Month: March 2018

Гадаад харилцааны яамны Консулын газар АНУ-ын H2 визийн хөтөлбөрт хамрагдах хүсэлтэй иргэдэд зориулан тус хөтөлбөрийн дагуу гадаадаас ажилчин авах зөвшөөрөлтэй АНУ-ын ажил олгогч, зуучлагч байгууллагын тухай мэдээлэл болон ажиллах хүч авах үйл явцын талаар дэлгэрэнгүй танилцуулгыг бэлтгэн албан ёсны http://consul.mn/hvisa.php цахим хуудастаа гаргалаа.

Н2 ангиллын визийн хөтөлбөр нь Монгол ажилчин авах хүсэлтэй АНУ-ын ажил олгогч компани байх тохиолдолд эрх бүхий компаниар дамжуулан бүртгүүлсэн иргэдийг хүлээн авч ажиллуулдаг зохицуулалттай тул монголын эрх бүхий компаниуд америкийн албан ёсны бүртгэлтэй зуучлагч компаниудтай гэрээ байгуулсны дараа иргэдийг хэрхэн бүртгэх, сонгон шалгаруулах асуудал шийдвэрлэгдэх юм.

Одоогоор АНУ-ын ажил олгогч, зуучлагчтай гэрээ хийсэн Монгол компани байхгүй байгаа бөгөөд төрийн аль нэг байгууллага эсвэл Улаанбаатар дахь АНУ-ын ЭСЯ ямар нэг бүртгэл хийхгүй юм. Америкийн ажил олгогчтой гэрээ байгуулж, эрх авсан компаниуд тодорсон тохиолдолд олон нийтийн хэвлэл мэдээллийн хэрэгслээр дамжуулан иргэдэд мэдээлэл өгөх болно.

Олон нийтэд анхааруулахад “АНУ-д ажиллах иргэдийг бүртгэж байна, визэнд зуучилна, зөвлөгөө өгнө” гэх зэргээр залилангийн гэмт хэргийн шинжтэй зарлал, мэдээлэл гарсаар байгаа тул та бүхнийг зөвхөн албан ёсны эх сурвалжаас мэдээлэл авахыг хүсье.

Япон Улсын Сендай хотноо 2015 онд зохион байгуулагдсан Гамшгийн эрсдэлийг бууруулах дэлхийн III бага хурлаас гамшгийн эрсдэлийг бууруулах чиглэлээр хэрэгжүүлэх дэлхийн хэмжээний 7 зорилт, үйл ажиллагааны 4 тэргүүлэх чиглэлийг тодорхойлж, “Гамшгийн эрсдэлийг бууруулах чиглэлээр 2015-2030 онд хэрэгжүүлэх Сендайн үйл ажиллагааны хүрээ” баримт бичгийг дэлхийн 187 орон санал нэгтэй баталсан билээ.

Тэгвэл ирэх долдугаар сард Улаанбаатар хотноо болох Гамшгийн эрсдлийг бууруулах Азийн сайд нарын бага хурлаар Сендайн үйл ажиллагааны хүрээ баримт бичгийн эхний гурван жилийн үйл ажиллагаа, Азийн бүсийн төлөвлөгөөний эхний хоёр жилийн хэрэгжилт, гамшгийн эрсдэлийг бууруулах чиглэлээр бүс нутгийн улс орнуудын хүлээсэн үүрэг, амлалт, Сендайн үйл ажиллагааг хэрэгжүүлэх чиглэлээр авч хэрэгжүүлж байгаа арга хэмжээний ахиц дэвшлийг үнэлж дүгнэн 2018-2020 онд Азийн бүс нутагт хэрэгжүүлэх арга хэмжээг тодотгон гамшгийн эрсдэлийг бууруулах “Улаанбаатарын тунхаглал”-ыг гаргах юм.

Үүнтэй холбогдуулан “Гамшгийн эрсдэлийг бууруулах Сендайн үйл ажиллагааны хүрээг Монгол Улсад хэрэгжүүлэх дунд хугацааны стратеги”-ийг боловсруулан Засгийн газрын 355 дугаар тогтоолоор баталсан.

Тэгвэл Монгол Улсын Шадар сайдын 2018 оны 03 дугаар сарын 13-ны өдрийн 23 дугаар тушаалаар “Гамшгийн эрсдэлийг бууруулах Сендайн үйл ажиллагааны хүрээг Монгол Улсад хэрэгжүүлэх дунд хугацааны стратеги”-ийг хэрэгжүүлэх арга хэмжээний төлөвлөгөөг баталж, хэрэгжүүлж ажиллахыг аймаг, нийслэлийн Засаг дарга, хариуцагч болон хамтран хэрэгжүүлэгч байгууллагуудад даалгалаа.

Нийслэлийн Засаг даргын Зөвлөлийн ээлжит хуралдаан өнөөдөр боллоо. Хуралдаанаар Нийслэлийн худалдаа, үйлчилгээний нийтлэг журам батлах тухай, УИХ-ын 2018 оны “Агаарын бохирдлыг бууруулахтай холбогдуулан авах арга хэмжээний тухай” 02 дугаар тогтоол, Засгийн газрын 2018 оны “Агаарын бохирдлыг бууруулах талаар авах зарим арга хэмжээний тухай” 43-р тогтоолыг хэрэгжүүлэх талаар нутгийн захиргааны байгууллагуудаас зохион байгуулж буй ажлын явцын тухай, Нийслэлийн өмчит үйлдвэрийн газруудын зорилтот түвшинг тогтоох тухай, Нийслэлийн “Шилдэг хороо-2018” шалгаруулах болзолт уралдааныг зохион байгуулах тухай, Нийслэлийн хэмжээнд “Авлигатай тэмцэх үндэсний хөтөлбөр”-ийг хэрэгжүүлэх 2018 оны үйл ажиллагааны төлөвлөгөө зэрэг асуудлыг хэлэлцлээ.

Нийслэлийн худалдаа, үйлчилгээний нийтлэг журам батлах тухай асуудлыг зөвлөлийн гишүүд хэлэлцэн дэмжиж НИТХ-ын Тэргүүлэгчдийн хуралдаанаар хэлэлцүүлэхээр шийдвэрлэв. Журмын зорилго нь худалдаа үйлчилгээний төрөл, ангилал, худалдаа, үйлчилгээ эрхлэхэд тавигдах шаардлага, хориглох зүйл, худалдаа, үйлчилгээ эрхлэгчдийн эрх, үүрэг болон зохицуулах зөвлөл, Улаанбаатар хотын ерөнхий менежер, Захирагчийн ажлын албаны чиг үүрэг хариуцлагыг тодорхойлж, худалдаа, үйлчилгээ эрхлэгчийг бүртгэлжүүлж хамтран ажиллах гэрээ байгуулах, түргэн үйлчилгээний цэгийг ажиллуулах, хяналт тавих харилцааг зохицуулахад оршиж байна. Энэхүү журмыг шинэчлэн боловсруулснаар мэдээллийн нэгдсэн санг дүүрэг тус бүрээр бүрдүүлж иргэдэд нээлттэй болгож, олон нийтийн сэтгэлд нийцсэн, чанартай, стандарт үйлчилгээг богино хугацаанд, төвөггүй, зөв сонгох боломж бүрдэх, нийслэлийн худалдаа үйлчилгээний чанарыг олон улсын жишгийн дагуу сайжруулах, үйлчилгээний салбарт доголдож буй дутагдал, зөрчлийг арилгах, мэргэжлийн байгууллагуудын ажлын уялдаа холбоог сайжруулах, аж ахуйн нэгж, байгууллага, иргэдийн үүрэг хариуцлагыг тодорхой болгох зэрэг ач холбогдолтой юм.

Нийслэлийн худалдаа, үйлчилгээний нийтлэг журмыг НИТХ-ын Тэргүүлэгчдийн 2014 оны 7 дугаар тогтоолоор батлан мөрдөж ирсэн. Гэтэл энэ журам нь 2016 онд Захиргааны ерөнхий хууль мөрдөгдөж эхэлсэнтэй холбоотойгоор Хууль зүй, дотоод хэргийн яаманд бүртгэгдээгүйгээс эрх зүйн чадамжгүй болжээ гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Говь-Алтай аймагт нэгэн аймшигт хэрэг гарсан талаарх мэдээлэл ирлээ. Тодруулбал Тонхил сумын төвөөсөө 100 км-ийн зайд хаднаас боомилж нас барсан хоёр хүн байна гэх дуудлага гуравдугаар сарын 8-ны өдөр тус аймгийн цагдаагийн газарт иржээ. Дуудлагын дагуу цагдаагийн алба хаагчид хэргийн газар очиход эрэгтэй эмэгтэй хоёр хүн байсан ба халааснаас нь гэрээслэл олдсон байна.

Уг гэрээслэлд гэр бүлийн хүмүүс гэдгээ бичээд сум алдсанаас болж гурван настай хүүгийнхээ аминд хүрсэн талаар бичжээ. Улмаар амьдрал утгагүй санагдсан, хүүгээ хаана оршуулсан талаараа бичсэн байсан гэх мэдээлэл байна. Цагдаагийн байгууллагаас эл хэргийн талаар тодруулахад “Тийм хэрэг гарсан нь үнэн. Одоо хэргийг тус аймгийн цагдаагийн газраас үргэлжлүүлэн шалгаж байгаа учраас мэдээлэл өгөх боломжгүй” гэлээ.

Нийслэлийн Хүнс хөдөө аж ахуйн газар Монголын хүнсчдийн холбоотой хамтран “Бялуу чимэглэх ур чадварын уралдаан”-ыг Технологийн дээд сургуульд өнөөдөр зохион байгуулж байна. Уралдааны нээлтэд Нийслэлийн ХХААГ-ын дарга Д.Баянбат, Монголын хүнсчдийн холбооны гүйцэтгэх захирал М.Говьсайхан Технологийн дээд сургуулийн ерөнхий захирал Б.Бат-Эрдэнэ болон бусад албаныхан оролцлоо.

Монголын хүнсчдийн холбооны гүйцэтгэх захирал М.Говьсайхан “Хүнсний аж үйлдвэрийн ажилтан, ажилчдын өдрийг угтаж Нийслэлийн Хүнс хөдөө аж ахуйн газар, Монголын хүнсчдийн холбооны дэргэдэх мэргэжлийн салбар зөвлөл хамтран ур чадварын тэмцээнийг жил бүр зохион байгуулдаг. Энэ жилийн хувьд гурил гурилан бүтээгдэхүүн, бялуу үйлдвэрлэлийн салбар зөвлөл Технологийн дээд сургууль хамтран энэхүү арга хэмжээг зохион байгуулж байна. Манай холбооны дэргэд салбар тус бүрт мэргэжлийн зөвлөл ажилладаг. Гурил гурилан бүтээгдэхүүн, бялуу үйлдвэрлэлийн салбарт 28 аж ахуйн нэгж хамааралтай байдгаас өнөөдрийн тэмцээнд 5 аж ахуйн нэгж мэргэжлийн ур чадварын тэмцээнд оролцож байна” гэлээ.

Технологийн дээд сургуулийн ерөнхий захирал Б.Бат-Эрдэнэ “Манай сургууль 1965 оноос хойш үйл ажиллагаагаа явуулж байгаа. Өнөөдрийн байдлаар талх нарийн боов, чимэглэлийн урлагтай холбоотой 10 орчим мянган оюутан сурагч бэлтгэн гаргажээ. Манай сургуулийн хувьд мэргэжлийн ажилтнаас магистрын түвшинд хүртэл сургалт явуулдаг. Цаашид энэ тэмцээн нь манай сургуулийн нэрэмжит болон жил бүр зохион байгуулагдах болно. Тиймээс оролцогчдын ур чадварыг дээшлүүлэх талд анхаарч дэмжлэг үзүүлж байх болно” гэв.

Энэхүү тэмцээний зорилго оролцогч аж ахуйн нэгж байгууллагуудын хооронд туршлага солилцуулах, сайн туршлагыг түгээн дэлгэрүүлэх, аж ахуйн нэгжүүдийн үйл ажиллагааг бусдад сурталчлан таниулах, хэрэглэгчдэд оролцогч үйлдвэр аж ахуйн нэгжүүдийн мэргэжлийн ур чадварыг таниулан сурталчлахад оршино гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.