Month: March 2018

Найз охинтойгоо муудалцсан залуу уурандаа амиа хорлохыг завдсан хэргийг Баянгол дүүрэг дэх цагдаагийн нэгдүгээр хэлтэст шалгаж байна. Өнгөрөгч хоногт цагдаагийн байгууллагад “Манай охины найз залуу амиа хорлох гээд байна” гэх дуудлага ирсний дагуу очиж шалгалтын ажиллагааг явуулан, бусдын амиа хорлох гэсэн үйлдлийг таслан зогсоожээ.

Уг этгээд нь Баянгол дүүргийн 23 дугаар хороонд оршин суух хаягтай, 26 настай, Э гэгч байсан бөгөөд хүзүүн тус газартаа гэмтэл учруулсны улмаас эмнэлэгт хүргэгдэн эмчилгээ хийлгэжээ. Өнгөрөгч долоо хоногт согтуурсан үедээ бусдыг айлган сүрдүүлэх зорилгоор амиа хорлохыг завдсан үйлдлийг цагдаагийн алба хаагчид таслан зогсоож байсан.

Залуус уурын мунхаг, ухамсаргүй байдал, архи, согтууруулах ундаа хэтрүүлэн хэрэглэсний улмаас эрүүл мэнд, амь насаа хохироох эрсдэлтэй болчимгүй үйлдэл хийж байгаа нь харамсалтай. “Тэрхэн мөчид биеэ барьж чадсан бол…” гэдэг харамсал тээж, өөрийн болон бусдын амьдралд хар толбо үйлдээхгүйн тулд ухамсартай, хариуцлагатай байцгаая.

Улаанбаатар хотын Захирагчийн ажлын албанаас хотын хөгжлийн чиг хандлага, иргэдийн хүсэл тэмүүллийг харуулсан, иргэдэд хотын соёл, гоо зүйн боловсролыг олгох нийгмийн зар сурталчилгааны баримлыг нийтийн эзэмшлийн гудамж талбайд бий болгох зорилгоор “Хүрээ соёл” баримлын загвар шалгаруулах уралдаан зарлаж байна.

Уралдаанд их дээд суруулийн оюутан, уран бүтээлчид, бүтээлч сэтгэлгээтэй иргэд оролцох боломжтой бөгөөд оролцогч нь хотын нийтийн эдэлбэрийн газраас тухайлсан орон зайг сонгон, нийгмийн зар сурталчилгааг түгээх баримлын загвар төслийг хийж, баримлын хэмжээ, өнгө, хийц материал зэргийг тодорхой тусган харуулсан жижиг хувилбарыг эскиз зураг, төсвийн саналын хамтаар ирүүлнэ.

Төслийг ирэх сарын 20-ны өдрийг дуустал нэг үе шаттайгаар зохион байгуулж, дүнг 2018 оны тавдугаар сарын 1-ний өдөр гаргана.

Ирүүлсэн загваруудыг нэгдүгээр байрт-1, хоёрдугаар байрт-2, гуравдугаар байрт-3, нийт 6 загвар шалгаруулан, Улаанбаатар Ерөнхий менежерийн хүндэт өргөмжлөлөөр шагнана.

Шалгарсан шилдэг загваруудыг 2018 оны хаврын тохижилтын ажлын хүрээнд нийтийн эзэмшлийн гудамж талбайд хийх байрлуулахаар төлөвлөж байна гэж Улаанбаатар хотын Захирагчийн ажлын албанаас мэдээллээ.

Ерөнхий боловсролын сургуулийн ахлах ангийн сурагчдыг мэргэжлээ зөв сонгоход нь туслах зорилгоор Засгийн газрын хэрэгжүүлэгч агентлаг Гэр бүл, хүүхэд, залуучуудын хөгжлийн газар, нийслэлийн Залуучуудын хөгжлийн газар болон холбогдох байгууллагууд хамтран “Ирээдүйн эзэд” мэргэжил сонголтын аяныг хоёр дахь жилдээ буюу энэ сарын сарын 5-наас ирэх тавдугаар сарын 1-ний өдар хүртэл зохион байгуулж байна.

Аяны ээлжит сургалтыг Сан дээд сургуулийн танхимд өчигдөр зохион байгуулж, Баянгол дүүргийн ерөнхий боловсролын 19, 47, 73, Ес эрдэм, Эрхэт эрдэм, Эрдмийн ач, Номун далай, Русская гимназия сургуулиудын 350 гаруй ахлах ангийн сурагчи хамрагдлаа.

Энэ үеэр хувь хүний хөгжлийн талаар Засгийн газрын хэрэгжүүлэгч агентлаг Гэр бүл, хүүхэд, залуучуудын хөгжлийн газрын ахлах мэргэжилтэн Н.Мандуул, мэргэжлийн чиг баримжаа олгох, мэргэжил сонголтын талаар Нийслэлийн Залуучуудын хөгжлийн газрын мэргэжилтэн Д.Доржхорол нар мэдээлэл өглөө.

Аяны хүрээнд 21 аймаг, 9 дүүргийн ЕБС-ийн X-XII ангийн сурагчдад “Мэргэжлээ хэрхэн зөв сонгох вэ” уулзалтыг зохион байгуулж, мэргэжил сонголтын тухай зөвлөгөө, мэдээлэл өгнө гэж нийслэлийн Залуучуудын хөгжлийн газраас мэдээллээ.

НҮБ-ын Эмэгтэйчүүдийн аж байдлын комиссын 62 дугаар чуулган Нью-Йорк хотноо болж буй бөгөөд энэхүү чуулганд Улсын Их Хурлын гишүүн, Өргөдлийн байнгын хорооны дарга М.Оюунчимэг тэргүүтэй төлөөлөгчид оролцож байна.

Чуулганы хүрээнд зохион байгуулсан “Хөдөөгийн эмэгтэйчүүд, охидын жендерийн тэгш байдлыг хангах, чадавхижуулахад тулгарч буй сорилтууд ба шийдэл, боломж” сэдэвт хуралдаанд Улсын Их Хурлын гишүүн М.Оюунчимэг үг хэллээ. Тэрбээр хэлсэн үгэндээ, Монгол Улсын Их Хурлаар 2016 оны хоёрдугаар сард баталсан Монгол Улсын тогтвортой хөгжлийн үзэл баримтлалд жендерийн тэгш байдлыг дэмжиж, эмэгтэйчүүд, охидыг чадавхижуулахад чиглэсэн заалт оруулсан тухай тэмдэглэв.

2018 оны гуравдугаар сарын 12-25-ны өдрүүдэд болж буй энэхүү чуулганд Улсын Их Хурлын Хурлын гишүүн М.Оюунчимэг, Н.Амарзаяа, Б.Ундармаа нар оролцож буй бөгөөд энэ үеэрээ мөн НҮБ-ын системийн байгууллагуудтай хэрхэн хамтран ажиллах талаархолбогдох хүмүүстэй уулзалт, ярилцлага хийж байна хэмээн УИХ-ын Хэвлэл мэдээлэл, олон нийттэй харилцах хэлтсээс мэдээлэв.

Энэ өвөл цас их орж, өндөр уулсын орчим болон гуу, жалга, суваг, шуудуунд маш их хэмжээний цас хуримтлагдсан байгаа учраас шар усны үер буух эрсдэлтэй байгааг мэргэжлийн байгууллагуудаас анхааруулж байгаа юм.

Тиймээс нийслэлийн нутаг дэвсгэрт үерийн хамгаалалтын далан сувгийн ашиглалтын нөхцөл байдалд дүгнэлт гаргах, цаашид авч хэрэгжүүлэх арга хэмжээний санал боловсруулах, зөвлөмж гаргах үүрэг бүхий ажлын хэсгүүд Улаанбаатар хотын Ерөнхий менежер бөгөөд Захирагчийн ажлын албаны даргын А/68 дугаар тушаалаар байгуулагдан, ажиллаж байна.

Ажлын хэсэг нийслэлийн нутаг дэвсгэрт байршилтай үерийн далан, хамгаалалтын барилга байгууламжийн хэвийн ажиллагааг хангуулж, авч хэрэгжүүлэх шаардлагатай зарим арга хэмжээнүүдийг газар дээр нь шийдвэрлэн ажиллах юм гэж нийслэлийн Онцгой байдлын ерөнхий газраас мэдээллээ.

Монгол Улсын Боловсролын Их Сургуулийн харьяа гүнзгийрүүлсэн сургалттай Ерөнхий боловсролын сургууль ирэх дөрөвдүгээр сарын 1-нээс 30-ны өдрүүдэд бэлтгэл бүлгийн элсэгчдээ бүртгэх гэж байна. Улмаар бүртгүүлсэн хүүхдүүдийг 14 хоногийн бэлтгэл ангид суралцуулсны дараа нэгдүгээр ангид дэвшин сурах элсэлтийн шалгалт авч тэнцсэн элсэгчдэд батламж олгох юм.

Багш бэлтгэдэг төрийн ууган их сургуулийг түшиглэн байгуулагдсан тус лицей сургууль 2015 оноос бэлтгэл бүлэгтээ элсэлт авч эхэлжээ. “Манай сургууль одоо нэгээс тавдугаар ангийн 11 бүлэгтэй. Жил ирэх тусам хүүхдийн тоо нэмэгдсээр байна. Бага ангид гэхэд л 259 хүүхэд сурч байна. Бага ангийн сурагчдын өдөр өнжүүлэх бүлэгтэй бөгөөд энд нэгээс гуравдугаар ангийн 60 орчим хүүхэд гурван багштай хичээллэдэг” хэмээн сургалтын менежер П.Болорцэцэг хэлсэн юм.

Мөн бусад ангидаа ч элсэлт авах ажээ. Тухайлбал “Энэ жилээс шинээр хөгжмийн төрөлжсөн ангидаа 10-р ангийн сурагчдаас элсэлт авна. Ингэснээр тухайн сурагч цаашид МУБИС-ийн Багшийн сургуулийн Хөгжмийн багшийн ангид элсэлтийн ерөнхий шалгалтгүй сурах боломжтой болно” хэмээн Дотоод хяналт хариуцсан менежер Д.Номин-Эрдэнэ хэллээ.

Гүнзгийрүүлсэн сургалттай тус сургуульд их сургуулиа амжилттай төгссөн болон гаднаас урилгаар ирсэн шилдэг сайн, ур чадвартай багш нар хичээл зааж байна. Мөн МУБИС-ийн зүгээс ч багш, сурагчдын хөгжилд анхааран ажиллаж байгаа нь тус лицей сургуулийн адил төстэй сургуулиудаас ялгарах өөрийн гэсэн давуу тал нь юм.

Багш нар нь жил бүр сургалтын хөтөлбөр, арга барилаа шинэчилж бусад сургуулийн багш нартай туршлага солилцож, ур чадвараа ахиулдаг байна. Төрөл бүрийн дугуйлан болон сонгон суралцах хичээлд сурагчдаа хамруулан, хүүхдийн хөгжилд давхар анхаарч байгаагаараа бас онцлогтой. Жишээ нь физикийн шинжлэх ухаан, математикийн ухагдахуунтай холбоотой LEGO роботын дугуйланг VI – IX ангид, Электроникийн дугуйланг IX – X ангийн сурагчдын дунд хичээллүүлж, МУБИС-ийн эрдэмтэн багш нар хичээл зааж байна. Ийнхүү сурагчдыг бусдаас суралцдаг, сурах идэвх сонирхолтой, үүрэг хариуцлагаа ухамсарладаг, зөв дадал хэвшилтэй болгохыг зорьж байна.

Энэ сарын 19, 20-нд “Агаарын тээврийн либералчлал, Иргэний нисэхийн салбарын шинэчлэл” удирдах ажилтны зөвлөгөөн болох гэж байгаатай холбогдуулан либералчлал-хууль эрх зүйн шинэчлэл, нисэх буудлуудын хөгжлийн чиг хандлага, агаарын навигацийн үйлчилгээ, ерөнхий зориулалтын нисэхийн хөгжлийн талаарх хэлэлцүүлгүүд Иргэний нисэхийн ерөнхий газарт 2 өдөр болж өндөрлөлөө.

Нисэхийн салбарт үйл ажиллагаа явуулж буй төр, хувийн хэвшлийн байгууллагууд, авиа компаниуд, мэргэжлийн холбоод, аялал жуулчлалын салбарынхан оролцсон хэлэлцүүлгийн үеэр салбарт тулгарч буй бэрхшээл, цаашдын хөгжлийн талаарх саналуудаа нэгтгэсэн юм. Тухайлбал, агаарын тээврийн либералчлал гэдгийг юу гэж ойлгох талаар нэгдсэн ойлголттой болох, агаарын харилцааны хэлэлцээрүүдэд цаашид баримтлах төрийн бодлогоо тодорхойлох, өнөөдөр либералчлал Монголд хэрэгтэй юу, үгүй юу гэдэгт олон санал гарган хэлэлцэгдэж байсан. Мөн Ерөнхий зориулалтын агаарын тээврийг хөгжүүлхэд ямар бэрхшээл тулгарч байгаа, аж үйлдвэр, инновацийн хөгжилтэй хэрхэн уялдуулах вэ, хууль эрх зүйн шинэчлэлийг даруй хийх хэрэгтэй байна гэсэн асуудлуудыг ч хэлэлцүүлэгт оролцогчид хэлж санал, шүүмжээ илэрхийллээ.
Иргэд, зорчигчдын зүгээс хамгийн их гаргадаг тийзний үнэтэй холбоотой асуудалд авиа компаниуд өөр өөрсдийн санал, төлөвлөгөөтэй байна. Түүнчлэн шинэ нисэх буудлыг хэзээ ашиглалтад оруулах вэ, Хөшигийн хөндий рүү авиа компаниуд нүүхэд бэлэн үү, Монголд аялал жуулчлал хөгжихөд агаарын тээврийн салбарын үйлчилгээ нөлөөлж байгаа юу гэдгийг ирэх даваа, мягмар гаригт болох зөвлөгөөнд илтгэл тавьж хэлэлцүүлхээр тогтлоо.

Ингээд ИНЕГ-ын Дэд дарга бөгөөд Нисэхийн аюулгүй ажиллагаа, хяналт зохицуулалтын албаны дарга, Удирдах ажилтны зөвлөгөөн зохион байгуулах ажлын хэсгийн ахлагч С.Манлайгаас дараах тодруулгыг авлаа.

– Хоёр өдөр болох хурал ямар хөтөлбөрийн хүрээнд зохион байгуулагдах вэ?

– Ирэх даваа гариг буюу гуравдугаар сарын 19-нд “Агаарын тээврийн либералчлал” сэдвийн хүрээнд олон нийтийн хамгийн их сонирхдог тийзний үнэтэй холбоотой асуудлууд, либералчлалын талаарх олон улсын чиг хандлага, Монголд агаарын тээврийн либералчлалыг хэрхэн хэрэгжүүлэх талаар хэлэлцсэн томоохон өргөтгөсөн хуралдаан болно. Энэ хурлыг Зам тээврийн хөгжлийн яам, ИНЕГ хамтран зохион байгуулж байгаа юм. Аялал жуулчлалын хөгжилтэй холбоотой асуудлууд ч яригдах учраас бусад холбогдох яамдаас мөн оролцохоор төлөвлөж байна. Түүнчлэн авиа компаниуд, мэргэжлийн холбоодын төлөөллүүд, тийз борлуулагчид оролцоно. Мягмар гариг буюу гуравдугаар сарын 20-нд болох хурлаар иргэний нисэхийн салбарын шинэчлэлийн асуудлыг өргөн хүрээнд удирдах ажилтнуудын түвшинд хэлэлцэнэ. Энэ өдрийн зөвлөгөөнөөр шинэ нисэх буудал, авиа компаниудын асуудал, хууль эрх зүйн шинэчлэл, ерөнхий зориулалтын агаарын тээврийн хөгжил, нисэх буудлуудын шинэчлэлт, орон нутгийн нисэх буудлуудын цаашдын чиг хандлага зэргийг нарийвчлан ярьж зөвлөмж гаргана. Зөвлөгөөнд ЗТХЯ, Байгаль орчин, аялал жуулчлалын яам, бүх авиа компаниуд, мэргэжлийн холбоодын төлөөлөл, орон нутгийн нисэх буудлуудын удирдлагууд мөн оролцох юм.

– Зөвлөгөөнөөс ямар үр дүн хүлээж байгаа вэ?

– Засгийн газар болон, ЗТХЯ-аас дэвшүүлсэн хэд хэдэн зорилт байгаа. Тэдгээрийг хэрэгжүүлэх арга зам, гарц нь энэ хоёр өдрийн хуралдаанаас эхлэлтэй гэж үзэж байгаа. Хэлэлцэгдсэн асуудлуудыг УИХ, Засгийн газрын түвшинд хэрхэн шийдүүлэх вэ гэдгийг дэвшүүлсэн, салбарын хөгжлөө өргөн хүрээнд ярилцсан чухал ач холбогдолтой хурлууд болно. Удирдах ажилтны зөвлөгөөн хамгийн сүүлд 2013 онд зохион байгуулагдсан. Түүнээс хойш салбарт олон зүйл өөрчлөгдсөн байгаа. Тиймээс өнөөг хүртэл бид юунд хүрэв, цаашид яаж хөгжиж, дэвших вэ гэсэн ирээдүйн зорилт, зорилгоо улам сайн тодорхойлж чадна гэсэн үр дүнг хүлээж байна.

Гуравдугаар сарын 19-нд болох хурал Корпорэйт зочид буудлын /Худалдаа аж үйлдвэрийн танхимийн дэргэдэх/ хурлын зааланд болох бол 20-ны өдрийн хурал Хаан банк/Энхтайвны гүүрний зүүн урд/-ны хурлын зааланд зохион байгуулагдах юм.