Month: March 2018

Энэ хаврын анхны бороо Баян-Өлгий, Завхан, Хөвсгөл аймгуудын нутгаар орсон талаар цаг уурын байгууллагаас мэдээллээ. Тодруулбал, гуравдугаар сарын 11-12-нд шилжих шөнө Баян-өлгий аймгийн Дөчинжил, Завхан аймгийн Тосонцэнгэл, Хөвсгөл аймгийн Мөрөн, Ренчинлхүмбэ, Шинэ-идэр сумдын нутгаар 0.0-2.0 мм бороо орсон байна.

Гуравдугаар сарын 14-18-ныг хүртэлх цаг агаарын урьдчилсан төлөв:

14-нд төвийн аймгуудын ихэнх нутаг, баруун, зүүн болон говийн аймгуудын нутгийн зарим газраар, 15-нд нутгийн зүүн өмнөд хэсгээр, 17-нд баруун аймгуудын нутгийн баруун хэсгээр цас орно. Салхи 14-нд говь, тал, хээрийн нутгаар түр зуур секундэд 16-18 метр хүртэл ширүүсч цасан болон шороон шуурга шуурна.

14-нд ихэнх нутгаар, 15-нд нутгийн зүүн хагаст хүйтэрч Увс нуур болон Дархадын хотгор, Тэс, Ерөө, Тэрэлж, Онон, Улз голын хөндийгөөр шөнөдөө 22-27 градус, өдөртөө 10-15 градус, Завхан голын эх, Хүрэн бэлчир, Идэр, Орхон-Сэлэнгэ, Хараа, Туул, Хэрлэн, Халх голын хөндийгөөр шөнөдөө 18-23 градус, өдөртөө 5-10 градус, Хангай, Хөвсгөл, Хэнтийн уулархаг нутгаар шөнөдөө 13-18 градус хүйтэн, өдөртөө 4 градус хүйтнээс 1 градус дулаан, говийн бүс нутгийн өмнөд хэсгээр шөнөдөө 0-5 градус хүйтэн, өдөртөө 7-12 градус дулаан, бусад нутгаар шөнөдөө 7-12 градус хүйтэн, өдөртөө 1-6 градус дулаан байна.

УИХ-ын БОХХААБХ-ны дарга Л.Элдэв-Очир, УИХ-ын гишүүн А.Ундраа нар Баяжуулсан хүнсний тухай хуулийн төслийг УИХ-ын чуулганы нэгдсэн хуралдааны холбогдох шатны хэлэлцүүлэгт бэлтгэх ажлын хүрээнд Улаанбаатар хотод үйл ажиллагаа явуулдаг сүүний үйлдвэрүүдтэй өнөөдөр (2018.03.12) танилцлаа.

УИХ-ын гишүүд эхлээд нийслэлийн Хан-Уул дүүрэгт байрлах “АПУ дейри” ХХК-ийн сүүний үйлдвэрийн үйл ажиллагаатай танилцав. Үйлдвэрийн хүчин чадал, үйл ажиллагааны талаар тус үйлдвэрийн гүйцэтгэх захирал Г.Энхбилэг танилцуулахдаа, 2014 онд ашиглалтад орсон манай үйлдвэр жилд 45 сая литр бүтээгдэхүүн боловсруулах хүчин чадалтай. Хэдийгээр жилээс жилд шингэн сүүний хэрэглээ нэмэгдэж байгаа ч Д аминдэмийн дутагдал орон даяар, ялангуяа нийслэлд их байна. Тиймээс олон улсын стандарт, технологийн дагуу бүтээгдэхүүнээ Д аминдэмээр баяжуулан үйлдвэрлэж байгааг онцоллоо.

УИХ-ын гишүүн А.Ундраа “Саяхан Эрүүл мэндийн яам, Нийгмийн эрүүл мэндийн газар, НҮБ-ын Хүүхдийн төлөө сан хамтран Хүнс тэжээлийн тавдугаар судалгааны дүнг гаргасан. Манай нийт хүн амын дунд А, Д аминдэм, төмөр, фолийн хүчил зэрэг заавал байх ёстой шим тэжээлийн дутагдал дунджаар 95 хувьтай байгаа нь дахин батлагдлаа. Энэ нь ялангуяа, өндөр настан, бага насны хүүхэд, жирэмсэн эхчүүд, жирэмслэх насны эмэгтэйчүүдэд хүндээр тусаж, зарим өвчний суурь нөхцөл болж байна. Тийм учраас хамгийн өргөн хэрэглэгддэг хүнс тэжээлийг тухайлбал, гурил, сүү, талх зэрэг бүтээгдэхүүнийг баяжуулах зайлшгүй шаардлага байна” гэлээ.

Дараа нь УИХ-ын гишүүд хүүхдийн сүүний үйлдвэр нэртэйгээр 1991 онд байгуулагдсан “Монсүү” ХХК-ийнүйл ажиллагаатай танилцлаа. Үйлдвэрийн захирал Ч.Хадбаатар манай үйлдвэр зөвхөн малын гаралтай шингэн сүүгээр үйлдвэрлэлээ явуулж, байгалийн болон химийн гаралтай тогтворжуулагч бодис хольдоггүй, хуурай сүү хэрэглэдэггүй гээд, түүхий эдийн татан авалт буюу тээвэрлэлт, нөөцийн асуудал манай салбарын үйлдвэрлэгчдийн нийтлэг бэрхшээл болоод байна. Хэдийгээр 60 гаруй сая малтай боловч энэ нөөцийнхөө маш бага хувийг хот тойрсон бүс нутгаасаа хангаад үлдсэн хэсгийг нь ашиглаж чадахгүй байгааг онцлов.

БОХХАБХ-ны дарга Л.Элдэв-Очир Баяжуулсан хүнсний тухай хуулийн төсөл УИХ-д өргөн баригдаад хоёр жил болж байгааг тэмдэглээд, баяжуулсан хүнсийг хуульчилж баталгаажуулснаар хүн амын эрүүл мэнд, өсөлт хөгжилтөд эерэгээр нөлөөлөх нь гарцаагүй. Монгол хүн эрүүл орчинд амьдарч, эрүүл хүнс хэрэглэх ёстой. Ард иргэдийн маань амжиргаа сайнгүй, олдсон хүнс тэжээлээ л хэрэглээд явж байгаа ийм үед төр иргэддээ анхаарал хандуулж, энэ хуулийг нэн даруй батлах ёстой. Гэхдээ зөвхөн бүтээгдэхүүн баяжуулах үйлдвэрлэлийн асуудлыг биш тухайлбал сүү, сүүн бүтээгдэхүүний ханган нийлүүлэлт, тээвэр ложистик, үйлдвэрлэгчдэд тавигдах чанар, стандарт, хүндрэл бэрхшээл зэргийг урьдчилж харж байж, эрх зүйн орчныг нь оновчтой бүрдүүлэх ёстой гэлээ.

Анх шим тэжээлийн дутагдлаас үүдэн түүнийг нөхөх зорилгоор АНУ, Канадад хүнсийг баяжуулж эхэлсэн байдаг. Түүнээс хойш бамбай өвчнөөс сэргийлж давсыг иодоор, ракит, сульдаа өвчнөөс сэргийлж сүүг Д аминдэмээр, түүнчлэн гурил, талх, ургамлын тос зэргийг баяжуулж хэрэглэх замаар хүн амынхаа шим тэжээлийн дутагдлыг нөхөх, өвчлөлөөс сэргийлэх зохицуулалт олон оронд бий болжээ гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.

Монгол цэргийн өдөр, Зэвсэгт хүчний 97 жилийн ойн баярыг тохиолдуулан Баянзүрх дүүргийн Засаг даргын Тамгын газар, Цэргийн штабаас ‘’Андуудаа одонгоо зүүцгээе’’ хүндэтгэлийн арга хэмжээг амжилттай зохион байгууллаа.

Уг арга хэмжээнд Баянзүрх дүүргийн Засаг дарга Т.Баясах, ИТХ-ын нарийн бичгийн дарга Г.Болормаа, Эдийн засаг, хөгжлийн асуудал хариуцсан-Засаг даргын орлогч Д.Уламбаяр, Хөдөлмөр эрхлэлт, нийгмийн хөгжлийн асуудал хариуцсан-Засаг даргын орлогч Б.Наранчулуун, Засаг даргын Тамгын газрын дарга Б.Амартүвшин, Цэргийн штабын дарга Ч.Цог болон үе, үеийн ахмад офицерууд, албаны бусад хүмүүс оролцлоо.

‘’Андуудаа одонгоо зүүцгээе’’ хүндэтгэлийн арга хэмжээ жил бүр уламжлал болгон зохион байгуулагдаад 10 жил болж байна. Тэгвэл өнөөдөр Монгол бөхийн өргөөнд болсон энэхүү арга хэмжээнд Зэвсэгт хүчний 015 дугаар ангийн хугацаат цэргийн байлдагч нар, Батлан Хамгаалахын Их сургуулийн сонсогчид, Их засаг их сургууль, Санхүү эдийн засгийн дээд сургуулийн оюутанууд, мөн тэтгэвэр чөлөөнд байгаа 2000 гаруй бэлтгэл генерал, офицерууд оролцов хэмээн Баянзүрх дүүргийн ЗДТГ-ын Хэвлэл мэдээллийн албанаас мэдээллээ.

Нийслэлийн Мэдээллийн Технологийн газрын дарга О.Чинзориг “VTV” телевизийн Өдрийн хөтөлбөрт оролцож нийслэлд мэдээллийн технологийн чиглэлээр хийж хэрэгжүүлсэн болон цаашид хийх ажлынхаа талаар ярилцлаа.

Мэдээллийн технологийг оновчтой ашиглах замаар засаглалыг илүү сайжруулан, нийслэлийн төрийн үйлчилгээг цахимжуулах, иргэдэд ил тод, хүртээмжтэй болгох, шат дамжлагыг багасгах зорилгоор тус газрын зүгээс олон ажлыг шат дараатайгаар хийсээр байна гэж нийслэлийн Мэдээллийн технологийн газраас мэдээллээ.

Хаврын улиралд махны хомсдол үүсч, махны үнэ хөөрөгддөг. ХХААХҮЯ-наас махны борлуулалтыг тогтвортой байлгах үүднээс нөөцийн мах бэлтгэн, дөрөвдүгээр сараас худалдаанд гаргахаар зэхэж байна. Мах бэлтгэхэд зориулан баталсан төсвийн хүрээнд арилжааны дөрвөн банктай гэрээ байгуулан, 10 ААН-ээс 12.6 мянган тонн мах бэлтгэжээ. Нөөцийн мах бэлтгэл мал тарга тэвээрэг сайтай байх үед хийгдэж, стандартын дагуу махаа бэлтгэж иргэдэд хүргэх юм байна.

Өнгөрсөн жилийн хавар нөөцийн мах бэлтгэх ажил зохион байгуулж, 15 мянган тонн нөөцийн мах бэлдсэн. Тухайн үед үхрийн мах 10 мянган төгрөг хүрээд байсан бол нөөцийн махыг худалдаанд гаргаснаар үнийг 30 орчим хувиар бууруулжээ. Энэ жилийн хувьд, ААН-үүдтэй байгуулсан гэрээний хүрээнд үхрийн махыг 5600 төгрөг, хонины махыг 5400 төгрөг, ямааны махыг 4400 төгрөгөөр борлуулах юм байна.

Энэ сарын 1-нээс эхлэн нийслэлийн бүх дүүргийн 2 сартай хүүхдүүдийг уушгины хатгалгаа буюу пневмококкийн эсрэг 13 цент вакцинаар дархлаажуулж эхэлсэн. Энэ ажил газар дээрээ хэрхэн явагдаж байгаатай Эрүүл мэндийн сайд Д.Сарангэрэл, НЭМГ-ын дарга Л.Төмөрбаатар, ЭМЯ-ны Тандалт шуурхай удирдлагын хэлтсийн дарга Д.Нарангэрэл нар танилцахаар өнөөдөр Сүхбаатар дүүргийн нэгдсэн эмнэлгийн Дархлаажуулалтын тасагт ажиллалаа. Тус дүүргийн хувьд өдөрт 20-25 хүүхэдэд вакцин хийдэг. Нийтдээ 150 хүүхэд хамрагдах ёстойгоос 94 хувийн хамрагдалтай байна.

Эхний тунг хоёр сартай, хоёр дахь тунг 4 сартай, гурав дахь тунг 9 сартай хүүхдэд тус тус хийнэ. Одоогийн байдлаар вакцинжуулалт 40 хувьтай үргэлжилж байна. Энэ үер Эрүүл мэндийн сайд Д.Сарангэрэл хэлэхдээ энэ онд 38 мянган хүүхдийг 3 удаагийн тунгаар дархлаажуулахад шаардлагатай 110 мянган хүн/тун вакциныг НҮБ-ын Хүүхдийн санд захиалж, 35 мянган хүн/тунг хүлээж авсан бөгөөд үлдсэн 75 мянган хүн/тун вакциныг хоёрдугаар улиралд багтаан авна. Вакцины зах зээлийн үнэ нэг хүн/тун нь 13-15 ам.доллар байдаг. Харин НҮБ-ын Хүүхдийн сангийн хөнгөлөлттэй үнэ болох 3,5 ам.доллараар худалдан авч байна гэлээ.

Уг вакцины 3 тунг бүрэн авсан хүүхэд пневмококкоор үүсгэгдсэн уушгины хатгаа өвчний эсрэг 10-15 жилийн дархлаа тогтоно. Эцэг эхчүүд хүүхдээ өрхийн эмнэлэг дээрээ товлолын дагуу вакцинд хамруулах боломжтой.