Month: March 2018

2018 оны 3 дугаар сарын 07-10-ны өдрүүдэд Монгол Улсын Их хурлын гишүүн, Батлан хамгаалахын сайд Н.Энхболд БНЭУ-ын Батлан хамгаалахын сайд, хатагтай Нирмала Ситараманы урилгаар БНЭУ-д албан ёсны айлчлал хийлээ. Батлан хамгаалахын сайдыг дагалдан БХЯ-ны СБТГ-ын дарга, бригадын генерал Г. Сайханбаяр, ГХАГ-ын ахлах мэргэжилтэн, дэд хурандаа Д.Мягмаржав, Зэвсэгт хүчний 084 дүгээр ангийн захирагч, хурандаа Б.Хаш-Эрдэнэ нар ажиллав.

Монгол-Энэтхэгийн харилцаа, хамтын ажиллагаа олон салбарт амжилттай хөгжиж байна. Хоёр орны харилцааг хөгжүүлэхэд хоёр орны батлан хамгаалах салбарын харилцаа чухал байр эзэлдэг.
Хоёр орны Батлан хамгаалах яамд харилцан айлчлал хийх, мэдээллийн технологийн салбарын чиглэлээр хамтран ажиллах, энхийг дэмжих болон терроризмтэй тэмцэх хамтарсан сургууль, дадлага зохион байгуулах, боловсон хүчнээ бэлтгэх зэрэг чиглэлээр амжилттай хамтран ажиллаж байна. Албан ёсны уулзалт, ярилцлагууд эхлэхийн өмнө буюу гуравдугаар сарын 08-ны өдөр БНЭУ-ын нийслэл Шинэ Дели хотын төвийн \”Энэтхэгийн хаалга\”-ны дэлхийн I дайнд амь үрэгдсэн 130 гаруй мянган цэргийн алба хаагчдын дурсгалын цогцолборт цэцэг өргөв.
Уг арга хэмжээний дараа айлчлалын бүрэлдэхүүн тус улсын Батлан хамгаалах яаманд хүрэлцэн ирсэн ба Батлан хамгаалахын сайд Н.Энхболдыг БНЭУ-ын Төрийн хүндэт харуул жагсан, Батлан хамгаалахын төрийн сайд доктор Субхаш Бамрэ угтан авлаа. Монгол Улсын Батлан хамгаалахын сайд Н.Энхболд, БНЭУ-ын Батлан хамгаалахын сайд хатагтай Нирмала Ситараман, Батлан хамгаалахын төрийн сайд доктор Субхаш Бамрэ, Үндэсний Аюулгүй байдлын зөвлөх ноён Ажит Довал, БНЭУ-ын Армийн Штабын дарга, генерал Бипин Рават нартай албан ёсны уулзалт зохион байгуулж хоёр орны батлан хамгаалах харилцаа хамтын ажиллагааны талаар санал солилцож, цаашдын хамтын ажиллагааны чиглэлээр харилцан тохиролцлоо. Түүнчлэн саяхан байгуулагдаад байгаа БНЭУ-ын парламент дэх Монгол Улс, БНЭУ-ын парламентийн найрамдлын бүлгийн зарим гишүүнтэй уулзаж хоёр орны харилцаа хамтын ажиллагаа, цаашид хамтран ажиллах боломжийн тухай санал солилцсон.
Мөн Батлан хамгаалахын төрийн сайд доктор Субхаш Бамрэ тэргүүнтэй Батлан хамгаалах яам, тус улсын Армийн командлалын холбогдох бүрэлдэхүүнтэй хоёр орны батлан хамгаалах харилцааны талаар харилцан санал солилцож, цаашид хамтын ажиллагааг хөгжүүлэх чиглэлүүдийг тодорхойлсон юм.

Хоёр орны батлан хамгаалах салбарын харилцаа, хамтын ажиллагаа сүүлийн жилүүдэд эрчимтэй хөгжиж байгаа бөгөөд тэр дундаа тусгай хүчний ангиудын хамтарсан сургууль дадлага жил бүр явагддаг. Айлчлалын хүрээнд ч Агра хот дахь БНЭУ-ын Зэвсэгт хүчний Шүхэр десантын 50 дугаар бригад, тус улсын Үндэсний Батлан хамгаалахын коллежид айлчилж үйл ажиллагаатай танилцсан. Тус бригад нь 75 жилийн түүхтэй ажээ.
Ерөнхий сайд Нарендра Модигийн 2015 оны тавдугаар сард Монгол Улсад хийсэн айлчлалын үеэр \”Монгол Улсын Засгийн газар, Бүгд Найрамдах Энэтхэг Улсын Засгийн газар хоорондын Монголын Улсын Батлан хамгаалах яаманд кибер аюулгүй байдлын сургалтын төв байгуулах харилцан ойлголцлын санамж бичиг\”-т талууд гарын үсэг зурсан нь 2001 оноос эхтэй Монгол Улс, БНЭУ-ын батлан хамгаалах салбарын харилцааг дээшлүүлэхэд чухал алхам болсон юм. Энэхүү санамж бичгийн хэрэгжилтийг ханган нягт хамтран ажиллаж энэхүү сургалтын төвийн үйл ажиллагааг ойрын хугацаанд эхлүүлэхэд хамтран ажиллахаа талууд илэрхийлэв.
Бас нэг онцлох чиглэл нь сургалтын тухай байв. Монгол Улсын Зэвсэгт хүчний офицер, ахлагч нар БНЭУ-ын батлан хамгаалах коллеж, сургууль, сургалт дамжаануудад суралцаж цэргийн хэргийн мэдлэг, боловсролоо дээшлүүлж ирсэн уламжлалтай. Цаашид цэргийн алба хаагчдыг үргэлжүүлэн сургах, сургалтын нэр төрлийг нэмэгдүүлэх, Монгол Улсын Зэвсэгт хүчний чадавхийг дээшлүүлэх чухал арга хэмжээний нэг болох шат дараалласан сургалтад Монгол Улсын Зэвсэгт хүчний бие бүрэлдэхүүнийг сургах асуудал айлчлалын үеэр яригдсан чухал асуудлын нэг байв. БНЭУ-ын Зэвсэгт хүчний сургалт, дамжаанд суралцсан цэргийн алба хаагчид дараагийн шатны сургалтад хамрагдах боломжгүй байдаг. Учир нь Энэтхэгийн тал нэг алба хаагч нэг удаа тус улсын сургалтад хамрагддаг ба сургалтыг өргөн хүрээнд олон хүнийг хамруулж, олон хүн сургах бодлого баримталдаг байна. Гэхдээ Энэтхэг улсын Батлан хамгаалах салбарын удирдлагууд Монгол Улсын Зэвсэгт хүчний шат дараалласан сургалтаар бүрэлдэхүүнийг сургаж, дадлагажуулах нь илүү ач холбогдол, үр дүнтэй байдаг сургалтын онцлог, бодлогыг харгалзан үзэж баримталж буй бодлогодоо өөрчлөлт оруулах талаар шаардлагатай арга хэмжээг авч хэрэгжүүлэхээ илэрийлсэн юм. Түүнчлэн Монгол Улсын Үндэсний Батлан хамгаалах сургууль, БНЭУ-ын Үндэсний Батлан хамгаалах коллеж хооронд хамтын ажиллагааг эхлүүлэн хөгжүүлэх, цэргийн эмнэлгүүдийн харилцааг хөгжүүлэх, эмч мэргэжилтнүүдийн чадавхийг нэмэгдүүлэх, харилцан туршлага солилцох чиглэлээр хамтын ажиллагаагаа өргөжүүлэхээр хоёр тал харилцан тохиролцов.
Монгол Улсад жил бүр уламжлал болон зохион байгуулагддаг \”Khaan Quest\” энхийг дэмжих ажиллагааны олон улсын сургуульд БНЭУ-ын Зэвсэгт хүчнээс тогтмол оролцож, энхийг дэмжих ажиллагааны чиглэлээр харилцан туршлага солилцдог ба БНЭУ-ын зүгээс тус сургуулийн ач холбогдлыг өндрөөр үнэлдгээ илэрхийлээд цаашдын оролцоогоо хадгалах, өсөн нэмэгдүүлэх чиглэлээр хамтран ажиллахаар хоёр тал харилцан тохиролцлоо. Хоёр орны Зэвсэгт хүчний хамтын ажиллагааны хамгийн чухал, үр дүнтэй арга хэмжээнүүдийн нэг нь жил бүр уламжлал болгон зохион байгуулдаг \”Нүүдэлчин заан\” тусгай хүчний хамтарсан сургууль юм. 2004 оноос уламжлал болгон зохион байгуулж буй энэхүү хоёр талын хамтарсан сургууль нь харилцан туршлага судлах, харилцан бие биеэс суралцах байгаль, цаг агаарын өөр өөр нөхцөлд үүрэг гүйцэтгэх арга ажиллагаанд бие бүрэлдэхүүнийг сургахад чухал ач холбогдолтой. Айлчлалын талаар

Батлан хамгаалахын сайд Н.ЭНХБОЛД:
-БНЭУ-ын тал манай айлчлалын бүрэлдэхүүнийг маш дотноор хүлээн авч, бидний зүгээс тавьсан санал, асуудал бүрийг хамтран шийдэхэд бэлэн гэдгээ илэрхийлсэн. Тийм болохоор айлчлалын үр дүнд маш сэтгэл хангалуун байна. Цаашдаа олон талаар хамтран ажиллах тохиролцоонд хүрлээ.

БХЯ-ны СБТГ-ын дарга, бригадын генерал Г.САЙХАНБАЯР:
-Хоёр улсын батлан хамгаалах салбарын хамтын ажиллагааг өргөжүүлэн хөгжүүлэхэд чухал ахиц гарсан айлчлал боллоо. Ялангуяа манай улсын цэргийн алба хаагчдыг БНЭУ-д кибер аюулгүй байдал, англи хэл болон бусад сургалтад хамруулах, мэргэжил дээшлүүлэх, давтан сургах зэрэг чиглэлээр тодорхой тохиролцоонд хүрснийг онцлох нь зүйтэй. Мөн хоёр улсын цэргийн эмнэлгийн хамтын ажиллагааг шинэ түвшинд хүргэх, эмч нарыг харилцан туршлага солилцуулах, нарийн мэргэжлийн мэс ажилбаруудыг хамтран хийж байхаар боллоо.

Зэвсэгт хүчний 084 дүгээр анийн захирагч, хурандаа Б.ХАШ-ЭРДЭНЭ:
-Хоёр улсын тусгай хүчний хамтарсан \”Нүүдэлчин заан\” хээрийн сургууль 2004 оноос жил бүр уламжлал болгон явагдаж ирсэн түүхтэй. Энэ удаагийн айлчлалаар манай улсын тусгай хүчний ангид техник хэрэгслийн туслалцаа үзүүлэх, хамтран ажиллах зэрэг олон талын тохиролцоонд хүрсэнд баяртай байна гэж сэтгэгдлээ товч илэрхийсэн юм.
Монгол Улсын Их хурлын гишүүн, Батлан хамгаалахын сайд Н.Энхболд айлчлал Катар улсад үргэлжилж байна гэж Батлан хамгаалах яамнаас мэдээллээ.

Дорноговь аймгийн Замын-Үүд сумаас алга болсон Д.Сэржмядаг охины сураг гараагүй байгаа энэ үед 13 настай охин алга талаар мэдээлэл цацагдаад байна. Охин өчигдөр буюу гуравдугаар сарын 12-ны өдөр хичээлдээ явах гэж гараад одоо болтол гэртээ эргэж ирээгүй байна. Гэрээс гарахдаа хар богино куртка, урт түрийтэй лакан гуталтай цагаан ноосон цамцтай, хар цүнхтэй гарсан аж. Түүний сууж явсан таксины зургийг хяналтын камерт бичигдэж үлдсэн боловч одоог болтол олоогүй байгаа аж. Тиймд дээрхи такси болон охиныг харсан хүн байвал 96666886, 96657887, 96667887, 98164499, 96646864 утсаар холбоо барьж, мэдээлэл өгнө үү. Энэ хэргийг Цагдаагийн байгууллага шалгаж байгаа юм байна.

Бүгд найрамдах Польш Улс, Украин, Куба, Беларусь, Болгар, Казахстан, БНВУ, БНЛУд суралцуулах сонгон шалгаруулалт зарлагдлаа.

Мэргэжлийн чиглэл:

Польш: Байгаль орчин, ногоон хөгжил, тусгай хэрэгцээт боловсрол, сургуулийн өмнөх боловсролын арга зүй, соёлын өвийн сэргээн засварлагч, соёл урлаг, уул уурхай, хөдөө аж ахуй, сэргээгдэх эрчим хүч, цөмийн энерги, зам тээвэр, барилга хот байгуулалт, биотехнологи, нанотехнологи, химийн инженерчлэл, логопед, хэл судлал

Куба: Анагаах ухаан;

Болгар: Хөдөө аж ахуй,хүнсний инженерчлэл;

Беларусь: Хөдөө аж ахуй;

Казакстан: Уул уурхай, Олон улсын харилцаа, нэхмэлийн үйлдвэрлэл, зам гүүрний барилга, байгууламжийн инженер;

Вьетнам: Олон улсын харилцаа, хүнсний инженерчлэл, анагаах ухаан, аялал жуулчлал, Соёлын өвийн сэргээн засварлах, усны нөөцийн менежмент, сэргээгдэх эрчим хүч;

Лаос: Олон улсын харилцаа, хууль, эдийн засаг;

Украин: Биеийн тамир, уул уурхайн инженер, нисэхийн инженер, авто замын инженер, хөдөө аж ахуйнн инженер, төмөр замын инженер, авто тээвэр зохион байгуулалт, барилгын инженерын чиглэлээр, доктор байгалийн ухааны чиглэлээр суралцуулна.

Нэг. Тавигдах шаардлага

Бакалавр

Ерөнхий боловсролын сургуулийн төгсөх ангийн иргэн, Монгол Улсын магадлан итгэмжлэгдсэн их, дээд сургууль, коллежийн 1, 2 дугаар ангид 3.0 ба түүнээс дээш голч дүнтэй суралцаж байгаа;

Магистр, доктор

Магистрант: бакалаврын зэрэгтэй, 3.0 ба түүнээс дээш голч дүнтэй, 2-оос доошгүй жил ажилласан ажлын туршлагатай, 35 хүртэлх насны;

Докторант: магистр зэрэгтэй, 3.0 ба түүнээс дээш голч дүнтэй, 2-оос доошгүй жил ажилласан ажлын туршлагатай, 45 хүртэлх насны

Хоёр. Бүрдүүлэх баримт бичиг:

Монгол Улсын магадлан итгэмжлэгдсэн их, дээд сургууль, коллежийн 1, 2 дугаар ангид суралцаж буй иргэн:

Цахим өргөдөл

Суралцаж буй сургуулийн тодорхойлолт;

Дүнгийн хуулбарын эх хувь /голч дүнтэй/;

Бүрэн дунд боловсролын гэрчилгээ, дүнгийн хавсралтын нотариатаар баталгаажуулсан хуулбар;

Иргэний үнэмлэхийн нотариатаар баталгаажуулсан хуулбар

Сонгон шалгаруулалтад орохыг дэмжсэн сургуулийн захирлын албан бичиг;

Бүртгэлийн хураамж 15000 төгрөг төлсөн баримт.

Гадаад паспорт

Ерөнхий боловсролын сургуулийн төгсөх ангийн иргэн:

Цахим өргөдөл

Сонгон шалгаруулалтад орохыг дэмжсэн сургуулийн захирлын албан бичиг;

Сүүлийн хагас жилийн дүнгийн тодорхойлолт;

Иргэний үнэмлэхийн нотариатаар баталгаажуулсан хуулбар;

Бүртгэлийн хураамж 15000 төгрөг төлсөн баримт;

Гадаад паспорт

Магистр, докторын сургалтад бүртгүүлсэн иргэд:

-Цахим өргөдөл

-Иргэний үнэмлэхийн нотариатаар баталгаажуулсан хуулбар;

-Хамгийн сүүлд ажиллаж байсан эсвэл ажиллаж байгаа байгууллагын ажил, зан байдлын дэлгэрэнгүй тодорхойлолт;

-Дээд боловсролын зэргийн дипломууд, тэдгээрийн дүнгийн жагсаалтын нотариатаар баталгаажуулсан хуулбар (Боловсролын баримт бичиг монгол хэл дээр биш бол монгол хэл дээрх албан ёсны орчуулгыг хавсаргах);

-Англи хэлний түвшин тодорхойлох олон улсад хүлээн зөвшөөрөгдсөн шалгалт өгсөн бол хуулбарыг хавсаргах /Шалгалтыг 2016 оны 9 сараас хойш өгсөн байх/

-Суралцах хөтөлбөр, төлөвлөгөө (Англи, Монгол хэл дээр 500-аас цөөнгүй үгтэй байх);

Эрдэм шинжилгээний бүтээлийн жагсаалт (Докторын сургалтад өргөдөл гаргах иргэд зайлшгүй хавсаргах, магистрын сургалтад өргөдөл гаргах иргэд хавсаргах шаардлагагүй ч хавсаргавал давуу талтай.)

Бүртгэлийн хураамж 15000 төгрөг төлсөн баримт;

Гадаад паспорт

Гурав. Бүртгэл

2018 оны 03 дугаар сарын 12-наас 04 сарын 08-ны өдрийн 23 цаг хүртэл esis.edu.mn/grant цахим хаягаар бүртгэл хийнэ. Холбоосоор хандан, хэрэглэгчийн эрх үүсгэн нэвтэрч, цахим өргөдлийг бөглөж, Цахим өргөдөлд дурдсан баримт бичиг тус бүрийг PDF хэлбэрээр “баримт бичиг” хэсэгт хавсаргана.

Бүртгэлийн хураамж 15000 төгрөгийг Төрийн сан дахь Боловсрол, соёл, шинжлэх ухаан, спортын яамны 100900015431 тоот дансанд тушаана. Хураамж төлсөн баримтад бүртгүүлэгчийн овог, нэр, регистрийн дугаар, утасны дугаар, гүйлгээний утга буюу аль улсын ямар тэтгэлэгт бүртгүүлэх тухай мэдээллийг заавал оруулах шаардлагатай.

Дөрөв. Сонгон шалгаруулалт

Сонгон шалгаруулалтад оролцогч дараах шалгалтыг өгнө:

Бакалаврын сургалтад бүртгүүлсэн иргэд математик, англи хэлний нэгдсэн шалгалтыг тестийн хэлбэрээр өгнө.

2018 оны 04 дүгээр сарын 14-ний өдрийн 11.00 цагт Математик, 14:00 Англи хэлний шалгалтыг Шинжлэх ухаан, технологийн их сургуулийн 1-р байранд тус тус зохион байгуулна. Шаардлага гарвал шалгалт авах нэмэлт байр гаргаж, шалгалтын үеэр жич зарлана.

Бүртгүүлэгч шалгалт эхлэхээс 30 минутын өмнө, иргэний үнэмлэхтэй ирэх шаардлагатай. Иргэний үнэмлэхгүй иргэнийг шалгалтад оруулахгүй.

Бичгийн шалгалтын дүн болон ярилцлагад орох иргэдийн нэрс, ярилцлагын цагийн хуваарийг 2018 оны 04 дүгээр сарын 14-ны өдрийн 18.00 цагт Боловсрол, соёл, шинжлэх ухаан, спортын яамны цахим хуудас дахь “гадаадад суралцах” цэсэд зарлана.

Ярилцлагыг 2018 оны 04 дүгээр сарын 15-ны өдөр 10 цагт Шинжлэх ухаан, технологийн их сургуулийн 1-р байранд зохион байгуулна. Ярилцлагад ирэхдээ бүртгэлд ирүүлсэн бичиг баримтаа эх хувиар нь авчирэх шаардлагатай.

Ярилцлагад тэнцсэн иргэдийн нэрсийг 2018 оны 04 дугаар сарын 15-ны өдөр Боловсрол, соёл, шинжлэх ухаан, спортын яамны цахим хуудас дахь “гадаадад суралцах” цэсэд зарлана.

Магистр, докторын сургалтад бүртгүүлсэн иргэд:

Бүртгүүлэгчдийн ирүүлсэн бичиг баримтад үнэлэлт, дүгнэлт өгөх хэлбэрээр ярилцлагад орох иргэдийн нэрсийг тодруулж, ярилцлагын цагийн хуваарь, байршлыг 2018 оны 04 дүгээр сарын 13-ны өдрийн 18.00 цагт Боловсрол, соёл, шинжлэх ухаан, спортын яамны цахим хуудас дахь “гадаадад суралцах” цэсэд зарлана.

Ярилцлагыг 2018 оны 04 дүгээр сарын 14, 15-ны өдөр зохион байгуулна

Бүртгэлийн асуудлаарх лавлагаа, мэдээллийг Боловсрол соёл, шинжлэх ухаан, спортын яамны +51 267131 утсаар авч болох юм.

Морин эрдэнэ