Аргын тооллын хоёрдугаар сарын 10, Санчир гариг. Билгийн тооллын 25, Эрхтэгний тэнгэр одтой, харагчин тахиа өдөр. Өдрийн наран 7:55 цагт мандан, 18:09 цагт жаргана. Тухайн өдөр үхэр, могой жилтнээ аливаа үйлийг хийхэд эерэг сайн ба гахай, хулгана жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр буян номын үйлд шамдах, бүтээл туурвил эхлэх, худалдаа арилжаа хийх, бизнэс эхлэх, зэрэг дэвших, хагалгаа хийлгэх, буг дарах, газрын ам бооход сайн. Мод суулгах, нарийн чанд зөвлөгөөн хийх, байшингийн суурь тавих, угаал үйлдэхэд муу. Өдрийн сайн цаг нь хулгана, бар, туулай, морь, хонь, тахиа болой. Хол газар яваар одогсод баруун зүгт мөрөө гаргавал зохистой.
Үс шинээр үргээлгэх буюу засуулбал тохиромжгүй.
Монгол Улсын Их Хурлын дарга М.Энхболдод УИХ-ын гишүүн Д.Хаянхярваа Монгол Улсын Их Хурлын чуулганы хуралдааны дэгийн тухай хуульд нэмэлт, өөрчлөлт оруулах тухай хуулийн төслийг өргөн мэдүүллээ.
“Пёнчан 2018” өвлийн 23 дугаар олимпийн наадмын нээлтийн үйл ажиллагаа БНСУ-ын Пёнчан хотын “Ганнам Айс арена”-д эхэллээ. Энэ удаагийн олимпийн наадамд таван тивийн 92 орны 2925 тамирчин спортын 15 төрлөөр 306 багц медалийн төлөө хурд хүч, авхаалж самбаа, тэсвэр тэвчээрээрээ өрсөлдөх юм.
УИХ-ын намрын чуулган өнөөдөр хаалтаа хийлээ. Чуулганы хаалтад зориулан УИХ-ын дарга М.Энхболд хэлсэн үгэндээ “Энэ намрын чуулганы анхаарлаа хандуулсан нэг чухал асуудал нь агаарын бохирдол байлаа. Үүний дагуу УИХ тодорхой шийдвэрүүдийг гаргасан. Цаашид шийдвэр гаргах бүх төвшинд идэвх санаачилгатай ажиллах шаардлагатай. Намрын чуулганаар хэлэлцэн баталсан бас нэг чухал хуулийн нэг нь Төрийн албаны тухай хуулийн шинэчилсэн найруулгын төсөл байлаа. Энэ дотроо олон шинчлэлийг багтаасан. Шинэчлэн баталсан Төрийн албаны тухай хэрэгжиж эхэлснээр 2019 оноос төрийн албан хаагчид чадхуйн зарчмаар дэвшин ажилладаг болно. Тухайлбал, яамны төрийн нарийн бичгийн дарга 16-аас доошгүй зүйл төрийн албанд ажилласан, ингэхдээ яамны газрын даргаар наймаас доошгүй жил ажилласан байхыг шаардаж байгаа.
Цасан шуурга ихэнх нутгаар шуурч, цаг агаарын хүндрэлтэй нөхцөл байдлын улмаас зарим олон улсын нислэг тодорхой цагаар хойшлогджээ. Тухайлбал, МИАТ-ийн Сөүлээс Улаанбаатар чиглэлийн OM302 нислэг өнөөдөр 13:15 цагаас хөөрөх байсан ч 15:00 хүртэл хойшлогдсон байна. Мөн орон нутгийн Ханбумбатаас Улаанбаатарт ирэх OM7072 нислэгийн хөөрөх цаг 15:10 байсан ч 23:25 цаг хүртэл өөрчлөгдсөн байна. Харин Улаанбаатараас Сөүл хүрэх өнөө өглөөний нислэг хугацаандаа буусан аж.
Бөхийн чөлөөт барилдааны “А” зэрэглэлийн “Тахтийн цом” олон улсын тэмцээн энэ өдрүүдэд үргэлжилж байна. Тэмцээний эхний өдөр эрэгтэйчүүдийн 57 кг-д зодоглосон гавьяат тамирчин Э.Бэхбаяр амжилттай барилдаж шигшээд шалгарлаа. 
Испаний хөлбөмбөгийн “Копа дел Рэе” цомын тэмцээний их шөвгийн тоглолтууд явагдаж өндөрлөлөө. Энэ өдөр Каталоны Барселона талбайдаа Валенсиаг хүлээн авч 2:0-ээр ялж шигшээд шалгарав. Тоглолтын нэгдүгээр үед багууд харилцан довтолсон нээлттэй тоглолт үзүүлж байсан ч 0:0-ээр өндөрлөсөн. Харин шийдвэрлэх хоёрдугаар үеийн эхэнд Барселонагийн шинэ цэрэг Флиппе Коутино Луйс Суарезийн дамжуулалтаар гоолдож багтаа тэргүүлэл авчирсан байна. Гоол оруулсан Барселона нягт хамгаалсан тоглолт үзүүлж байв. Харин тоглолтын 82 дахь минутанд Хорват хагас хамгаалагч Иван Ракитич гоол оруулж багийнхаа тэргүүллийг баталгаажуулжээ. Ийнхүү Каталоны баг “Копа дел Рэе”-ын цомын төлөө Севиллиатай тоглохоор болж байгаа юм.