн хашаандаа мод бут тарьж, тарьсан ногоон байгууламжаа арчлах, усалгаа хийх зэргээр амьдрах орчноо сайжруулж, орчны бохирдлыг бууруулахад хувь нэмрээ оруулахыг уриалж байна.

Нийслэлийн Засаг дарга С.Батболд иргэдийн эрүүл, аюулгүй орчинд амьдрах нөхцөлийг хангах, орон сууцны орчны газар ашиглалтыг сайжруулж, төлөвлөлтийн дагуу тохижилт хийх боломжийг бүрдүүлж, ногоон байгууламжийг нэмэгдүүлэх зорилгоор орон сууцны хорооллын ойр орчмын нийтийн эдэлбэрийн газрыг харьяалах Сууц өмчлөгчдийн холбооны мэдэлд шилжүүлэх “Нийтийн эзэмшил-Нийгмийн хариуцлага” аяныг эхлүүлсэн билээ.

Бүх нийтээр мод тарих өдрийг угтаж “Тарьц, суулгац-2018” үзэсгэлэн худалдааг Байгаль орчин, аялал жуулчлалын яам, Ой судалгаа хөгжлийн төв хамтран зохион байгуулж, 40 гаруй аж ахуйн нэгж оролцон 20 гаруй зүйлийн модлог, 50 гаруй зүйл цэцэгт ургамлын худалдаа хийгдсэн. Харин тавдугаар сарын 12-ны өдөр дүүрэг бүрт “Тарьц суулгац-2018” үзэсгэлэн худалдаа зохиогдоно.

Нийслэлийн нутгийн захиргааны байгууллагууд “Бүх нийтээр мод тарих үндэсний өдөр”-ийн хүрээнд Үндэсний цэцэрлэгт хүрээлэн, Монгол наадам цогцолбор, УСУГ-ны харьяа төв цэвэрлэх байгууламжийн талбайд мод тарих үйл ажиллагааг зохион байгуулахаар бэлтгэж байна гэж нийслэлийн Байгаль орчны газраас мэдээллээ.

Нийслэлийн Онцгой байдлын газрын харьяа Нийслэлийн иргэдийг гамшгаас хамгаалах сургалт, арга зүйн төвийн багш, ажилтнууд Сэлэнгэ, Дархан-Уул аймгуудад ажиллалаа. Тус төвийн багш нар хүүхэд, багачууд, иргэдэд газар хөдлөлтийн чичирхийллийг биеэр мэдрүүлэх, өөртөө болон бусдад эмнэлгийн анхны тусламж үзүүлэх, утаат орчин, хорт хий, утаанаас хэрхэн өөрийгөө хамгаалах, гал унтраах анхан шатны багаж хэрэгслийг ашиглаж сурах зэрэг дадлага, сургуулийг явуулын сургалтын танхимыг ашиглан зохион байгуулсан нь орон нутгийн иргэдийн талархлыг хүлээсэн ажил болжээ.

Дархан-Уул, Сэлэнгэ аймгийн 1000 орчим иргэн гамшгаас хамгаалах мэдлэгээ дээшлүүлж, болзошгүй аюул, ослын үед өөрийгөө болон бусдыг авран хамгаалах анхан шатны чадварыг эзэмшлээ гэж Онцгой байдлын ерөнхий газраас мэдээллээ.

Гадаад харилцааны сайд Д.Цогтбаатар Бүгд найрамдах Франц улсаас Монгол Улсад суугаа Элчин сайд хатагтай Элизабет Барсакыг хүлээн авч уулзлаа. Уулзалтаар Монгол, Францын харилцаа, хамтын ажиллагаанд ойрын үед төлөвлөгдөж буй айлчлал, арга хэмжээний талаар мэдээлэл, санал солилцжээ. Түүнчлэн Элчин сайд Э.Барсак олон талт хамтын ажиллагааны хүрээнд Франц Улсын Засгийн газраас санаачилсан “Байгаль орчны төлөөх Дэлхийн гэрээ” санаачлагын талаар мэдээлж, хамтарч ажиллахыг хүссэн байна.

БСШУСЯ, Шинжлэх ухаан, технологийн сан, Шинжлэх ухааны академи, Монголын Үндэсний худалдаа, аж үйлдвэрийн танхим, Шинжлэх ухаан, технологийн их сургууль хамтран “Монголын инновацийн 7 хоног-2018” арга хэмжээг зохион байгуулах гэж байна.

Инновацийн долоо хоногийн хүрээнд “Аж үйлдвэрийн 4-р хувьсгалын үе ба Монгол Улсын хөгжлийн асуудлууд”, “Соёлын бүтээлч үйлдвэрлэл” онол практикийн бага хурал, “Инновацийн түншлэл-Хөгжлийн гарц” чуулган, “Хөдөө аж ахуйн технологи, инноваци-2018” форум, “Инновацийн үзэсгэлэн” зэрэг арав гаруй арга хэмжээ зохиогдох юм.

Уг арга хэмжээний нэг хэсэг болох “Инновацийн үзэсгэлэн” 2018 оны тавдугаар сарын 11,12-ны өдрүүдэд 11:00-18:00 цагт “Улаанбатар чуулга”-ын байранд болно. “Инновацийн нээлттэй үзэсгэлэн” нь Монгол улсад мэдлэгийн эдийн засгийг хөгжүүлэх чиглэлд төр, шинжлэх ухаан, боловсрол, бизнесийн түншлэлийг бэхжүүлэн нийгэмд энтрепрёнер сэтгэлгээ, инновацийн соёлыг төлөвшүүлэх зорилгоор зохион байгуулагдах юм.Судалгаа хөгжүүлэлтийн ажлын үр дүн, шинэ технологийг үйлдвэрлэлд нэвтрүүлэх, оюуны бүтээлийг эдийн засгийн эргэлтэд оруулах, инновацийн үйлчилгээ бий болгох, төр-хувийн хэвшлийн уялдаа холбоог сайжруулах, шинжлэх ухааны ололт амжилтыг түгээн дэлгэрүүлэх, сурталчилах хүрээнд үзэсгэлэнд эрдэм шинжилгээний байгууллага, их дээд сургууль, тэдгээрийн дэргэдэх гарааны компани, лаборатори, төрийн бус байгууллага, өндөр технологийн компанийн төлөөлөл болсон 60 гаруй байгууллага оролцоно. Үзэсгэлэнд 13 эрдэм шинжилгээний байгууллага, 6 Төрийн байгууллага, 41 хувийн хэвшлийн байгууллага тус тус оролцох юм. Үзэсгэлэнд уг байгууллагууд хэд хэдэн чиглэлээр оролцох бөгөөд Үүнд:

1. Инновацийн бүтээгдэхүүн, тоног төхөөрөмж,
2. Мэдээллийн технологийн бүтээгэхүүн үйлчилгээ,
3. Төрийн үйлчилгээний инноваци
4. Нийгэм, соёлын инноваци
5. Гоо сайхны, эм, био бэлдмэл, хүнсний бүтээгдэхүүн
6. Инновацийн дэд бүтэц,
7. Хөдөө аж ахуйн бүтээгдэхүүн болох нийт 7 чиглэлийн 200 гаруй инновацийн бүтээл, бүтээгдэхүүн, үйлчилгээг олон нийтэд дэлгэн харуулахаар төлөвлөөд байна.

Энэ жилийн инновацийн үзэсгэлэн нь хоёр хоног үргэлжлэх юм. Инновацийн талаарх хязгаарлагдмал ойлголтыг өөрчлөх үүднээс мэдээллийн технологи, нийгэм, соёлын инноваци, төрийн үйлчилгээний инноваци зэрэг инновацийн олон төрлүүдтэй бодитоор танилцах боломжийг олон нийтэд олгож байгаа юм. Түүнчлэн энэ үеэр шинэ бүтээгдэхүүн, үйлчилгээгээ зах зээлд амжилттайгаар яаж нэвтрүүлэх талаар маркетингийн зөвлөгөө өгөх бөгөөд тус үзэсгэлэн нь их, дээд сургуулиуд, эрдэм шинжилгээний байгууллагууд, бизнесийн байгууллага, үйлдвэр аж ахуйн газрууд, төр, засгийн байгууллагууд, төрийн бус байгууллага, мэргэжлийн холбоод зэрэг өргөн цар хүрээг хамарч байгаагаараа онцлогтой.

Нийслэлийн Засаг дарга бөгөөд Улаанбаатар хотын Захирагчийн 2016-2020 оны үйл ажиллагааны хөтөлбөрт тусгагдсан “Орон нутгийн үйлдвэрлэлийн түншлэл” дэд хөтөлбөрийн хүрээнд 2018 оны тавдугаар сарын 8-ны өдөр Нийслэлийн Үйлдвэрлэл, инновацийн газрын дарга Б.Бат-Эрдэнэ, ШУТИС-ийн Бизнесийн ахисан түвшний сургуулийн захирал Г.Баттүвшин нар төрийн байгууллага, их дээд сургууль хоорондын хамтын ажиллагааг сайжруулж түншлэлийг бий болгох чиглэлээр хамтран ажиллах санамж бичигт гарын үсэг зурлаа. Санамж бичгийн хүрээнд үйлдвэрлэлийн бүтээгдэхүүн хөгжүүлэлтийг төр, хувийн хэвшил, их сургууль, эрдэм шинжилгээний байгууллагуудын олон талт хамтын инновацид түшиглэн хөгжүүлэх, нийслэлийн дүүрэг бүрийн тэргүүлэх чиглэлийн салбар бүтээгдэхүүнийг тодорхойлох, үйлдвэрлэл эрхлэгчдийн бараа бүтээгдэхүүний чанар, дизайныг сайжруулах, чадавхыг дээшлүүлэхэд сургалт зохион байгуулах зэрэг үндсэн чиг үүрэгтэйгээр талууд хамтарч ажиллах юм. Нийслэлийн Үйлдвэрлэл, инновацийн газрын дарга Б.Бат-Эрдэнэ төр, хувийн хэвшил, их сургууль, эрдэм шинжилгээний байгууллагуудын хамтын ажиллагааг өргөжүүлэх нь чухал ач холбогдолтой болохыг онцлоод талууд үр дүнтэй хамтран ажиллана гэдэгт итгэлтэй байгаагаа илэрхийлэв гэж нийслэлийн Үйлдвэрлэл, инновацийн газраас мэдээллээ.

Чингэлтэй дүүргийн Засаг даргын Тамгын газар, тус дүүргийн Онцгой байдлын хэлтэс, Нийслэлийн Байгаль орчны газар, Улаан загалмайн хороо хамтран ой хээрийн түймрээс урьдчилан сэргийлэх, унтраах нэгдсэн дадлага сургалтыг 19 дүгээр хороо, Гүнтийн даваанд зохион байгуулав. Сургалтад Чингэлтэй дүүргийн Онцгой байдлын хэлтсийн Аврах гал унтраах 10 дугаар ангийн гал сөнөөгчид, 17, 19 дүгээр хорооны Гамшгаас хамгаалах штабын бүрэлдэхүүн, байгаль хамгаалагч, морин эргүүлүүд зэрэг нийт 145 хүн хамрагдлаа. Энэхүү сургалт нь ой, хээрийн түймэр гарсан үед богино хугацаанд хохирол багатай унтраах, хор уршгийг арилгахад чухал ач холбогдолтой юм. Сургалтаар ой, хээрийн түймэр гарсан үед зохион байгуулалтын нэгж дамжлагаар нутгийн иргэдийг түшиглэн идэвхтэн байгаль хамгаалагч болон морьт эргүүлүүд байгаль хамгаалагч нарт мэдэгдэж, мэргэжлийн байгууллагыг иртэл түймэр унтраах, түймрийн дэгдэлтийг хязгаарлах, цурманд оруулах арга техникийг зааж сургалаа гэж нийслэлийн Байгаль орчны газраас мэдээллээ.

Нийслэлийн Байгаль орчны газрын Ойн хэлтсийн дарга М.Чинсанаагаас дараах зүйлийг тодрууллаа.

-Бүх нийтээр мод тарих үндэсний өдрийг энэ жил хэзээ зохион байгуулах вэ?

-Бүх нийтээр мод тарих үндэсний өдөр энэ сарын 12-ны бямба гаригт болно. Энэхүү арга хэмжээг 2010 оноос уламжлал болгон зохион байгуулж ирсэн. Нийслэлийн Засаг даргын 2016-2020 оны үйл ажиллагааны “Аз жаргалтай хот” хөтөлбөрт Улаанбаатар хотыг дэлхийн жишигт нийцсэн, ногоон хөгжлийн үзэл баримтлалтай хот болгож, иргэдийн ая тухтай амьдрах нөхцөлийг бүрдүүлнэ гэсэн байдаг. Тиймээс уг арга хэмжээнд нийслэлийн төр захиргааны байгууллагууд болон бусад аж ахуйн нэгж, иргэдийн оролцоог жил бүр нэмэгдүүлэн ажиллаж байна.

-Энэ жил Үндэсний цэцэрлэгт хүрээлэнд мод тарих уу?

-Энэ жилийн хувьд нийслэлийн хэмжээнд 3 газарт мод тарихаар төлөвлөсөн. Жил бүр Үндэсний цэцэрлэгт хүрээлэнд тарьдаг. Үүнээс гадна “Монгол наадам” цогцолбор болон цэвэрлэх лагийн талбайд УСУГ-ын зохион байгуулалттайгаар мод тарих юм. Иргэдийн оролцоог нэмэгдүүлэх, тэдэнд чирэгдэл учруулахгүйн тулд дүүрэг бүрт мөн арга хэмжээ зохион байгуулна. Мод тарьж буй бүх газарт үзэсгэлэн худалдаа давхар явагдах болно.

-Энэхүү өдрийг тохиолдуулан өнгөрсөн хугацаанд хэчнээн мод тариад байна вэ?

-2010-2017 оны хооронд нийт 2 сая 22 мянган мод тарьсан байна. Модыг тарьж болно. Гэхдээ эргээд арчилж, хамгаалан ургуулах нь хамгийн том ажил байдаг. Тэгэхээр иргэдийг тарьсан модоо цаашид арчилж хамгаалан ургуулаарай гэж уриалж байна. Мод тарьснаар ногоон байгууламж нэмэгдэхээс гадна уур амьсгалын өөрчлөлтөд эерэг нөлөө үзүүлэх, хөрсний бохирдол, хүнд металлуудыг задлах зэрэг маш их эерэг ач холбогдолтой. Тэр тусмаа нэг га ой мод 18 сая шоо метр агаарыг цэвэршүүлж, утаа униарын 30-35 хувийг өөртөө шингээн, дуу чимээний 25 хувийг замхруулж, тоос шороог 76 хувь хүртэл өөртөө барьдаг чанар нь хүн амын төвлөрөл ихтэй нийслэл хотын орчны бохирдлыг бууруулахад онцгой ач холбогдолтой юм гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.