Month: February 2018

Нийслэл, дүүргийн Газрын албаны нэрийг барин иргэдээс мөнгө авсан тохиолдол гарсан байна. Өнгөрсөн сарын 30-ны өдөр иргэн Б рүү “Би газрын албанаас ярьж байна. Намайг Баянбат гэдэг. Танд зуслангийн газар олгохоор болсон тул та А.Батсүхийн Хаан банкны дансанд мөнгөө тушаана уу” гэсэн байна. Үүний дагуу иргэн Б нь тэр даруй мөнгийг тушаажээ. Энэ мэтээр газрын албаны нэрийг барин мөнгө авч иргэдийг залилах тохиолдол гарч байгаа тул иргэн, аж ахуйн нэгж байгууллагуудад анхаарал болгоомжтой байхыг сэрэмжлүүлж байна.

Газрын алба нь Газрын тухай хуулийн дагуу иргэн, аж ахуйн нэгж байгууллагуудад төрийн үйлчилгээг үнэ төлбөргүй үзүүлдэг, ялангуяа иргэний нэр дээрх дансанд мөнгө хурааж авдаггүй болохыг мэдэгдэж байна гэж нийслэлийн Газрын албанаас мэдээлээ.

Монголын сэтгүүлчдийн нэгдсэн эвлэл /МСНЭ/-ийн XVII Их хурал Нийслэлийн иргэний танхимд өнөөдөр эхэллээ.

1951 оноос үйл ажиллагаагаа эхэлсэн МСНЭ өнөөдөр XVII Их хурлаа хийж, Монголын хэвлэл мэдээллийн байгууллагуудын төлөөлөл болсон 305 сэтгүүлч оролцохоор мандат аваад байгаа юм. Энэ удаагийн их хурлаар МСНЭ-ийн дүрмийг шинэчилж, ерөнхийлөгч болон удирдах бүрэлдэхүүнийг шинээр сонгон томилно.

Хурлыг МСНЭ-ийн ерөнхийлөгч Б.Галаарид нээж, Мандатын комиссоос МСНЭ-ийн Гүйцэтгэх захирал С.Алтанцэцэг мэдээлэл хийв. Тэрбээр, МСНЭ-ийн Их хурлын зохион байгуулах ажлын хэсгийг ерөнхийлөгч Б.Галаарид удирдан зохион байгуулсныг хэлээд, төлөөлөгчдийг Телевиз, радио, Сургалт судалгаа, Цахим мэдээллийн сайт зэрэг мэргэжлийн төвүүдээс ирүүлсэн саналын дагуу 305 төлөөлөгчид мандат олгосон гэлээ. Хурлын төлөөлөгччдийн хамгийн өндөр настай нь 87 настай Х.Цэвлээ, хамгийн залуу нь 23 настай н.Мөнхбаяр оролцож байгаа бөгөөд ахмад, залуу үе, хүйсийн харьцааг тэнцвэртэй хангасныг мөн онцолж байв. Нийт 400 гаруй хэвлэл мэдээллийн байгууллагаас нийслэл болон хөдөө орон нутгийн хэвлэл мэдээллийн бүхий л салбарын төлөөлөл хамрагдсан байна.

Мандатын комиссын мэдээллийн дараа Их хурлын таван тэргүүлэгчийг санал хураалган сонгов. Хурлын даргаар эрдэмтэн судлаачдын багийн төлөөлөл Боловсролын их сургуулийн доктор Ж.Батбаатар, тэргүүлэгч гишүүдээр ахмадын төлөөлөл Ү.Хүрэлбаатар, залуучуудын төлөөлөл, сайтын холбооны дэд Ерөнхийлөгч Ц.Мөнхбаатар, орон нутгийн төлөөлөл, Өмнөговь аймгийн салбар зөвлөлийн дарга Ч.Номин, телевизийн төлөөлөл, МҮОНТВ-ийн дарга асан Ц.Оюундарь нар сонгогдлоо. Улмаар тооллогын комиссыг 5 хүний бүрэлдэхүүнтэй баталж, хурлын дэгээ тогтов.

МСНЭ-ийн ерөнхийлөгчид “Зиндаа” сэтгүүлийн эрхлэгч, сэтгүүлч Х.Мандахбаяр, niislel.mn сайтын эрхлэгч, сэтгүүлч Б.Түвшинтөгс, МҮОНРТВ-ийн захирал асан, сэтгүүлч М.Наранбаатар нар өрсөлдөхөө одоогоор зарлаад байгаа юм.

Өнөөдөр МСНЭ-ийн XVII их хурал болно. Их хуралд нийт 305 төлөөлөгч оролцоно. Уг хурлаар МСНЭ шинэ ерөнхийлөгчөө сонгох, дүрмэндээ зарим нэг шинэчлэл оруулах магадлалтай юм. Монголын сэтгүүлчдийн байгууллагын шинэ ерөнхийлөгчөөр хэн тодрох бол гэсэн асуулт нэлээд нийгэмд ихээхэн сонирхол татаж байгаа бөгөөд олон нийтийн сүлжээгээр янз бүрийн санал асуулгууд ч явагдаж байна. МСНЭ-ийн ерөнхийлөгчид “Bloomberg TV” захирал, Өдөр тутмын сонины холбооны Ерөнхийлөгч Б.Долгион, “Зиндаа”-гийн гэгдэх Х.Мандахбаяр, МҮОНТВ-ийн захирал асан М.Наранбаатар, Нийслэл.мн сайтын эрхлэгч, сэтгүүлч Б.Түвшинтөгс нар өрсөлдөх бололтой.

Бүгд Найрамдах Турк Улсын Истанбул хотод жил бүр зохион байгуулагддаг EMMIT (East Mediterranean International Tourism Expo) буюу Газрын дундад тэнгисийн зүүн эргийн орнуудын олон улсын аялал жуулчлалын үзэсгэлэн 2018 оны өнгөрсөн сарын 25-28-ны өдрүүдэд 22 дахь жилдээ зохион байгуулагдлаа.

Тус үзэсгэлэнд нийслэлийн Аялал жуулчлалын газар, Монгол Улсаас БНТУ-ын Истанбул хотод суугаа Ерөнхий консулын газар, Монголын аялал жуулчлалын холбоо, “А Стар Монголия ХХК”, “Аян Трэйвэл ХХК”, “Баттур ХХК”, “ДМД Монголия ХХК” Ялгуун брэнд болон Улаанбаатар чуулгын уран бүтээлчид хамтран эх орноо сурталчлан амжилттай оролцов.

Тус бүс нутгийн жуулчдыг татах, Монгол Улс болон нийслэл Улаанбаатар хотын аялал жуулчлалын бүтээгдэхүүн үйлчилгээг сурталчлан шинэ зах зээл нээх зорилгоор Улаанбаатар хотыг олон улсын аялал жуулчлалын байгууллагуудад сурталчлан, гадаадын тур операторууд болон жуулчдыг мэдээллээр ханган ажиллаа.

Газрын дундад тэнгисийн зүүн эргийн орнуудын жуулчдад аялал жуулчлалын бүтээгдэхүүн үйлчилгээгээ сурталчлах боломжийг олгодог тус үзэсгэлэнг энэ жил 54364 хүн үзэж сонирхсон бол 85 орны 1065 аялал жуулчлалын үйл ажиллагаа эрхэлдэг төлөөллүүд талбай авч оролцон 106 орны 600 орчим аяллын бөөний худалдаа эрхэлдэг агентлагууд оролцож 7000 бизнес уулзалтууд болж өнгөрлөө.

Үүнээс гадна нийслэлийн Аялал жуулчлалын газар, Монгол Улсаас БНТУ-ын Истанбул хотод суугаа Ерөнхий консулын газар, Монголын аялал жуулчлалын холбооны төлөөлөл Истанбул хотын аялал жуулчлалын газрын дарга Сердал Акюүрт, тус газрын гадаад харилцаа хариуцсан мэргэжилтэн Дидем Огүр нартай уулзаж цаашдын хамтын ажиллагааны талаар ярилцаж хамтран ажиллахаар болов.

Уулзалтаар хоёр хотын аялал жуулчлалын бүтээгдэхүүнийг хамтран борлуулах маркетингийн төлөвлөгөө гарган ажиллах, Газрын дундад тэнгисийн орнууд болон Турк улсаас дамжин ирэх Европын жуулчдыг Монгол Улс руу татах, Монгол Улсаас дамжин ирэх Зүүн өмнөд Азийн жуулчдыг Турк Улс руу татан харилцан ашигтай ажиллах, Истанбул хотод Монгол Улсын аялал жуулчлалыг сурталчлах гэрэл зургийн үзэсгэлэнг гаргах, хоёр хотын хэвлэл мэдээллийг баг, блог нийтлэгч, аялал жуулчлалын компаниудын төлөөллийг харилцан аялуулах ФАМ Турыг зохион байгуулахаар тохиролцов.

Дэлхийн томоохон аялал жуулчлалын үзэсгэлэнд оролцох нь олон улсын аялал жуулчлалын зах зээлд Монгол улсын эзлэх байр суурийг баталгаажуулах, сурталчлан таниулах, өрсөлдөх чадварыг сайжруулах, улмаар жуулчдын тоог нэмэгдүүлэх өндөр ач холбогдолтой ажээ гэж нийслэлийн Аялал жуулчлалын газраас мэдээлэв.