Month: April 2018

Төрийн үйлчилгээг иргэдэд шуурхай хүргэх, цахим засаглалыг бэхжүүлэх зорилгоор НДЕГ-аас “Нийгмийн даатгал” гар утасны аппликейшн ашиглалтад оруулжээ.

Иргэд энэхүү аппликейшнийг ашиглан өөрийн нийгмийн болон эрүүл мэндийн даатгалын шимтгэл төлөлт болон Нийгмийн даатгалын сангаас гаргуулсан зардал, төлбөр зэрэг мэдээллээ авах боломжтай юм. Мөн нийгмийн даатгалын салбарын хууль тогтоомжтой танилцах, тэтгэвэр авагчийн мэдээллээ харах, тэтгэмжийн зардлаа хянах, нэрийн дансаа тооцоолох, нийгмийн даатгалын байгууллагын үйлчилгээний талаар санал, хүсэлтээ илэрхийлж, 10 хоногийн дотор шийдвэрлүүлэх, УИХ, Засгийн газар болон НДЕГ-аас гаргаж буй шийдвэр, мэдээ мэдээллийг авах боломж бүрдэх аж.

Энэхүү аппликэйшнийг гар утсандаа суулгасны дараа иргэд өөрт ойр байрлах Нийгмийн даатгалын хэлтэст иргэний үнэмлэхтэйгээ очиж нэг удаа баталгаажуулах ёстой. Даатгуулагчийн шимтгэл төлөлтийн мэдээлэл нь хувийн нууцад хамаарах тул ийнхүү өөрийн биеэр ирж баталгаажуулахыг шаардаж байгаа аж.

Энэ 4-р сарын 28-нд МОНГОЛ ГЕНЕРАЛЫН ӨДӨР тохионо.

Цэргийн дээд офицерын ГЕНЕРАЛ хэмээх цолыг анх Франц Улсад XVI зуунаас хэрэглэж ирсэн бол ОХУ-д 1657 онд I Петр хаан армидаа хэрэглэж эхэлжээ.

Манай улсын хувьд, аугаа их Чингис хааны үеэс дайчин эрсээ илбэн тохинуулж, дэлхийн талыг дайлан туулахад их цэргийн манлайд нь явж байсан мянгат, түмтийн ноёд, өрлөг жанжид бол тухайн үеийн ГЕНЕРАЛУУД байсан нь эргэлзээгүй билээ.

Харин бүр сүүлд, ХХ зууны дунд үед буюу 1944 оны дөрөвдүгээр сарын 28-нд БНМАУ-ын Ардын сайд нарын зөвлөлийн 52 дугаар тогтоолоор цэргийн удирдах дээд албан тушаалын генерал хэмээх эрхэм хүндтэй энэхүү цэргийн дээд цолыг манай улсад бий болгож: “Эх орныхоо эрх чөлөө, тусгаар тогтнолыг батлан хамгаалах үйл хэрэгт онц гарамгай гавьяа байгуулсан цэргийн дээд дарга нарт олгоно” хэмээн журамлаж анх 11 хүнд олгосон байдаг юм.

Хожим нь үүнтэй холбогдуулан, 2004 оноос эхлэн жил бүрийн 4-р сарын 28-ны өдрийг МОНГОЛ ГЕНЕРАЛЫН ӨДӨР хэмээн нэрийдэж, генерал цолтон бүхий байгууллагууд жил бүр ээлжээр генерал цолтнуудаа хүлээн авч, хүндэтгэл үзүүлж, ёслон хүндэтгэж тэмдэглэдэг сайхан уламжлал тогтсон билээ. Энэ жилийн энэхүү тэмдэглэлт өдрийг ШШГЕГ хариуцан, энэ сарын 27-нд зохион байгуулах ажээ.

Цэргийн хэргийн мэдлэг боловсрол, ажил албаны дадлага туршлага, албан тушаалын зэрэг дэв зэрэг тусгай өндөр шалгуур үзүүлэлтүүдийг үндэслэн ГЕНЕРАЛ цолыг зөвхөн Монгол Улсын Ерөнхийлөгч, Зэвсэгт хүчний Ерөнхий командлагчийн зарлигаар олгодог онцлогтой.

Тоо баримтаас товч сонирхуулахад:1944 оноос өнөөг хүртэлх 74 жилд төрөн гарсан ГЕНЕРАЛ цолтой 181 хүнээс 96 нь өнөөдөр энх тунх амьдарч байгаагийн 34 нь одоо төрийн тусгай албан тушаал хашиж, бусад нь цэргийн тэтгэвэртээ сууж байгаа ажээ. Хамгийн өндөр настай нь хошууч генерал Т.Алтангэрэл гуай өдгөө 99 насны сүүдэр зоогложээ.

Генерал цолтой дээрхи хүмүүсийн дотор 1921 оны Ардын хувьсгалын партизан агсан 3, 1939 оны Халх голын болон 1945 оны чөлөөлөх дайнд оролцсон 31, Монгол Улсын баатар 6, ЗХУ-ын баатар 1, Хөдөлмөрийн баатар 3, Монгол Улсын Гавъяат цолтон 10, сансрын нисгэгч 1, БНМАУ-ын төрийн тэргүүн агсан 1, УИХ (АИХ)-ын гишүүн (депутат) асан 69, доктор профессор 37, төрийн сайд асан 20, цэргийн дипломат 30, ОУ-ын Химийн зэвсгийн мэргэжлийн шинжээч асан 1, дэлхийн “халуун цэгүүд”-эд үүрэг гүйцэтгэж НҮБ-ын мандаттай Энхийг сахиулах ажиллагаа (ЭСА)-ны олон улсын секторын командлагчаар ажилласан 1, ЭСА-ны монгол цэргийн багийн захирагчаар үүрэг гүйцэтгэсэн 6, Иракт олон үндэстний цэргийн штабт ажилласан 1 генерал тус тус байгаа ажээ.

“Мянган цэргийг олоху дор хялбар, Нэгэн жанжинг олоху дор бэрх” хэмээн их Чингис хаан нэгэнтээ өгүүлсэн байдаг нь учиртай.

Монгол Улсын Засгийн газраас НҮБ-ын Гамшгийн эрсдэлийг бууруулах газартай хамтран зохион байгуулж байгаа “Гамшгийн эрсдэлийг бууруулах Олон Улсын стратегийн Азийн түншлэлийн хурал”-ын нээлтийн ажиллагаа өнөөдөр эхэллээ.

Хурлын нээлтийн ажиллагаанд Монгол Улсын Шадар сайд Ө.Энхтүвшин, НҮБ-ын Гамшгийн эрсдэлийг бууруулах газрын Ази, Номхон далайн бүсийн төвийн дарга, хатагтай Лоретта Хибер Жирарде нар оролцож, үг хэлсэн юм. Энэ үеэр НҮБ-ын ерөнхий нарийн бичгийн даргын Гамшгийн эрсдэлийг бууруулах асуудал хариуцсан тусгай төлөөлөгч, хатагтай Мами Мизуторигийн мэндчилгээг оролцогчдод танилцууллаа.

Монгол Улсын Шадар сайд Ө.Энхтүвшин хуралдааныг нээж хэлсэн үгэндээ, энэхүү хуралдаан нь ирэх 7 дугаар сард зохион байгуулагдах Гамшгийн эрсдэлийг бууруулах Азийн сайд нарын II дугаар бага хурлын сүүлийн бэлтгэл хуралдаан болж байгаагаараа онцлог гэдгийг дурдаад, 2017 оны 02 дугаар сард зохион байгуулагдсан НҮБ-ын 71 дүгээр Ерөнхий Ассамблейгаас Сендайн үйл ажиллагааны хүрээ баримт бичгийн дэлхийн 7 зорилтот шалгуур үзүүлэлтийг батлан гаргасан нь бүс нутаг, улс орнуудад уг баримт бичгийн хэрэгжилтийн явцыг дотооддоо хянах,тулгамдаж буй асуудлаа тодорхойлж шийдвэрлэх, ахиц дэвшлээ үнэлж дүгнэх, тайлагнах боломжийг бүрдүүлсэн. Улаанбаатар хотод болох Азийн сайд нарын бага хурлаар бид дараагийн 2 жилд хэрэгжүүлэх Азийн бүсийн төлөвлөгөөг шинэчлэн батлахын тулд уг төлөвлөгөөг 2017-2018 онд хэрэгжүүлэх явцад улс орнуудын гаргасан ололт амжилтууд, тулгарч буй асуудлуудыг хэлэлцэн цаашдын чиглэлүүдээ тодорхойлохыг зорилго болгон ажиллах нь нэн чухал” гэдгийг онцоллоо.

Өнөөдрийн хуралдаан Энэтхэг Улсад зохион байгуулагдсан Азийн сайд нарын бага хурлаар баталсан “Сендайн үйл ажиллагааны хүрээ” баримт бичгийг хэрэгжүүлэх Азийн бүсийн төлөвлөгөөнд тусгагдсан үүрэг, амлалтуудаа хэрхэн хэрэгжүүлж байгаагаа улс орнууд тайлагнах юм.

Мөн бүс нутагт гамшгийн эрсдэлийг бууруулахад тулгарч буй асуудлууд, түүний явц, ололт амжилтын талаар нэгдсэн хэлэлцүүлгүүд зохион байгуулагдана.

Түүнчлэн ирэх 7 дугаар сард Монгол Улсын Засгийн газар, НҮБ-ын Гамшгийн эрсдэлийг бууруулах газар хамтран Улаанбаатар хотноо зохион байгуулах Гамшгийн эрсдэлийг бууруулах Азийн сайд нарын II бага хурлын бэлтгэл ажлын талаар санал солилцоно гэж Онцгой байдлын ерөнхий газраас мэдээллээ.

Төв цэвэрлэх байгууламжийн лагийг үнэргүйжүүлэх, усгүйжүүлэх, хатаах, шатаах технологи бүхий тоног төхөөрөмжийг энэ улиралд багтаан худалдан авч, суурилуулж эхлэхийг Барилга, хот байгуулалтын сайд Х.Баделханд Засгийн газрын хуралдаанаас даалгасан юм. Энэ хүрээнд тоног төхөөрөмж суурилуулах, лагийг үнэргүйжүүлэх зэрэг ажил хийгдэж байна.

Төв цэвэрлэх байгууламжийн цэвэршүүлэлтийн хувийг сайжруулах зорилгоор улсын төсвийн хөрөнгө оруулалтаар хоёр тунгаагуур, био цөөрөм барьж байна. Эдгээр нь энэ оны долдугаар сард ашиглалтад орох юм. Ингэснээр Төв цэвэрлэх байгууламжийн цэвэрлэгээний түвшин дээшилж, Туулд голд нийлүүлэгдэх усны чанар сайжирна гэж мэргэжилтнүүд тайлбарлаж байна.

Мөн лагийн талбай руу шахаж байгаа түүхий лагийг хэт авианы төхөөрөмжөөр оруулснаар лаган дахь нян бактери устаж халдваргүйжих юм байна. Энэ төхөөрөмжийг суурилуулаад байгаа бөгөөд туршилт хийгдэж эхэлжээ.

Төв цэвэрлэх байгууламж 1964 онд ашиглалтад орсон. Хоногт 160 000-190 000 метр.куб ахуйн болон үйлдвэрийн бохир ус хүлээн авч цэвэрлэдэг байна. Гэвч лаг боловсруулах байгууламж байхгүй учир хоногт 1000-1200 метр.куб нойтон /10 тонны даацтай машинаар өдөрт 100 удаа зөөх хэмжээний /лагийг ил талбайд усгүйжүүлэн хатаадаг. Үүнээс үүдэн 900 000 метр.куб лаг хуримтлагдан байгаль орчин, агаар, хөрс бохирдуулж, иргэдийн эрүүл мэндэд ноцтой нөлөөлсөөр байгаа юм.

Өдөр тутам шахаж байгаа түүхий лаганд сибфлок гэж бодис найруулж хольж шахсанаар лагийн талбайд шахагдсан лагийн ус хурдан ялгарч, хэмжээ нь багасч, хурдан хатах, бактерийн тусламжтайгаар лагийг идүүлж улмаар үнэргүй бордоо болгох төлөвлөгөөтэй ажиллаж байгаа ажээ гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.

Радио долгион нь газрын гадаргуу дээр хил хязгааргүй тархах онцлог бүхий хязгаарлагдмал нөөц юм.

Хөрш улс орнууд хил орчмын бүс нутагтаа ажиллах радио төхөөрөмжүүдийн хэвийн ажиллагааг хангах зорилгоор энэхүү нөөцийн ашиглалтад техникийн нарийвчилсан зохицуулалт хийх, бүс нутгийн харилцаа холбооны цаашдын хөгжлийг дэмжих, хөрш орнуудын хилийн бүс нутаг орчмын оршин суугчдад харилцаа холбооны үйлчилгээг чанартай хүргэх шаардлагуудтай тулгардаг.

Орчин үеийн өргөн зурвасын хөдөлгөөнт радио холбооны хөгжлийн хандлага нь хил орчмын радио давтамжийн зохицуулалтыг хөгжлийн чиг хандлагад зохицуулан хийхийг шаардсаар байна.

Энэхүү зохицуулалтын хүрээнд 2018 оны 4-р сарын 16- наас 4-сарын 21-ний өдрүүдэд Монгол Улс, Оросын Холбооны Улсын харилцаа холбооны асуудал хариуцсан төрийн захиргааны байгууллага хооронд хил орчимд ашиглах радио давтамжийн зохицуулалтын 3 дахь удаагийн уулзалт Улаанбаатар хотод зохион байгуулагдлаа.

Энэ удаагийн уулзалтаар Монголын талаас Харилцаа холбоо, мэдээллийн технологийн газрын дарга Б.Чинбат, ОХУ-ын талаас тус улсын Харилцаа холбоо, мэдээллийн технологи, олон нийтийн хэвлэл мэдээллийн хэрэг эрхлэх газар /Роскомнадзор/-ын Тусгай зөвшөөрлийн газрын дарга Андрей Канцуров нар гарын үсэг зурж баталгаажуулан, дараах асуудлуудыг харилцан тохиролцлоо:

• Радио давтамжийн 890-915/935-960 МГц, 1710-1785/1805-1880 МГц зурвасуудыг хөдөлгөөнт өргөн зурвасын үйлчилгээнд ашиглахаар 2013 оны гэрээнд нэмэлт оруулав.
• Радио давтамжийн 2500-2690 МГц, 2300–2400 МГц зурвасуудыг хөдөлгөөнт өргөн зурвасын үйлчилгээнд ашиглахаар тохирч хоёр гэрээг шинээр
• Хилийн ойролцоох бүсэд ажиллаж байгаа ОХУ-ын 120 орчим, Монгол Улсын 101 телевизийн дамжуулах станцын техникийн үзүүлэлтийг нэг бүрчлэн тохиров.
• Радио давтамжийн 694-790 МГц зурвасыг цаашид 2 тал харилцан нөлөөлөлгүй ашиглах нөхцөлийг бүрдүүлэхээр хамтран ажиллана хэмээн тохиролцов.

Өмнө нь БНМАУ-ын Холбооны Яам, ЗСБНХУ-ын Холбооны Яамны хооронд “Хил хязгаар нутгийн хуурай замын хөдөлгөөнт албаны радио станцад метрийн ба дицеметрийн цараа дахь үелзийн хэрэглээг зохицуулах тухай” хэлэлцээрийг 1983 онд Москва хотод зохион байгуулж, БНМАУ-ын талаас Холбооны Яамны Сайд асан Д.Гарам-Очир, ЗСБНХУ-ын талаас тус улсын Холбооны Яамны Сайд асан Ю.Б.Зубарев нар гарын үсэг зурж баталгаажуулж байжээ.

Энэ цагаас хойш 30 жилийн дараа, 2013 онд Монгол Улс, ОХУ-ын харилцаа холбооны асуудал эрхэлсэн төрийн захиргааны байгууллагуудын хооронд уг асуудлаар уулзалтыг Москва хотноо зохион байгуулснаар 2 улсын хил орчмын бүс нутагт радио давтамжийн зохицуулалтыг орчин цагийн мэдээлэл, харилцаа холбооны хөгжилд нийцүүлэх хамтын ажиллагааны эхлэл тавигдсан юм.

2013 оны уулзалтаар GSM 900/1800, 3G /UMTS 2100 болон өргөн нэвтрүүлгийн системүүдийн зохицуулалтын талаар хэлэлцэж гэрээ байгуулсан бол энэ удаагийн уулзалтаар хөдөлгөөнт холбооны дараа үеийн хөгжилд нийцүүлсэн өөрчлөлтүүдийг өмнөх гэрээнд тусгах, Дэлхийн Радио Холбооны Их хурлын шийдвэрээр Дараа үеийн хөдөлгөөнт холбоонд шинээр хуваарилагдан ашиглагдаж байгаа шинэ зурвасуудыг зохицуулах талаар хэлэлцэж байв.

Уулзалт, хэлэлцээрт нийт 50 төлөөлөгч оролцсон бөгөөд Монгол Улсын талаас ХХМТГ, ХХЗХ, бусад яам, агентлагуудын харилцаа холбоо хариуцсан албад болон үүрэн холбоо, өргөн нэвтрүүлгийн үйлчилгээ эрхлэгч аж ахуйн нэгжүүдийн төлөөлөл, ОХУ-ын талаас тус улсын Харилцаа Холбоо, Мэдээллийн Технологи, Олон Нийтийн Хэвлэл Мэдээллийн Хэрэг Эрхлэх Газар, ОХУ-ын БХЯ, болон аюулгүй байдлын албаны харилцаа холбооны асуудал хариуцсан ажилтнууд оролцов.

Гэрээнд Монгол Улсын харилцаа холбооны асуудал хариуцсан төрийн захиргааны байгууллагыг төлөөлж ХХМТГ-ын дарга Б.Чинбат, ОХУ-ын харилцаа холбооны асуудал хариуцсан төрийн захиргааны байгууллагыг төлөөлж тус улсын Харилцаа Холбоо, Мэдээллийн Технологи, Олон Нийтийн Хэвлэл Мэдээллийн Хэрэг Эрхлэх Газрын дарга А.Канцуров нар гарын үсэг зурлаа.

Уулзалт, хэлэлцээр талуудын урьдчилан төлөвлөгдсөн агуулгын хүрээнд амжилттай явагдаж ажил хэрэгч, харилцан ойлголцсон, үр өгөөжтэй боллоо гэж талууд дүгнэлээ.

Монгол Улсад Гэмт хэргээс урьдчилан сэргийлэх ажлын зохицуулах зөвлөл, Аймгийн Засаг даргын Тамгын газар, Замын цагдаагийн алба хамтран 21 аймгийн хэмжээнд “Замын хөдөлгөөний аюулгүй байдлын төлөө-Хамтдаа шийдье” зөвлөгөөнийг зохион байгуулж байна.

Уг зөвөлгөөний эхлэл болж зүүн бүсийн аймгууд буюу Хэнтий, Сүхбаатар, Дорнод аймгуудын хэмжээнд Замын хөдөлгөөний аюулгүй байдлыг хангах, тулгамдаж буй асуудлуудыг хамтран шийдвэрлэх, холбогдох хуулийн хэрэгжилтийг хангуулах, осол гэмтлээс урьдчилан сэргийлэх, цаашид авч хэрэгжүүлэх үйл ажиллагааны талаар санал солилцох, тодорхой төрлийн шийдвэр гарган бусад төрийн болон төрийн бус байгууллагуудын хамтын ажиллагааг сайжруулах зорилгоор “Замын хөдөлгөөний аюулгүй байдлын төлөө хамтдаа” зүүн бүсийн зөвлөгөөнийг 2018.04.20-ны өдөр Хэнтий аймгийн Чингис хотноо зохион байгууллаа.

Зөвлөгөөн зохион байгуулагдсанаар төрийн болоод иргэний нийгмийн байгууллагууд, оролцогч талуудын уялдаа холбоо сайжирч, тухайн нутаг дэвсгэрийн хэмжээнд замын хөдөлгөөний аюулгүй байдлыг хангах тогтвортой менежмент хэрэгжүүлэх, урт болон богино хугацааны төсөл, хөтөлбөрүүдийг зохион байгуулах юм.

Монгол Улсад Гэмт хэргээс урьдчилан сэргийлэх ажлын зохицуулах зөвлөл, Аймгийн Засаг даргын Тамгын газар, Замын цагдаагийн алба хамтран 21 аймгийн хэмжээнд “Замын хөдөлгөөний аюулгүй байдлын төлөө-Хамтдаа шийдье” зөвлөгөөнийг зохион байгуулж байна.

Уг зөвөлгөөний эхлэл болж зүүн бүсийн аймгууд буюу Хэнтий, Сүхбаатар, Дорнод аймгуудын хэмжээнд Замын хөдөлгөөний аюулгүй байдлыг хангах, тулгамдаж буй асуудлуудыг хамтран шийдвэрлэх, холбогдох хуулийн хэрэгжилтийг хангуулах, осол гэмтлээс урьдчилан сэргийлэх, цаашид авч хэрэгжүүлэх үйл ажиллагааны талаар санал солилцох, тодорхой төрлийн шийдвэр гарган бусад төрийн болон төрийн бус байгууллагуудын хамтын ажиллагааг сайжруулах зорилгоор “Замын хөдөлгөөний аюулгүй байдлын төлөө хамтдаа” зүүн бүсийн зөвлөгөөнийг 2018.04.20-ны өдөр Хэнтий аймгийн Чингис хотноо зохион байгууллаа.

Зөвлөгөөн зохион байгуулагдсанаар төрийн болоод иргэний нийгмийн байгууллагууд, оролцогч талуудын уялдаа холбоо сайжирч, тухайн нутаг дэвсгэрийн хэмжээнд замын хөдөлгөөний аюулгүй байдлыг хангах тогтвортой менежмент хэрэгжүүлэх, урт болон богино хугацааны төсөл, хөтөлбөрүүдийг зохион байгуулах юм.