Month: January 2018

НИТХ-ын Тэргүүлэгчдийн хурлын тогтоолоор “Газрын Харилцаа” Олон нийтийн нээлттэй хэлэлцүүлэг зохион байгууллаа. Өнгөрсөн сарын хугацаанд НИТХ-ын ажлын алба, Нийслэлийн үйлчилгээний нэгдсэн төвүүдэд иргэд аж ахуйн нэгжээс ирүүлсэн 530 орчим өргөдөл, гомдлын 70 хувь нь газрын албаны удирдлага, зохион байгуулалт, ажилтнуудын ёс зүй, хүнд сурталд гомдолтой байгаагаа илэрхийлжээ. Эдгээр өргөдлүүдийг судлаж үзэхэд иргэдэд газрын харилцаатай холбоотой төрийн үйлчилгээ авахад маш хүндрэлтэй байдаг гэдгээ илэрхийлжээ. Иргэдийн хүсэлтийг шийдвэрлэхгүйгээр олон жилээр чирэгдүүлэх, газар эзэмших эрхийг хууль зөрчин бусдад шилжүүлэх, давхардуулах, хуулиар хүлээсэн үүрэг, шүүхийн шийдвэрийг шийдвэрлэхгүйгээр шүүхийн шийдвэрийг хэрэгжүүлэхгүй байх зэрэг ноцтой зөрчил, дутагдлууд олон байгаа талаар иргэд дурдлаа. Хэлэлцүүлгийг иргэдийн оролцоонд тулгуурлан олон нийтэд нээлттэй зохион байгууллаа. Шийдвэр гаргагчид болон иргэд газар зохион байгуулалтын асуудлаар анх удаа нүүр тулсан томоохон уулзалт өрнүүлж байгаа нь энэ юм.

Нээлттэй хэлэлцүүлгийн төгсгөлд иргэдийн саналыг тусгасан зөвлөмж гаргалаа. Газрын харилцаатай холбоотой хууль, эрх зүйн актын хэрэгжилтийг хангуулах, хяналтаа сайжруулж НИТХ-ын Өргөдөл, гомдлын хороонд байгуулж, энд ирсэн зарим өргөдөл, гомдлыг шилжүүлэн, холбогдох арга хэмжээг шат дараалан авахаар тусгасан байна. Мөн Нийслэл, дүүргийн газрын албанд Газрын харилцаатай холбоотой хууль, эрх зүйн актын товч мэдээллийн санг нэгтгэн гаргаж олон нийтэд хүргэх. Газрын албаны үйл ажиллагааны уялдаа холбоог сайжруулах, иргэдэд нээлттэй ил тод болгох, Албан хаагчдын мэргэшлийн ур чадварыг дээшлүүлэх, хүнд суртлыг арилгах, ёс зүй, сахилга хариуцлагыг дээшлүүлэх чиглэлээр тодорхой арга хэмжээ авах, албан хаагчид хариуцлага тооцох тогтолцоо бий болгох, Иргэд, аж ахуйн нэгжийн хүсэлтийг хуулинд заасан хугацаанд түргэн шуурхай шийдвэрлэхэд анхаарч ажиллах, Шүүхийн шийдвэрийг биелүүлэх, хүндрэлтэй асуудлаар саналаа холбогдох байгууллагад гаргаж шийдвэрлүүлэхээр үүрэг болголоо.

НЗДТГ, Улаанбаатар хотын худалдааны танхимтай хамтран “Улаанбаатар хөрөнгө оруулалт 2018” бизнес уулзалтыг дөрөв дэх жилдээ энэ сарын 29-ний өдөр зохион байгуулах гэж байна.

“Улаанбаатар хөрөнгө оруулалт-2015” нэрийн дор хотын удирдлагууд бизнесийн төлөөлөл, гадаадын хөрөнгө оруулалттай компаниуд хамтран анхны форумыг зохион байгуулж байсан. Анхны форумаар хотын захиргаа бизнесийнхнийг дэмжин ажиллахад харилцан тохиролцож санамж бичигт гарын үсэг зуран тунхагласан юм. Улаанбаатар хотын худалдааны танхимын санаачлагаар зохион байгуулагддаг энэхүү форум нийслэл болон хувийн хэвшил тэдний асуудал бэрхшээл, шийдэх арга замаа дүгнэн хэлэлцдэг томоохон чуулга уулзалт болон өргөжин 4 дэхь жилдээ зохион байгуулагдах гэж байна. Жилээс жилд чуулга уулзалтын агуулга, ач холбогдол өргөжин оролцогч зочид төлөөлөгчдийн тоо өссөөр байна. Онцлох ач холбогдол бол хувийн хэвшилд хаалттай байсан худалдан авалт, төсөл хөтөлбөр, тендерүүд нээлттэй болж үүнийгээ чуулга уулзалтаар зарлаж эргээд нийслэлд хэрэгжүүлж болох бүтээн байгуулалтын хөтөлбөрүүдийг хувийн хэвшлийнхэн хотод танилцуулдаг болсон явдал юм.

2015 онд 800, 2016 онд 1000 гаруй, 2017 онд мөн мянга гаруй бизнес, аж ахуй нэгжийн төлөөлөл “Улаанбаатар хөрөнгө оруулалт” бизнес чуулга уулзалтанд оролцож ирлээ.

Өнгөрсөн жил Нийслэлийн Засаг дарга бөгөөд Улаанбаатар хотын Захирагч С.Батболд уг ажлыг үргэлжлүүлэн дэмжиж УБХТ-ын гишүүд болон бизнес эрхлэгчидтэй санал солилцон “Улаанбаатар хөрөнгө оруулалт-2017” форумыг хамтран зохион байгуулсан. Улаанбаатар хотын хөгжлийн төслүүдэд хувийн хэвшлийнхэн хэрхэн оролцох боломжтой талаар хот хувийн хэвшлийнхэн харилцан санал солилцож нийслэлээс 2017 онд хэрэгжүүлэх хөрөнгө оруулалт бүтээн байгуулалтын ажлуудаа танилцуулан чуулсан билээ.

Энэхүү чуулга уулзалтаас хойш Улаанбаатар хотын худалдааны танхим, нийслэлийн Засаг даргын Тамгын газартай хамтран хэд хэдэн удаагийн уулзалтыг тодорхой сэдвийн хүрээнд зохион байгуулж, хамтын ажиллагааны шинэ төслийн талаар санал солилцсон. Нийслэлийн удирдлагын баг бодлого, зорилтоо танилцуулж, бизнесийнхэн шинэ төсөл хөтөлбөр, инновацийн тухай ч илтгэлүүд тавьсан өргөтгөсөн хуралдаан болсон байна.

Дээрхи тогтмтол уулзалт, яриа хэлэлцээрийн үр дүнд “Улаанбаатар хөрөнгө оруулалт 2018” бизнес уулзалтын өмнө НЗДТГ, Улаанбаатар хотын худалдааны танхим хамтарч “Ногоон сан” ТББ байгуулсан. Ногоон сан нь ашгийн бус, төр бизнесийн салбарынхан хамтран агаар, орчны бохирдлыг бууруулах ажлыг эрчимтэй хийх, шинэ технологи нэвтрүүлэх, хүлэмжийн хийг бууруулах, эцсийн хэрэглэгчид ногоон технологийг хүргэх зорилготой юм. “Ногоон сан” нь танхимын гишүүдийн хандив дэмжлэгтэйгээр санхүүжихээс гадна, гадаад дотоодын хөнгөлөлттэй зээл, хөрөнгө оруулалтад тулгуурлан үйл ажиллагаа явуулна.

“Улаанбаатар хөрөнгө оруулалт 2018” бизнес уулзалтын онцлог нь хувийн хэвшил, бизнесийнхэний хөрөнгө оруулалт, төсөл хөтөлбөрийг илүүтэй дэмжиж, Улаанбаатар хот хамтран ажиллаж, иргэдийнхээ амьдрах орчныг сайжруулахын төлөө бүтээн байгуулалт, хөрөнгө оруулалтыг чиглүүлэхэд оршиж байна. Нийслэлийн Засаг дарга бөгөөд Улаанбаатар хотын захирагч С.Батболд Улаанбаатар хотод хийж, хэрэгжүүлэхээр төлөвлөж байгаа ажлуудын мэдээлэл, танилцуулга өгч, Улаанбаатар худалдааны танхимын гишүүд төрөөс дэмжлэг авч, хамтран хэрэгжүүлж болохуйц томоохон төсөл хөтөлбөрүүдээ танилцуулна. Мөн нийслэлийн харьяа агентлагууд үзэсгэлэн гаргаж, худалдан авах ажиллагаа болон хөрөнгө оруулалт, бүтээн байгуулалт, нийгмийн салбар гээд бүхий л чиглэлээр бизнесийнхэн болон аж ахуй нэгжид мэдээлэл өгнө.

Уулзалтад УИХ, Засгийн газрын гишүүд, Нийслэлийн ИТХ-ын төлөөлөгчид, Нийслэлийн нутгийн захиргааны байгууллагын удирдлага, Улаанбаатар хотын худалдааны танхимын гишүүд, Олон Улсын байгууллагын төлөөлөгч, Монгол Улсад суугаа Онц бөгөөд Бүрэн эрхт Элчин сайд нар, хувийн хэвшлийнхэн, бизнес эрхлэгчид оролцоно.

Түүнчлэн “Улаанбаатар хөрөнгө оруулалт 2018” бизнес чуулга уулзалтын логог тэнгэрийн цэнхэр, агаарын цагаан, модны ногоон, асч бадамлахын улаан өнгийг оруулж хийсэн болно. Энэ өнгө нь иргэдийн ажиллаж, амьдрах, бизнесээ эрхлэхэд таатай орчныг бүрдүүлж, агаар, хөрсний бохирдолын асуудалд онцгойлон анхаарсан жил байна гэдгийг илтгэж байна. Мөн “Эко хот, эдийн засгийн төв” байх зорилтыг давхар агуулж, хөгжин дэвжихийг билэгджээ.

Улаанбаатар хэмээх бичиглэл нь нийслэлийн Засаг даргын зөвлөлөөс баталсан шинэ өнгө төрх бүхий эрч хүчтэй залуу хотыг харуулсан бичиглэлийг шингээсэн байна.

“Улаанбаатар хөрөнгө оруулалт 2018” бизнес уулзалт нь “Иргэдийн оролцоотой амьдрах орчныг сайжруулах жил”-ийн зорилтыг төр, хувийн хэвшил хамтдаа хэрэгжүүлэхэд чиглэгдэж байна гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Сайд Д.Сумъяабазарын Бүгд Найрамдах Казахстан Улсад хийсэн айлчлал 2018 оны 01 дүгээр сарын 20-21-ны өдрүүдэд үргэлжлэв.

Айлчлалын үеэр Казахстаны “Тау-Кен Алтын” алтны үйлдвэрийн үйл ажиллагаатай танилцаж, Казакстан улсад үнэт металл, үнэт чулууны тухай хууль гаргасан, алт мөнгө цэвэршүүлэх үйлдвэр байгуулж ажиллуулсны ач холбогдол, Монгол улсад алт мөнгө цэвэршүүлэх үйлдвэр барьж байгуулах, боловсон хүчин бэлтгэх, дадлагажуулах талаар тус компанийн захирал Мейрамгали Тлеужанов тэргүүтэй төлөөлөгчидтэй харилцан санал солилцов.

“Тау-Кен Алтын” үйлдвэр нь 2013 оны 3-р сард үйлдвэрийн барилгын суурь тавигдаж, тухайн оны 9-р сард барилга ажил дуусаж, техник тоног төхөөрөмжийн суурьлуулж, 9 сарын хугацаанд буюу 12-р сард анхныхаа бүтээгдэхүүнээ гаргаж, нийт 50 тонн мөнгө, 25 тн алт цэвэршүүлэх хүчин чадалтай төрийн өмчит үйлдвэр юм.

Сайдын айлчлал үргэлжилж байна.

Зам тээврийн хөгжлийн сайд Ж.Бат-Эрдэнэ өчигдөр Үндэсний аж үйлдвэрийн зөвлөлийн төлөөлөгчдийг хүлээн авч уулзлаа.

Уулзалтад Үндэсний аж үйлдвэрийн зөвлөлийн гүйцэтгэх захирал Д.Жаргалсайхан болон эх орондоо техникийн бүтээгдэхүүн үйлдвэрлэдэг хэд хэдэн компанийн удирдлагууд оролцож, бүтээгдэхүүн үйлчилгээгээ танилцуулж, үндэсний үйлдвэрлэлийг дэмжих, эх оронч худалдан авалтыг бий болгох тал дээр Зам, тээврийн хөгжлийн яамтай хамтран ажиллах хүсэлтэй байгаагаа илэрхийлж, дэмжин ажиллахыг хүслээ.

Тухайлбал, “Альфа Фильтер” ХХК нь автомашины хөдөлгүүр болон агаар шүүгч, агааржуулалт зэргийг эх орондоо үйлдвэрлэдэг бол Камминс Монголиа Инвестмент ХХК дизель газ, цахилгаан үүсгүүр үйлдвэрлэдэг, Экологи-бус ХХК нь долоон төрлийн 300 гаруй том жижиг оврын цахилгаан автобус, троллейбус, цахилгаан машин зэргийг үйлдвэрлэдэг. Монгол инженерүүдийн бүтээсэн техникийн бүтээгдэхүүнийг өргөжүүлэхэд хууль эрх зүйн дэмжлэг хэрэгтэй байгааг онцлон, зах зээлээ хамгаалахад улсаас дэмжлэг үзүүлэхийг тэд хүсч байлаа.

Төлөөлөгчдийн санал, хүсэлтийг сонссоны дараа Зам тээврийн хөгжлийн сайд Ж.Бат-Эрдэнэ “Та бүхэн автобус, техникийн шүүлтүүр, хөдөлгүүр зэрэг олон зүйлийг хийдэг болсон гэж ярьж байна. Би та нарыг бодит санал тавих болов уу гэж хүлээж байлаа. Тухайлбал, Манай компани хэдэн ширхэг автобус үйлдвэрлэе, эдгээр автобус нь ийм хэрэгцээг хангах зориулалттай, ийм чанартай шүүлтүүр үйлдвэрлэж байна, эрэлт хэрэгцээ нь ийм байгаа, төрөөс болон яамнаас ингэж дэмжлэг үзүүлээд, хууль эрх зүйн үндэслэлийг бүрдүүлээд өг гэсэн хүсэлт тавьбал би түүнийг чинь бариад зүтгэе.

Тэгэхээр дараагийн уулзалтад нэн тэргүүнд хийж чадах бодит зүйлээ, шийдвэрлүүлэх тодорхой асуудалтайгаа бариад ороод ир. Би үндэсний үйлдвэрлэл болон эх оронч худалдан авалтыг бүх талаар дэмжин ажиллана. Техник технологи гэлтгүй бүх салбарт бид үйлдвэрлэлээ дэмжиж ажлын байр бий болгох, худалдан авалтыг дэмжихэд анхаарах ёстой. Гагцхүү хийх ёстой зүйлс чинь бодитой тодорхой, хэрэгцээтэй байх ёстой. Тэгэж байж бид урагшилна” гэдгийг онцоллоо.

Мөн тэрээр уулзалтын төгсгөлд, бүх салбар нэн түрүүнд дотоодын үйлдвэрлэлээ дэмжсэн худалдан авалт хийдэг байх хууль эрх зүйг бий болгох нь чухал. Тиймээс эхлээд дотооддоо үйлдвэрлэсэн бүтээгдэхүүнийг худалдан авах, тухайн бүтээгдэхүүн шаардлага хангахгүй тохиолдолд алдаа дутагдлыг нь хэлээд засч сайжруулах, боломжгүй нөхцөлд импортын бүтээгдэхүүнийг сонгодог байх зарчимд шилжинэ гэдгийг онцоллоо.

Энэ үеэр “Экологи-бус” ХХК “Оюутолгой” компанийн санхүүжилтээр Өмнөговь аймгийн нийтийн тээвэрт ашиглах зориулалтаар 12 хүний суудалтай жижиг оврийн цахилгаан автобус үйлдвэрлэснээ авчирч танилцууллаа. Тус цахилгаан автобус дизель түлшээр ажилладаг автобуснаас 5 дахин бага зарлагатай гэдгийг үйлдвэрлэгчид онцолж байлаа.

“Цалинтай ээж хөтөлбөр”-т бүртгүүлсэн ээжүүдийн 50 000 төгрөгийг өнөөдрөөс бүртгүүлсэн данс руу нь шилжүүлж эхэлжээ. Тухайлбал Баянгол дүүргийн Төрийн банкаар дамжуулан авч буй ээжүүдийн мөнгө дансанд орсон байна.

2018 оны эхний улиралд багтаан НӨАТ-ын буцаан олголтын мөнгө данс руу орох учиртай. Гэвч одоогийн байдлаар 22 мянган иргэн буцаан олголтоо авч чадахгүй байдалд хүрээд байгаа аж. Тодруулбал, өнөөдрийн байдлаар НӨАТ-ийн ebarimt.mn цахим хаягт 655 мянга 245 иргэний мэдээлэл бүртгэлтэй байгаагаас 22 мянга 192 иргэний мэдээлэлд зөрчил илэрчээ. Иргэд овог, нэр, дансны дугаараа буруу эсвэл алдаатай бүртгүүлснээс энэхүү зөрчил үүссэн байна.

Бүртгэлийн мэдээллээ алдаатай эсвэл дутуу оруулсан 22 мянган иргэн НӨАТ-ын буцаан олголтод хамрагдах боломжгүй болжээ. Тиймээс дээрх иргэд 2018 оны 1 дүгээр сарын 22-ны өдрөөс өмнө ebarimt.mn цахим хаягт хандаж хувийн мэдээллээ болон дансны дугаараа засаж баталгаажуулахыг Татварын ерөнхий газраас зөвлөж байгаа аж. Учир нь 1 дүгээр сарын 22-нд Татварын ерөнхий газар НӨАТ-ын буцаан олголтод хамрагдах иргэдийн мэдээллийг Сангийн яаманд хүргүүлнэ. Харин Сангийн яам Монголбанкаар дамжуулан татварын урамшууллыг иргэдийн данс руу шилжүүлж эхлэх юм байна.