Month: April 2018

БОАЖ-ын сайд Н.Цэрэнбат БНСУ-ын аялал жуулчлалын корпорацийн Улаанбаатар төлөөлөгчийн газрын Захирал Пак Жон Үн, Дунг-А их сургуулийн багийн ахлагч Хуан болон бусад судлаач, профессоруудийг өнөөдөр хүлээн авч уулзлаа.

Аялал жуулчлалын хөгжлийн төв ТӨҮГ нь 2017 оны тавдугаар сарын БНСУ -ын аялал жуулчлалын корпорацитай хамтран ажиллах санамж бичигт гарын үсэг зурсан. Хоёр байгууллагын хамтын ажиллагааны хүрээнд “Аялал жуулчлалын сургалтын төв байгуулж хүний нөөцийн чадавхийг дээшлүүлэх” төсөл хэрэгжүүлэхээр төслийг боловсруулаад байна.

Тухайн төслийн зорилго нь аялал жуулчлалын талаарх төрийн бодлогын хэрэгжилтийг хангах, аяллын бүтээгдэхүүний нэр төрөл, үйлчилгээний чанар, хүртээмжийг нэмэгдүүлэх, аялал жуулчлалын мэргэжлийн байгууллагуудын менежментийг сайжруулах, аялал жуулчлалын хүний нөөцийн хөгжлийн хангах, салбарт ажиллагсадын мэргэжлийн ур чадварыг тасралтгүй дээшлүүлэх, тогтвортой аялал жуулчлалыг хөгжүүлэхэд чиглэгдэнэ. Уг зорилтуудыг хэрэгжүүлснээр аялал жуулчлалын салбарын хөгжлийг эрчимжүүлж, салбарын мэргэжилтэй мэргэшсэн боловсон хүчин, ур чадвартай ажилтнаар хангагдаж, улмаар аялал жуулчлал, зочлох үйлчилгээний хүртээмж, чанарын түвшин дээшилж аялал жуулчлалын салбарын тогтвортой хөгжих нөхцөл бүрдэх юм. Уг төсөл нь Засгийн газар хоорондын хэлэлцээрийн хүрээнд хийгдэх зээл тусламжаар бус хөгжлийн албан ёсны тусламжаар байгууллага хоорондын хамтын ажиллагааны хүрээнд санхүүжилтийг шийдэх бөгөөд эцсийн шийд БНСУ–ын төлөвлөлт, санхүүгийн яаманд 5 дугаар сард танилцуулагдаж шийдэгдэх болно.

Усны шувууд ганганан дуугарсаар нутгийн нуурандаа чуулах арайхан болоогүй ч урь унаж, жаврын үзүүр хэдий нь цаашилжээ. Ирж яваа цагийн урь амсаж, малчны хотонд төлийн дуу цангинаж байна.

Улсын хэмжээнд энэ оны эхний 28.2 сая хээлтэгчийн 35.0 хувь буюу 10 сая 21.7 мянган эх мал төллөж 9 сая 620.7 мянган төл бойжиж байна. Төл бойжилт 96.6 хувьтай байна. Мал төллөлт өмнөх 7 хоногоос 2.6 саяар нэмэгджээ.

Монгол Улсын Засгийн газраас НҮБ-ын Гамшгийн эрсдэлийг бууруулах газартай хамтран ирэх долдугаар сард Улаанбаатар хотноо “Гамшгийн эрсдэлийг бууруулах Азийн сайд нарын бага хурал”-ыг зохион байгуулах юм.

“Дэлхийн номын өдөр”-ийг тохиолдуулан ШУА-иас хүүхдэд зориулж хэвлүүлсэн шинжлэх ухааны хялбаршуулсан, танин мэдэхүйнцуврал номынхоо дээжийг БСШУСЯ болон Улсын төв номын сан, Хүүхдийн номын ордонд тус тус гардуулж өглөө. Эдгээр цуврал номыг БСШУСЯхот хөдөөгийн ЕБС-иудад түгээх юм. Ном гардуулах үеэр дээрх байгууллагуудын төлөөллөөс гадна Нийслэлийн 21-р сургуулийн сурагчид ирж ном гардан авсандаа баяртай байлаа.

Монгол Улсын Шинжлэх ухааны Академийн шинжлэх ухааныг сурталчлах, түгээн дэлгэрүүлэх зорилгоор ерөнхий боловсролын сургуулийн сурагчид, хүүхэд залуучууд, олон нийтэд зориулсан шинжлэх ухааны хялбаршуулсан цуврал номыг 2015 оноос эхлэн хэвлүүлж, нийтийн хүртээл болгоод байна. Тус цуврал бүтээл нь шинжлэх ухааны олон салбар, чиглэлийн мэдлэгийг энгийн ойлгомжтой хэлбэрээр хялбаршуулан бичснээрээ онцлог бөгөөд хүүхэд, багачуудад шинжлэх ухааны мэдлэг олгох, цаашлаад шинжлэх ухаанч иргэн болгон төлөвшүүлэхэд ихээхэн ач холбогдолтой юм.

ШУА-ийн эрдэмтэд 2017 онд онд “Нар”, “Нарны аймаг”, “Жигмэд Тогмид хоёр жимсэнд”, “Элементүүдийн үүсэл”, “Монгол орны эртний амьтан ургамал”, “Усан орчны амьдрал”, “Монгол орны цэцэгт ургамал”, “Ой модны экологийн ач холбогдол”, “Эртний улсууд”, “Гуравдагч хөрш”, “Хеликобактер”, “Хэл ба сэтгэхүй” зэрэг 11 хялбаршуулсан номыг хэвлүүлж хүүхэд багачууддаа хүргэж байна. Өнгөрсөн гурван жилийн хугацаанд ШУА-иас эрхлэн гаргаж буй хялбаршуулсан 33 цуврал дугаар олны хүртээл болоод байна. ШУА цаашид ЕБС-иуд, Нийслэлийн Боловсролын газар, багш, эрдэмтэдтэй хамтран цуврал ном хэвлүүлэх ажлыг тогтвортой үргэлжлүүлэх бөгөөд 2018 онд уламжлал ёсоор 10 цуврал гаргахаар төлөвлөөд байна хэмээн Монгол Улсын Шинжлэх ухааны академиас мэдээллээ.

БНХАУ-ын засгийн газрын буцалтгүй тусламжаар хэрэгжих Монгол улсын говийн мазаалай баавгайг хамгаалах техникийн туслалцаа үзүүлэх төсөл хэрэгжүүлэх хэлэлцээрт гарын үсэг зурах ёслол энэ сарын 18-ны өдөр БНХАУ-аас Монгол улсад суугаа элчин сайдын яаманд боллоо.

Хэлэлцээрт Монгол Улсын БОАЖЯ-ны Хүрээлэн буй орчин, байгалийн нөөцийн удирдлагын газрын дарга Г.Нямдаваа, БНХАУ-аас Монгол Улсад суугаа ЭСЯ-ны Худалдаа, эдийн засгийн зөвлөх Сун Вэрэн нар гарын үсэг зурав.

Гарын үсэг зурах ёслолын арга хэмжээний үеэр БОАЖ-ын дэд сайд Ц.Батбаяр, БНХАУ-аас Монгол Улсад суугаа Элчин сайдын хэргийг түр хамаарагч Ян Чиндун нар баяр хүргэж үг хэлэв. Хэлэлцээрийн дагуу Хятадын тал Монголын талтай хамтран Мазаалай баавгайн амьдрах орчны менежментийн төслийн судалгаа, амьдрах орчны экологийн чанарын үнэлгээний судалгаа, хүнсний ургамлын популяцын судалгаа болон биологийн олон янз байдлын мониторингийн судалгаа хийх бөгөөд Монголын Их говийн тусгай хамгаалалттай газарт техникийн болон мэргэжлийн хүмүүст газар дээрх сургалт зохион байгуулах, БНХАУ-д хоёр удаагийн сургалт зохион байгуулах, төсөлд шаардлагатай тоног төхөөрөмж, материалаар хангах,төслийн хэрэгжилтийн хугацаанд Мазаалай баавгайн тэжээлд зориулан жилд 20 тонн улаан буудайн үр олгох бөгөөд төслийн нийт өртөг 11,63 сая юанийн санхүүжилттэй 3 жилийн хугацаанд хэрэгжинэ.

Нийслэлийн Засаг дарга бөгөөд Улаанбаатар хотын Захирагчийн тэргүүлдэг Нийслэлийн Хүүхдийн төлөө зөвлөлийн “Нийгмийн салбар дахь хүүхэд хамгаалал” хуралдаан өнөөдөр боллоо. Энэ удаагийн хуралдаанаар нийгмийн салбар дахь хүүхэд хамгаалал, салбар дундын зохицуулалтыг хангах талаар холбогдох салбарын байгууллагууд буюу нийслэлийн Хүүхэд, гэр бүлийн хөгжлийн газар, нийслэлийн Боловсролын газар, нийслэлийн Эрүүл мэндийн газар, нийслэлийн цагдаагийн газраас мэдээлэл хийсэн. Өнөөдрийн хуралдаанаар сургууль, цэцэрлэгийн дээвэр дээрх үүрэн телефоны антеныг цэгцлэх, хүүхдийн эрүүл мэнд, сэтгэл зүйгээр далимдуулан орлого олж буй PC тоглоомын газруудыг хаах асуудлыг онцлон ярилцаж, холбогдох албаныханд үүрэг өглөө.

Мөн хуралдаанаар нийслэлийн хэмжээнд Хүүхдийн эрхийн Конвенц, Зөвлөмж, “Хүүхдийн хөгжил, хамгааллын үндэсний хөтөлбөр”-ийн хэрэгжүүлэх ажлыг зохион байгуулах, хяналт тавих, тайлагнах чиг үүрэг бүхий Ажлын хэсгийн бүрэлдэхүүн батлах, “Хүүхдийн хөгжил, хамгаалалын үндэсний хөтөлбөр”-ийг 2018-2021 онд нийслэлд хэрэгжүүлэх үйл ажиллагааны төлөвлөгөөний тогтоолууд батлагдсан.

Нийслэлийн Засаг дарга бөгөөд Улаанбаатар хотын Захирагч С.Батболд “Нийслэлийн зүгээс хүүхэд хамгааллын талд нэлээн ажлыг зохион байгуулж байгаа. Нийслэл, дүүргүүдэд Хүүхдийн төлөө зөвлөл, дүүрэг бүрт хууль зүйн зөвлөгөө өгөх хороонууд ажиллаж байна. Хүүхдийг хүчирхийлэх, гэмт хэрэгт холбогдуулах, томчуудын хайхрамжгүй үйлдлээс болж амиа алдах асуудлыг зогсоох хэрэгтэй. Хүүхэд зам тээврийн осолд өртдөг явдлыг үгүй болгох ёстой. Энэ бол бидний хэтэрхий хайхрамжгүй байгаагаас үүдэлтэй. Энэ талд НҮБ-ын Хүүхдийн хорооны хурлаар Монгол улс онцгой анхаарал хандуулах хэрэгтэй гэсэн зөвлөмж өгсөн. Улаанбаатар хотын хүн амын 30 гаруй хувийг хүүхэд эзэлж байна. Тиймээс хүүхдийн хараа хяналтыг сайжруулах үүднээс бид шийдвэр гарах учиртай” хэмээгээд дараах шийдвэрийг гаргаж, холбогдох албаныханд үүрэг өглөө.

Багахангай дүүрэгт байгуулсан хүүхдийн асран хамгаалах төвийн санхүүжилтийг Засгийн газраас гаргуулан үйл ажиллагааг нийслэлийн зүгээс хариуцаж хүүхдүүдийн хараа хяналт, бүртгэлийг сайжруулах, хүүхдийн эрхийг хамгаалж ажиллах үүргийг тус дүүргийн Засаг даргад,

Өнгөрсөн онд хүүхдээр тэвчишгүй хөдөлмөр эрхлүүлэх тоо 50 хувиар буурсан үзүүлэлттэй гарсан ч энэ талд судалгаа, хяналтаа сайжруулах, хүүхдийн тэвчишгүй хөдөлмөр эрхлэх асуудлыг онцгой анхаарч ажиллах, хамгааллын цогц үйлчилгээг эрчимжүүлэх шаардлагатайг холбогдох албаныханд,

Сургууль, цэцэрлэгийн дээвэр дээрх үүрэн телефоны оператор компанийн антены асуудлыг цэгцлэх, энэ асуудлаар оператор компаниуд руу албан бичиг явуулж бүх антеныг авах үүргийг Нийслэлийн Засаг даргын Ядуурлыг бууруулах, хөдөлмөр эрхлэлтийн асуудлыг хариуцсан орлогч Д.Энхтөрд өгч “Гар утасны хүчтэй долгион цацруулагчийг сургууль, цэцэрлэгийн дээвэр дээр байрлуулна гэдэг байж болохгүй зүйл. Тиймээс ирэх долоодугаар сарын 1 гэхэд оператор компанийн антенуудыг авсан байх ёстой” хэмээн онцолж байв.

Түүнчлэн хотын дарга хүүхдийн эрүүл мэндэд эрсдэл учруулж буй PC тоглоомын газруудын үйл ажиллааг хаахыг үүрэг болгосон.

Тэрбээр “Хүүхдийн эрүүл мэнд, сэтгэл зүйгээр орлого олдог тоглоомын газруудын үйл ажиллагааг зогсоох шаардлагатай. НЗДТГ-ын Нийгмийн бодлогын хэлтэс, Нийслэлийн Цагдаагийн газар, Нийслэлийн Боловсролын газар зэрэг нь хамтраад тус тоглоомын төвүүдийн зөвшөөрөл олголтын асуудлыг судалж, хяналт шалгалтыг нийслэлд шилжүүлэх хэрэгтэй. Хүүхдээрээ тоглож ашиг олж болохгүй” хэмээлээ.

Улсын хэмжээнд 0-18 насны 1.2 сая хүүхэд байгаагаас 470 гаруй мянга нь буюу 42 хувь нь нийслэлд амьдардаг байна. Нийслэлийн 380 мянган өрхийн 270 орчим нь гэр хороололд байдаг. Нийслэлийн хэмжээнд байгаа нийт хүүхдийн 10 хувь нь хүчирхийлэлд өртөх, хараа хяналт сул, хөдөлмөр эрхлэх чадваргүй, хөгжлийн бэрхшээлтэй, гамшиг осолд өртөх, сургууль завсардах магадлалтай зорилтот бүлгийн хүүхдүүд байдаг байна. Тиймээс нийслэлийн Хүүхэд гэр бүлийн хөглийн газраас урьдчилан сэргийлэх арга хэмжээг зохион байгуулж, зорилтот бүлгийн хүүхдээдэд хамгааллын үйлчилгээг үзүүлэн ажиллаж байгаа гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.