Энэ сарын 8, 9-нд ихэнх нутгаар цас орж, хүчтэй цасан шуурга шуурч, хүйтний эрч чангарахыг Цаг, уур орчны шинжилгээний газраас анхааруулсан байна. Одоогийн байдлаар Улаанбаатараас Дархан, Сэлэнгэ чиглэлийн автозамын хөдөлгөөнийг түр хугацаагаар хаасан байгаа бөгөөд Өвөрхангай, Дундговь чиглэлийн авто замуудад цас ихээр шуурч үзэгдэх, харагдах байдал хязгаарлагдсан, хальтиргаа, гулгаа ихээр үүссэн байна.
Иймд онцын шаардлагагүй тохиолдолд орон нутгийн замд хөдөлгөөнд оролцохгүй байх, тээврийн хэрэгслийн бүрэн бүтэн байдлыг хангах, өвлийн дугуй, шатах, тослох материалыг бэлтгэж хөдөлгөөнд оролцохыг Замын цагдаагийн албанаас анхаарууллаа.
Монгол Улсын төрийн шагналт яруу найрагч, төр, нийгмийн зүтгэлтэн Очирбатын Дашбалбарын уран бүтээл, үзэл санаа, туурвил зүйн онцлог, сэтгэлгээний талаар өгүүлэх зохиолч П.Батхуягийн туурвисан “Очирбатын Дашбалбар” номын нээлт ирэх бямба гаригт болно. Тодруулбал яруу найрагчийн төрсөн өдөр буюу 2018 оны хоёрдугаар сарын 10-ны өдрийн 13:00 цагт Д.Нацагдоржийн нэрэмжит Улаанбаатар хотын номын санд болно.
МАХН-ын нарийн бичгийн дарга Г.Бямбасүрэн хэлэхдээ “МАХН-ын их чуулган маргаашаас хийнэ гэсэн яриа байна. Энэ чуулган О.Баасанхүү гишүүний эсрэг цуглаан. Намын их чуулган гэдэг бол албан ёсны бүтцээс сонгогдсон төлөөлөгч бүрэн эрхээ эдлэн их хурлаа хийдэг дүрэмтэй. Гэтэл энэ хурал мөнгө тараан цуглуулсан хүмүүсийн цуглаан болох гэж байна. Түүнчлэн жирийн гишүүд өөрсдийнхөө итгэл үнэмшил, өөрсдийн саналаар хийсэн их чуулганы шийдвэрийг хүлээн зөвшөөрөхгүй. Өөрсдөө МАХН гэсэн нэрийг ашиглахын төлөөх үйлдлийг удаа дараа хийж байна. Ялангуяа их чуулганы үе болон 19-нд болсон шүүх хурлаас хойш намын гишүүдийг удаа дараа дарамтлан зодсон. Маргаашийн хурлаар О.Баасанхүү гишүүнийг доромжилсон хүнд таван сая, мөн өлсгөлөн, суулт зарласан хүнд арван сая төгрөг өгнө гэж манай гишүүдийг дарамталсан. Хуралдаа олон хүн оролцуулахын тулд гадуур явж байгаа хүмүүст хоёр мянган төгрөг өгч, гишүүний анкет бөглүүлсэн. Энэ дотор хөдөө орон нутагт амралтаараа очсон оюутнуудын зардлыг даан, хуралд оролцуулахаар авчирсан гэх мэт хууль бус үйлдлүүд байгаа. Дээд шүүх хурлынхаа шийдвэрийг бидэнд өгөхгүй байна. Энэ шийдвэрийг авчихвал бид дараагийн байгууллагуудад хандана” гэв.
МАХН-ын бага хурлын гишүүн Ч.Мөнхбаяр ярихдаа “Маргааш болох МАХН-ын хоёрдугаар их хурал бол хууль бус үйл ажиллагаа. Дээд шүүхийнхэн энэ асуудалд бодитой хандахыг бид хүсэж байна. Н.Энхбаяртай хамаатай хүмүүс биднийг урвасан гэж яриад байгаа. Бид юунаас ч урваагүй. Харин Н.Энхбаяр гэдэг хүн бүхнээс урвасан.Энэ хүн намын идэвхтэй гишүүдийг зодох хууль бус ажиллагаанд шилжиж байна. Би өөрөө учир битүүлэг халдлагад өртсөн” гэсэн юм.
Онцгой байдлын ерөнхий газрын БЗХАГ-ын дарга, дэд хурандаа Л.Өлзийбаяр, ГЭУГ-ын дарга, дэд хурандаа Д.Баасансүрэн нар Азийн хөгжлийн банкны Зүүн Азийн газрын мэргэжилтэн хатагтай Шабано Тирмизи, Азийн хөгжлийн банкны Монгол дахь суурин төлөөлөгчийн газрын Хүрээлэн буй орчин хариуцсан ахлах мэргэжилтэн хатагтай П.Онгонсар нарыг хүлээн авч уулзлаа.
Тайванийн Хуалиен хотын хойд хэсэгтэнэ сарын 6-ны өдөр газар хөдлөлт болсонтой холбогдуулан Тайпэй дахь Худалдаа, эдийн засгийн төлөөлөгчийн газарт ажлын хэсэг байгуулан 24 цагаар ажиллуулж, шуурхай дуудлагын +886-2-27229740 дугаарыг олон нийтэд зарлаж ажиллав гэж Гадаад харилцааны яамны Консулын газраас мэдээллээ.
Нэмэгдсэн өртгийн албан татварын тухай хуулийн дагуу 2017 оны албан татварын буцаан олголтын урамшууллаар 654 168 татвар төлөгч иргэнд 78.1 тэрбум төгрөг олгох учиртай. Энэ сарын 7-ны өдрийн байдлаар 621 595 татвар төлөгч иргэнд 77.1 тэрбум төгрөгийг олгосон байна. 
Өнөөдөр Монголын жүдочид Франц улсыг зорилоо. Нийт 15 тамирчны бүрэлдэхүүнтэйгээр Парисын Их Дуулгад өрсөлдөхөөр ийнхүү явж байгаа юм. Жүдо бөхийн календарчилсан төлөвлөгөөний дагуу явагддаг томоохон тэмцээнүүдийн тэргүүн эгнээнд Парисын их дуулга багтдаг. Тэгвэл уг тэмцээнд эх орноо төлөөлж эрэгтэй эмэгтэй нийлсэн 11 жинд манай жүдочид өрсөлдөх юм. Ингээд уг тэмцээнд оролцохоор мэдүүлгээ өгөөд буй манай улсын тамирчдыг танилцуулж байна.